Read Khoekhoegowab Esegieli 10 Bible Online

Esegieli 10 - Khoekhoegowab bible

Esegieli 10

¹ǁNās khaoǃgâ ta ge ge kō tsî mû, ǁnā ǃāǂuisab xerub di danas ǂamǃnâ hâb ǀgapise i ge safirǀui-i xase ge ī i īb trons dib i xase; tsî ǁîb ge ǁîb ai ge ǂhai.

²Tsî ǁîb ge ǁnā aob, ǀgaisa ǃuri ǃkhaiba anasen hāba ge ǃhoa-ū, tsî ǁîb ge ge mî: ǂGâ ǀnūdi ǁaegub kōse xerub ǃnagas kōse, îts ǃomǃnâkha âtsa ǀaexa ǂnomdi ǀkha ǀoaǀoa xerub ǁaeguba xu, îts ǁîde ǃās ǂama tsoro. Ob ge ti mûra aiǃâ ge ǂgâ.

³Tsî xerugu ge amǀkhāb ommi dib ai ge mâ i, ǁnā aob ge ǂgâ ǃnubai, tsî ǀnanu-i ge ai-ommi di ǃnāba ge ǀoaǀoa.

⁴ǃNubaib ge ǂkhaisib ǃKhūb diba ǀgapise ge khâi xerub ǂamǃnâba xu dā-aiǃkhais ommi dis ai, ob ge omma ǃâus xa ge ǀoa, ob ge ai-omma ǃKhūb ǂkhaisib di ǂkhaib xa ge ǀoa.

⁵Ob ge ǀōb xerub ǁgabokha diba ge ǁnâuhe ommi di ǀkhâuǀams kōse, Hoaǀgaixa Elob dib axase, ǁîb ra ǃhoa ǃnubai.

⁶Tsî i ge ge ī, ǁnā aob ǀgaisa ǃuri ǃkhaiba ana hâbab ge mîmā tsî: ǀAe-i xa ū ǀnūdi ǁaeguba xu, xerub ǁaeguba xu ti mî, ǃnubaib ge ǁîba ǂgâ tsî ǀnū-i tawa sī ge mâ.

⁷Ob ge ǀgui xeruba ǃommi âba ge ǀhōǂui xerugu ǁaeguba xu ǀaes xerugu ǁaegu hâsǀî tsî ǁîs xa ū tsî ǃomǃnâkha ǁnāb, ǀgaisa ǃuri ǃkhaiba anasen hâb dikha ǃnâ ge mâ, ǁnāb ge ǁîsa ū tsî ge ǃgûǂoa.

⁸Xerugu di īb tawa i ge khoe-i ǃommi khami ī xū-e ge mûhe xui-ao, ǁîgu di ǁgabogu ǃnaga.

⁹ǃNubai ta ge ge kō tsî mû, haka ǀnūdi ge ge hâ i xerugu tawa; ǀgui ǀnūs ge mâ xerub hoab tawa hâ i; tsî īsib ǀnūdi dib ge ǀûb turkoesǀuis dib xase ge ī i.

¹⁰Tsî īsib âgu xasa: ǁÎ hakagu ge ǀgui īsib ǀguiba ge ūhâ i; ǀgui ǀnūsa nau ǀnūs ǃnâ hâs ǁkhās khami.

¹¹ǁNādi ge ǃgûo, o di ge nēdi ona haka ǃnamgu âdi ai ge ǃgû; ǁîdi ge oa tama ge i, ǃgû di geo, tsî di ge danas ǃoa hâǀî, ǁnāǀî di ge ge ǃgûsao, ǁîdi ge ǃgû di garu hîa oa tama ge i.

¹²Tsî ǁîgu di soros hoas tsî ǁîgu di ǃgâgu tsî ǁîgu di ǃomgu tsî ǁîgu di ǁgabogu tsîn ge ǀnūdi on ǀkha mûdi xa ǀoa ǂnamipe ge hâ i, ǁî hakagu ge ǁîgu di ǀnūde ge ūhâ i.

¹³Tsî ǀnūdi xasa: Mâs hoas âdi ge ti ǂgaera aiǃâ ǃgaosareb ti gere ǂgaihe.

¹⁴Tsî mâs hoas âdi ge haka aide ge ūhâ i: ǂGuro ais ge xerub di ais khami ge ī i, tsî ǀgamǁî ais ge khoe-i di ais khami ge ī i, tsî ǃnonaǁî aisa xammi di ais khami, tsî hakaǁîsa ǃariǃkhās di ais khami.

¹⁵Tsî ǁî xerugu ge ǀgapise ge khâi; nēb ge ǁnā ûitsamab ǁkhāba ge i, ǃāb Kebari amǃgâ ta ge mûba.

¹⁶Tsî xerugu ge ǁgabogu âga ūkhâio, ǃhūba xu gu nî khâise, o di ge ǁnā ǀnūdi ona ǁîgu xōǀkhā oa tama ge i.

¹⁷ǁÎgu ge mâ ǃnubai di ge nēde ge mâ; tsî ǁîgu ra ūkhâihe ǃnubai di ge nēdi ona ge khâi, gagab ûitsaman dib ge ǁîdi ǃnâ hâ i xui-ao.

¹⁸ǃNubaib ge ǂkhaisib ǃKhūb diba ommi dā-aiǃkhaisa xu bē tsî xerugu ǂamǃnâ sī ge mâ.

¹⁹O gu ge xeruga ǁgabogu âga ūkhâi tsî ǃhūba xu ǀgapise ge khâi, ti mûra aiǃâ gu ge ǂoao, tsî ǀnūdi ge ǁîgu xōǀkhā ge hâ i, tsî mâb hoab âgu ge dao-ams aiǂoas ǁāb dis ǃKhūb di ommi dis tawa ge mâ i, tsî ǂkhaisib Israeli Elob dib ge ǁîgu ǂamǃnâ ge hâ i ǀgapiseba xu.

²⁰Nēb ge ǁnā ûitsamab tita ge Israeli Elob ǃnaga mûba ǃāb Kebari amǃgâ, tsî ta ge ge mûǂan, ǁîgu a xeru ǃkhaisa.

²¹Mâb hoab ge haka aide ūhâ, tsî mâb hoab ge haka ǁgaboga ge ūhâ i, tsî khoen ǃomgu khami ī xūga ǁîgu di ǁgabogu ǃnaga.

²²Tsî ais âgu di īsib xasa; ǁîgu di aidi ge ǁnā aidi, ǃāb Kebari di amǃgâ ta ge mûdi ǁkhāde ge i, ǁîgu di īsib tsî ǁîgu ǂûgu xasa. ǁÎgu ge mâb hoab âga ais âb aiǃâ ǂhanuse ge ǃgû.