Read Khoekhoegowab ǃGae-amdi 1 Bible Online

ǃGae-amdi 1 - Khoekhoegowab bible

ǃGae-amdi 1

¹Matis kha ǃāsa ǃū-aisase ǂnôa, ǁnās hîa khoexa ge isa! ǁÎs ge ǃoatara-i khami ī kaihe hâ, ǁnās ǁaedi ǁaegu kai ge is! ǃHūgu ǁaegu gaosa ge is ge ge ǃoaba-ao kai.

²ǁÎs ra hugaǀgui tsuxuba ā, tsî ǁgamrogu âs ra ǂnâ ǁîs di xōkha-ū. ǁÎs ge ǁkhaeǂgao-aob xareba ūhâ tama hâ, ǁîs di ǁâsabegu hoagu ǃnâ. ǁÎs di ǀhōsan hoan ge ǁîsa îǂhôaoǃnâse ge sîsenū; ǁîn ge ǁîsa khākhoe kaiba hâ.

³Judab ge ǃkhōsis ǃnâ ge ǂgâ ǀkhomǀkhomsasib xa tsî ǃoabas di ǂguib xa. ǁÎs ge ǀūben ǁaegu ǁan hâ, xawes sâ-i xare-e ūhâ tama hâ. ǁÎs di ǃgôaǃgonaon hoan ra ǁîsa saoǁae ǂōǃkhaidi ǁaegu.

⁴Daogu Sions digu ge ra ǃoa, khoe-i xare-i kaitsēs ai hā tama xui-ao. ǁÎs di ǁāgu hoagu ge a ǃū-aisa, ǁîs di pristergu ge ra ǀhâimâinǀom, ǁîs di ǂkhamkhoedi ge ǃoa hâ, tsî ǁîs ǂhanis ge aub xa ǀoa hâ.

⁵ǁÎs di mâǃoasaben ge ge dana kai; ǁîs di khākhoen ge a sâsa. ǃKhūb ge ǁîsa ǃoa kai amaga ǃûǂamdi âs di ǂguib ǃaroma. ǁÎs di ôaron ge ǃkhōsis ǃnâ sī ge ǂgâ mâǃoasaben di ais aiǃâ.

⁶Sionni ôasa xub ge ǁîb di ǂkhaisib hoaba ge bē. ǁÎs di gaosagu ge ǁkhaman khami ī, ǃû-aiba hō taman tsî ǂkhabu hâse ǃgôaǃgonaon di ais aiǃâ ra ǃgûna.

⁷Jerusalems ge ǀkhomǀkhomsasib tsî ǃoab âs di tsēdi ǃnâ ra ǂâi ǁnā ǃgâi xūn, hugakam tsēdi ǃnâs ge ūhâ in xa. ǁÎs di ǁaes ra mâǃoasabeb di ǃomma xu ǁnā, tsî hui-ao-i xare-i a ǀkhai hîan ra mâǃoasaben âna ǁîsa ǃgapaǀî tsî ǁîs di ǀunitsēde ra ǃhō.

⁸Jerusalems ge ǃgomse ge ǁore amagas ge khaihe hâ taras khami ī kaihe hâ. ǁÎsa ge ǃgôa hâ in ge nēsi ǁîsa sora hâ, ǁîs di ǀōǀkhāsiban ge mû amaga; ǁîs ra ǁkhāti ǀhâimâinǀom, tsîs ge khaosǀî ge oa.

⁹ǃAnuoǃnâsib âs ge ǁîs di ǂomamǃgâgu ǃnâ hâ; ǁîs ge ǀams âs xa ǂâi tama hâ amagas ge buruburuxase ǃgamse ge ǁgôa, ǁkhaeǂgao-i xare-es ūhâ tamas kōse. ǃKhūtse, ti ǀkhomǀkhomsasiba kōǀî, khākhoeb ra kaikaisen xuige.

¹⁰Mâǃoasabeb ge ǃommi âba ǁîs ra ǂgao xūn hoan ǂama ge ǀhōǂui; ǁîs ge ǁaedi ra ǃanusib âs ǃnâ ǂgâ ǃkhaisa ge mû, ǁnā ǀǁaedi ǁîn xats ge satsa sa ǀhaohâb ǃnân sī tide, ti mîna.

¹¹ǁÎs di ǁaes hoas ra ǀhâimâinǀom pereba ra ôaǃâ; ǁîn ge ǀgapiǃgôasan âna ǂûn ama ge mā, ǀomsan nî khoakhoase. Kō, ǃKhūtse, îts ǃgapaǀî, tita ge ǃharaxūsa ǃkhaisa.

