Read Khoekhoegowab Jeremiab 6 Bible Online

Jeremiab 6 - Khoekhoegowab bible

Jeremiab 6

¹ǀGuiǃhū sadu, Benjaminni ôado, Jerusalems ǁaeguba xu, î du ǀgapadasa xâi Tekoas tawa, î du ǀaeǃkhau-e ǃkhā Bet-Hakerems tawa! ǂKhaba-i ǀapasa xu ra ǂui xuige, ama kai ǂkhôa-e.

²Tita ge Sionni ôasa nî hîkākā, ǁnā îsa tsî anusa ǀgôasa.

³Xawe gu ge ǃûi-aoga ǁîs ǃoagu nîra hā ǁîgu di gūdi ǀkha; ǁîgu ge tentomde ǁîs ǂnamipe nîra ǂnaumâi, tsî gu ge mâb hoab âga ǁîb ǃkhaisa nîra ǃûtoa.

⁴Toroba khai ǁîs ǃoagu! Khâi î du doeǃapa tsēǃgâǁaeb ai! Tsūba da, tsēs go toa amaga, ǃuisomgu ra ǁhai amaga.

⁵Khâi î du doeǃapa tsuxub ǃnâ, î da ǁîs di î-omga hîǀhuru!

⁶Nētib ra ǃKhūb ǂnubidi diba mî xuige: Haide ǁhāǁnâ, î du ǁkhuiba aokhâi Jerusalems ǃoagu. ǁÎs ge ǁnā ǃās, ôaǃnâhe nîrasa; ǁîs ǁaegub ǃnâb ge ǁgâiǀāb ǀguiba hâ.

⁷ǀAus ra ǁgam-i âsa ūǀkhī khamis ra ǁîsa ǂkhabasib âsa ūǀkhī; ǁgaris tsî hîkākās tsîra ge ǁîs ǃnâ ra ǁnâuhe; tsûsasib tsî ǁnorab tsîkha ge hugaǀgui ti ais aiǃâ hâ.

⁸ǂGōǀaukaisen re, Jerusalemse, îs ti ǀomsa sasa xu tā ǂgaedawasen, î ta tā ǃū-aisa ǃkhai kai si tsî ǁanǃnâhe tama hâ ǃhū kai si.

⁹Nētib ra mî ǃKhūb ǂnubidi diba: ǁÎn ge ǃgau kan Israeli dina ǂōrisase nîra ǃora ǂauxûiǂûhais ra dīhe xase; îts sa ǃomma ǂauxûiǂûn di ǃora-aob ra dī xase ǁkhawa ǀharudiǀî ǀhō.

¹⁰Tari-e ta ǃhoaǀî tsî nî ǃkhâikhom, ǁnâun nîga? Mû, ǁîn ǂgaes ge ǃgaohe tama hâ, on ge a ǃgâ ǁoa. Mû, mîs ǃKhūb dis ge ǁîna ǃharaxūxūse ība; on ge ǁîsa tura tama hâ.

¹¹ǁNā-amaga ta ge ǃKhūb di ǁgôasib xa ǀoa hâ, tsî ta ge a ūdawasen ǁoa. O ta ge ǁîba nî ǁhōǂui daob ai hâ ǀgôaron ǂama, tsî ǀhû hâ ǂkhamkhoegu tsîn ǂama; aob tsî taras on ge ǁkhāti nîra ǃkhōhe, kairab, ǁnāb tsēdi xa dāhe hâb tsîn ǀkha.

¹²Tsî ǁîn omdi ge nîra ǀkhara khoen di kai, ǃhanagu tsî taradi tsîn ǀkha, tita ge ǃommi âtaba nîra ǀhōǂui xui-ao, nē ǃhūb di ǁansabenǀî, tib ra ǃKhūba mî.

¹³ǂKham-i âna xu kai-i ân kōsen ra mâ-i hoa-i âna xūǃgunuxasiba sîsenū; tsî kēbo-aoba xu pristeri kōsen ra mâ-i hoa-i âna ǂkhabasiba dī xui-ao.

¹⁴Tsîn ra ǂkhôas ti ǁaes ôas disa supuǂâixase ǂuruǂuru: ǂKhîb, ǂkhîb ti ra mîǃâ, ǂkhî-i xare-i a ǀkhai hîa.

