Read Khoekhoegowab Jeremiab 48 Bible Online

Jeremiab 48 - Khoekhoegowab bible

Jeremiab 48

¹Moab ǃoagub ra ǃKhūb ǂnubidi dib Israeli Eloba nēti mî: Tsūba si Nebosa, ǁîs hîǀhuruhe hâ xui-ao. Kirjataims ge tao hâ ǁîs ge ūhe hâ; ǀgapise ǁgoe ǃkhais ge tao tsî ǃhuri hâ.

²Koasens Moab dis ge go toa; Hesbons ǃnân ge ǂkhabana ǁîsa ǂâiǂam tsî ge mî: Hā î da ǁîsa ǃhūǃnoma, în ǃaruǀî tā ǁaese ī. ǁKhātis ge sas Madmensa nîra ǂhāǁguihe; gôab ge sasa nîra ǃgôaǃgon.

³ǁNâu! Dommi Horonaims di ǃaus diba: Hîǀhurus tsî khôaǂkhūs kaisa.

⁴Moab ge khôaǂkhūǂkhūhe hâ; ǁîs ǂkhamron ge ge ǃau ǁnâuhen nîga.

⁵Tsî Luhits di ǂkhâba-ūn ra ā garu rase ǃapa; Horonaims di ǁnōb tawan ge Moab ǁgâiǀā-aona ǀkhomǀkhomsa ā-e ǁnâu xui-ao.

⁶ǃHū î du sadu ǀomsa ore; î du ǃgaroǃhūb ǃnâ mâ hais khami ī.

⁷Sa ǂgomaiǂnûis, sîsengu âs ais kas, ǁuigu âs ais kas hoasas ra ǂgomaiǂnûis on nî ūhe ǃkhaisa, tsî Kemob ge ǃkhōsis ǃnâ nîra doeǂoa ǁîb pristergu tsî ǁîb gaosagu tsîn ǀkha.

⁸Hîǀhuru-aob ge mâ ǃās hoasa nîra hāǂam, ǀgui ǃās xawes ûi tides kōse. Tsî ǃgoaǃnāb ge nîra hîkākāhe, tsî ǂgās ge nîra hîǀhuruhe, ǃKhūb ge ǁîsa mî khami.

⁹Moaba ǁgabokha mâ, ǁkhana raseb ge ǁîba nîra ǂoa xuige; tsî ǃādi âb ge nî ǃū-aisa ǃkhai kaihe, khoe-i xare-i ǁîdi ǃnâ ǁan tides kōse.

¹⁰ǀÂxarexūhesab ge ǁnāb ǃKhūb sîsenna gāxaǃnâse ga dība! Ā, ǀâxarexūhesab ge ǁnāb gôab âba ǀaoba xu ga ūdawaba!

¹¹Moab ge ǂkhamsis âba xu sâsa ge i, tsîb ge ǂgommi âb ai sâsase ge ǁgoe i, tsîb ge nē xapasa xu nau xapas ǃnâ ǁhōhe tama ge hâ i, tsî tātsēb ge ǃkhōsis ǃnâ ǃgûbē tama ge i. ǁNā-amagab ge ǁkhoab âba ǁîb ǃnâ ge hâhâ, tsî ǁamab âb ge ǀkhara tama ge i.

¹²ǁNā-amaga kō tsēdi ge ǃgoaxa, tib ra ǃKhūba mî, o ta ge tita ǁhōǂui-aona ǁîba nîra sîba, ǁîba nîra ǁhōǂui ǃnâna; tsî xapadi âba nîra ǀkhaiǃnâ tsî xapadi âba nîra khôaǂkhūna.

¹³Ob ge Moaba Kemob ǃaroma nîra tao, Israeli ommi ge Bet-Els, ǁîn di ǂgomaiǂnûis ǃaroma tao khami.

¹⁴Mati go sago: Sige ge a ǁē-ao, sige ge a ǃkham ǁkhā ao ti mî ǁkhā?

