Read Khoekhoegowab Jeremiab 51 Bible Online

Jeremiab 51 - Khoekhoegowab bible

Jeremiab 51

¹Nētib ra ǃKhūba mî: Mû, tita ge Babilons ǃoagu ǁgaoǁgaosa ǂoa-e ra ǂkhaiǂkhaikhâi, tsî ǁnā ǁansaben tita ǃoagu ra khâin ǂgaob ǃnâ.

²Tsî tita ge Babilonsa ǁgara-aoga nîra sîba, ǁîsa nîra ǁgaraga tsî ǃhūb âsa nîra ǀkhaiǀkhaiǃnâga; ǂkhabab di tsēs ai gu ge ǁîga mâ ǀkhāb hoaba xu ǁîs ǃoagu nîra hâ.

³Ab ǁkhâu-aoba ǁnāb khāsa ra ǂgaeǃnâb, ǁâtanib âb ǃnâ ra ǀgapiǀgapisenniǀî khās âba ǂgaeǃnâ. Î du ǂkhamkhoegu âsa tā sâu, î du ǁîs ǂnubis hoasa ǀâxare.

⁴În ǃgamhe hâna ǃhūb Xaldeaǁîn dib ǃnâ ǁgoe, tsî ǁhâiǃganuhesana ǁîs di daogu ai.

⁵Israeli tsî Judab tsîkha ge ǁîkha Elob, ǃKhūb ǂnubidi dib xa ǁîkha di ǃhūb ǀhapis xa ǀoa hâ xawe, Israeli di ǃAnub xa ǃoatarase hâ kaihe tide.

⁶ǁHâǂoa Babilons ǁaeguba xu, î du mâ-i hoa-i âdo ǁî-i ǀomsa ore! Î du ǁîs ǂhanuoǃnâsib ǃnâ tā ǃhomǂuihe: Nēb ge ǁaeb, ǃKhūb ǁîsa ra ǀkhaoba, ǃoaǂuis hâ-es ra ǃkhōǃoaba.

⁷Babilons ge ǃhuniǀuriǀgabi ge i, ǃKhūb ǃomǁae, ǃhūbaib hoaba ra āǀhoro kaisa. ǁAedi ge ǁîs ǂauxûib xa ā amaga di ge ge ǃkhau.

⁸ǃHaeses ge Babilonsa ǁnā tsî ge ǂkhū. Ā ǁîs ǂama, î du ǁîs tsûba balsemma ūba; ǀnîsis nî ǂgau xuige.

⁹Sida ge Babilonsa ge ǂuruǂuru, xawes ge ǂgau tama hâ; ǁîsa du ǁnâi ǁnāxū, î-i mâ-i hoa-i âda ǁî-i ǃhūb ǃoa ǃgû, ǁîs ǀgoraǃgâs ra ǀhommi kōse sī tsî ǀgapise hâ ǃâudi kōse ra ǃapa xuige.

¹⁰ǃKhūb ge sida ǂhanu-aisiga ge ūǀkhī; hā î da Sions tawa sîsenni ǃKhūb sida Elob diba ǃhoa.

¹¹ǂĀga ǀāǀā, î du khōsikhōga ǁāǁā ǃKhūb ge gagas Mediab gao-aogu disa ge ǂkhaiǂkhaikhâi, ǂâibasens âb ge Babilons ǃoagu hâ, ǁîsab nî hîǀhuru ti. Nēs ge ǀkhaos ǃKhūb dis, ǀkhaos ǁîb tempeli disa.

¹²ǃKhauba ǃkhā Babilons ǂnubiǂgoagu ai, î du ǃûisa ǀgaiǀgai, î du ǃûi-aoga mâi, î du ǁgoeǃgâ-aoga ǁgoe kai; ǃKhūb ge ǂâibasenni ges ǁkhās khami ge dī, Babilons ǁansaben ǂamab ge ǃhoan hoana.

