Read Khoekhoegowab Jeremiab 5 Bible Online

Jeremiab 5 - Khoekhoegowab bible

Jeremiab 5

¹ǃGûǃnâma du re ǃâgu Jerusalems diga, î du kō, î du ǁnâuǃā, î du ǁîs di daogu ai ôa, iseb ǀguiba hâ ǃkhaisa ǂhanuse ra dība, tsî amaba ra ôaba, o ta ge ǁîsa nîra ǀkhom.

²Tsî ǃKhūb a ûitsama ǃkhais ao tin ga mî xawen ra ǂkhabase nū.

³ǃKhūtse, sa mûra amab ai kō tama ra hâ? Sats ge ǁîna ge ǂnau, xawe ǁîn ge tsû-e hō tama ge i; sats ge ǁîna ge hapu, xawen ge ǂgōǀausan nî ǃkhōǃoa ǃkhaisa ge ǂkhā. ǁÎn ge aidi âna ǃhaob ǃgâ-ai ge karokaro, ǁîn ge ǃhobasensa ge ǂkhā.

⁴O ta ge tita: Amasen ge nēna a ǀgâsa, ti ge mî, gâresen ra dī, daob ǃKhūb dib tsî ǂhanub ǁîn Elob diban ǂan tama xui-ao.

⁵Î ta tita kain ǃoa ǃgû, î ta ǁîn ǀkha ǃhoa, ǁîn daob ǃKhūb dib tsî ǂhanub ǁîn Elob dib tsîna a ǂan xui-ao. Xawen ge hoatsama ǃnaoba ge khôa, tsî ǃgae-ūdana ge ǂgaeǃgao.

⁶ǁNā-amagan ra xammi haiǀgoms dib xa ǂnauhe, ǂhiras ǃaub dis ra ǁîna ǀkhauǃā, ǃarub ra ǃādi âna ǃûiǃgâ, ǁîde xu ga ǂoaxa-i hoa-i ra ǀkhauǃāhe, ǁîn ǃûǂamdi go ǂgui, tsî ǁîn di ǁnāǁgôasigu ge kaise go kai xui-ao.

⁷Mati ta kha nēn ǂama nî ǀûba tsi? Sa ôan ra tita ǁnāxū, tsîn ra ǁnān hîa elo taman tawa nū hîa: Tita ge ǁîga ǁâ kaio, o gu ge ǃgamekhôa, tsî ǀai-aodi di omdi ǁga ge ǃkhoe.

⁸ǂÛǁâ hâ ǂkharahāgu khami gu ge ǃnauǁgoaga ra khâi, mâb hoab ra ā ǀgūkhoeb âb di tarasǀî.

⁹Nēti ī xūn ǂama ôaǃnâsa dī ta tide? tib ra ǃKhūba mî. Tsî ti ǀomsa ǀkhaobasens tide nēti ī ǁaeǃnôa-i tawa?

¹⁰ǁÎn di ǂnubiǂgoagu ai ǃapa, î du ǁîga hîkākā, xawe tā dītoa. Dībē ǁîn di ǂgonaga, ǃKhūb di tama gu a xuige.

¹¹Israeli ommi tsî Judab ommi ge îǂhôaoǃnâse tita sîsenū xuige, tib ra ǃKhūba mî.

¹²ǁÎn ge ǃKhūba ǀoa tsî: ǁÎ tamab komo ti ra mî, tsî da kom tsū-i xare-i xa hāǂamhe tideo; gôab kas, ǃâtsūǀkhāb kas hoasa da kom mû tideo.

¹³Tsî kēbo-aogu kom nîra ǂoa kaio, mîs ǁîgu ǀkha hâ tama xui-ao; o gu kom ǁîga ǁnāti nîra hāǂamheo.

¹⁴ǁNā-amagab ra ǃKhūb ǂnubidi di Eloba nēti mî: Sadu nē mîsa ra ǃhoa amaga, mû, tita ge ti mîde sa ams ǃnâ nîra ǀae kai tsî nē ǁaesa nîra hai kai, os ge ǁîna nîra hapu.

¹⁵Mû, tita ge sadu ǂama ǁae-e ǃnūseba xu nîra ūhā, sadu Israeli ommi dido, tib ra ǃKhūba mî: ǀGaisa ǁaes ge a ǁî, ǁîs ge ama kaira ǁaesa, ǁaes gowab âsa du nî ǀūs, tsî tare-en ra ǃhoasa du ǁnâuǃā tidesa.

¹⁶ǁÎn di khāǁgarub ge a ǁkhowa-amsa ǀhoba; hoatsaman ge ǁîna a ǁē-ao.

