Read Khoekhoegowab Jeremiab 9 Bible Online

Jeremiab 9 - Khoekhoegowab bible

Jeremiab 9

¹Ti danas ga koma ǁgam hâo, ti mûs ga koma ǁgamrogu di ǀau hâo! O ta ga tsēs tsî tsuxuba ti ǁaes ôas di ǃgamhe hâna āba hâ.

²ǃGaroǃhūb ǃnâ ta ga koma ǃgûkhoen omsa ūhâo, o ta ga ti ǁaesa ǁnāxū tsî ǁîna xu doebē hâ, ǁîn hoan a ǃgamekhôa-ao tsî a îǂhôaoǃnâ xui-ao.

³Tsîn ra khās axase nams âna ǂgaeǃnâ ǂhumibǀî; ǂhumib ra ǃnā ǃhūb ǃnâ, amaba tama i tsî; ǁîn ra ǃaruǀî ǂkhabasib xu ǂkhabasiba ǃoa ǃgû; xawe tita ge ǁîna a ǀū, tib ra ǃKhūba mî.

⁴ǂAnbasen du re, mâ-i hoa-e ǁî-i di ǀhōsa-e xu, î du ǃgâsa-i xare-i ai tā ǂgomaiǂnûi re: Mâ ǃgâsab hoab ra gāxaǃnâsib ǀguiba dī, tsî mâ horesab hoab ǀhoes ǀguisa ra hî xuige.

⁵Tsîn gāxaǃnâse ra sîsenūgu, mâb hoaba ǁîb ǀhōsaba, tsîn ge amaba ǃhoa tama hâ. ǁÎn ra nams âna ǂhumigowaba ǁkhāǁkhā, ǁîn ra ǀhupu ǂkhabadīb ǀkha.

⁶Sa ǁanǃkhais ge gāxaǃnâsib ǁaegu hâ; gāxaǃnâsiba xus ge tita ǂansan ra ǂkhāsa tib ra ǃKhūba mî.

⁷ǁNā-amagab ra ǃKhūb ǂnubidi diba nēti mî: Mû, tita ge ǁîna tsunitsuni, tsî nîra ǃâitsâ, mati ta kha ǀkharase a dī ǁkhā ti ǁaes ôas ǂama?

⁸ǁÎn nams ge a ǃgam ra ǂā; ǁîs ra gāxaǃnâse ǃhoa, mâb hoab ra ǀgūkhoeb âba ǂkhîb xa ǃhoaǀî ams âb ǀkha, xawe ǃnāb âb ǃnâb ra ǁnoaga ǁgui.

⁹Nē xūn ǂama ôaǃnâ ta tide ǁîna? tib ra ǃKhūba mî, ǀkhaobasens tide ti ǀomsa, nē ǁaes khami ī ǁaeǃnôa-i tawa?

¹⁰Î ta tita ǃhomgu ǂama ā tsî ǃgaetsoatsoa, tsî ǃoatsana-e ǃgaroǃhūb di ǃûǃkhaidi ǂama. ǁÎn khauǃkhūhe hâ amaga, khoe-i xare-i ǁîna-ū ǃgûǃganu tamas kōse, tsî ǀgoa-i di dommi xaweb a ǀkhai. ǀHommi di anina xu ǀgoan kōsen ge bē hâ; ǁîn ge ge bēǃari.

¹¹Tsî tita ge Jerusalemsa ǀuiǁkhopose nîra ǂnûi, ǀgirin ǁanǃkhaise; tsî ǃādi Judab didi ǁîde ta ge hîǀhurusa ǃkhaise nîra ǂnûi, ǁansabeo ǃkhaise.

¹²Tariba ǁnā gā-ai aob nēna ra ǁnâuǃāba? Tsî tariba a ǁnāb, ǁîb ǁgas ge ǃKhūb di amsa ǃhoaba, ǁî ǃkhaisab nî aoǁnâga? Tarexab ǃhūba hîkākāhe tsî khauhe hâ ǃgaroǃhū-i khami, khoe-i xare-i ǁîba ǃgûǃnâǃganu tamas kōse?