¹³Sas ǀoasa ǁgamgu tawa ǁan hâs, sas ǁuixase, sa ǀams ge go hā, sa ǀgaus sa xūǃgunuxasib dis go ǀoa.

¹⁴ǃKhūb ǂnubidi dib ge ǁîb ǀoms tawa ge nū: Khoen ǂhomn kōse ǂguin ǀkha ta ge tita sasa nî ǀoaǀoa, xawen ge sas ǂama dâxase nîra ǂgaiǀîgu, ti.

¹⁵ǁNāb ǃhūba ǀgaib âb ǀkha ge kurub, ǃhūbaiba gā-aisib âb ǀkha ge ǁāǁāb, tsî ǀhomma ǁnâuǃāb âb ǀkha ge ǃāǂuiba,

¹⁶ǁîb ga dommi âba ǀō kaio o i ge ǀō-i ǁgamgu di-e ǀhommi ǃnâ hâ; tsî ǁîb ra hurisa ǃkhū kai ǃhūbaib ǀkhâuǀamsa xu. ǁÎb ra napaga ǀapiba dība, tsîb ra ǂoaba ǀkhī kai ǁîb ǁui-omga xu.

¹⁷Mâ khoe-i hoa-i ge go, ǁnâuǃāo, ǂan-i xare-e i ūhâ tamas kōse; mâ ǃhuniǀurikuru-aob hoab ge tao hâ ǃgaohesa īb âb a ǂhumi xui-ao, tsî gaga-i xare-i ǁîb ǃnâ a ǀkhai xui-ao.

¹⁸ǁAuxūgu ge ǁîga, ǂgaeǂhapus di sîsenaiga; ôaǃnâs ân di ǁaeb ain ge nîra kā.

¹⁹Jakob di amǃnâs ge ǁîn dis khami ī tama hâ, ǁîb a hoan Kuru-ao xui-ao, tsî Israeli ge ǃgaob ǁîn ǀumis diba; ǃKhūb ǂnubidi dib, tib ge ǀon hâ.

²⁰Sats ge hamerse ība te tsî toroǀāxūse tsî sa ǀkha ta ge ǁaede ge ǂkhūǂkhū, tsî sa ǀkha ta ge gaoside ge hîkākā;

²¹sa ǀkha ta ge tita hāb tsî ǁîb ǃgapi-aob tsîkha ge ǂkhūǂkhū, tsî sa ǀkha ta ge kunis tsî ǁîs ai hân tsîna ge ǂkhūǂkhū;

²²sa ǀkha ta ge aob tsî taras tsîra ge ǂkhūǂkhū, kairab tsî ǂkhammi tsîkha, tsî sa ǀkha ta ge ǂkhamkhoeb tsî ǂkhamkhoes tsîra ge ǂkhūǂkhū,

²³sa ǀkha ta ge ǃûi-aob tsî ǁîb gūn tsîna ge ǂkhūǂkhū, tsî sa ǀkha ta ge ǃhanasîsenaob tsî ǁîb gomagu tsîna ge ǂkhūǂkhū, tsî sa ǀkha ta ge ǃhūǃkhōmâi-aogu tsî ǂamkhoegu tsîga ge ǂkhūǂkhū.

²⁴Xawe Babilons tsî Xaldeab ǁansaben hoana ta ge tita ǁîn ǂkhabasib, Sionsan ge sîsenūb hoaba sadu di mûdi aiǃâ nîra mādawa-am, tib ra ǃKhūb mî.

²⁵Mû, tita ge nîra hāǂam tsi, sats ǁgaoǁgaosa ǃhomtse, sats ǃhūbaib hoaba ra ǁgaoǁgaotse, tsî tita ge ǃommi âtaba saǀî nîra ǀhōǂui tsî ǃhaoga xu nîra gabaǁnâ tsi, tsî khau hâ ǃhomse nîra mâi tsi.

