Read Khoekhoegowab Esegieli 11 Bible Online

Esegieli 11 - Khoekhoegowab bible

Esegieli 11

¹ǃNubaib ge Gagaba tita ǃkhōkhâi tsî aiǂoas ǁāb, ǃKhūb ommi dib aiǂoasǀî ǃoa hâb ǃoa ge ūsī, tsî mû, dao-ams ǁāb dis tawa gu ge ǀgamdisikoroǀa aoga ge hâ i, tsî ǁîgu ǁaegu ta ge Jaasanjab, Asuri ôab, tsî Pelatjab, Benajab ôab tsîkha, ǁaes di gaosakha, ge mû.

²Ob ge ǁîba tita ǃoa ge mî: Khoenôa ǀgôatse, nēgu ge ǁnā aogu, ǂhanuoǃnâsib xa ra ǂâiga tsî nē ǃās ǃnâ ǂkhaba ǀape-aide ra ǀapega,

³ǁnā mî raga: Omdi ge ǀgūse ǂnubihe tide, nē ǃās ge nî sū tsî sida ge ǁganse nî ī.

⁴ǁNā-amaga kēbo ǁîgu ǃoagu; kēbo, sats khoenôa ǀgôatse.

⁵Ob ge Gagab ǃKhūb diba ti ai ge ǁnā, tsî ǁîb ge tita ǃoa ge mî: Mî re: Nētib ra ǃKhūba mî: Sadu Israeli ommi di du ge nēti ra mî, tita ǁnā xūn sa gagas ǃnâ ra khâin di xū-i hoa-e a ǂan xui-ao.

⁶Sago ge sago di ǂnauǃanhesana nē ǃās ǃnâ ge ǂguiǂgui tsî go ge ǁîs di daoga ǂnauǃanhe gen ǀkha ge ǀoaǀoa.

⁷ǁNā-amagab ra ǃKhūb ǃKhūba nēti mî: Sadu di ǂnauǃanhesan, ǁîs ǁaeguts ge ǁguin, ǁîn ge a ǁnā ǁgan, tsî nē ǃās ge a sū; xawe sado ta ge tita ǁîn ǁaeguba xu nîra ǂoa kai.

⁸Sadu ge gôaba ge ǃao, tsî gôab ge ǁnāb, tita sadu ǂama nîra ūhāba, tib ra ǃKhūb ǃKhūba mî.

⁹ǁKhāti ta ge tita sado ǁîn ǁaeguba xu nîra ǂoa kai, tsî tita ge sado ǃhaokhoen ǃomǁae nîra māǁnâ, tsî tita ge sadu ǁaegu ǂhanuba nîra dī.

¹⁰Sadu ge gôab ǃnâ nîra ǁnā; ǀkharib Israeli dib ǃnâ ta ge tita nîra ǀgoraǃgâ, tsî du ge nîra ǂan tita a ǃKhū ǃkhaisa.

¹¹Nē ǃās ge sado sūse ība tide, tsî sadu ge ǁîs ǁaegu ǁganse i tide; ǀkharib Israeli dib ǃnâ ta ge tita sado nîra ǀgoraǃgâ.

¹²Tsî sadu ge nîra ǂan tita a ǃKhū ǃkhaisa, ti ǂnûiǂgādi ǃnâ du tanisen tama tsî ti ǂhanuga du ge dī tama i, tsî du ge ǂhanugu, ǁnā ǁaedi sadu ǂnamipe hâdi diga gere dī amaga.

¹³Tsî i ge ge ī, tita ra kēbo hîab ge Pelatjab, Benajab ôaba, ǁō ǃkhaisa. ǃNubai ta ge tita ti ais ai ǁnāǁgoe tsî ǃgari dommi ǀkha ǂgai tsî ge mî: Okha ǃKhūtse, ǃKhūtse, ǃgauron Israeli dinats kha nî dītoaǃari?

¹⁴ǃNubais ge mîs ǃKhūb disa tita hāba tsî ge mî:

¹⁵Khoenôa ǀgôatse, nēn ge a sa ǃgâsa, ā, sa ǃgâsan ge a ǁî: Aogu sa khoexakhoesis digu tsî Israeli ommi hoab, ā, ǁîb hoaba, Jerusalems di ǁansaben ge ǁîb ǃoa: ǃNūse bē ǃKhūba xu, nē ǃhūb ǁkhāba da ge ǀumise māhe xuige, ti ge mîba.

¹⁶ǁNā-amaga mî. Nētib ra ǃKhūb ǃKhūba mî: Tita ge ǁîna ǃnūse ǁaedi ǃnâ dībē xawe, tsî tita ge ǁîna ǃhūgu ǃnâ ǀgaruǀgaru xawe, xawe ta ge tita ǁîna ǂkhari ǁaerob kōse ǃanusise nîra ība ǁnā ǃhūgu, ǁîgu ǃnân ge sīgu ǃnâ.

¹⁷ǁNā-amaga mî: Nētib ra ǃKhūb ǃKhūba mî: Ā, tita ge sado ǁaede xu nîra ǀhaoǀhao, ǁnā ǃhūgu ǁîgu ǃnâ du ge ǀgaruǀgaruhe hâ iga xu, tsî tita ge sado Israeli di ǃhūba nîra mā.

¹⁸On ge ǁnāpa sī tsî nîra ǁnāpa xu dībē ǁîb di ui-uisan hoan tsî ǁîb di ǁgaidīn hoana.

¹⁹Tsî tita ge ǁîna ǀguiti-ī ǂgaoba nîra mā tsî ǀasa gagasa ǁîn di ǃnāb ǃnâ nîra mā; tsî tita ge ǀuiǂgaoba ǁîn di ǁgansa xu nîra ūbē tsî ǁganǂgaoba ǁîna nîra mā,

²⁰ti ǂnûiǂgādi ǃnân nî tanisenga, tsî ti ǂhanuga sâu tsîn nî ǁîga dīse, tsî titan nî ǁaese ībase, tsî tita nî ǁîna Elose ībase.

²¹Xawe ǂgaob ân ra ǁîn di ui-uisan tsî ǁîn di ǁgaidīna ǃgôaǃgon, ǁîn di daoba ta ge tita danas ân ai nîra mā, tib ra ǃKhūb ǃKhūba mî.

²²ǃNubai gu ge xeruga ǁîgu di ǁgaboga ge ūkhâi tsî ǀnūdi ǁîgu xōǀkhā, tsî ǂkhaisib Israeli Elob dib ge ǁîgu ǂamǃnâ ge hâ i.

²³Tsî ǂkhaisib ǃKhūb dib ge ǃās ǁaeguba xu khâi tsî ge sī mâ, ǁnā ǃhommi ǃās aiǂoasǀî ǁgoeb ai.

²⁴ǁNās khaoǃgâb ge Gagaba tita ūkhâi tsî ais ǃnâ Elob di Gagaba-ū Xaldeab ǃnâ ge ūsī, ǃkhōsan ase ge ǂgaeǂguibēhe hâ in ǁga; tsî ais hîa ta ge mûs ge tita xu ge ǃapa.

²⁵Tsî ta ge ǃkhōsan ase ge ǂgaeǂguibēhen ǃoa ǃKhūb di mîdi ǁîb ge mû kai te di hoade ge ǃhoa.