Read Khoekhoegowab ǃGae-amdi 2 Bible Online

ǃGae-amdi 2 - Khoekhoegowab bible

ǃGae-amdi 2

¹Matib kha ǃKhūba Sionni ôasa ǁaib âb ǃnâ ǃkhaeǃkhae hâ! ǁÎb ge ǂkhaisib Israeli diba ǀhomma xu ǃhūbaib ai ge aoǁgui; tsî ǁîb ge ǂaiǃnaos ǂaira âb dis xa ǂâi tama ge hâ i ǁaib âb di tsēs ai.

²ǃKhūb ge ǁanǃkhaidi Jakob didi hoade go hapu tsî ǁîde ǃkharesi tama ge i, ǁîb ge ǁaposasigu Judab di ôas diga ge khôaǁnâ ǁgôasib âb ǃnâ, ǁîb ge ǁîga ǃhūba ge tsâǀkhā kai, ǁîb ge gaosis tsî ǁîs di gaosagu tsîna ge ǀuriǀuri.

³ǁÎb ge ǂhubis ǁaib âb dis ǃnâ Israeli di ǁnâb hoaba ge ǁhāǁnâ. ǁÎb ge amǀkhāb ǁôab âba ge ǂgaedawa, khākhoeb ge hā ǃnubai. Tsî ǁîb ge Jakoba ge ǂhubiǀî ǀaes di ǁhabub hîa ra hapuǂnamipeb khami.

⁴ǁÎb ge khās âba ge ǂgaeǃnâ, khākhoeb axase, ǁîb ge amǀkhāb ǁôab âb ǀkha ge mâ i mâǃoa-aob axase, ǁîb nî mûdi ra ǂgao xūn hoana ǃgamse. ǁÎb ge ǁgôasib âba tentoms Sionni ôas dis ǃnâ ge ǁhōǂui ǀae-i axase.

⁵ǃKhūb ge khākhoe-i khami ge ī, ǁîb ge Israela ge hapu. ǁÎb ge ǁîs di î-omgu hoaga ge hapu, ǁîb ge ǁîb di ǁaposasiga ge hîkākā. ǁÎb ge Judab ôas tawa ǃgaes tsî ǃoas tsîra ge ǂguiǂgui.

⁶Tsî ǁîb ge omǂnamib âba ǀgaib ǀkha ge tsurutoa ǃhanab khami; ǁîb ge ǀhûǃkhais âba ge hîkākā. ǃKhūb ge Sions ǃnâ ǁâudīb tsî sâtsēs tsîra ge ǀuru kai, tsî ǁîb ge ǁaib âb di ǁgôasib ǃnâ gao-aob tsî pristeri tsîkha ǃharaxūsase ge aoxū.

⁷ǃKhūb ge altars âba ge ǂhāxu, ǁîb ge ǃanusib âba ge ǃharaxū. ǁÎb ge ǂnubiǂgoagu ǁîs di î-omgu diga khākhoeb ǃomǁae ge mā. ǁÎn ge ǃKhūb di ommi ǃnâ domma ge ǃhâ, ǂnûihe hâ tsēs ǁâudīb dis axase.

⁸ǃKhūb ge ge ǂâibasen hâ i, ǂnubiǂgoab Sionni ôas dibab nî hîǀhuru ǃkhaisa. ǁÎb ge ǀnē-ū tsuriba ge ǂgaeǂam bi, ǁîb ge ǃomma ǂgaedawa tama ge i, hapusa xu; tsî ǁîb ge aiǂnubiǂgoab tsî ǂnubiǂgoab tsîkha ǀhûpe ge ǃoa kai, o kha ge ge ǂkhabu.

⁹ǁÎs di ǁāgu ge ǃhūb ǃnâ ge ǂgâ; ǁîb ge daoǁkhaegu âsa hîkākā tsî ge khôaǂkhū. ǁÎs di gao-aob tsî ǁîs di gaosagu tsîn ge ǁaedi ǁaegu hâ, ǂhanu-i ge a ǀkhai, tsî ǁîs di kēbo-aogu on ge ǃKhūba xu ai-e hō tama hâ.

¹⁰Kaigu Sionni ôas digu ge ǃhūb ai ǂnôa, ǁîgu ge a ǃnōsa; ǁîgu ge danas âgu ai tsaraba ra tsoro, ǁîgu ge ǁhōga ge ana. ǂKham khoedi Jerusalems didi ge danas âde ǃhūb ǃoa ra aoǁnâ.

