Read Khoekhoegowab Jeremiab 52 Bible Online

Jeremiab 52 - Khoekhoegowab bible

Jeremiab 52

¹Sedekiab ge ǀgamdisiǀguiǀa kurixa ge i, gao-ao kaib ge ǃnubai. Tsîb ge disiǀguiǀa kuriga ge gaosîsen Jerusalems ǃnâ tsî ǁîb îs ge Hamutal ti ge ǀon hâ i, Jeremiab Libnas dib di ôasa.

²Tsîb ge ǃKhūb mûǁae a ǂkhabana gere dī, Jojakimmi gere dīn hoan khami.

³Tsî i ge nēti ge ī, ǃKhūb di ǁaib ge Jerusalems tsî Judab tsîra ǃoagu khâi ǃkhaisa, ǁînab ge ais âba xu aoxūs kōse. Tsîb ge Sedekiaba Babilons gao-aoba ge mâǃoa.

⁴Tsî i ge ge ī khoeseǁî kurib ǁîb gaosis dib ǃnâ, disiǁî ǁkhâb ǃnâ disiǁî tsēs ǁkhâb dis ai, ob ge Nebukadnesari Babilons gao-aoba Jerusalems ǃoagu ge hā, ǁîb tsî ǁîb di ǂnubis hoasa, tsî ǁîsa ge xāǂgā, tsî gu ge ǁîs ǂnamipe ǁaposa ǃkhaide ge ǂnubi.

⁵Nētis ge ǃāsa ge xāǂgāhe disiǀguiǀaǁî kurib gao-aob Sedekiab dib kōse.

⁶Khoeseǁî tsēs hakaǁî ǁkhâb dis ai, ǃâtsūǀkhāb ge ǃās ǃnâ kai tsî ǁaes ǃhūb dis ge pere-e ūhâ tama hâ i,

⁷ǃnubais ge ǃāsa ge khôaǃkhopahe, o gu ge toro-aogu hoaga ǃhū tsî tsuxuba ǃāsa xu ge ǂoa, ǀgam ǂnubiǂgoakha gao-aob ǃhanab tawa hâkha ǁaegu garu daoba-ū, Xaldeaǁîgu ǃās ǂnamipe hâ hîa, tsîn ge ǂgās di daoba-ū ǃaub ǃoa ge ǃgû.

⁸Os ge ǂnubis Xaldeaǁîn disa gao-aoba sauruǃgon tsî Sedekiaba ǂgādi Jerixos didi ai ge saoǁae, os ge ǁîb di ǂnubis hoasa ǁîba xu ge ǀgaru.

⁹Tsî gu ge gao-aoba ǃkhō tsî ǁîba Babilons gao-aob ǃoa, Riblas ǁga ge ǂgaeǂguisī Hamats di ǃhūb ǃnâ tsîb ge ǁîb ǂama ǁkharaba ge ǃhoaǂui.

¹⁰Tsî gao-aob Babilons dib ge Sedekiab ôaga ǁîb di mûra aiǃâ ge ǃgam, tsîb ge gaosagu Judab digu hoagu ona Riblas tawa ge ǃgam.

¹¹Tsîb ge Sedekiab di mûra ge ǂgī kai, tsîb ge ǁîba ǀgam ǂaiǁkhamkha ǀkha ge ǃgae, nētib ge Babilons gao-aoba ǁîba Babilons tawa ūsī tsî ǃkhō-oms ǃnâ ge ǂnûi ǁîb ǁōtsēs kōse.

¹²ǁNās khaoǃgâ koroǁî ǁkhâb ǃnâ disiǁî tsēs ǁkhâb dis ai, disikhoeseǀaǁî kurib Nebukadnesari, Babilons gao-aob dib, ǃnâb ge Nebusaradanni ǃûiǃgâ-aogu di ǂamsab, Babilons gao-aob di ais aiǃâ mâba, Jerusalems tawa ge sī.

¹³Tsîb ge ommi ǃKhūb dib tsî gao-aob di ommi tsîkha ge khauǃkhū; tsî omdi Jerusalems didi hoadi tsî kai omdi hoadeb ge ǀaes ǀkha ge khauǃkhū.

¹⁴Tsî Xaldeaǁîn ǂnubis hoas, ǃûiǃgâ-aogu di ǂamsab ǀkha hâs, ge Jerusalems ǂnubiǂgoagu hoaga ge khôaǁnâ.

¹⁵Tsî ǁaes ǃnâ hoan xa ǀgâsan tsî naun ǁaes din, ǃās ǃnâ ge ǃgaun tsî ǁnāǁgôasan, Babilons gao-aoba ge ǁaeǁaesenn tsî naun ǂguib din xab ge Nebusaradanni, ǃûiǃgâ-aogu di ǂamsaba, ǃkhōsase ge ūǃgûbē.

¹⁶Xawe hoan xa ǀgâsan ǃhūb din xab ge Nebusaradanni, ǃûiǃgâ-aogu di ǂamsaba ǀnîna ge ǃgau kai, ǂauxûiǂûǃhanasîsenaose tsî ǃhanasîsenaose.

¹⁷ǃAruǀîn ge Xaldeaǁîna ǂaib ǂkhâǃnâgu, ǃKhūb ommi ǃnâ hâgu tsî mâi-aiǃkhaidi tsî ǂaib hurib, ǃKhūb ommi ǃnâ hâb ona ge khôaǁnâ; tsîn ge ǂaib ǁnā xūn diba Babilons ǃoa ge ǃgû-ū.