¹²ǁÎ ǃkhaisa ǁae-ū tama du hâ, sadu daoba-ū ra ǃgû-ī du hoado? Kōǂnamipe îts mû, ise ǁnāti ī tsû-i ti tsûb khami ī-e hâ ǃkhaisa, dī-ūhe ta hâb, ǃKhūb ge ǀgamsib ǁîb di ǁaib dib ǃnâ ǃoaǃoa-ū teba?

¹³ǀGapiseba xub ge ǁîba ǀae-e ge sî ti ǂkhōgu, ǁîb ge gaoǂamgu ǃnâ. ǁÎb ge ǀûi-e ti ǂaira ge ǃāǂuiba, ǁîb ge tita khaosǀî ge oa kai. ǁÎb ge tita ge ǃū-aisa kai, tsî ǀaesen kai tsēs hoasa.

¹⁴ǃNaob ti ǃûǂamdi dib ge ǁîb di ǃommi ǀkha ǃgaemâihe hâ, ǁî ge ǂgapuǁaehe hâ. ǁÎdi ge ti ǃaob ai ǃapa hâ, ǁîb ge ti ǀgaiba khôa hâ; ǃKhūb ge tita ǁîna ǃomǁae ge mā, o ta ge tita a khâi ǁoa.

¹⁵ǃKhūb ge ti ǀgaisagu hoaga ti ǁaegub ǃnâ ge dāǃgâ; ǁîb ge ti ǂama ǀhûhâ-e ge ǂgaiǀhû, ti ǂkhamkhoegab nî khôaǂkhūǂkhūse. ǃKhūb ge ǀāǃnâǃoreb ǂkhamkhoes Judab ôas diba gere dāǃnâ.

¹⁶Nē xūn ǃaroma ta ge tita ra ā, ti mûs, ti mûs ra ǁgam-i xa ǂnâ. ǁNā ǁkhaeǂgao-aob ti ǀomsa nî khoakhoab ge tita xu a ǃnū xui-ao. Ti ôaron ge ǃū-ai hâ, khākhoeb ge dā amaga.

¹⁷Sions ra ǃomkha âsa khora, xawe hui-ao-i xare-i ge ǁîsa a ǀkhaiba. ǃKhūb ge Jakob xa ge mîmā, ǁîb ǂnamipe hân nî ǁîb di mâǃoasabe ǃkhaisa; Jerusalems ge ǁîn ǁaegu ǀaesenni âs ǀkha hâ tarase i.

¹⁸ǃKhūb ge a ǂhanu-ai, tita ge ams âba mâǃoaxase ge ība xui-ao. ǁNâu re, saso ǁaeso hoaso, î so mû re ti tsûba. Ti ǂkhamkhoedi tsî ti ǂkhamkhoegu tsîn ge ǃkhōsis ǃnâ ge ǂgâ.

¹⁹Tita ge ti ǁâsaga ge ǂgaiǀî xawe gu ge tita ge kā. Ti pristergu tsî ti kaigu tsîgu ge ǃās ǃnâ ge ǀkhai, ǂûnan ra ôabasen hîa, ǁîn di ǀomsan nî khoakhoase.

²⁰Kōǀî te re ǃKhūtse ǃao ta hâ xuige! Ti ǃnāxūn ra gon. Ti ǂgaob ge ti ǃnāb ǃnâ dawaǃkhunisen hâ, kaise ta ge mâǃoaxase ge i xui-ao. ǃAugab ai ta ge gôab xa ǀgôana ūǀhanahe hâ; ǃnāb ǃnâb ge ǁōba hâ.

²¹ǁÎn ra ǁnâu, ǀhâimâinǀom ta ra ǃkhaisa, xawe ta ge ǁkhaeǂgao-ao-i xare-e ūhâ tama hâ. Ti khākhoen hoan ra ti tsūǃōb xa ǁnâu; tsîn ge ǃgâiaǂgao hâ, sats ge ǁî ǃkhaisa dī ǃkhais xa, xawe sats ga ǁnā tsēs sats ge ǂgaiǂuisa ūǀkhī ǃnubain ge ǁîna tita khami nîra ī.

²²An ǁîn di ǂkhabana ais âts aiǃâ sī; îts ǁîna dī-ū, sats ge tita dī-ū khami ti ǃûǂamdi hoadi ǃaroma. Ti ǀhâimâinǀomdi ge a ǀoasa tsî ti ǂgaob tsau hâ xuige.