Read Khoekhoegowab Jeremiab 44 Bible Online

Jeremiab 44 - Khoekhoegowab bible

Jeremiab 44

¹Nēs ge mîs Jeremiaba ge hābasa, ǁnā Jodeǁîn, Egipteǃhūb ǃnâ ge ǁan hâ in, Migdols tawa, tsî Taxpanhes tawa tsî Memfis tawa tsî Patros ǃhūb ǃnâ ge ǁan hâ in ǃoa, mî rase:

²Nētib ra ǃKhūb ǂnubidi dib, Israeli Eloba, mî: Sats ge ge mû, ǁnā tsūb, tita ge Jerusalems ǂama tsî Judab ǃādi hoadi ǂama ūhāba. Tsî kō, ǁîdi ge nētsē a ǃū-aisa, tsî khoe-i xare-i ge ǁîdi ǃnâ ǁan tama hâ.

³ǁNā ǂkhabasib ân hîan ge dīb ǃaroma, titan nî ǂoeǂoega, ǃgû tsîn nî ǀkhara eloga ǀanǀanba tsî ǃoabase, ǀūn ge iga, ǁîn kas, sadu kas, sadu în kas hoasa.

⁴Tsî tita ge sadu ǃoa ti ǃgāgu hoaga, kēbo-aoga, gere sî ǃnauǁgoaga khâi tsî ra sîǃâ: Tā dī re nē ǁgaiǁgaisan, hîa ta ǁkhan hâna ti gu nî mîse.

⁵Xawen ge ǁnâu tsî ǂgaes âna ǂō tama ge i, ǃhobasenn nîga tsî ǀkhara elogan ǀanǀanba tidega.

⁶ǁNā-amaga kha ge ti ǁgôasib tsî ti ǁaib tsîkha ǁhōǂuisen tsî ge khau Judab ǃādi ǃnâ tsî Jerusalems daogu ǃnâ, ǁîdi ge ǃū-aisa ǃkhai tsî ǃgaroǃhū kais kōse, nētsē i ī xase.

⁷Tsî nēsi, nētib ra ǃKhūb, Elob ǂnubidi dib, Israeli Eloba mî: Tarexa du kha nēti ī kai tsūǃō-e sadu ǂama ra hā-ū, aob kas, taras kas, ǀgôa-i kas, dai ra-i kas hoasa ǁîna Judab ǁaeguba xu ǃhomǂuisa, ǃgaoro-i xare-i ǃgau tamas kōse?

⁸Tita sadu ǃomgu di sîsengu ǀkha ra ǂoeǂoeǃâ, ǀkhara eloga ǀanǀanbas ǀkha Egipteǃhūb ǃnâ, ǁîb ǃnâ du ge sība, ǃhao khoese du nî ǁnāpa hâga, ǁî-aitsama du nî ǃhomǂuisenga tsî ǀâxare kai du nîga tsî ǃharaxū kai du nîga ǃhūbaib di ǁaedi hoadi ǃnâ?

⁹ǀUru du kha ge ǂkhabasigu sadu îgu diga tsî ǂkhabasigu Judab gao-aogu diga tsî ǂkhabasigu ǁîgu taradi diga tsî sago ǂkhabasiga tsî ǂkhabasigu sago taradi diga, Judab ǃhūb ǃnâ tsî Jerusalems daogu ain ge re dīga?

¹⁰ǁÎn ge nētsēs kōse ganupe khôaǂkhūǂkhūhe tama hâ, tsîn ge ǃao tama hâ, tsîn ge ǁkhāti ti ǂhanub tsî ti ǂnûiǂgādi tsîn, sadu di ais aiǃâ tsî sadu îgu di ais aiǃâ ta ge mān ǃnâ tanisen tama hâ.

¹¹ǁNā-amagab ra ǃKhūb ǂnubidi dib, Israeli Eloba nēti mî: Mû, tita ge ti aisa sadu ǃoagu tsūǃōse nîra ǂnûi, tsî Judab hoab nî ǃhomǂuihega.

