Read Khoekhoegowab ǃGae-amdi 4 Bible Online

ǃGae-amdi 4 - Khoekhoegowab bible

ǃGae-amdi 4

¹Matib kha ǃhuniǀuriba ǃkhaeǃkhaehe hâ! Matib ge ǃgâi ǀui ǃhuniǀuriba ǀkharaǀkharahe! Mati di kha ǀuidi ǃanusib dide mâ ǁhôas daogu dis hoas tawa aoxūhe hâ!

²ǀGapiǃgôasa ǀgôan Sions din ǀui ǃhuniǀurib ǀkha ǃgôahe hâna, matin kha nēsi ǂgoaxapan ǀkha ǀguitikōse ǃgôahe hâ, sūǂnubi-aob ǃomkha sîsenna!

³ǀGiridi xawe di ge samdi âde ra mā, ǂkhamn âde di nî daisiga, xawe ǀgôas ti ǁaes dis ge a ǀkhomoǃnâ, ǃgaroǃhūb di ǀamidi khami.

⁴Nams dai rab dis ge namǃhanab âb ai ǂae hâ ǁgâs xa, ǀgôaron ra pereba ǂgan xawe khoe-i ǁîna nî au-i xare-i ge a ǀkhai.

⁵ǃGâi xūna ge ǂûn ǁîn ra daogu ai ǃâs xa ǁō. Karmosain ǃkhaib ǃnâ ge tanihen, ǁîn ra ǂgoaba ǁnam.

⁶Tsî ǂhanuoǃnâsib ti ǁaes ôas dib, ǁîb ge Sodoms di ǁoren ǃgâ-ai a kai, ǁîs ǀgui mûsǀapiros ǃnâ ge dawaǃkhapuhes tsî ǃom-i xare-i ǁîs tawa sîsen tamasa.

⁷ǁÎs di ǀō-aisan ge tsamaros ǃgâ-ai ǃanu ge i, ǁîn ge dai-i xa ǃuri ge i; ǁîn ge robainǀuidi ǃgâ-ai ǀapa soros â-i ge i, safirdi khami ge ī i.

⁸Xawe īsib âs ge nēsi ǂnūb xa a ǃkhae, os ge daogu ai ǂanhe tama hâ. ǁÎs di khōb ge ǂkhōgu âs tawa ǂae hâ; ǁîs ge ǂnâ hâ hai-i khami.

⁹Gôab ǀkha ǃgamhe hân ge ǃâs xa ǃgamhe hân ǃgâ-ai a ǃgâiǃgâxa; ǁîn ge ǃkhāǃganuhe hâse ra kāǁō ǃaub di ǂûn a ǀkhai amaga.

¹⁰ǃOmgu ǀkhomxa taradi digu ge ǁîdi ôana ge sâi, ǁîn ge ǁîde ge ǂû kaiba, khôas ti ǁaes di ôas dis ǃaroma.

¹¹ǃKhūb ge ǁgôasib âba ge dīǀoaǀoa; ǁîb ge ǀgamsib ǁîb ǁaib diba ge ǁhōǂui. Tsî ǁîb ge Sions tawa ǀae-e ge ǂhubi, ǃgaoǃgaogu âsa ra hapu-e.

¹²Gao-aogu ǃhūb digu ge ǂgom tama ge i, tsî ǁansaben ǃhūbaib din tsîn, mâǃoasabeb tsî khākhoeb nî ǁāgu Jerusalems digu ǃnâ ǂgâ ǃkhaisa.

¹³ǁOren ǁîs di kēbo-aogu din tsî dīsādi ǁîs di pristergu didi tsîn, ǁîs ǁaegub ǃnâ ǂhanu-ain di ǀaoba ge ǂnâxūn ǃaroma.

¹⁴ǁÎn ge ǂgī hân axase daogu ai ge ǁhapuma. ǁÎn ge ǀaob ǀkha ge ǂnaoǂnaosen hâ i, sats khoets ǁîn di sarana tsâǀkhā ǁoa ge is kōse.

¹⁵ǁÎn ge ǁîna ge ǂgaiǀî: ǂGō, ǀurisa-i ge nēpa hâ xuige, ǂgō î du tā tsâǀkhā! ti. Amasen ge ǁîna ge ǁkhanabē, ā, ǁhapubē, on ge ǁaedi ǁaegu: ǁÎn ge ǃaruǀî ǁan hâ tide, ti ge mî.

¹⁶ǃKhūb di ais ge ǁîna ge ǀgora; ǁîb ge ǃaruǀî ǁîna kō tide. ǁÎn ge ais pristergu disa ǃgôa tama ge i, ǁîn ge kaiga ǀkhom tama ge i.

¹⁷Sida mûdi ge ge kōǁkhui ǁau huib âdaǀî; sida ǃapis ǀkha ǁaes hui da ǁoasa ge kō.

¹⁸ǁÎn ge sida dāǃharodi ai ge ǃgaoǃgâ, sida daogu ai da ge ǃgû ǁoa is kōse. Sida ǀams ge a ǀgū, sida tsēdi ge ǀoa hâ, ā sida ǀams ge go hā.

¹⁹Sida ǃgôaǃgonaon ge ǃariǃkhān ǀhommi din ǃgâ-ai ge ǃhae i; ǁîn ge ǃhomgu ai ǀaexase ge ǃgôaǃgon da, ǃgaroǃhūb ǃnân ge sida ǁnoaga ge ǁguiba.

²⁰ǀOmmi sida ǂguis dib, ǂkhauǀkhāsabeb ǃKhūb dib, ge ǁîn di āgu ǃnâ ǃkhōhe hâ, ǁîb xa da ge: Sida ge sommi âb ǃnâ ǁaedi ǁaegu nî ǁan, ti mîba.

²¹ǃGâiaǂgao îs dâ, sas Edommi ôase, Usǃhūb ǃnâ ǁan hâse; ǀgabis ge sas on ǂama nîra hā, sas ge nîra ākhanu tsî nîra ǀōǀkhā.

²²Sa ǂhanuoǃnâsib ge toa hâ, sas Sionni ôase, ǁîb ge sasa ǃaruǀî ǃkhōsase ūǃgûbē tide, tsîb ge sa ǂhanuoǃnâsiba sas Edommi ôase, nîra ôaǃnâ, ǁîb ge ǁoren âsa nîra ǂhaiǂhaiǃgâ si.