²⁶Tsîn ge satsa xu ǀui-i xare-e ǁhôaǀuise ū tide, tsî ǀui-i ǃgaoǃgaos di-i xare-e, sats nî ǀamose xū tamase ī xui-ao, tib ra ǃKhūba mî.

²⁷ǃKhā ǃkhauba ǃhūb ǃnâ! Xâi ǀgapadasa ǃhaodi ǁaegu! ǃHaode khai ǁîs ǃoagu, ǂgaiǀhû ǁîs ǃoagu gaosidi Ararati didi tsî Minib didi tsî Askenab didi tsîde. Toroǂamkhoeba mâi ǁîs ǃoagu; hāga hā-ū ǁîs ǃoagu ǀkhâuxa ǂhomn khami.

²⁸ǁAede khai ǁîs ǃoagu, Medieb gao-aogu tsî ǁîgu ǃāǃkhōmâi-aogu tsî ǁîgu ǂamsagu, ā ǁîgu gaoǂam hâ ǃhūb hoaba.

²⁹ǃNubaib ge ǃhūbaiba ǀkhū tsî nîra tsû, mâ ǂâis ǃKhūb ǂâidi dis hoas mâǁapo hâ xui-ao Babilons ǃoagu, Babilons ǃhūbab nî ǃgaroǃhū kaise, ǁansabe-i xare-i a ǀkhais kōse.

³⁰Babilons ǁē-aogu ge ǃkhamǀû hâ; ǁîgu ge ǁaposa ǃkhaidi ǃnâ hâ. ǁÎgu ǀgaib ge ǂkhabu hâ, ǁîgu ge tarare khoedi xase ī hâ. ǁÎgu ge ǁîn ǁanǃkhaide ǂhubi hâ; daoǁkhaegu ân ge khôa hâ.

³¹Nē ǃkhoe-aob ge nau ǃkhoe-aoba nîra ǃkhoeǃoa, nē sîsabeba nau sîsabeba, gao-aob Babilons diba gu nî hōhōse, ǃās âb hoa ǀkhāga xu ūǂgāhe hâ ǃkhaisa,

³²tsî xanu-aidi ge ūhe hâ tsî ǂāxa ǃkhaidi ge khauǃkhūhe hâ, tsî toro-aogu ǃhuri hâ ǃkhaisa.

³³Nētib ra ǃKhūb ǂnubidi dib, Israeli Eloba, mî: ǀGôas Babilons dis ge dāǃnâǃkhaise ī, nēb ge ǁîs nî dāhe ǁaeba; gorose ǂkhari ǁaerob kōse, os ge ǃgaoǁaeb xa nîra hāǂamhe.

³⁴Nebukadnesari, Babilons gao-aob ge tita ge hapu, ǁîb ge tita ge ǂkhūǂkhū, ǁîb ge tita ǀkhaiǃnâ soase ge mâi. ǁÎb ge tita draki xase ge hapu, ǁîb ge ǃnāb âba ti ǃgâiǂûxūn ǀkha ge ǀoaǀoa, ǁîb ge tita ge doeǁgabē.

³⁵ǀGaidīb, tita tsî ti ǁgans ge dī-ūheba ab Babilons ai hâ, tis mî ǁansabes Sions disa. Tsî ti ǀaoba ab ǁansaben Xaldeab din ai hâ, tis Jerusalemsa mî.

³⁶ǁNā-amaga, nētib ra ǃKhūba mî: Tita ge sadu di ǃkhamma nîra ǃkham tsî sadu ǀkhaoba nîra ǀkhao. Tsî tita ge ǁîn huriba ǂnâ kai tsî ǀaus âna nîra ǃkhoro kai.

³⁷Os ge Babilonsa nîra ǀuiǁkhopo, tsî nîra ǀgirin di ǁanǃkhai kai, tsî nîra burugâxū tsî ǃhōxū kai, ǁansabe-i xare-i nîra ǀkhais kōse.