¹²Tsî tita ge ǃgau gen Judab dina nî ūbē, ǁnān aidi âna ge ununa Egipteǃhūb ǃoa, ǃgû tsîn nî ǁnāpa ǃhaokhoese hâse. Tsîn ge hoatsama Egipteǃhūb ǃnâ nîra hapuhe, gôab xan ge nîra ǁnā, ǃâtsūǀkhāb xan ge nîra ǁō ǂkhamma xu kaib kōse, gôaba xus kas, ǃâtsūǀkhāba xus kas hoasan ge nîra ǁō, tsîn ge nîra ǀâxare kai tsî ǃhurigâxū kai tsî ǀgoe kai tsî ǃharaxūxū kai.

¹³Tita ge ǁnān Egipteǃhūb ǃnâ ǁan hâna nîra ôaǃnâ, tita ge Jerusalemsa ôaǃnâ khami, gôab ǀkha, ǃâtsūǀkhāb ǀkha tsî ǂhīǁōb ǀkha.

¹⁴ǃGau gen Judab din, Egipteǃhūb ǃnâ ge sīn, ǁnāpan nî ǃhao khoese hâga, ǁîn ûi nî-e tsî ǃgau nî-e ūhâ tidega, ǁnās ge, ǁîn nî Judab ǃhūb ǃoa ǃhobasa, ǁnāǀîs ra ǀoms âna ǁkhore, ǁnāpan nî ǁan, ti, xawen ge ǁkhawa oa tide, ǁhâ nîn ǀguin ose.

¹⁵ǃNubain ge ǁnā aogu, taradi âgu ǀkhara eloga gere ǀanǀanba ǃkhaisa a ǂangu, tsî ǁnā taradi ǁnāpa mâdi hoadi kai ǂnubise tsî ǁnā ǁaes, Egipteǃhūb ǃnâ Patros ǃnâ ǁan hâsa Jeremiaba ǃeream tsî ge mî:

¹⁶ǁNā mîs ǃKhūb ǀons ǃnâts go sida ǃhoa-ūs xasa: Sida ge ǁîsa ǁnâuǀnam tsi tide!

¹⁷Tsî da ge hoaragase nî dī sida amsa xu ge ǂoan hoan ǃoa, gao-aos ǀhommi disa ra ǀanǀanbaǃâ tsî ǂnâǁguibade ǁîsa ra ǁguibaǃâ, sida gere dī xase, sida tsî sida îgu tsî sida gao-aogu tsî sida gaosagu tsîna Judab d ǃādi ǃnâ tsî Jerusalems ǃgangu ǃnâ. ǁNāǃnubai da ge pereb xa gere ǁâ, tsî da ge ǃgâiǂgao tsî tsū-i xare-e mû tama ge hâ i.

¹⁸Xawe gao-aos ǀhommi disa ǀanǀanbas ǀkha da ge ǀû tsî ǁîsa ǂnâǁguibasa ǁguibas ǀkha da ge ǀû ǁaeba xu da ge xun hoana ge tôasi, tsî da ge gôab xa tsî ǃâtsūǀkhāb xa ge ǁō.

¹⁹Tsî gao-aos ǀhommi disa se ga ǀanǀanba tsî ǁîsa ǂnâǁguibade ǁguibao, ǁîsa se î-îhe hâ amperena ra dība, tsî ǂnâǁguibade ǁguibase ra sise aogu ose?

²⁰ǃNubaib ge Jeremiaba ǁaes hoas ǃoa, aogu ǃoa tsî taradi ǃoa tsî ǁnā ǁaes ǁîba ge ǃereams hoas ǃoa ǃhoa tsî ge mî:

²¹ǁNā ǀanǀans, Judab ǃādi ǃnâ tsî Jerusalems ǃgangu ǃnâ du gere ǀanǀans, sadu tsî sadu îgu, sadu gao-aogu tsî sadu gaosagu tsî ǃhūb di ǁaes tsîdos, ǁîs xa ǂâi tamab kha hâ ǃKhūba, tsî ǂgaob âb ǃnâ khâi tamas hâ?

