Read Khoekhoegowab Jeremiab 50 Bible Online

Jeremiab 50 - Khoekhoegowab bible

Jeremiab 50

¹ǁNā mîs, ǃKhūb ge Babilons ǃoagu tsî Xaldeaǁîn ǃhūb ǃoagu kēbo-aob Jeremiab di ǃoabasa xu ǃhoas:

²Aoǁnâ re ǁaedi ǁaegu, î du ǁnâu kai, î du ǃkhauba ǃkhā; ǁnâu kai î du ǁî ǃkhaisa tā gaugau, î du: Babilons ge ūhe hâ; Beli ge tao hâ, Merodaxi ge ǃhuri hâ, ǁgôa-elogu ân ge tao hâ, ǁgai-elogu ân ge ǂkhū hâ, ti mî.

³ǁAes ǁîs ǃoagu ra ǂoaxa ǀapasa xu xui-ao, ǁîs ge ǃhūb âsa nîra ǃgaroǃhū kai, ǁansabe-i xare-i ǁîb ǃnâ nîra ǀkhais kōse; khoena xu ǀgoan kōsen ge ǁîna ǁhâxū tsî doebēxū hâ.

⁴ǁNā tsēdi ǁkhādi ǃnâ tsî ǁnā ǁaeb ǁkhāb ain ge, tib ra ǃKhūba mî, Israeli ôan, tsî Judab ôan tsîna ǀhûpe nîra hā, ā garu rasen ge ǃKhūb, ǁîn di Eloba nîra ôa.

⁵Sionsan ge ǁîna nîra dîǃgâ, ais âna daob ai nēxopa unuhe hâǃâ. Hā î da ǃKhūba sī ǁaeǁaesen ǀamo ǃgaeǀhao-i tātsē ǀuruhe tide-i ǀkha.

⁶Ti ǁaes ge kā hâ gū ge i; ǃûi-aogu ân ge ǁîna ge ǂgaeǂhapu, ǁîgu ge ǁîna ǃhomgu ǃoa ge ǂgaeǂguisī. ǁÎn ge ǃhomma xu ǃnoms ǃoa ge ǃgû, ǁîn ge ǁgoeǃkhais âna ge ǀuru.

⁷ǁÎna ge hōn hoan ge ǁîna ge hapu; tsî khākhoen ân ge: Sida ge ǀhapi-i xare-e ūhâ tama hâ, ti ge mî, ǁîn ge ǁore amaga, ǃKhūb ǃoagu, ǂhanu-aisib di ǁanǃkhaib ǃoagu, ā, ǃKhūb ǁîn îgu di ǃâubasenni ǃoagu.

⁸ǁHâǂoa Babilons ǁaeguba xu; î du Xaldeaǁîn di ǃhūba xu ǃgûǂoa, î du pirin gūn aiǃâ garun khami ī.

⁹Mû, tita ǀhaos kai ǁaes disa ǀapas di ǃhūba xu ǂkhaiǂkhaikhâi, tsî Babilons ǃoagu nîra ūhā xui-ao, ǁîn ge ǁîs ǃoagu nîra ǂhomisen os ge nîra ūhe. ǁÎs di ǂāgu ge ǃgari ǁē-aob digu xase nîra ī, ǀguib xareb ge ǀkhaiǃomse oahā tide.

¹⁰Tsî Xaldeab ge ǁkhâuǁnâse nîra ī; ǁîba ga ǀâǀhanan hoan ge nîra ǁâ, tib ra ǃKhūba mî.

¹¹Sadu ge ǃgâiaǂgao amaga, dâb xa du ge urikhâi amaga, sadu ti ǀumis ǁkhâuǁnâ-aodo, sadu ge kau amaga, ǃû hâ tsâus khami tsî ǀgaisa hān khami du ge ā amaga.

¹²Nētis ge sadu îsa kaise ge tao; sado ge ǁoras ge taob xa ge dāhe. Mû, ǁîs ge ǃhaodi di ǀunise ī ǃgaroǃhūb, ǂnâsa ǃkhaib tsî ǃū-aisa ǃkhaise.

¹³ǁGôasib ǃKhūb dib ǃaromas ge ǁîsa ǁanǃnâhe tide, tsîs ge ǃgaroǃhūse nî hâhâ. Babilonsa ga ǃgû-īǀkhā-i hoa-i ge burugâ, tsî nîra ǃhō si ǁîs di ǁnora-ain hoan ǂama.

¹⁴Babilons ǂnamipe ǂhomisen, sadu khāsa ra ǂgaeǃnâdu hoado. ǁKhâu ǁîs ǃnâ î du ǂāga tā sâu, ǁîs ge ǃKhūb ǃoagu ǁore xuige.

¹⁵Dâ ǁîs ǂama, sadu, ǁîs ǂnamipe hâdo! ǁÎs ge māǁnâsen hâ xuige, ǁîs ǃgaoǃgaogu ge ge ǁnā, ǁîs ǂnubiǂgoagu ge khôaǁnâhe hâ. ǃKhūb di ǀkhaob a nēba xuige, ǁîsa ǀkhao, î du ǁîsa dī-ū, ǁîs ge dī xase.

