Read Khoekhoegowab Jeremiab 7 Bible Online

Jeremiab 7 - Khoekhoegowab bible

Jeremiab 7

¹Nēs ge mîs, Jeremiaba ǃKhūba xu ge hābasa, mî raǃâ:

²Mâ ǃKhūb ommi di ǁāb ǃnâ, îts ǁnāpa nē mîsa ǂgaiǂui îts mî: ǁNâu ǃKhūb di mîsa, sats Judats hoatse, sadu nē ǁāga ū ra ǂgâdo, ǃKhūba du nî ǀgoreǀîse.

³Nētib ra ǃKhūb, ǂnubidi dib, Israeli Eloba mî: Sadu daogu tsî sadu dīga ǃgâiǃgâi, o ta ge tita nē ǃās ǃnâ nîra ǁan kai du.

⁴Tā ǂkhaba mîdi ai ǂgomaiǂnûi, mî rase: ǃKhūb di tempeli, ǃKhūb di tempeli, ǃKhūb di tempeli ge nēba!

⁵Xawe amase du ga sadu daogu tsî sadu dīga ǃgâiǃgâio, amase du ga ǂhanuse dīo, mâ aob hoab tsî ǁîb ǀgūkhoeb tsîkha ǁaegu,

⁶ǃhao khoeb, ǃoaǀgôab tsî ǃoataras tsîna du ga ǁgâiǀā tama io, tsî ǀhapio ǀaoba du ga nē ǃās ǃnâ ǂnâxū tama io, tsî ǀkhara eloga du ga sadu ǁgaoǁgaose saoǃgon tama io,

⁷o ta ge tita sado nē ǃās ǃnâ nē ǃhūb, sadu ôana ta ge māb ǃnâ nîra ǁan kai ǀamosiba xu ǀamosib kōse.

⁸Mû, sadu ge ǂkhaba mîdi, hîa harebe ǁoadi ai ra ǂgomaiǂnûi.

⁹ǃNarits nî, ǃgamts nî, ǃgamekhôats nî, ǂkhabase nūts nî, tsî Baalga ǀanǀanbats nî, ǁîgu tsî ǀkhara elogu hîats a ǀūga saoǃgonts nî?

¹⁰Tsî ǁnās khaoǃgâ hā tsîts nē ommi, ti ǀons ǃoa ra ǂgaiheb ǃnâ ti ais aiǃâ mâ tsî nî mî: Sida ge orehe hâ nē ǁgaiǁgaisan hoana da nî dīse?

¹¹Nē ommi, ti ǀons ǃoa ra ǂgaiheba kha sadu mûǁae ǃgamaon ǁhāba? Mû, tita on ge ǁî ǃkhaisa go mû, tib ra ǃKhūba mî.

¹²ǃGû ǁnâi nēsi ti ǃkhais Silos, ti ǀonsa ta ge aibe ǁîs ǃnâ ǁan kai hâ is ǃoa î du mû, ǁnāpa ta ge ǂkhabasib ti ǁaes Israels dib ǂama dīn hoana.

¹³Tsî nēsi, nē sîsengu hoaga du ra dī amaga, tib ra ǃKhūba mî, tsî tita ge sadu ǃoa gere ǃhoa, ǃnauǁgoaga khâi tsî ra ǃhoaǃâ, xawe sadu ge ǁnâu tama ge i, tsî tita sado gere ǂgai, xawe du ge ǃeream te tama i amaga.

¹⁴ǁNā-amaga ta ge tita nē ommi, ti ǀons ǃoa ra ǂgaiheb, sadu ǁîb ai ra ǂgomaiǂnûib, tsî nē ǃkhais, tita ge sadu tsî sadu îna mās tsîna nîra sîsenū, Silosa ta ge sîsenūs ǁkhās xase.

¹⁵O ta ge tita sado ti aisa xu nîra aoxū, tita sadu ǃgâsan hoan, Efraimmi suriba ge aoxūs ǁkhās khami.

¹⁶Satsa ǁnâi tā nē ǁaesa ǀgoreba, îts ǁîna tā ǃaus tsî ǀkhomasa dība, îts tā tita ǃkhoehāba, tita ǁnâu tsi tide xuige.

¹⁷Xare mû tamats hâ, Judab ǃādi ǃnâ tsî Jerusalems daogu ai tare-en ra dīsa?

¹⁸ǀGôan ra ǀaena sā-ai, tsî ǁgûgu ǀaesa ra khau, tsî taradi ge ǀâpereba ra ǂhomi Melexets, ǀhommi disan nî îsase dīhe hâ amperega dībase, tsî ǀkhara elogan nî ǂnâǁguibade ǁguibase, titan nî tsûaǂgao kaiga.

¹⁹Titan ra tsûaǂgao kai? tib ra ǃKhūba mî. ǁÎ-aitsaman kha xare dī-ūsen tama hâ, ǁîn ais di taotaose?

