Read Khoekhoegowab Jeremiab 43 Bible Online

Jeremiab 43 - Khoekhoegowab bible

Jeremiab 43

¹Tsî i ge ge ī, Jeremiab ge ǁnā mîdi ǃKhūb ǁîn Elob didi, ǃKhūb ǁîn Elob ge ǁîdi ǀkha ǁîn ǃoa sîdi hoade ǃhoatoao, ǁnā mîdi hoade,

²o gu ge Asariab, Hosajab ôab, tsî Johananni, Kareaxi ôab, tsî ǃguriǂgaoxa aogu hoaga ǃhoa tsî Jeremiab ǃoa ge mî: Sats ra ǂhumi, ǃKhūb sida Elob ge satsa sî tama hâ, Sadu ge Egipteb ǃoa ǃgû tide, ǁnāpa du nî ǃhaokhoese hâga tits nî mîse.

³Xawe Baruxi Nerijab ôab ra satsa sida ǃoagu khâikhâiǃnâ, sidab nî Xaldeaǁîn ǃomǁae māǁnâga, în ǃgam da, în ǃkhōsase Babilons ǃoa ǂgaeǂguibē da, ti.

⁴Nētin ge Johananni, Kareaxi ôab, tsî ǂnubidi ǂamsagu hoagu tsî ǁaes hoasa ǃKhūb di domma ǁnâuǀnam tama ge i, Judab ǃhūb ǃnân nî hâsa.

⁵Xawe Johananni Kareaxi ôab, tsî ǂnubidi di ǂamsagu hoagu ge ǁnā ǃgau gen Judab din, ǁnā ǁaedi ǁîdi ǃoadi ge doeǁgasīhe hâ idi hoade xu ra oana ge ū, Judab ǃhūb ǃnân nî ǁanga,

⁶aogu tsî taradi tsî ǀgôaron tsî gao-aob tsî mâ ǀoms, Nebusaradanni, ǃûiǃgâ-aogu di ǂamsab, ge Gedaljab, Ahikammi ôab, Safanni ôab tawa ǁnāxūs hoasa tsî kēbo-aob Jeremiab tsî Baruxi Nerijab ôab tsîkha ona.

⁷Tsîn ge Egipteǃhūb ǃoa ge doe, dommi ǃKhūb diban ǁnâuǀnam tama amaga, tsîn ge Taxpanhes tawa ge sī.

⁸ǃNubais ge mîs ǃKhūb disa Jeremiaba ge hāba, Taxpanhes tawa, mî raǃâ:

⁹Kai ǀuide sa ǃomǁae ū îts ǁîde ǂgoab ǃnâ gaugau, Taxpanhes ǃnâ, Faraob ommi di dao-ams tawa hâs ǃnâ, Jodeǁî aogu di mûdi aiǃâ.

¹⁰Îts ǁîga ǃoa mî: Nētib ra ǃKhūb ǂnubidi dib, Israeli Eloba, mî: Mû tita ge sî tsî nî Nebukadnesari Babilons gao-aob, ti ǃgāba, ūhā, tsî tita ge ǁîb di tronsa nē ǀuidi, tita ge gaugaudi ai nîra ǂnûi, ob ge îsa tentoms âba ǁîdi ai nîra ǂnaumâi.

¹¹Ob ge hā tsî Egipteǃhūba nîra ǂnau, ǁōb dina ǁōb ǁga tsî ǃkhō-oms dina ǃkhō-oms ǁga tsî gôab dina gôab ǁga.

¹²Tsî tita ge ǀae-e nîra ǂhubi ǁgôa-elogu Egipteb digu di omgu ǃnâ, tsî ǁîb ge ǁîga nîra khauǃkhū tsî ǃkhōsase nîra ǂgaeǂguibē, tsîb ge Egipteǃhūba nîra ǂgaeǂgā, ǃûi-aob ra sarab âba ǂgaeǂgā khami, tsî ǁîb ge ǁnāpa xu nîra doeǂoa ǂkhîb ǃnâ.

¹³Tsî ǁîb ge ǂnûikhâihesa īgu Bet-Semes, Egipteǃhūb ǃnâ ǁgoes diga nîra khôaǂkhū, tsî ǁîb ge Egipteb ǁgôa-elogu omga ǀaes ǀkha nîra khauǃkhū.