Read Khoekhoegowab Jeremiab 46 Bible Online

Jeremiab 46 - Khoekhoegowab bible

Jeremiab 46

¹Mîs ǃKhūb dis, kēbo-aob Jeremiaba ge hābas, ǁaedi ǃoagu.

²Egipteǃhūb ǃoagu: ǁNā ǂnubis, Farao Nekob, Egipteb gao-aob dis, ǃāb Eufrati amǃgâ Karkemis tawa ge ǁgoe is, Nebukadnesari, Babilons, gao-aob, xa ge ǂnauhes, hakaǁî kurib Jojakimmi, Josiab ôab, Judab gao-aob, dib ǃnâ:

³ǁĀǁā khōsikhōb tsî ǃgupu khōsikhōb tsîkha, î du ǃkhammi ǃoa ǀgū!

⁴Hāga ǃgaeǃgâ, î go ǃapa, sago ǃgapi-aogo! Î go sī mâ, toroǀgapadi ǀkha! ǁHâigôaga ǂkhai kai, î go ǁâtaniba ana!

⁵Tarexasa mû ta rasa, ǂkhabuǂâi tsî gu ra oa ǃkhaisa? Tsî ǁîn ǁē-aogu ǂûgu ge dāhe, tsî ra ǃhū tsî kōnǃgâs xawesa hî tama hâ. ǃHurib ǀguib xan ge hâǂgāhe hâ, tib ra ǃKhūba mî.

⁶ǃHaeb ge a ǁhâxū ǁoa, ǁē-aob ge a ûiǂoa ǁoa. ǀApasǀî ǃāb Eufrati amǃgâs ge ǁîgu ge ǃnôa tsî ǁnāsa.

⁷Tariba kha ǁnāb, Nylǃāb khami ra khâiba, ǁgamgu âb khami ra dâuba?

⁸Egipteb ra Nylǃāb khami khâi, tsî ǁgamgu âb ra ǃāgu khami dâu, tsîb ra mî: Tita ge nî khâi, tita ge ǃhūbaiba nî ǃgū-ai; tita ge ǃās tsî ǁîs ǃnâ ǁan hâna nî hîǀhuru.

⁹ǃApa, sago hāgo, î so ǀō saso kuniso! Î gu ǁē-aoga ǂoa, Etiopiaǁîgu tsî Putiǁîgu khōsikhōba ra sîsenūgu, tsî Ludiǁîgu khāsa ra ǂgaeǃnâgu tsîga.

¹⁰Nē tsēs ge a ǃKhūb di tsē, ǃKhūb ǂnubidi dib di tsē, ǀkhaob di tsē, îb ǁîba ǀkhaobasen khākhoen âb tawa. Îb gôaba ō, tsî ǁâ, îb āǁō ǁîn di ǀaob xa. ǃKhūb ǂnubidi di ǃKhūb ge ǂāǁguiba-e ra dī ǀapas di ǃhūb ǃnâ, Eufratǃāb amǃgâ.

¹¹ǃGûǃapa Gileadi ǃoa, îs balsemma ūhā, sas ǂkhamkhoes Egipteb ôase. ǁAuses ra sasa soǀôana ǂguiǂgui; ǂuruǂurus ge sasa a ǀkhaiba.

¹²ǁAedi ge taob âs xa ge ǁnâu; ǃhūb ge ǃaus âs xa ǀoa hâ. Nē ǁē-aob ge nauba ge ǂgâu; o kha ge hoakha ge ǁnā.

¹³Mîs ǃKhūb ge kēbo-aob Jeremiaba ǃhoa-ūs, hās Nebukadnesari, Babilons gao-aob dis xa, Egipteǃhūbab nî ǂnause:

¹⁴Aoǁnâ ǁî ǃkhaisa Egipteb ǃnâ, î du ǁîsa Migdols tawa ǁnâu kai; as ǁkhāti ǁnâuhe Memfis tawa tsî Taxpanhes tawa; mî re: Mâ î du ǂhomisen, gôab ge sa ǂnamipe hâna hapu xuige.

¹⁵Tarexasa sa ǀgaisagu ge ǀnapubēhesa? ǁÎgu ge mâ ǁoa ge i, ǃKhūb ge ǁîga doeǁgabē xui-ao.