²⁰ǁNā-amagab ra ǃKhūb ǃKhūba nēti mî: Mû, ti ǁaib tsî ti ǁgôasib tsîkha ge nîra ǁhōǂuisen nē ǃās ǂama tsî khoen ǂama tsî ǀgoan ǂama tsî ǃaub hain ǂama tsî ǃhūb ǂûn ǂama, on ge nîra khau tsî ǀarihe tide.

²¹Nētib ra ǃKhūb ǂnubidi dib, Israeli Eloba mî: Ū sadu khauǁguibade ǂāǁguibadi ǀkha, î du ǁgan-e ǂû!

²²Tita ge sadu îgu ǀkha, Egipteǃhūba xu ta ge ǁîna ǂgaeǂguiǂuisa xu ǃhoa tama hâ tsî khauǁguibadi tsî ǂāǁguibadi di ǃkhaidi xa mîmā-e mā tama ge hâ i.

²³Tsî ta ge nē ǃkhaisa ǁîna mîmā tsî ge mî: ǁNâu ti domma, o ta ge tita Elose nîra ība du, tsî sadu ge tita ǁaese nîra ība, î du ǁnā daob tita sado nî mîmāb hoab ǃnâ ǃgû, î du ǃgâibahe.

²⁴Xawen ge ǁnâu tsî ǂgaes âna ǂō tama ge i, tsîn ge ǀapeǀape-aidi ǃgâiǂâisendi ǁîn ǂkhaba ǂgaob didi ǃnâ ge ǃgû, tsîn ge khaosǀî ge oa tsî aiǃâb ǃoa ī tama ge i.

²⁵ǁNā tsēs ǁîs ai gu ge sadu îga Egipteǃhūba xu ǃgûǂoasa xu nētsēs kōse ta ge ti ǃgāgu kēbo-aoga ra sî tsēkorobe ǃnauǁgoaga khâi tsî ra sîse.

²⁶Xawen ge tita ǁnâu tsî ǁîn ǂgaesa ǂō tama ge i, tsîn ge ǃaob âna ge karokaro, ǁîn ge ǁîn îgu ǃgâ-ai tsūse ge dī.

²⁷ǁKhātits ge nē mîdi hoade ǁîna nî ǃhoa-ū, xawen ge ǃgâ tsi tide; sats ge ǁîna nî ǂgaiǀî, xawen ge ǃeream tsi tide.

²⁸ǁNā-amga ǁîna mîǀî re: Nēs ge ǁnā ǁaes, ǃKhūb, ǁîn Elob domma ǁnâu tsî ǂgōǀausa ǃkhōǃoa tamasa. Amab ge a ǀkhai, tsîb ge ams âna xu ūǂuihe hâ.

²⁹ǂKhom re danaǀûn âsa, Jerusalemse, îs ǁîna aoxū, îs ǃgae ǀgapi ǃkhaidi ai, ǃKhūb ge ǃhaos ǁîb ǁgôasib disa aoxū tsî ǁnāxū xuige.

³⁰Judab ôan ge ti mûǁae a ǂkhabana dī xuige, tib ra ǃKhūba mî. ǁÎn ge ǁîn ǁgaiǁgaisana ge ǂnûi ǁnā ommi, ti ǀons ǃoa ǂgaihe hâb ǃnâ, ǁîban nî ǀuriǀurise.

³¹Tsîn ge ǀgapigu Tofeti ǃgoaǃnāb Hinommi ôab dib ǃnâ hâb diga ge ǂnubi, ǁîn ôagu tsî ǁîn ôadi tsînan nî khauǃkhūse. Tita mîmā tama tsî ti ǂgaob ǃnâ khâi tamasa.

³²ǁNā-amaga mû, tsēdi ge ǃgoaxa, tib ra ǃKhūba mî, Tofeti tsî ǁkhāti Hinommi ôab di ǃgoaǃnāb tib ǃaruǀî ǂgaihe tidede, tsî ǃGamaon ǃgoaǃnāb tib nîra ǂgaihe ǃkhaisa, tsîn ge Tofeti ǃnâ nîra ǁkhō, ǀnî ǃkhai-i xare-i a ǀkhai amaga.

³³Tsî ǁō hâ sorodi nē ǁaes didi ge anin ǀhommi din tsî ǀgurun ǃhūbaib dina ǂûse nîra ība, tsî khoe-i ǁîna nî ǃhaebē-i xare-i ge nîra ǀkhai.

³⁴Tsî tita ge ǃādi Judab dide xu tsî ǃgangu Jerusalems diga xu nîra ǀû kai dommi dâb diba tsî dommi ǃgâiaǂgaob diba tsî dommi ǃgame-aob tsî ǃgame-aos tsîra diba, ǃhūb ge nîra ǃū-aisa xui-ao.