³⁸ǀHûpen ge ǁîna ǂkham xamgu khami ǃguru tsî ǂkham xamron khami nîra ǃgō.

³⁹ǁÎn ga ǀgamo, o ta ge tita ǁîna āxūba mâi-aiǃâ tsî ǁîna nîra āǃgâu kai, dân nîga, xawen ge ǀamo ǂomsa nîra ǁom tsî ǃnoaǂkhai tide, tib ra ǃKhūba mî.

⁴⁰Tita ge ǁîna nîra ǂgaeǂguihā, ǁkhaon ǂāhe ǃgû ran khami, bairagu tsî pirigu khami.

⁴¹Matis kha Sesaxsa ūhe hâ tsî koas ǃhūbaib hoab disa ǃkhōhe hâ! Matis kha Babilonsa burugâxū kai hâ ǃhaodi ǃnâ!

⁴²Hurib ge Babilonsa ge dâuǂam; ǀoasasib ǃgabigu âb dib xas ge ge ǃgū-aihe.

⁴³ǁÎs ǃādi ge ge ǃgaroǃkhai kai, ǂnâsa ǃhū tsî ǃgaroǃhū kai, khoe-i xare-i xa ǁanǃnâhe tamab tsî khoen ôan ǀgôa-i xa ǃgûǃnâǃganuhe tamaba.

⁴⁴Tsî tita ge nîra ôaǃnâ Beli, Babilons tawa hâba, tsî tita ge ams âba xu ǁîb ge hara xūna nîra ūǂui. O di ge ǁaede ǃaruǀî ǁîb tawa ǀhao tide. Babilons ǂnubiǂgoab on ge ǁnā hâ.

⁴⁵ǃGûǂoa, ti ǁaese ǁîs ǁaeguba xu! Î-i mâ-i hoa-e ǁî-i ǀomsa ore, ǀgamsib ǃKhūb ǁaib diba xu.

⁴⁶Tsî ǂgaob âdu ǀnîsi tsau tide, tsî ǃao du tidega, ǁnā gommi ǃhūb ǃnâ nîra ǁnâuheb xa; gommi ge ǀgui kurib ǃnâ nîra hā, tsî ǁnās khaoǃgâ nau kurib ǃnâ tsî ǀgaidīb ge ǃhūb ǃnâ nîra hâ nē gaosaba nau gaosab ǃoagu.

⁴⁷ǁNā-amaga kō, tsēdi ge nîra hā, o ta ge tita nîra ôaǃnâ ǃgaohesa īgu Babilons digu ǂama, ob ge ǁîs ǃhūb hoaba nîra tao; on ge ǃgamhesan hoan âsa ǁîs ǁaegub ǃnâ nîra ǁnā.

⁴⁸O kha ge ǀhommi tsî ǃhūbaib tsîkha tsî ǁîkha ǃnâ hân hoana Babilons ǂama nîra dâ, ǀapasa xu gu ge hîǀhuru-aoga ǁîsa nîra hāba xui-ao, tib ra ǃKhūba mî.

⁴⁹Babilons ge Israeli ǃgamhesan di ǁnāse ge ī i, ǁnās ǁkhās xasen ge ǃgamhesan ǃhūb hoab dina Babilons ǂama nîra ǁnā.

⁵⁰Sadu, gôaba ge ûixūdo, ǃgûbē î du tā mâ! ǃKhūb xa ǂâi ǃnūseba xu, îs Jerusalemsa sadu ǂgaob ǃnâ khâi.

⁵¹Sida ge tao hâ, ǃharaxūb xa da ge ǁnâu xui-ao, taob di ǀapab xas ge sida aisa ge ǃkhōhe, ǃhaokhoen ge ǃanusigu ǃKhūb ommi digu ǂama hā amaga.