¹⁶Babilonsa xu ǃhomǂui tsoro-aob tsî ǁnāb sikelsa ǃgaoǁaeb ai ra sîsenūba. ǁGâiǀā ra gôaba xu an oa, mâ-i hoa-e ǁî-i ǁaes ǃoa, î-i ǁhâ mâ-i hoa-e ǁî-i ǃhūb ǃoa.

¹⁷Israeli ge gūb xamgu xa saurubēhe hâba. ǂGurob ǁîba ge hapub ge gao-aob Asiriab diba; tsî ǀunis aib ge Nebukadnesari, Babilons gao-aoba ǁîb ǂkhōga ge xâu.

¹⁸ǁNā-amaga, nētib ra ǃKhūb ǂnubidi dib Israeli Eloba mî: Mû, tita ge ôaǃnâ gao-aob Babilons dib ǂama tsî ǃhūb âb ǂama, tita ge ôaǃnâ khami gao-aob Asiriab dib ǂama.

¹⁹Tsî tita ge Israela ǁkhawa nîra ūǁaru, ob ge Karmeli ai nîra ǃû tsî Basani ǃnâ; os ge ǀoms âba Efraimmi tsî Gileadi tsîkha di ǃhommi ai nîra ǁâ.

²⁰ǁNā tsēdi ǃnâ tsî ǁnā ǁaeb aib ge, tib ra ǃKhūba mî, Israeli di ǂhanuoǃnâsiba nîra ôahe, xaweb ge nîra ǀkhai, tsî Judab di ǁorena, xawen ge hōhe tide; tita ǁîn hîa ta ge ǃgau kaina nîra ǀûba xui-ao.

²¹ǃHūb Merataims dib ǃoagu ǃgûǃapa, ǁîs ǃoagu tsî ǁansaben Pekods din ǃoagu. ǁÎra khaoǃgâ hîkākā, îts ǀâxare, tib ra ǃKhūba mî, îts dī tita ge satsa mîmān hoana.

²²Toroǁnae-i ge ǃhūb ǃnâ hâ, tsî ama kai ǂkhôa-e!

²³Matis kha hamers ǃhūbaib hoab disa ǁhāǁnâhe tsî khôaǂkhūǂkhūhe hâ! Matis kha Babilonsa burugâxū kai hâ ǁaedi ǁaegu!

²⁴Tita ge sasa ǁnoa-e ge ǁguiba amagas ge ǃkhōhe hâ, sas Babilonse, ǀūs a hîa; sas hōhe tsî ǁkhāti ǃkhōhe hâ, ǃKhūb ǃoagus ge ǃkham amaga.

²⁵ǃKhūb ge ǁui-oms âba ǁkhowa-am tsî sîsenūdan ǁîb ǁgôasib dina ge ūǀkhī, nēb a sîsenni ǃKhūb ǂnubidi di ǃKhūb diba xui-ao, Xaldeaǁîn di ǃhūb ǃnâ.

²⁶Hā ǁîb ǃoagu hoa ǀkhāga xu, î du sâu-omgu âba ǁkhowa-am, î du ǁîba ǃhoroǃgaeǀkhādi xase ǀgabo-aigu. Î du ǁîba ǀâxare, tāb ǃgauro-i xawe-e ūhâ.

²⁷ǃGam ǁîb ǁgōgu hoaga; a gu ǂāhe gu nîga ǁgôa, tsūba gu, ǁîgu di tsēs ge go hā xuige, ôaǃnâs âs di tsēsa.

²⁸Dommi ǁhâ gen tsî ûi gen dib ge hâ Babilons ǃhūba xu, ǂhôab nîse ǀkhaos ǃKhūb sida Elob dis, ǀkhaos ǁîb tempeli disa.

²⁹ǁNâukaisen Babilons ǃoagu, sago ǁkhâu-aogo, sago khāsa ra ǂgaeǃnâgo hoago, î go ǁîsa ǁgoeǂnamipe, î go khoe-i xare-i âna tā ûi kai. ǁÎsa dīdawa-am ǁîs sîsenni ǃoa, î du ǁîsa dī-ū ǁîs ge dīn ǃoa; ǁîs ge mâǃoaxase ge sîsen ǃKhūbǀî, Israeli di ǃAnubǀî.

³⁰ǁNā-amaga gu ge ǂkhamkhoegu âsa nîra ǁnā ǁîs daogu ai; tsî ǁîs toro-aogu hoagu ge ǁnātsē nîra ǁō, tib ra ǃKhūba mî.

³¹Mû, tita ge nî hāǂam si, sas ǃguriǂgaoxase, tib ra ǃKhūb, ǂnubidi di ǃKhūba mî, sa tsēs go hā xui-ao, ǁnā ǁaeb ǁîb ǃnâ ta nîra ôaǃnâ siba.