²²ǃKhūb ge ǁîsa ǃaruǀî tani ǁoa is kōse, ǂkhabasib sadu dīgu dib xa, tsî ǁnā ǁgaiǁgaisan, hîa du ge dīn xa, ǁnā-amagab ge sadu di ǃhūba ge ǃgaroǃhū kai tsî ǃhurigâxū kai tsî ǀâxare kai, khoe-i xare-i ǁîb ǃnâ ǁan tamas kōse, nētsē i ī xase.

²³ǁNā ǀanǀans, ǀanǀan du geres, tsî ǃKhūb ǃoagu du gere ǁore ǁoreb, tsî ǃKhūb di domma du ge ǁnâuǀnam tama is, tsî ǁîb ǂhanub tsî ǁîb ǂnûiǂgādi tsî ǁîb ǀhûǀguitimîdi ǃnâ du ǃgû tama hâ is xas ge nē ǂkhabab xa du ge hāǂamhesa, nētsē i ī xase.

²⁴Ob ge Jeremiaba ǁaes hoas ǃoa tsî taradi haodi ǃoa ge mî: ǁNâu ǃKhūb di mîsa, sadu, Judab hoab didu, Egipteǃhūb ǃnâ ǁan hâdo.

²⁵Nētib ra ǃKhūb ǂnubidi dib, Israeli Eloba ǃhoa, mî raǃâ: Sadu tsî sadu taradi tsîdu xasa, sadu di ams ǀkha du ge ge ǃhoa, tsî sadu ge ǁîsa sadu ǃomgu ǀkha ge dīǀoaǀoa, mî raǃâ: Sida ge sida mîmâidi hîa da ge mîmâide nî ǃkhōǀgaipe gao-aos ǀhommi disa ra ǀanǀanbaǃâ tsî ǁîsa ǂnâǁguibade ra ǁguibaǃâ. Sadu ge sadu mîmâide ǁapoǁapo tsî sadu mîmâide ge ǃkhōǀgaipe.

²⁶ǁNā-amaga ǁnâu ǃKhūb di mîsa, sadu Judab hoab didu, Egipteǃhūb ǃnâ ǁan hâdo. Mû, tita, ge ti kai ǀons tawa ge nū, tib ra ǃKhūba mî, ti ǀons ǃaruǀî mâb Judab dib hoab xa Egipteǃhūb hoab ǃnâ ǂgaihe tide ǃkhaisa, ǃKhūb ǃKhūb a ûitsama ǃkhais ao ti nî mîba.

²⁷Mû, tita ge ǁîna ra ǃûi ǂkhabab ǃoa, tsî ǃgâib ǃoa tama; o gu ge Judab aogu, Egipteǃhūb ǃnâ hâgu hoaga, gôab xas kas, ǃâtsūǀkhāb xas kas hoasa nîra ǁō, toa gu nîs kōse.

²⁸Xawe gôaba xu ga ûin, ge Egipteǃhūba xu Judab di ǃhūb ǃoa nîra oa ǀoro ǀgaus â-i khoese. On ge ǃgau gen Judab din hoan, Egipteǃhūb ǃnâ ge sīn ǁnāpan nî ǃhaokhoese hâse, ǁîn ge nîra ǂan, tari-i di mîs nî mâhōsa, tis kas, ǁîn dis kas hoasa.

²⁹Tsî nēs ge sado saose nî ība, tib ra ǃKhūba mî, tita nî nē ǃās ǃnâ ôaǃnâ ǃkhaisa, ǂan du nîga, ti mîdi ǂanǂansase sadu ǂkhabab ǃoa nîra hâhâ ǃkhaisa.

³⁰Nētib ra ǃKhūba mî: Mû, tita ge Faraob Hofrab, Egipteb gao-aoba, khākhoen âb tsî ǁnān ǀoms âba ra ôan ǃomǁae nîra mā, Sedekiab, Judab gao-aoba ta ge Nebukadnesari, Babilons gao-aob, ǁîb di khākhoeb, ǀoms âba ge ôab ǃomǁae mās ǁkhās khami.