Read Khoekhoegowab ǃGae-amdi 3 Bible Online

ǃGae-amdi 3 - Khoekhoegowab bible

ǃGae-amdi 3

¹Tita ge ǁnā aota, ǀkhomǀkhomsasiba ge mû ta ǂnauhaib ǁgôasib âb diba xu.

²ǁÎb ge tita ǂgaeǂgui tsî ge ūǃgû, ǃkhaenab ǃnâ tsî ǃnâb ǃnâ tama;

³ǁÎb ge ǃommi âba ti ǃoagu ge unu, ǁîb di ǃommab ge tsēs hoasa ge unu.

⁴ǁÎb ge ti ǁgans tsî ti khōb tsîra ge kaira kai, ǁîb ge ti ǂkhōga ge khôaǂkhūǂkhū.

⁵ǁÎb ge ti ǃoagu ge ǂnubi tsî tsabab tsî ǀhupub tsîkha ǀkha ge hâǂgā te.

⁶ǁÎb ge tita ǃkhae ǃkhaidi ǃnâ ge ǂnûi, ǁnān ǂomxa ǁaeba xu ǁō hân khami.

⁷ǁÎb ge tita ge omǂgan, ǂoaxa ǁoa ta as kōse; ǁîb ge ti ǂaiǃgae-ūdana ge ǃgomǃgom.

⁸Tsî ta ge ǂgai tsî ǃau, xaweb ge ǂgaera âba ti ǀgoresa xu ǂganam.

⁹ǁÎb ge ti daoga ge ǂnubiǂgan ǁhāǂuihesa ǀuidi ǀkha; ǁîb ge ti daoga ge gamagama.

¹⁰ǁÎb ge tita ǃapi ra bēr-i ase ība, xammi ǂganǃgâsa ǃkhaidi ǃnâ ǁgoeb ase.

¹¹ǁÎb ge ti daoga ge ǁkhaebē, tsî tita ge ǂkhūǂkhū, ǁîb ge tita ge ǃū-ai kai.

¹²ǁÎb ge khās âba ge ǂgaeǃnâ, tsî tita ǂāba ǁhoraxūse ge ǂnûiba.

¹³ǁÎb ge ǂāgu âba ti ǃnaira ǃnâ ge ǂgâ kai.

¹⁴Tita ge ti ǁaes hoasa ge âixū kaiba, tsî ǁîn di ǁnaetsana tsēs hoasa.

¹⁵ǁÎb ge tita ausigu ǀkha ge ǁâǁâ, ǁîb ge tita alsemmi ǀkha ge āǁō kai.

¹⁶ǁÎb ge ti ǁgûna ǁkhaeǀuirodi ǀkha ge ǂkhūǂkhū; ǁîb ge tita tsaob ǃnâ ge ǁgâiǂgā.

¹⁷Tsî sats ge ti ǀomsa ǃnūse ǂkhîba xu ge ǂhābē; tita ge ǃgâiba ǀuru hâ.

¹⁸ǃNubai ta ge tita ge mî: Ti ǀgaib ge go kā, ti ǃâubasens ǃKhūb ai ta ge ūhâ isa.

¹⁹ǂÂi ti ǀkhomǀkhomsasib tsî ti ǃkhōsis xa, alsemmi tsî tsabab xa.

²⁰Ti ǀoms ra ǁî xūn xa îbe ǂâi, tsîs ra ti ǃnâ ǃgamǃgamsen.

²¹ǁÎ xūna ta ǂgaob ǃnâ ra ū amaga ta ge nî ǃâubasen.

²²ǀKhomxasigu ǃKhūb digu ǀguigu xas ge, hîǀhuruhe tama da hâsa, ǀkhomxaǂgaosigu âb toa tamasa.

²³ǁÎgu ge mâ ǁgoas hoas ai a ǀasa, sa îǂhôasib ge a kai.

²⁴ǃKhūb ge a ti amǃnâ tis ra ti ǀomsa mî, ǁnā-amaga ta ge tita ǁîb ai nî ǂgomaiǂnûi.

²⁵ǃKhūb ge ǁnān ǁîba ǃâu hâna a ǃgâiba, ǁnā ǀoms, ǁîba ra ôasa.

²⁶ǃGâi ǃkhais ge sats khoets ra ǃâubasen, tsî ǃKhūb di ǃgâiǃōba ǃnōbasa.

²⁷Aoba i ge a ǃgâiba, ǃnaob âbab nî ǂkhamsis âb ǃnâ tanisa.

²⁸Ab ǀguri ǂnû îb ǃnō, ǁîb xab ga ǁîba ǁgui-aihe ǃnubai.

²⁹Ab ams âba tsarab ǃnâ ǂgā, îb: ǀNîsis ge ǃâubasensa hâ, ti mî.

³⁰Ab xōb âba ǁnāb ǁîba ga ǂnauba mā, îb ǃharaxūb xa ǁâ.

³¹ǃKhūb ge ǂhāxū tsi tide ǀamosib kōse.

³²ǁÎb ga ǃoaǃoao, ob ra ǀkhom kaisib ǁîb di ǀkhomxaǂgaosigu dib ǃoa.