¹¹Ti mûra ge ǁgamrogu xa hapuhe hâ, ti ǃnāxūn ra ǁhape, ti âib ge ǃhūb ai a aoǂnûisa, ti ǁaes ôas di ǂkhôas ǃaroma, ǀgôan tsî dai ran tsîn ge ǃās di daob ai ra tsanaǁkhui amaga.

¹²ǁÎn ga ǁgûdi ǃoa: Mapa kha ǃhorob tsî ǂauxûib tsîkha hâ? ti mîo, ǁîn ga ǃās di daob ai tsanaǁkhuio ǃgamhesan khami, ǀoms ân ga ǁgûdi di tîǂams ǃnâ ǁhōǂuiseno.

¹³Mâ ǀhûǀguitimî-aona ta kha sasa nî ūhāba? Tare-e ta kha sa ǀkha nî ǂkhō, sas Jerusalems ôase? Tare-e ta kha sa ǀkha nî ǂkhō, ǁkhaeǂgao si ta nîga, sas ǂkhamkhoes Sionni ôase? Sa ǂkhôas ge hurib khami a kai, tari-e sasa ǂuruǂuru ǁkhā?

¹⁴Sa kēbo-aogu ge sasa ǁau tsî ǂhumi xūn ǀguina ge mûba; tsî gu ge ǂhanuoǃnâsib âsa ǂhaiǂhaiǃgâ si tama hâ, sa ǃkhōsisa gu nî ǁkhaedawase, tsî gu ge ǁau ǃkhanagu tsî ǂgaeǂhapun ǀguina sasa ge mûba.

¹⁵ǁNān daoba-ū ra ǃgûn hoan ra ǁamǂam si; ǁîn ra ǃhō tsî ǃnabindana ǀgôas Jerusalems dis ǂama: Nēsa kha ǁnā ǃās, ǁîs xan ge: Hoaragase a îsa, ǃhūbaib hoab di ǃgâiaǂgaos a, ti mîsa?

¹⁶Sa khākhoen hoan ra ǂapenamǃnâǂam si; ǁîn ra ǂnuni tsî ra ǁaninǁgû, ǁîn ra mî: Sida ge ǁîsa go hapu. Nēs ge ǁnā tsēs sida ge ǃâu hâ isa; sida ge ǁîsa go hō, sida ge ǁîsa go mû.

¹⁷ǃKhūb ge ge dī ǁîb ge ǂâibasen hâ ina; ǁîb ge mîs âba ge ǀoaǀoa, ǁîb ge mîmā hâ isa hugasa xu. ǁÎb ge ge khôaǁnâ tsî sâu tama hâ tsî ǁîb ge khākhoeba sas ǂama ge ǃgâiaǂgao kai, ǁîb ge ǁnâb sa mâǃoasaben diba ge ǀgapiǀgapi.

¹⁸ǁÎn di ǂgaob ge ǃKhūb ǃoa ge ǂgai, sats Sionni ôas di ǂnubiǂgoatse, a gu ǁgamroga tsēa tsî tsuxuba ǃārob axase dâuǁgôa; tā sâǃgû îs âutsiǂgares âtsa tā āǀû.

¹⁹Khâi, îts ǃau tsuxuǃûidi di tsoatsoas ǃnâ, sa ǂgaoba ǁhōǂui ǃKhūb di ais aiǃâ ǁgam-i axase. Îts ǃomkha âtsa ǀhōkhâi ǁîbǀî sa ôaron, daogu hoagu di ǂgâǃkhais aiǃâ ǃâs xa tsanaǁkhui hân di ǀoms ǃaroma.

²⁰Kō ǃKhūtse, îts mû tari-ets ge ǁnāti dī ǃkhaisa. Tarade kha ūǀkhīn âdi, ǁnā ǀgôaron, ǁôagu ai ra tanihena, nî ǂû? Xare kha kēbo-aob tsî pristeri tsîkha ǃanusib ǃKhūb dib ǃnâ nî ǃgamhe?

²¹ǂKhamn tsî kain tsîn ge daogu amǃgâ ǃhūb ai ǁgoe; ti ǂkhamkhoedi tsî ti ǂkhamkhoegu tsîn ge gôaba xu ge ǁnā. Sats ge ǁîna ǁaib âts di tsēs ai ge ǃgam; sats ge ǁîna ge ǂā tsî sâu tama hâ.

²²Sats ge ti ǃhuriǃhuri-aide ge ǂgaiǂnamipe, tsēs ǂnûihe hâ ǀgapiǁaeb dis ais axase. O i ge khoe i xare-e ǃKhūb di ǁaib di tsēs ai ûi tsî ǃgau tama ge i; ǁnān tita ǁôakha ai ge tanin tsî kaikain, ǁînab ge ti khākhoeba ge ǃgam.