¹⁷Tsîn ge sadu di ǃgaos tsî sadu pereb tsîna nîra hapu, sadu ôagu tsî sadu ôadi tsînan ge nî ǂûhapu; tsîn ge sa gūn tsî sa goman tsîna nîra ǂûhapu, tsîn ge sa ǂauxûiǂûhais tsî sa ǀnomahais tsîna nîra ǂûhapu. Sadu di ǁaposa ǃādi, ǁîdi aits ǂgomaiǂnûi hâdi, ǁîden ge nîra ǀgâǀgâ gôaba xu.

¹⁸Xawe ta ge tita ǁkhāti ǁnā tsēdi ǃnâ sado dītoaǃari tide.

¹⁹Tsî i ge nîra ī, sadu ga: Tare xū-i ǃaromab kha ǁnâi ǃKhūb sida Eloba nē xūn hoana ge dī-ū da? ti mîo, ots ge satsa ǁîn ǃoa nî mî: Sadu ge tita ǁnāxū tsî ǃhao eloga sadu ǃhūb ǃnâ ǃoabas ǁkhās khami du ge ǃhao khoena nîra ǃoaba, ǃhū-i hîa sadu di tama-i ǃnâ.

²⁰ǂHôa nēna Jakob ommi ǃnâ, î du ǁîna Judab ǃnâ ǁnâu kai, mî rase:

²¹ǁNâu ǁnâi nēsi nēsa, sadu gâre tsî ǁnâuǃāoǃnâ ǁaedo, mûde ūhâ xawe mû tamado, ǂgaede ūhâ xawe ǁnâu tamado:

²²Tita du kha ǃao tide? tib ra ǃKhūba mî. Xare ǀkhū du tide ti ais aiǃâ? Tita hîa ǁkhaeba huriba nî ǁkhaese ge ǂnûiba ta, ǀamo ǀkharise ǁîbab īǂam tidega. Tsî ǀō rase gu ga ǃgabigu âba gon, xawe gu ge xū-e dī ǁkhā tide, tsî ǂkhupi gu ka, xawe gu ge ǁîba īǂam tide.

²³Xawe nē ǁaes ge ǁnāǁgôaxa tsî mâǃoaxa ǂgaoba ūhâ; ǁnāǁgôa tsîn ge ǁîna ge ǃgûbē.

²⁴Tsîn ge ǂgaob ân ǃnâ mî tama hâ: A da nēsi ǃKhūb sida Eloba ǃao, ǁnāb ǀapiba ra māba, haiǃkharub tsî ǃnaresib tsîkha ǁîb ǁaeb ai, ǁnāb wekhegu ǂnûihe hâ ǁaegu ǃgaos diga ra ǀkhae daba.

²⁵Sadu ǂhanuoǃnâsigu ge ǁnā xūna ra ǁkhaedawa, tsî ǁoren âdu ge ǃgâiba ra ǂkhā du.

²⁶Eloxoresan ra ti ǁaes ǃnâ hōhe xui-ao, mâ-i hoa-i ân ra ǂui, aniǃkhō-aob ra dī xase; ǁîn ra ǁgaoǁgaosa ǁnoa-e-e ǁgui, ǁîn ra khoena ǃkhō.

²⁷Ani-oms hîa aniǃnôan xa ǀoa hâs ǁkhās khami di ge ǁîn omde gāxaǃnâsib xa ǀoa hâ; ǁnā-amagan ge kai tsî ge ǃkhū.

²⁸ǁÎn ge a kausa, ǁîn ge a ǂkhanu, ǁîn ge dīgu ǂkhabasib diga ǃnā hâ, ǂhanuǂhanuǃkhaiden ge ǁîna ǂhanuǂhanu tama, ǂhanuǂhanuǃkhais ǃoaǀgôan disa xawe, xawen ra ǃgâiǃgâ, ǁkhātin ge ǂhanub ǂhâ hân diba ǀgoraǃgâ tama hâ.

²⁹Nēti ī xūn ǂama kha tita ôaǃnâ ta tide? tib ra ǃKhūba mî. Ti ǀomsa kha ǁnâi ǀkhaobasens tide, nē ǁaes khami ī ǁaeǃnôadi tawa!

³⁰ǃHuriǃhurisa tsî ǁgaiǁgaisa ǃkhais ge ǃhūb ǃnâ ra ī.

³¹Kēbo-aogu ge ǂkhabase ra kēbo, tsî pristergu ge ǁîgu ǃomma xu ra gao, tsî ti ǁaes ra ǁî ǃkhais xa ǃgâibahe. Xawe tare-e du nî dī, ǀams ga hā ǃnubai?