¹⁵Moab ge hîǀhuruhe hâba, tsîb ge ǃādi âba xu ge ǃapa; tsî hoagu xa ǃgâi ǂkhamkhoegu âb ge ǂāǃnaos ǃoa ge ǁgôa, tib ra Gao-aob, ǃKhūb ǂnubidi dib, ti ǀon hâba mî.

¹⁶Moab di kās ge ǀgūse go hā; tsî tsūǃōb âb ra kaise ǃhaeǃhaesen.

¹⁷ǃGaeǂam bi, sadu ǁîb ǂnamipe hâdu hoado, tsî sadu ǀons âba a ǂandu hoado; mî re: Matib khôahe hâ ǁnā ǀgaisa ǀkharub, ǁnā îsa ǁgâibasenhaiba!

¹⁸ǁGôa sa ǂkhaisiba xu, îs ǂnâsa ǃhūb ǃnâ ǂnû, sas ǁansabes Dibons ôase, Moab di hîǀhuru-aob go sas ǃoagu ǂoaxa xuige, ǁîb ra ǁaposa ǃkhaidi âsa hîkākā.

¹⁹Daob amǃgâ mâ îs kō, sas ǁansabes Aroers dise. ǁHâ rab kas, ûiǂoa hâs kas hoasa dî, îs: Tare-e go ī? ti mî.

²⁰Moab ge tao hâ, ǁîb ge ǂnauhe hâ amaga. Ā, î du ǃau! Arnons tawa ǂhôa, Moab hîǀhuruhe hâ ǃkhaisa.

²¹Tsî ǀgoraǃgâs ge ǂgās ǂama ge hā, Holons ǂama tsî Jahas ǂama tsî Mefaats ǂama,

²²Dibons ǂama, Nebos ǂama tsî Bet-Diblataims ǂama,

²³Kirjataims ǂama, Bet-Gamuls ǂama, Bet-Meons ǂama,

²⁴Keriots ǂama tsî Bosras ǂama, ā, ǃādi Moab ǃhūb didi ǃnūse tsî ǀgūse hâdi hoadi ǂama.

²⁵Moab di ǁnâb ge ǁhāǁnâhe hâ; tsî ǁîb di ǁôab ge khôaǂkhūhe hâ, tib ra ǃKhūba mî.

²⁶ǁÎba āǃgâu kai, ǃKhūb ǃoagub ge kaikaisen xuige. Îb Moaba ǀkhûib âb ǃnâ ǃhobosen; îb ǁîb ona âiǂuixū kai.

²⁷Israela kha âiǂuixūseb ība du tama ge hâ i? ǃNari-aon ǁaegu hōheb ge, o du ǁîb xa du gere ǃhoa ǁaeb hoaba gere ǃnabindana?

²⁸ǃĀde ǁnāxū î du ǃhaob ǃnâ ǁan, sadu Moab ǁansabedo. Î du ǂnabus khami ī, ǁhoab di dao-ams ǃnâ ra omsa.

²⁹Sida ge Moab di ǃguriǂgaoxasib xa ge ǁnâu, kaiseb a ǃguriǂgaoxasa. ǁÎb ǂnīsasib xa, tsî ǁîb ǃgurixasib xa tsî ǁîb ǀgapiǂâixasib tsî ǂgaob âb di ǀgapisib xa.

³⁰Tita ge ǁgôasib âba a ǂan, tib ra ǃKhūba mî, tsî ǂhumib âb tsî ǁkhāti ǂhanuoǃnâ sîsenni âba.

³¹ǁNā-amaga ta ge tita Moab ǂama nî ā, Moab hoab ǂama ta ge tita nî ǃau-ā, khoen Kir-Heres din ǂaman ge nî ǀhâimâinǀom.

³²Jasers ra āǂamhe ās ǃgâ-ai ta ge nîra āǂam sī, sas ǂauxûiǂûhais Sibmas dise. Sa ǂgonagu ge huriba ge ǃgâu, ǁîgu ge Jaesers di hurib kōse ge sī. Sa ǁkhunaǂûn ǂama tsî ǂauxûiǂûn di ǃgaos ǂamab ge hîǀhuru-aoba ge ǁnā.