¹³Ob ge ǃKhūba ge mî: Ti ǂhanub, hîa ta ge ais ân aiǃâ ǁîna mâba ǁnāxū tsîn ti domma ǁnâu tsî ǁîb ǃoa tanisen tama amaga.

¹⁴Tsî ǁîn ǂgaob di tsū ǂâibasens ǃoan ge tanisen; tsî Baalgan ǁîn îgu xan ge ǁkhāǁkhāhe khami gere saoǃgon amaga.

¹⁵ǁNā-amagab ra ǃKhūb ǂnubidi dib, Israeli Eloba nēti mî: Mû, tita ge nē ǁaesa alsemma nîra ǂûmā, tsî tita ge ǁîna ǃgāxa ǁgam-e nîra āsi.

¹⁶Tita ge ǁîna ǀūben, ǁîn tsî ǁîn în on ǀū ge in ǃnâ nîra ǀgaruǀgaru, tsî tita ge gôaba ǁîna nîra sîǃgon, ǁîna ta nî hîkākās kōse.

¹⁷Nētib ra ǃKhūb ǂnubidi diba mî: ǃGaoǃgâ, î du ǃgae ra tarade ǂgai, î di hā; î du gā-ai tarade sî, î di ǀkhī.

¹⁸Î di ǃhae î di ǃgaeǂam da, î gu sida di mûde xu ǁgamrogu âda ǂnâ, îb ǀamegu âda xu ǁgamma dâu.

¹⁹Dommi ǃgaes dib ge Sionsa xu ge ǁnâuhe xui-ao: Mati da kha sida hîǀhuruhe hâ! Kaise da tao hâ, ǃhūba da ǁnāxū hâ ǃkhais xa, sida ǁanǃkhaiden aoǁgui hâ ǃkhais xa.

²⁰ǁNâu so re ǃKhūb di mîsa, saso taraso, îs saso ǂgaesa ǃkhōǃoa mîs ǁîb ams disa. Î so saso di ôade ǃgaesa ǁkhāǁkhā; mâs hoas âsa ǁîs di horesasa ǃgaetsanade.

²¹ǁŌb ge sida mûǂuidaodi ǃnâ ge uriǂgâ, ǁîb ge sida î-omgu ǃnâ ge ǂgâxa; ǀgôanab nî ǃās ǃganga xu ǃhomǂuiga, tsî ǂkhamkhoega ǁamaxūǃkhaide xu.

²²Nētib ra ǃKhūba ǃhoa: Ā, ǁō hâ sorodi khoen didi ge ǂhaub ǃgarob ai ǁgoe khami nîra ǁgoe, tsî ǃhoroǃgaeǀkhās, ǃgao-aob khaoǃgâ khoe-i xare-i xa sākhâihe tamase ǁgoes khami.

²³Nētib ra ǃKhūba mî: Gā-ai-e a-i tā ǁî-i gā-aisib xa koasen, tsî ǀgaisa-e a-i tā ǁî-i ǀgaib xa koasen, a-i ǃkhū hâ-e tā ǁî-i ǃkhūsib xa koasen,

²⁴xawe koasen ǂgao ka-e, a-i nēs xa koasen, ǁnâuǃā tsî i tita a ǂan ǃkhaisa, tita a ǃKhū, ǃhūbaib ai ǀkhomxasib tsî ǂhanub tsî ǂhanu-aisib tsîga ra dī ta, nēn ǃnâ ta tita ǃgâiǃgâibasensa ūhâ xui-ao, tib ra ǃKhūba mî.

²⁵Mû, tsēdi ge ǃgoaxa, tib ra ǃKhūba mî, ǁîdi ai ta tita nîra ôaǃnâde, ǃgaohe hân xawe, aikhōba ūhân hoan ǂama.

²⁶Egipteb ǂama tsî Judab ǂama tsî Edommi ǂama tsî Amonni ôan ǂama tsî Moab ǂama tsî ǁnān, ǀûn ân ǀamdi ai ǂkhomhe hân, ǃgaroǃhūb ǃnâ ǁan hân ǂama, ǀūben hoan ge aikhōba ūhâ, xawe Israeli ommi hoab aikhōb ǂgaob diba ūhâ xui-ao.