⁵²ǁNā-amaga mû, tsēdi ge ǃgoaxa, tib ra ǃKhūba mî, o ta ge tita nîra ôaǃnâ ǁîs di ǃgaohesa īgu ǂama, tsî ǁōǁōsase tsuihe hân ge ǃhūb hoab ǃnâ nîra ǃgae.

⁵³Babilons ga ǀhommi ǃoa ǃapa tsî ǀgaib âs di ǀgapibas ga ǁapoǁapo, xawes ge tita xu hîkākā-aon xa nî hāǂamhe, tib ra ǃKhūba mî.

⁵⁴Dommi ǃaus dib ra Babilonsa xu ǀkhī, tsî kai ǂhôasa Xaldeaǁîn di ǃhūba xu.

⁵⁵ǃKhūb ra Babilonsa hîkākā xui-ao, tsîb ge ǂkhupiba ǁîsa xu nîra kā kai. ǁÎs di ǃgabigu ge kai ǁgamgu xase nîra ǀō; ǂkhupib ǁîs ǃaub dib ge nîra kai.

⁵⁶Hîǀhuru-aob ra ǁîs ǂama, Babilons ǂama hā xui-ao; tsî ǁîs ǁē-aogu ge nîra ǃkhōhe; ǁîs khādi ge nîra khôahe. ǃKhūb mādawa-ams di Elob ge ǁîsa ǂanǂansase nîra mādawa-am.

⁵⁷Tsî tita ge ǁîs gaosagu tsî ǁîs ǃhūǃkhōmâi-aogu tsî ǁîs ǂamkhoegu tsî ǁîs ǁē-aogu tsîga nîra ākhanu kai; o gu ge ǀamo ǂomsa nîra ǁom tsî ǃnoaǂkhai tide, tib ra Gao-aob ǃKhūb ǂnubidi dib, ti ǀon hâba mî.

⁵⁸Nētib ra ǃKhūb ǂnubidi diba mî: ǁNā ǂnubiǂgoab Babilons dib ge ǀgui ǃnās ai nîra ǀkhaiǀkhā kaihe, tsî ǁîs di ǀgapi ǁāgu ge ǀaes ǀkha nîra ǂhubihe; ǁaedi nî ǁaupe sîsen tsî ǃhaodi nî ǀaesa sîsenba tsau di nîga, ti.

⁵⁹ǁNā mîs kēbo-aob Jeremiab ge Serajab, Nerijab ôab, Maxsejab ôaba, a mîmāsa, Sedekiab, Judab gao-aoba xub ge Babilons ǃoa ǃgû ǃnubai hakaǁî kurib ǁîb gaosis dib ǃnâ, tsî Serajab ge sâǃkhaib mûǂamao.

⁶⁰Tsî Jeremiab ge ǁnā ǂkhabab, Babilons ǂama nî hāba ǂkhani-i ǃnâ ge xoa, nē mîdi Babilons ǃoagu xoahe hâdi hoade.

⁶¹Tsî Jeremiab ge Serajab ǃoa ge mî: Babilons tawats ga sīo, kō îts nē mîdi hoade khomai.

⁶²Ots ge nî mî: O ǃKhūtse, sats ge nē ǃās ǃoagu ge ǃhoa, sats nî ǁîsa ǃhūǃnoma ti, ǁansabe-i xare-i nî ǀkhais kōse, khoe-e xu ǀgoa-i kōse, îs ǀamo ǃū-aisa ǃkhaise ī, ti.

⁶³Tsî i ge nîra ī, nē ǂkhanisats ga khomaitoa ǃnubaits ge ǀui-e ǁîs ai ǃgae tsî Eufrati ǃnâ nî aoǂgā si.

⁶⁴Îts mî: Nētis ge Babilonsa nîra dūǂgâ tsî ǁkhawa ǀkhī tide, ǁnā tsūb ǁîs ǂama ta nî ūhāb ǃaroma, on ge nîra ǂkhabu. Nēs kōse mîdi Jeremiab dide.