³²ǃNubais ge ǃguriǂgaoxasa ǃnôa tsî nîra ǁnā, tsî khoe-i ǁîsa nîra ūkhâi-i ge nîra ǀkhai; ā tita ge ǀae-e nîra khau ǁîs ǃādi ǃnâ, ǁî-i ge ǁîs ǂnamipe ǁgoe ǃādi hoade nîra ǂhubi.

³³Nētib ra ǃKhūb ǂnubidi diba mî: Israeli ôan tsî Judab ôan tsîn ge ǀhûpe ge ǁgâiǀāhe hâ i, tsî ǁîna ge ǃkhōn hoan ge ǁîna ge ǃkhōǀgara, tsîn ge ǁîna oresa ge ǂkhā.

³⁴Xawe ore-aob ân ge a ǀgaisa; ǃKhūb ǂnubidi dib, tib ge ǀon hâ. ǁÎb ge ǁîn ǂnoaguǃkhaisa amase nîra ǂnoaguǃganu, ǃhūbab ǁîba nî sâ kaise, tsî Babilons ǁansabenab nî sâoǃnâ kaise.

³⁵Gôaba ab Xaldeaǁîn ǂama hā! tib ra ǃKhūba mî, tsî Babilons ǁansaben ǂama, tsî ǁîs gaosagu ǂama tsî ǁîs gā-aigu ǂama!

³⁶Gôaba ab ǂhumi-aon ǂama hā, în gâre. Gôaba ab ǁîs di ǁē-aogu ǂama hā, î gu ǃhuri.

³⁷Gôaba âb ǁîs hān ǂama hā, tsî ǁîs kunidi ǂama, tsî habagusa ǂguib, ǁîs ǁaegu hâb ǂama, în tara kai. Gôaba ab ǁuigu âs ǂama hā î gu hîǀhuruhe.

³⁸ǀKhurusiba ab ǁgamgu âs ǂama hā î gu ǂnâ! ǃGaohesa īgu di ǃhūb a xuige, tsîn ra ǁgaiǁgaisa ǁgôa-elogu xa ǃkhau.

³⁹ǁNā-amagan ge ǁaixa ǀgurun tsî ǃgaugu tsîna Babilons ǃnâ nîra ǁan, ǁkhātin ge ǀamina ǁîs ǃnâ nîra ǁan. Tsî khoen ge hâǃkhai-i xare-e ǃaruǀî ǁnāpa ūhâ tide tātsēs kōse. Tsîs ge ǁanǃnâhe tide ǃhaosa xu ǃhaos kōse.

⁴⁰Elob ge Sodoms tsî Gomoras tsîra tsî ǀgūkhoen âra dawaǃkhupu khami, tib ra ǃKhūba mî, ǁnās ǁkhās xase i ge khoe-i xare-e ǁnāpa ǁan tide; tsî khoen ôan ǀgôa-i xare-i ge ǁîs ǃnâ hâ tide.

⁴¹Mû, ǁaes ge ǃgoaxa ǀapasa xu, ama kai ǃhaosa, tsî ǀgaisa gao-aogu ge ǃhūbaib ǀkhâuǀamde xu ra ǂkhaiǂkhaikhâihe.

⁴²Khās tsî ǁhâigôab tsîran ge ǁîna nîra sîsenū; ǁîn ge a ǀkhomoǃnâ, tsîn ge ǀkhom tide. ǁÎn di ǀōb ge hurib dib khami nîra ǀō, tsîn ge hāgu ai nîra ǃgapi; tsî toroǃkhamaob khami ǂhomisen hâ, torodī-ū sib nîga, sas Babilons ǀgôase.

⁴³Gao-aob Babilons dib ge gommi âna ǁnâuo, o kha ge ǃomkha âba ge ǃopo. Ob ge ǂōǂōsib xa ge ǃkhōhe tsûb xa, ǁora ra taras dib axase.

⁴⁴Mû, xammi Jordanǃāb di haiǀgomsa xu ra ǂoaxa khamib ge ǁîba ǁaposa ǃkhais ǃoagu nîra ǂoaxa. Tita ge ǁîna ǀgui mûsǀapirob khami ǁnā ǃkhaisa xu nîra ǃkhoeni kai tsî ǁî ǃkhaisa ǃkhōǂuibahe hâ-i, ǁî-e ta ge tita ǁîs ǂama nîra mâi. Tariba ǁnāb, tita ǀkha ǀguiti-ība, tsî tariba ǁnāb, tita nî ǂgaoba? Tsî tariba ǁnā ǃûi-aob, ti ais aiǃâ nî mâ ǁkhāba xui-ao?

⁴⁵ǁNā-amaga ǁnâu ǃKhūb di ǀape-ais, ǁîb ge Babilons ǂama ǀapesa, tsî ǁîb ǀapedi, ǁîb ge Xaldeaǁîn di ǃhūb ǂama ūde. Gūn di hoan xa ǂkhari-i on ge nîra ǃkharabēhe; ā ǁanǃkhais ge ǁîn ǂamǃnâ nîra hîǀhuruhe.

⁴⁶ǀŌb Babilons di ūhes dib xab ra ǃhūbaiba ǂgubi tsî ǃau-ās ra ǁnâuhe, ǁaedi hoadi ǃnâ.