Read Khoekhoegowab Esegieli 1 Bible Online

Esegieli 1 - Khoekhoegowab bible

Esegieli 1

¹Tsî i ge ǃnonadisiǁî kurib ǃnâ hakaǁî ǁkhâb ǃnâ koroǁî tsēs ǁkhâb dis ai, ǃhūsaben di ǁaegub ǃnâ ta ǃāb Kebari tawa hâ hîa ge ī, ǀhommi ge ǁkhowa-amsen tsî ǁgauǁgaudi Elob dide ta ge mû ǃkhaisa.

²Koroǁî tsēs ǁnā ǁkhâb dis ai (koroǁî kurib ge ǁî ge i gao-aob Jojaxinni di ǃhūsabesisa xu)

³ǃnubais ge ǃKhūb di mîsa ǃgāsase Esegieli, Busib ôab, pristera ge hāba, Xaldeaǁîn di ǃhūb ǃnâ ǃāb Kebari tawa, tsîb ge ǁnāpa ǃKhūb di ǃommi xa ge hāǂamhe.

⁴ǃNubai ta ge tita ge kō tsî mû, ǁgaoǂoas ge ǀapasa xu ge ǀkhī, ǃâus ǀnanus ǁîs ǃnâ hâs tsî ǀaes ona, tsî ǂkhaib ǁnā ǃâus ǂnamipe hâb, tsî ǁîs ǁaeguba xu i ge Hasmali ǀûb khami ge ī, ǀaes di ǁaeguba xu.

⁵Tsî ǁîs ǁaeguba xub ge īsib haka ûitsaman diba ge ǀkhī, tsî nēb ge īsib âna ge i: ǁÎn ge khoe-i khami ge ī i,

⁶tsî mâ-i hoa-i ân ge haka aide ge ūhâ i, ǁnās ǁkhās xase i ge mâ-i hoa-i âna haka ǁgaboga ge ūhâ i.

⁷Tsî ǁîn di ǀnūgu ge ǂhanu ge i, tsî ǁîn di ǂaiǃnāgu ge tsâu-i di ǂaiǃnāgu khami ge ī i, tsî gu ge ǂkhanu ǂaib di ǀûb khami gere napa.

⁸Tsîn ge khoen ǃomga ǁgabogu ân ǃnaga ge ūhâ i ǁîn di haka ǃnamgu ai, tsî ǁnā hakan ge ǁîn di aidi tsî ǁîn di ǁgaboga ge ūhâ i.

⁹ǁÎn di ǁgabogu ge ǃgaeǁaehe ge hâ i nēba naub tawa, ǁîn ge ūnusen tama ge i ǃgûn geo, mâ-i hoa-i ge ǁî-i di ais hâǀî ǂhanuse ge ǃgû.

¹⁰Tsî īsib ǁîn di ais dib ge khoe-i di ais khami ge ī i, tsî xammi di aisan ge ǁî hakana ge ūhâ i amǀkhābǀî, tsî ǁareǀkhābǀîn ge ǁî hakana ǁgōb di aisa ge ūhâ i; ǁkhātin ge ǁî hakana ǃariǃkhās di aisa ge ūhâ i.

¹¹ǁKhātin ge aidi ân tsî ǁgabogu âna ǀgapisebǀî ge ǀgoraǃāhe hâ i, mâ-i hoa-i tawa kha ge ǀgam ǁgabokha ge ǃgaeǁaehe hâ i, tsî ǀgamkha ge sorodi âna ge ǃgū-ai hâ i.

¹²Tsîn ge mâ-i hoa-e ǂhanuse ais â-i ǃoa hâǀî ge ǃgû; Gagab ra ǃgû ǂgao ǀkhāb hoab ain ge ǁîna ge ǃgû, tsîn ge ǃgûn ra hîa dawasen tama ge hâ i.

¹³Tsî īsib ûitsaman dib xasa—īsib ân ge khau ra ǂnomdi ǀaes didi xase ge ī i, fakeldi di īsib xase, ǁnā ǀaes ge hugaǀgui ûitsaman ǁaegu gere ǃgûma, tsî ǀaes ge ǂkhaiba ge ūhâ i, tsî ǀaesa xub ge napaba gere ǀkhī.

¹⁴Tsî ûitsaman ge ǃkhoe tsî ge oa napab di īb ǀkhas khami.

