Read Khoekhoegowab Jeremiab 8 Bible Online

Jeremiab 8 - Khoekhoegowab bible

Jeremiab 8

¹ǁNā ǁaeb ǁkhāb ain ge, tib ra ǃKhūba mî, ǂkhōgu Judab gao-aogu digu tsî ǂkhōgu gaosagu ân digu tsî ǂkhōgu pristergu digu tsî ǂkhōgu kēbo-aogu digu tsî ǂkhōgu Jerusalems ǁansaben diga ǀhobadi âna xu nî ūǂui.

²Tsîn ge ǁîga nîra ǃāǁgui sores aiǃâ tsî ǁkhâb aiǃâ, tsî ǀhommi di ǂnubis hoas, ǁîna ge ǀnam hâ is tsî ǁîsan ge ǃoabas tsî ǁîsan ge saoǃgons aiǃâ; ǁîgu ge ǀhaoǀhaohe tsî ǁkhāti ǁkhōhe tide; ǁîgu ge nîra ǀaru kai ǃhūb ai.

³Tsî khoen ge ǁōba ûib xa nîra ǃkhōǂuibasen, ǃgau ge-i nē ǂkhaba ǃhaos xa nî ǃgau hân di-i hoa-i xa, ǃgau gen di ǃādi hoadi ǁîdi ǃoa ta ǁîna nî doeǁgasīdi ǃnâ, tib ra ǃKhūb ǂnubidi diba mî.

⁴Îts ǃaruǀî ǁîna mîǀî: Nētib ra ǃKhūba mî: Okha, ǁnā tsîts kha sats khoetsa ǁkhawa khâi tide? Kha ǁnāǁgôa tsîts ǁkhawa oa tide?

⁵Tarexas kha ǁnâi nē ǁaes Jerusalems disa hugaǀgui hâhâ ra ǁnāǁgôasi-i ǀkha ra ǁnāǁgôa? ǁÎn ra gāxaǃnâsiba ǃkhōǀgaipe; ǁîn ra ǃhobasensa ǂkhā.

⁶Tita ge ǃgâ tsî ge ǁnâu, ǁîn ra ǂhanu tamana ǃhoa ǃkhaisa. Khoe-i ǁî-i di ǂkhabasib ǂama ǃhausen hâ-i, Tare-e ta ge dī? ti ra mî-i xare-i ge a ǀkhai. Mâ-i hoa-i ge ǃkhoes â-i ǃnâ ra ǃkhoe-oa ǃkhausa ǂkharahāb khami ǃkhammi ǃnâ.

⁷Oivari ǀhommi ǃnaga hâb ge ǂnûibaheb hâ ǁaega a ǂan, tsî ǂnais tsî ǃgoaxareb tsî swabeli on ge hās di ǁaeba a ǂan, xawe ti ǁaes ge ǂhanub ǃKhūb diba a ǀū.

⁸Tsî mati du kha ǁnâi: Sida ge a gā-ai, tsî ǃKhūb di ǂhanub ge sida ǀkha hâ ti ra mî? Mû, amaseb ge ǂkhaba xoaǃammi xoaǂansabegu diba ǁause ra sîsen.

⁹Gā-ain ge tao hâ, ǁîn ge ǃhuri tsî ǃkhōhe hâ; mû, ǁîn ge ǃKhūb mîsa aoxū hâ, mâ gā-aisi-en kha ǁnâi nî ūhâ?

¹⁰ǁNā-amaga ta ge tita taradi âna nauga nîra mā, ǁîn di ǃhanaga ǁnān ǁîga nî hōna. ǂKhariba xu kaib kōsen ge mâb hoab âna a xūǃgunuxa, kēbo-aoba xu pristeri kōsen ra mâb hoab âna ǂkhabasiba dī xui-ao.

¹¹Tsîn ra ǂkhôab ti ǁaes di ôas diba, ama supuse ǂuruǂuru tsî: ǂKhîb, ǂkhîb, ti ra mî, ǂkhî-i xare-i a ǀkhai xawe.

¹²Taon ra xare, ǁgaiǁgaisa xūnan gere dī amaga? Hî-î tao taman ge ǁîna hâ. Taob xa dākaisensan a ǀū: ǁNāxan ge ôaǃnâs ân di ǁaeb ai ǁnā ran ǀkha nîra ǁnā, tib ra ǃKhūba mî.

¹³Tita ge ǁîna amase nîra tsububē, tib ra ǃKhūba mî. ǂAuxûiǂûhais ǂûna kha ǂauxûiǂûhais tawa hâ taman hâ, tsî ǀnomahais ǂûna kha ǀnomahais tawa hâ taman hâ? Ā, haiǂnaren on ge ǁnā hâ, tsîn ge ǁnā mîmādi tita ge ǁîna māde ge ǃûǂam.

¹⁴Tare xū-i ǃaroma da kha ra ǂnûhâhâ? ǀHû, î da ǁaposa ǃādi ǃnâ ǂgâ, î da ǁnāpa sī ǃnō! ǃKhūb sida Elob kom ge ǃnō kai dao tsî tsabaǁgammi ǀkha ge āsi da, ǃKhūb ǃoagu da ge ǁore amaga.

¹⁵Khoen ra ǂkhîba ǃâubasen, xawe ǃgâi-i xare-i ge a ǀkhai, ǂuruǂurus di ǁaeb ge, xawe mû, ǃhurib ǀguib ge hâ.

¹⁶Dansa xus ra ǃharas ǁîn hān disa ǁnâuhe; tsî ǀōb ǂkharahāgu âb ǀgamab dib xab ra hoaraga ǃhūba ǀkhū. Tsîn ra sī tsîn ra ǃhūb tsî ǁîb ǃnâ hân hoana hapu, ǃās tsî ǁîs ǃnâ ǁan hâna.

¹⁷Kō tita ge sadu ǃnâ ǀaon tsî basilisk tsîna ra sî, nūbahesa ra ǂkhāna, tsîn ge sado nîra nâ tib ra ǃKhūba mî.

¹⁸Ti khoakhoasens ge a tsûaǂgao, ti ǂgaob ge ti ǃnâ tsânaǁkhui hâ.

¹⁹Mû, ǃaub ti ǁaes ôas dib ge ǃnū ǃhūba xu hâ: ǃKhūba kha Sions tawa hâ tamab hâ? ǁÎs gao-aoba kha ǁîs ǃnâ hâ tamab hâ! Tare xū-i ǃaroman kha ǁnâi tita ge ǁaiǁai, ǁîn ǃgaoǂuihesa īgu ǀkha, ǃhao khoen di ǁausigu ǀkha?

²⁰ǃGaos ge go ǃgôa-ī, ǁkhunab ge go toa, xawe da ge gorose orehe tama hâ.

²¹Tita ge ǂkhôab ti ǁaes ôas dib ǂama tsû hâ; tita ge ǂnū saran ǃnâ ra ǃgû, ǃhurib xa ta ge go ǃkhōhe.

²²Balsam-e kha hâ tama i hâ Gileadi ǃnâ? ǂGauǂgau-ao-e kha ǁnāpa ǀkhai-e? Tare xū-i ǃaromasa ti ǁaes ôas ǂgau tamasa?