¹⁸ǁKhātin ge sūdi tsî sîsenbē-ūxūn tsî ǃkhā-ūxūn tsî ǀgapi-ūǃoredi tsî ǀanǀanǃoredi tsî ǂaib soadi ǃoabas ra dī-ūhedi hoadi tsîna ge ūǃgû.

¹⁹Tsî ǃûiǃgâ-aogu di ǂamsab ge ǃoredi tsî ǀanǀansoadi tsî ǀgapi-ūǃoredi tsî sūdi tsî kandelargu tsî ǀanǀanxapadi tsî ǀgabidi tsîna ge ūbē, ǁnān ǃūmû ǃhuniǀuri tsî ǃūmû ǀhaiǀurina.

²⁰ǁNā ǀgam ǂkhâǃnâkha, ǁnā ǀgui hurib tsî disiǀgamǀa ǂaigomagu, ǂnûi-aiǃkhaidi ǃnaga hâgu, gao-aob Salomob ge ǃKhūb omma dībagu tsîna: Nē xūn hoan di ǂaib ge ǀnōheǁoasa ge i.

²¹Tsî ǂkhâǃnâgu xasa: Disiǁkhaisaǀa ǂhâgu kōseb ge ǀgui ǂkhâǃnâba ge ǀgapi i tsî disiǀgamǀa ǂhâga ūhâ tsuri-i ge ǁîba ge hâǂgā, tsîb ge haka ǀkhunugu kōse ge ǁau i, tsî ǀkhaiǃnâ ge i.

²²Tsî kapitels âb, ǁîb ai hâs, ge ǂai ge i, tsî ǀgui kapitels ge koro ǂhâgu kōse ǀgapi ge i tsî ǂgapus tsî granatǂûn ge kapitelsa ge hâǂnamipe hâ i, hoatsama ǂaib ǀguib; tsî nēb khamib ge nau ǂkhâǃnâb ona granatǂûna ge ūhâ i.

²³Tsî granatǂûn ge khoesedisiǃnaniǀa ge i, mâ ǃnammi hoab ai; ǀgaus granatǂûn dis ge ǀguikaidisi ge i ǂgapus ǂnamipe.

²⁴ǁKhātib ge ǃûiǃgâ-aogu di ǂamsaba, Serajab ǀgapipristeri tsî Sefanjab, ǀgamǁî pristeri tsî ǃnona ǃûi-aogu ǁāb digu tsîga ge ū.

²⁵Tsî ǃāsa xub ge omǃoabasabeb, toro-aogu ǂama ge mâihe hâ ib, tsî hû aogu, ǁnāgu gao-aob di aisa ge mûgu, ǃās ǃnâ ge hōhega ge ū tsî ǂamxoa-aob, ǂnubis dib ǁaes ǃhūb disa toroǃoabas ǃaroma gere xoamâib, tsî ǃnanidisi aogu ǃhūb di ǁaes digu ǃās ǃnâ ge hōhegu tsîna.

²⁶Tsî Nebusaradanni, ǃûiǃgâ-aogu di ǂamsab ge nēga ūo, ob ge ǁîga Babilons gao-aob ǃoa ge ūsī Riblas ǁga.

²⁷Tsî gao-aob Babilons dib ge ǁîga ǂnau tsî ge ǃgam Riblas tawa, Hamat ǃhūb ǃnâ. Nētib ge Judaba ǁîb ǃhūba xu ǃkhōsase ge ūǃgûhe.

²⁸Nēs ge ǁnā ǁaes, Nebukadnesari xa ge ǃkhōsase ūǃgûbēhesa: Hûǁî kurib ǃnâ ǃnonaǀoadisi ǀgamdisiǃnonaǀa Jodeǁîna.

²⁹Disiǁkhaisaǀaǁî kurib Nebukadnesari dib ǃnâb ge ǁkhaisakaidisi ǃnonadisiǀgamǀa ǀomde Jerusalemsa xu ge ǂgaeǂguibē;

³⁰ǀgamdisiǃnonaǀaǁî kurib Nebukadnesari dib ǃnâb ge Nebusaradanni, ǃûiǃgâ-aogu di ǂamsaba, Jodeǁîn xa hûkaidisihakadisikoroǀa ǀomde ǃkhōsase ge ūǃgûbē. ǀOmdi hoadi ge hakaǀoadisi tsî ǃnanikaidisi ge i.

³¹ǁNās khaoǃgâ i ge ǃnonadisihûǀaǁî kurib ūǃgûbēhes Jojaxinni, Judab gao-aob dis ǃnâ disiǀgamǀaǁî ǁkhâb ǃnâ, ǀgamdisikoroǀaǁî tsēs ǁkhâb dis ai ge ī, Evil-Merodaxi, Babilons gao-aob ge ǂguro kurib ǁîb gaosis dib ǃnâ Jojaxinni, Judab gao-aoba ǀgapiǀgapi tsî ǁîba ǃkhō-omsa xu ūǂui ǃkhaisa.

³²Tsîb ge khoexaǃnâse ǁîb ǀkha ǃhoa tsî ǂnû-aiǃnaos âba ǁnā gao-aogu, Babilons tawa ǁîb ǀkha hâgu di ǂnû-aiǃnaos ǂamǃnâ ge ǂnûi.

³³Tsîb ge ǃkhōsis saran Jojaxinni dina ge ǀkharaǀkhara, tsîb ge hugaǀgui ais âb aiǃâ gere pereǂû ǁîb di ûitsēdi hoadi kōse.

³⁴Tsî ûixūn âb xasa: ǁÎb ge Babilons gao-aob xa mîmâihesa ûixūna ge māhe, mâ tsēs hoas di amǃnâsa tsēkorobe ǁîb ǁōtsēs kōse, ǁîb ûitsēdi hoade.