¹⁶ǁÎb ge ǂguiga ge ǃnôa kai; ā, ǀguib ge naub ai ge ǁnā, o gu ge: Khâi, î ge sage di ǁaes ǃoa oa tsî ǃhūb sage ǃnaes dib ǃoa, ǁgâiǀā ra gôab ǃaroma, ti ge mî.

¹⁷ǁNāpan ge Faraob Egipteb gao-aob ge kā hâ, ǁîb ge mîmâihesa ǁaeba ǁause ge ǃgôa-ī kai ti ra ǂgai.

¹⁸Tita a ûitsama ǃkhais ao, tib ra gao-aob, ǃKhūb ǂnubidi dib ti ǀon hâba mî, amaseb ge ǁîba Tabori khami ǃhomgu ǁaegu tsî Karmeli khami hurib xōǀkhā nîra hā.

¹⁹ǃKhōsase ǂgaeǂguibēhes di sîsenūdana ǂhomibasen, sas ǁansabes, Egipteb ôase, Memfis ge ǃgaroǃkhai kai tsî nîra khauǃkhūhe, khoe-i xare-i ǁîs ǃnâ ǁan tides kōse.

²⁰Egipteb ge a kaise îsa tsâu; ǂā-aob ra hā, ǁîb ra ǀapasa xu hā.

²¹ǁÎs di ǃgaesan on ge ǁîs ǁaegu sâuhe hâ tsâun khami ī. Xawe ǁîn on ge ge unusen, ǀhûpen ge ǁhâ tsî mâ tama ge i, tsēs kāǁōs dis xan go hāǂamhe xui-ao, ôaǃnâs ân di tsēs xa.

²²ǁÎs ge ǀao-i ǂhanabē ra-i khami ra ǁnâusen, torob di ǀgaib ǀkhan ra ǃgû tsî ǃōdi ǀkhan ǁîs ǃoagu ra hā xui-ao, haiǁhā-aogu khami.

²³ǁÎn ge haiǀgoms âsa ge ǁhāǁnâ, tib ra ǃKhūba mî, ôaǃnâhe ǁoan ge a, ǁîn ǂhomn xa a ǂgui xui-ao, ǃgôahe ǁoan as kōse.

²⁴ǀGôas Egipteb dis ge tao hâ, ǁîs ge ǁaes ǀapas dis ǃomǁae māhe hâ.

²⁵ǃKhūb ǂnubidi dib, Israeli Elob, ra mî: Mû, tita ge ǁkharaba nîra ūǀkhī Amonni, Nos dib ǂama tsî Faraob ǂama tsî Egipteb ǂama tsî elogu tsî gao-aogu âb ǂama, ā, Faraob ǂama tsî ǁnān ǁîb ai ǂgomaiǂnûi hân ǂama.

²⁶Tita ge ǁîna ǁîn di ǀomsa ra ôan ǃomǁae nîra mā, tsî Nebukadnesari, Babilons gao-aob, ǃomǁae tsî ǃgāgu âb ǃomǁae, xawe ǁnās khaoǃgâb ge Egipteǃhūba nîra ǁanǃnâhe hugakam tsēdi khami, tib ra ǃKhūba mî.

²⁷Xawe satsa, ti ǃgā Jakotse, tā ǃao, îts tā ǃhurigâ, sats Israeltse. Mû tita ge satsa ǃnūseba xu nîra ore, tsî surib âtsa ǃhūb ǁîn ǃkhōsis diba xu. Ob ge Jakoba oaǃhoba tsî ǃnō tsî nîra sâ, tsî khoe-i xare-i xab ge ǃhuriǃhurihe tide.

²⁸Satsa ǁnâi, ti ǃgā Jakotse, tā ǃao, tib ra ǃKhūba mî, tita sa ǀkha hâ xuige. Tita nî ǁnā ǁaedi, ǁîdi ǃoa ta ge satsa doeǁgasīdi hoade dītoa xawe ta satsa dītoa tide xuige, xawe ta ge ǀgaus ai nî ǁkhara tsi tsî hoaragase ǀhapiose ūhâ tsi tide.