³³ǁNā-amagab ge ǃgâiaǂgaob tsî dâb tsîkha ǂûtanixa ǃhūba xu, Moab ǃhūba xu ūbēhe hâ: Tita ge ǂauxûiba kā kai ǀāǃnâxapade xu xui-ao; on ge ǂauxûiǂûna dâxase dāǃnâ tide. Dâb di ǃaus ge dâǃause ī tide.

³⁴Hesbons di ǃaus Eleales kōse Jahas kōse ra sīs ǂaman ge ǁîn domma ge ǃhâkhâi, Soarsa xu Horonaims, Eglat-Selisias kōse; ǁgamgu Nimrims digu on ge nîra ǃū-aisa.

³⁵Tsî tita ge Moab ǃnâ nîra ǀû kai, tib ra ǃKhūba mî, ǁnāb ǀgapigu ai ga ǁguibab tsî elogu âba ga ǀanǀanbaba.

³⁶ǁNā-amagab ge ti ǂgaoba Moab ǂama ǂnunib khami ra ā; ǁkhātib ge ti ǂgaoba Kir-Heres khoen ǂama ǂnunib khami ra ā, ǁnān hîa ge ǃgaun, ǁîb ge dīn ge kā xui-ao.

³⁷Danadi hoadi ge a ǃgora tsî ǀhō-amgu hoagu ǂkhomhe hâ xui-ao; ǃomgu hoagu ai gu ge ǀgorega ǃgaohe hâ tsî kamanab ai i ge ǁhō-e anahe hâ.

³⁸Omǂamaidi Moab didi hoadi ai tsî ǁîb di daogu ais ge ǃgae-aisa hâ, tita ge Moaba xapa-i ǂgaohe tama-i khami khôaǂkhū xui-ao, tib ra ǃKhūba mî.

³⁹Matib kha ǂnauǂkhūǂkhūhe hâ! Ā, matib Moaba taotaosase ge ǃkhomǃnoro! ǁNās ǁkhās xaseb ge Moaba ǁîb ǂnamipe hân hoana âiǂuixūse tsî ǃhurigâxūse nîra ība.

⁴⁰Nētib ra ǃKhūba mî xui-ao: Mû, ǁîb ge ǃhaese nîra ǁkhana, ǃariǃkhās khami, tsî ǁîb ge ǁgabokha âba Moab ǂama nîra khoraǂui.

⁴¹ǃĀdi hoadi ge hōhe hâ, mâ ǁaposa ǃkhais hoas ge ūhe hâ. Tsî ǂgaob Moab ǁē-aogu dib ge ǁnātsē taras hîa ǂōǂōsib ǃnâ hâs di ǂgaob khami nîra ī.

⁴²Moab ge nîra hîkākāhe, ǁaeseb ī tides kōse, ǃKhūb ǃoagub ge kaikaisen amaga.

⁴³A gu ǃaob tsî āb tsî ǁnoab tsîga sa ǂama hā, Moab ǁansabetse, tib ra ǃKhūba mî.

⁴⁴ǃAoba xu ga ǁhâb ge tsaus ǃnâ nîra ǁnā, tsî tsausa xu ga ǂoab ge ǁnoab ǀkha nîra ǃkhōhe; tita Moab ǂama kurib ǁîn ôaǃnâs diba ra ūhā xui-ao, tib ra ǃKhūba mî.

⁴⁵ǁNān khākhoeb ǀgaiba ge ǁhân ge sommi Hesbons dib ǃnâ sī ge mâ, xawe ǀaes ge Hesbonsa xu ge ǂoa, tsî ǁhabuba Sihons di ǁaeguba xu; tsî ra ge Moab di ǃūs tsî ǂkhupib ôab di danaǂkhōsa tsîra ge hîkākā.

⁴⁶Tsūba tsi Moatse! Kemob di ǁaes ge kā hâ; sa ôagu ge ǃkhōsis ǃnâ ūǃgûhe xui-ao, tsî sa ôade ǃkhōsis ǃnâ.

⁴⁷Xawe ǀuni tsēdi ǃnâ ta ge tita Moab di ǃkhōsisa nîra unu, tib ra ǃKhūba mî. Nēs kōse Moab ǀgoraǃgâsa.