¹⁵Tsî ǁnā ûitsamana ta ge mûo, kō, o i ge ǀgui ǀnū-e ge hâ i ǃhūbaib ai, ǁnā ûitsaman xōǀkhā haka aidi ân ǀkhāb ai.

¹⁶Īsib ǀnūdi dib tsî kuru ǀgaub âdi ge turkoes di ǀûb khami ge ī i, tsî ǁnā hakan ge ǀgui īb ǀguiba ge ūhâ i, tsî īb âdi tsî kuru-ais âdi ge nē ǀnūs nau ǀnūs ǃnâ hâs khami ge ī i.

¹⁷ǃGû di geo, o di ge haka ǃnamgu âdi ai ge ǃgû, ǁîdi ge dawasen tama ge i, ǃgû di garu hîa.

¹⁸Tsî râidi âdi ge ǀgapi ge i, ǃaoǃaosase di ge īs kōse, tsî ǁîdi ge mûdi xa ǀoa ge hâ i ǁnā haka ǀnūdi ǂnamipe.

¹⁹Tsî ûitsaman ge ǃgûo, o di ge ǀnūdi ona ǁîn xōǀkhā ge ǃgû, tsî ûitsaman ge ǃhūba xu khâi, o di ge ǀnūdi ona ge khâi.

²⁰Gagab ra ǃgû ǀkhāb hoabǀî di ge ǁîde ge ǃgû, ǁnāǀîb ge Gagaba ge ǃgû, o di ge ǀnūde ǁîn ǃoa-ai ge khâi, Gagab ûitsaman dib ge ǀnūdi ǃnâ hâ i xui-ao.

²¹ǁÎn ge ǃgûo, o di ge nēde ge ǃgû; tsî ǁîn ge mâo, o di ge ǁîde ge mâ; tsî ǁîn ge ǃhūba xu khâi o di ge ǀnūde ǁîdi ǃoa-ai ge khâi, Gagab ûitsaman dib ge ǀnūdi ǃnâ hâ i xui-ao.

²²Tsî danadi ûitsaman didi ǂamǃnâ i ge īsi-i ǃāǂuisa-i di-e ge hâ i, ǂkhai ra kristali di ǀûb xase i-e, ǀgapiseba xu danadi ân ǂamǃnâ ge ǃāǂuihe hâ i-e.

²³Tsî nē ǃāǂuisab ǃnaga gu ge ǁîn di ǁgaboga ǂhanuse ge hâ i, nēba naub tawa, mâ-i hoa-i ge ǀgamkha ge ūhâ i, nē ǀkhāb ai tsî nau ǀkhāb ai sorodi âba ra ǃgū-aikha.

²⁴Tsî ǃgûn geo, o ta ge ǁîn di ǁgabogu di ǀōba ge ǁnâu, kai ǁgamgu di ǀōb axase, Hoaǀgaixab di dommi axase, ǂnubi-i di ǂkhupib axase: Mân geo on ge ǁgabogu âna ge ǃgam.

²⁵Tsîb ge domma ge hā ǃāǂuisab danadi ân ǂamǃnâ hâb di ǀgapiseba xu, mâ tsîn ge ǁgabogu âna ǃgam ǃnubai.

²⁶Tsî ǃāǂuisab danadi ân ǂamǃnâ hâb ǀgapise i ge īsi-i trons di-i safirǀui-i khami ī-e ge hâ i, tsî trons di īsib ǂamǃnâ i ge ī-i khoeb di-e ge hâ i, ǁîb ǀgapise hâb di-e.

²⁷Tsî ta ge ǀûb Hasmali dib xase ība ge mû, ǀaes di īsib xase trons di ǃnâb ǂnamipe īsib ǁîs ai ǂnôab di kamanaba xu tsî ǀgapisebǀî, tsî kamanab âba xu ǃnaga ta ge īsib ǀaes dib axase ība ge mû tsî ǁîb ǂnamipe hâ ǂkhaib tsîna.

²⁸Īsib ǀapiǃhanab ǁhōǀapib di tsēs ai ǀnanus ǃnâ hâb dib ī xaseb ge īsib ǁîb ǂnamipe hâ ǂkhaib diba ge ī i. Nēb ge īsib ǃKhūb ǂkhaisib di īsib diba ge i, tsî mû ta geo, o ta ge ti ais ai ge ǁnā, tsî ta ge ǀguib tita ǀkha ra ǃhoab di domma ge ǁnâu.