Read Khoekhoegowab Jeremiab 49 Bible Online

Jeremiab 49 - Khoekhoegowab bible

Jeremiab 49

¹Amonni ôan ǃoagub ra ǃKhūba nēti mî: Israela ǀgôana ūhâ tamab hâ? ǀUmi-ao-i xare-e ūhâ tamab hâ? Tarexasa kha ǁnâi Milkommi a Gads di ǀumi-aosa? Tsî tarexasa ǁaes âb ra ǃādi âsa ǁanǃnâsa?

²ǁNā-amaga mû, tsēdi ge ǃgoaxa, tib ra ǃKhūba mî, Rabas Amonni ôan dis ǂama ta nî tita au ǁnae-e ǁnâu kai ǃkhaisa; os ge nîra ǃū-aisa ǃkhai kai, o di ge ǁîs ǃnaga hâ ǃāde ǀaes ǀkha nîra ǂhubihe. Ob ge Israela ǁîb ǀumi-aona nîra ǀumi, tib ra ǃKhūba mî.

³Ā re, sas Hesbonse, Ais ge hîǀhuruhe hâ xuige! ǃAu saso Rabas ôaso! Î so ǁhōga ana, î so ǃgae; î so ǃhanaga ǃkhoeǂnamipe, Milkommi ǃkhōsis ǃnâ nîra ǃgûbē xuige, ǁîb pristergu tsî ǁîb gaosagu tsîn hoana.

⁴Tarexas ra ǃgoaǃnāgu âs xa koasen, sa ǃgoaǃnāb di ǃnāǂamsasib xa, sas ǂgomǃgâheǁoasa ǀgôase, ǁuigu âs ai ǂgomaiǂnûi tsî: Tari-e ti ǃoagu nî hā-e? ti ra mîse.

⁵Mû tita ge ǃaoba nîra hāǂam kai du, tib ra ǃKhūb ǂnubidi di ǃKhūba mî, ǁnān sa ǂnamipe hân hoan xa, o du ge mâ-i hoa-i âdo nîra doeǁgaǂuihe, tsî khoe-i xare-i ge ǁhapuma rana ǀhaoǀhao tide.

⁶Xawe ǁnās khaoǃgâ ta ge tita ǃkhōsis Amonni ôan disa nîra unu, tib ra ǃKhūba mî.

⁷Edommi ǃoagub ra ǃKhūb ǂnubidi diba nēti mî: Gā-aisi-i xare-e kha ǀkhai Temans tawa? ǀApesa ǀkhais a ǁnâuǃāxana xu? ǀGaiob ge gā-aisib âna?

⁸ǃHū, î du ǃgam ǃkhaidi ǃnâ sī ǁan, sadu Dedans ǁansabedo, tita ge Esaub kāǁōba ǁîb ǂama ra ūhā, ǁnā ǁaeb, ǁîb ǃnâ ta ra ǁkhara biba.

⁹ǂAuxûiǂûn ǃora-aon ga sado ǃoa hāo, xaren kha xū-e ǁnākhao tide? ǃNari-aon ga tsuxuba hāo, xaren kha ǁîna ǂâu hâs kōse hîǀhuru tide?

¹⁰Xawe tita ge Esauba ge ǀkhaiǀkhā kai; tita ge ǂganǃgâsa ǃkhaidi âba ge ǂhai kai, ǁîb gaugausen ǁkhā tides kōse. Surib âb ge hîǀhuruhe hâ tsî ǃgâsagu âb tsî ǀgūkhoen âb ona, tsîb ge ǁîba a ǀkhai.

¹¹Sa ǃoaǀgôana ǁnāxū; o ta ge tita ǁîna ûib ǃnâ nîra sâu. Î di sa ǃoatarade ti ai ǂgomaiǂnûi.

¹²Nētib ra ǃKhūba mî xuige: Mû, ǁnān hîa ǁnā ǀgabisa nî āse ī taman ge ǁîsa nîra ā, tsî satsa ǁnâi ǀhapiosets kha nî hâ? Hî-î, ǀhapiosets ge hâ tide, tsîts ge ǁîsa nîra ā.