¹⁵Xare taon ra, ǁgaiǁgaisanan ra dī amaga? Hî-î hoaragasen ge tao tama hâ, tsîn ge ǁkhāti taob xa dākaisensa a ǀū. ǁNā-amagan ge ǁnā ran ǃnâ nîra ǁnā. Tita ga ǁîna ôaǃnâ ǁaeb ain ge nîra ǃnôa tib ra ǃKhūba mî.

¹⁶Nētib ra ǃKhūba mî: Mâ daogu ai, î du kōǂnamipe; î du hugakam daoga dîǃgâ, mâb a ǃgâi dao ǃkhaisa, î du ǁîb ǃnâ ǃgû, o du ge sadu ǀomsa sâba nîra hōba. Xawen ra mî: Sida ge ǁîb ai ǃgû tide, ti.

¹⁷Tita ge ǁkhāti ǃûi-aoga ge mâiba du, î du xâiǁnâs ǀōb ai ǃgaoǃgâ, ti ra mîse, xawen ra mî: Sida ge ǃgaoǃgâ tide, ti.

¹⁸ǁNā-amaga ǁnâu du re, sadu ǁaedo; î du ǁnâuǃā, sadu ǀhû hâdo, ǁîn ǃnâ i tare-e hâ ǃkhaisa.

¹⁹ǁNâu sats ǃhūbaitse: Mû, tita ge ǂkhaba-e nē ǁaes ǂama nîra hā kai, ǁîn di ǂâidi di ǂûtani-e: ǁÎn ti mîdi ai ǃgaoǃgâ tama hâ, tsî ti ǂhanuban ra aoxū xui-ao.

²⁰Mâ xū-i ǂamab kha ǃgâihamxūba tita nî hāba Skebasa xu, tsî hoan xa ǃgâi kalmusa ǃnū ǃhūba xu! Sadu khauǁguibadi ge ǃgâiba te tama hâ; tsî sadu ǂāǁguibadi ge tita ǂkhonba tama hâ.

²¹ǁNā-amagab ra ǃKhūba nēti mî: Mû, tita ge nē ǁaesa ǁgonǁgonǂgaodi hoade ra ǂnûiba, on ge ǁîdi xa nîra ǃnôa, ǁgûgu tsî ǀgôan tsîn, ǀgūkhoeb tsî ǁîb horesab tsîn, ǁîn ge nîra kā.

²²Nētib ra ǃKhūba mî: Mû, ǁae-i ge ǃhūb ǀapas diba xu ra ǀkhī; tsî kai ǃhao-i ge ǃhūbaib ǀkhâuǀamde xu nîra ǂkhaiǂkhaihe.

²³Khās tsî ǁhâigôab tsîran ra sîsenū; ǁîn ge a oraǂgaoxa, tsîn ge ǀkhomxaǂgaosi-e dī tide. ǁÎn dommi ge hurib khami nîra ǀō, tsîn ge hān ai nîra ǃgapi; ǁîn ge torodīsa ǁāǁābahe hâ aob khami ī, sas, Sionni ǀgôas ǃoagu.

²⁴Sida ge gommi âba ǁnâuo, o gu ge sida ǃomga ge ǃopo. O da ge ǂōǂōsib xa ge ǃkhōhe, ǁora ra tara-i axase.

²⁵Tā ǃaub ai ǃgûǂoa, î du tā daob ai ǃgû, khākhoeb di gôab hâ xuige, tsî ǃhurib ge sa ǂnamipe hâ.

²⁶Ti ǁaes di ôase, ǁhō-e ana îs tsaob ǃnâ ǃhoposen; ǃoa ǀguise ǃnae hâb ǃaromas axase, au ǃgae-aisa, ǃhaese da hîǀhuru-aob xa nîra hāǂamhe xuige.

²⁷Tita ge satsa ti ǁaes ǃnâ ǃûiǂgō-omse ge mâi, ǁaposa ǃkhaise, ǁîn daobats nî ǂan tsî ǃâitsâga.

²⁸Hoan xa ǁnāǁgôaxan di ǁnāǁgôaxan ge a ǁî, ǀhoe-aose ra tanisenǃâ. ǁÎn ge a ǂai tsî a ǂnūǀuri, hoatsaman ge a hîkākā-ao.

²⁹Soasoab ge khauǃkhū hâ, ǂgoaǀurib ge ǀaes xa hapuhe hâ, ǁauseb ge tsunitsuni-aoba nētikō ǂōrisase ge tsunitsuni, ǂkhaban ūǁnâhe tama hâ xui-ao.

³⁰Aoxūhe hâ ǀhaiǀuri-i tin ra ǂgaihe, ǃKhūb ge ǁîna aoxū xui-ao.