Read Khoekhoegowab Jeremiab 42 Bible Online

Jeremiab 42 - Khoekhoegowab bible

Jeremiab 42

¹ǃNubai gu ge ǂamsagu ǂnubidi digu hoaga ge dāhā Johananni Kareaxi ôab tsî Jesanjab Hosajab ôab tsîkha tsî ǁaes hoasa ǂkhamma xu kaib kōse.

²Tsî gu ge kēbo-aob Jeremiab ǃoa ge mî: As sige ǀkhomasa sa ais aiǃâ sī, îts ǀgoreba da re ǃKhūb sa Eloba, sida nē ǃgau hâ ǁaeda hoada, ǀorose da ǂguina xu ǃgau hâ xuige, mûra âts ra mû khami.

³Îb ǃKhūb sa Eloba ǂanǂan da ǁnā daob, ǁîb ai da nî ǃgûba tsî ǁnā ǃkhais, hîa da nî dīsa.

⁴Ob ge kēbo-aob Jeremiaba ǁîgu ǃoa ge mî: Tita ge go ǁnâu, mû tita ge ǃKhūb sadu Elob ǃoa nî ǀgore sago di mîdi ǃoa, tsî i ge nîra ī, ǁnā mîs ǃKhūb nî sado ǃereamsa ta ge sado nî ǂanǂan, ǀgui mîs xawesa ta ge ūdawaxū du tide.

⁵ǃNubai gu ge ǁîga Jeremiab ǁga ge mî: Ab ǃKhūba sige ǃoagu hâ ama-ai tsî ǁaposa îǂhôa ǃkhō-amaose, ǁnā mîs, ǃKhūb sa Elob sa ǀkha nî sîba das hoas khami da ga dī tama io.

⁶ǃGâis ka, tsūs ka xawe da ge dommi ǃKhūb sida Elob, ǁîb ǃoa da satsa ra sîb diba nîra ǁnâuǀnam, î da ǃgâibahe, ǃKhūb sida Elob di domma da ga ǁnâuǀnams khaoǃgâ.

⁷O i ge disi tsēdi khaoǃgâ ge ī, ǃKhūb di mîs ge Jeremiaba hāba ǃkhaisa.

⁸ǁGoasib ge Johananni, Kareaxi ôab tsî ǂamsagu ǂnubidi digu, ǁîb ǀkha hâgu hoagu tsî ǁaes hoas tsîna ge ǂgai, ǂkhamma xu kaib kōse.

⁹Tsîb ge ǁîn ǃoa ge mî: Nētib ra mî ǁnā ǃKhūb, Israeli Elob, ǁîb ǃoa du ge sî teba, sadu ǀkhomasa ta nî ais âb aiǃâ ūsīga:

¹⁰Sadu ga nē ǃhūb ǃnâ ǁanhâhâo, o ta ge tita sado nî ǂnubi tsî khôaǁnâ tide, tsî sado nî ǂgā tsî ǃhomǂui tide, ǁnā tsūb tita ge sado dī-ūb ǂama ta ǃhausen hâ xui-ao.

¹¹Tā ǃao, Babilons gao-aob, ais âba du ra ǃaoba; tā ǁîba ǃao, tib ra ǃKhūba mî. Tita ge sadu ǀkha nîra hâ xuige, sâu du ta nîga tsî ǃomǁaeb âba xu ta nî ore duse.

¹²Tsî tita ge sado ǀkhomxaǂgaosiga nîra mā, ǁîb nî sado ǀkhom tsî sadu di ǃhūb ǃnâ ǁkhawa ūsī duse.

¹³Xawe sadu ga: Sida ge nē ǃhūb ǃnâ hâhâ tide, ti mîo, tsî du ga dommi ǃKhūb sadu Elob diba ǁnâuǀnam tama io,

¹⁴mî rase: Hî-î, î da ǃgû Egipteǃhūb ǃoa, ǁnāpa da ge toro-i xare-e mû tide tsî ǀō-i ǀgapadas di-e ǁnâu tide tsî pere-i xare-e ǃâba tide, î da ǁnāpa sī hâ,

¹⁵î du ǁnâi nēsi ǃKhūb di mîsa ǁnâu, sadu Judab di ǃgaurodo. Nētib ra ǃKhūb ǂnubidi dib, Israeli Eloba, mî: Sadu ga sadu di aide unuo, Egipteb ǃoa du nî ǃgûse, tsî du ga ǃgûsīo, ǁnāpa du nî ǃhao khoese ǁanga,

¹⁶o i ge nîra ī, ǁnā gôab, ǁîba du ǃao hâb, ǁnāpa Egipteǃhūb ǃnâ nîra saoǁae du ǃkhaisa, tsî ǁnā ǃâtsūǀkhāb, ǁîb xa du ǂhansen hâb, ǁîb ǁnāpa Egipteb ǃnâ nîra ǃgôaǃgon du ǃkhaisa, o du ge ǁnāpa nîra ǁō.

¹⁷Tsî ǁnāti gu ge ǁnā aogu hoaga nîra ǁō, aidi âga Egipteb ǃoagu nî ǃgûse ra ǂnûiga, ǁnāpa gu nî ǃhaokhoese hâse, ǁîgu ge ǁnāpa gôaba xus kas, ǃâtsūǀkhāba xus kas, ǂhīǁōba xus kas hoasa nîra ǁō; tsî khoe-i, ǁnā ǂkhabab, ǁîn ǂama ta nî hā kaiba xu nî ǃgau tsî ûi-i xare-i ge nîra ǀkhai.

¹⁸Nētib ra ǃKhūb ǂnubidi dib Israeli Eloba mî xui-ao: Ti ǁaib tsî ti ǁgôasib tsîkha Jerusalems ǁansaben ǂama ǁhōǂuihe hâ khami, ǁnās ǁkhās khamib ge ti ǁgôasiba sadu ǂama nîra ǁhōǂuihe, Egipteb ǃnâ du ga sīo; o du ge ǀâxarexūxūse nîra ī, ǃhurigâ xūse tsî ǀgoexūse tsî ǃharaxūxūse, tsî du ge nē ǃāsa ǃaruǀî ǁkhawa mû tide.

¹⁹ǃKhūb go sadu ǃoagu ǃhoa, sadu Judab di ǃgaurodo: Tā ǃgû Egipteb ǃoa; î du amase ǂan, tita go sadu ǃoagu ǀhûǀguitimî ǃkhaisa,

²⁰amase du go sadu ǀomde ǂgaeǂhapu, ǃKhūb sadu Elob ǃoa du go tita sî ǃkhais ǀkha, mî raǃâ: ǀGoreba da re, ǃKhūb sida Elob ǃoa; tsî ǃKhūb sida Elob ga mîn hoan ǃoa ǂanǂan da, o da ge ǁnāti nî dī.

²¹O ta ge ǁî ǃkhaisa nēsi go ǂanǂan du, xawe du ge dommi ǃKhūb, sadu Elob diba ǁnâu tama hâ, tsî ǁnān titab go ǁîn ǀkha sadu ǁga sîn hoana.

²²Î du ǁnâi nēsi amase ǂan, gôaba xus kas, ǃâtsūǀkhāba xus kas, ǂhīǁōba xus kas hoasa du nîra ǁō ǃkhaisa ǁnā ǃkhais, ǁîs ǃoa ǃgûsa du ge ǂgaos tawa, ǃhao khoese du nî ǁnāpa hâse.