¹³Tita ge ti tawa ge nū xui-ao, tib ra ǃKhūba mî, Bosras nîra ǃhurigâ tsî ǃharaxū tsî ǃgaroǃhū tsî ǀâxarexūxū kai ǃkhaisa; tsî ǁîs ǃādi hoadi ge nîra ǀamo ǃū-aisa ǃkhai kaihe.

¹⁴Tita ge ǂhôasa ge ǁnâu ǃKhūba xu, tsî sîsabeb ge ǁaedi ǃnâ ge sîhe: ǀHaoǀhaosen î du ǁîb ǃoagu hā, î du ǁîb ǃoagu khâi, khâi ǃkhammi ǁga khâi ti ra mîba.

¹⁵Mû tita ge satsa ǁaedi ǁaegu ǂkharise ge dī, khoen ǁaegu ǃharaxūhesa ǁaese.

¹⁶Sa ǃhuriǃhurisasib ge satsa ge ǂgaeǂhapu, ǂnîxaǃaosib sa ǂgaob dib, sats ǃhaogu di ǁhāgu ǃnâ ǁan hâts, ǃnomdi di ǀgapib ai hâtse. Tsî oms âtsats ga ǃariǃkhās khami ǀgapise om xawe ta ge ǁnāpa xu nîra ǂhāǁgui tsi, tib ra ǃKhūba mî.

¹⁷Nētib ge Edomma nîra burugâs ǃkhai kai; ǁîba ga ǃgû-īǀkhā-i hoa-i ge burugâ tsî nîra ǃhō bi ǁîb di tsûtsû-ain hoan ǂama.

¹⁸Sodoms tsî Gomoras tsîra tsî ǁanǁare-aon âra di dawaǃkhupus ǁkhās xases ge ǁîsa nîra ī, tib ra ǃKhūba mî; khoe-i xare-i ge ǁnāpa ǁan tide, tsî khoen ǀgôa-i xare-i ge ǁîb ǃnâ hâ tide.

¹⁹Mû, xammi Jordanǃāb haiǀgomsa xu ra hās ǁkhās khamib ge ǁîba ǁaposa ǁanǃkhais ǃoagu nîra ǂoaxa. Tita ge ǁîba ǀgui mûsǀapirob ǃnâ ǁîn ǃhūba xu nîra ǃkhoeni kai. Tsî ǁî ǃkhaisa ǃkhōǂuibahe hâ-i, ǁî-e ta ge tita ǁîs ǂama nîra mâi. Tariba ǁnāb, tita ǀkha ǀguiti-ība, tsî tariba ǁnāb, tita nî ǂgaoǀkhāba? Tsî tariba ǁnā ǃûi-aob ti ais aiǃâ nî mâ ǁkhāba?

²⁰ǁNā-amaga ǁnâu ǃKhūb di ǀape-aisa, ǁîb ge Edommi ǂama ǀapesa, tsî ǁîb ǂâidi, ǁîb ge Temans ǁansaben ǂama ǂâide: Gūn di hoan xa ǂkhari-i on ge nîra ǂgaeǂuihe; ā, ǁanǃkhais ân ge ǁîn ǂama nîra burugâ ti.

²¹ǃHūb ge ge ǂgubi ǁnās ân di ǀōb xa, ǁnā ǃaus ân ge ǂĀxahurib tawa ra ǁnâuhe.

²²Mû, ǁîb ge ǃariǃkhās khami hā tsî ǃhaese nîra ǁkhana, tsî ǁgabokha âba Bosras ǂama nîra khoraǂui. Ob ge ǂgaob Edommi ǁē-aogu diba ǁnātsē taras ǂōǂōsib ǃnâ hâs dib khami nîra ī.

²³Damaskus xasa: Hamats tsî Arpads tsîra ge tao hâ, tsū gomma ra ge ǁnâu amaga. ǁÎra ge hurib khami gon ǂhansendi xa, tsî a sâoǃnâ.

²⁴Damaskus ge ǃopo hâ, ǁîs ge ǁhâ nîse ge ūnusen, tsîs ge ǃhurib xa ǃkhōhe hâ; ǂōǂōsib tsî tsûgu tsîgu xas ge hāǂamhe hâ, ǁora ra taras digu xas axase.

²⁵Matisa kha xūhe tamas hâ, ǃās gom rasa, ǃās ti dâb disa?