³³ǁÎb ge khoen ôan ǀgôana ǂgaoba xu ǃoaǃoa tama hâ xui-ao.

³⁴ǃKhōhesan ǃhūbaib din hoan ga ǁîb di ǂaira ǃnâ dāǂkhūǂkhūheo,

³⁵ǂhanub aob dib ga gamagamaheo, Hoan xa ǀGapib di ais aiǃâ,

³⁶khoeb ga ǂnoaguǃkhai-i âb ǃnâ ǂkhabase sîsenūheo: ǁÎ ǃkhaisa mûb kha tide ǃKhūba?

³⁷Tariba ǁnāb, xū-e ra mîba tsî i ra ī, ǃKhūb ga ǁî ǃkhaisa mîmā tama io?

³⁸Hoan xa ǀGapib di amsa xu ǂoa taman hâ, ǃgâin tsî ǂkhaban tsîna?

³⁹Tarexasa kha ǁnâi khoeb ûitsamab ra ǀarasa? A-i mâ-i hoa-e ǁî-i di ǁoren ǂama ǀara.

⁴⁰A da sada di daoga ôaǃnâ, î da ǃâitsâǃganusen, î da ǃKhūb ǃoa ǃhobasen.

⁴¹Î da sada di ǂgaoga ǃkhōkhâi tsî ǃomgu tsîna Elob, ǀhommi ǃnâ hâb ǃoa, mî raǃâ:

⁴²Sida ge ge ǁore, tsî da ge mâǃoaxa ge i, ǁnā-amagas ge sats ge sâu tama isa.

⁴³Sats ge sida ǁaib ǀkha ge ǃgū-ai tsî sats ge sida ge ǃgôaǃgon; sats ge sida ge ǃgam, sats ge sâu tama ge i.

⁴⁴Sats ge ǀnanu-i ǀkha ge ǃgū-aisen, ǀgore-i ge ǃganu ǁoa is kōse.

⁴⁵Sats ge sida ǀnapuǂuixūse tsî aoxūxūse ǁaedi ǁaegu ge ǂnûi.

⁴⁶Sida di khākhoen hoan ge sida ǃoagu ge ǂapenamǃnâ.

⁴⁷ǃAob tsî āb tsîkha xa da ge sida ge hāǂamhe, hîǀhurus tsî khôaǂkhūǂkhūs tsîra xa.

⁴⁸ǁGamǃārogu khamis ra ti mûsa ǁhō, ǂkhôas ti ǁaes ôas dis ǃaroma.

⁴⁹Ti mûs ra ǂnâ, tsîs ge a ǂnâǀû ǁoa, sâ-i a ǀkhai amaga,

⁵⁰ǃKhūb nî ǀhomma xu kōǁnâ tsî ǁîsa mûs kōse.

⁵¹Ti mûs ra ti ǀomsa ǃoaǃoa ǀgôadi ti ǃās didi hoadi ǂama.

⁵²ǀHapiose ti khākhoese in, ge tita anita axase ǃgarise gere sauruǃgon.

⁵³ǁÎn ge ti ûiba tsaus ǃnâ ge ǃhomǂui, tsîn ge ǀui-e ti ai ge ao;

⁵⁴ǁgamgu ge ti danasa ge dâu-īǀkhā, o ta ge tita: Tita ge ǃgaoǁnâhe hâ ta, ti ge mî.

⁵⁵ǃKhūtse, tita ge ǀons âtsa hoan xa ǃgam tsausa xu ge ǂgaiǀî.

⁵⁶Sats ge ti domma ge ǁnâu; tā ǂgaes âtsa gaugau ti ǀhâimâinǀomsa xu, ti ǂgaisa xu.

⁵⁷Sats ge ǀgū ge i, satsa ta ge ǂgaiǀî tsēs ai, sats ge: Tā ǃao, ti ge mî.

⁵⁸ǃKhūtse, sats ge ǂnoaguǃkhaidi ti ǀoms dide ge ǂnoagu; sats ge ti ûiba ge ore.

⁵⁹ǃKhūtse, Sats ge ǁnā ǂkhabasib, titan ge dī-ūba ge mû. ǀGoraǃgâ re ti ǂhanuǂhanuǃkhaisa!

⁶⁰Sats ge ǁîn di ǀkhaos hoasa ge mû, ti ǃoagu hâ ǂâidi ân hoana.

⁶¹ǃKhūtse, sats ge ǃharaxūs âna ge ǁnâu, ǁîn di ǂâidi hoadi ge ti ǃoagu hâ.

⁶²Amǁgaugu ǁnān ti ǃoagu ra khâin diga tsî ti ǃoagun ra tsēs hoasa ǂâi xūna.

⁶³Kōǀî ǁîn di ǂnûs tsî khâis tsîra; tita ge a ǁîn ǁnaetsana.

⁶⁴ǃKhūtse, ǁîn di mādawa-amsa ǁîna mādawa-am, ǃomgu ân di sîsenni ǃoa.

⁶⁵ǃGū-aixūs ǂgaob disa ǁîna mā, îb sa ǀâxareba ǁîn ai hâ!

⁶⁶ǁAib ǃnâ ǁîna ǃgôaǃgon, îts ǁîna ǀhommi ǃKhūb dib ǃnagaba xu hîkākā.