²⁶ǁNā-amaga gu ge ǂkhamkhoegu âsa ǁîs daogu ai nîra ǁnā; tsî ǁîs toro-aogu hoagu ge ǁnātsē nîra ǁhâiǁguihe, tib ra ǃKhūb ǂnubidi diba mî.

²⁷Tsî tita ge ǀae-e nîra khau Damaskus ǂnubiǂgoab ǃnâ; tsî i ge Benhadadi di î-omga nîra ǂhubiǂui.

²⁸Kedari ǃoagu tsî Hasors gaosidi, Nebukadnesari, Babilons gao-aob xa ge ǂnauhedi ǃoagub ra ǃKhūba nēti mî: Khâi î du ǃapa Kedari ǃoagu î du ǀgôan aiǂoas dina hîkākā.

²⁹ǁÎn ge tentomdi ân tsî gūdi âna nîra ū; tsî xordainǃkhain ân tsî xūn ân hoana, tsî ǃnaidi âna nîra ūbasen. Tsîn ge ǁîna: ǃHurib hoa ǀkhāga xu! ti nîra ǂgai.

³⁰ǃHū î du ǃnoesase ǁhâbē! ǁAn ǃgam ǃkhaidi ǃnâ, sadu Hasors ǁansabedo, tib ra ǃKhūba mî. Nebukadnesari Babilons gao-aob ge ǀape-ai-e sadu ǃoagu ge ǀape; tsî mîǀgui-e sadu ǃoagu ge mîǁgui.

³¹Khâi î du ǃapa ǁnā ǁaes hîa sâba ūhâs, sâusase ǁan hâs ǃoagu, tib ra ǃKhūba mî, ǁnā ǁaes, ǁāgu tsî ǂganamūxūn tsîna ūhâ tamas; ǀguri ǁan hâs ǁga.

³²On ge ǃnaidi âna nîra ǁkhâuǁnâxū kai, tsî ǂguib ǁîb di ǀgoan dib ge nîra ǃnarixū kai. O ta ge tita ǁîna ǂoagu hoaguǀî nîra ǀgaruǀgaru, ǁnān ǂkhomhe hâ ǀûga ūhâna, o ta ge tita ǁgaoǁgaos âna mâ ǃnam-i hoa-e xu nîra ūhā, tib ra ǃKhūba mî.

³³Os ge Hasorsa ǀgirin ǁanǃkhai kai, tsî nîra ǃū-aisa ǃkhai kai ǀamosib kōse. Khoe-i xare-i ge ǁnāpa ǁan tide, tsî khoenôan ǀgôa-i ge ǁîs ǃnâ hâ tide.

³⁴Mîs ǃKhūb dis, kēbo-aob Jeremiaba ge hābas Elammi ǂama, tsoatsoas Sedekiab, Judab gao-aob gaosis dis ǃnâ, mî raǃâ:

³⁵Nētib ra ǃKhūb ǂnubidi diba mî: Mû, tita ge khās Elammi disa nîra khôa, ǁîn ǀgaib di danaxūsa.

³⁶Tsî ta ge haka ǂoaga haka ǁhôadi ǀhommi dide xu Elammi ǂama nîra ūǀkhī, tsî ta ge ǁîna ǁnā haka ǂoadi ǃnâ nîra ǀgaruǀgaru, tsî ǁae-i, ǁî-e ǃoan Elammi di doeǁgabēsana sī tama hâ-i xare-i nîra ǀkhai.

³⁷Tita ge Elamma khākhoen ân di ais aiǃâ nîra ǂkhabuǂâi kai, tsî ǁnān, ǀoms âna ra ôan di ais aiǃâ; tsî ta ge tsū-e ǁîn ǂama nîra ūhā, ǀgamsib ti ǁaib diba, tib ra ǃKhūba mî. Tsî tita ge gôaba ǁîna nîra sîǃgon, ǁîna ta nî hîkākās kōse.

³⁸Tsî ta ge ti tronsa Elammi ǃnâ nîra mâi tsî gao-aob tsî gaosagu tsîna ǁnāpa xu nîra hîkākā, tib ra ǃKhūba mî.

³⁹Xawe i ge ǀunis tsēdi dis ai nîra ī, Elammi ǃkhōsisa ta nîra unu ǃkhaisa, tib ra ǃKhūba mî.