Read Khoekhoegowab Esegieli 12 Bible Online

Esegieli 12 - Khoekhoegowab bible

Esegieli 12

¹ǃAruǀîs ge mîs ǃKhūb disa hāba te tsî ge mî:

²Khoenôa ǀgôatse, sats ge mâǃoaxa ommi din ǁaegu ǁan hâ, mûde ūhâ, mûn nîga, xawe mû taman, ǂgaede ūhâ, ǁnâun nîga, xawe ǁnâu tamana, mâǃoaxa ommi din a xui-ao.

³ǁNā-amaga sats khoenôa ǀgôatse, doexūs di sîsenūdana dībasen îts tsēa ǁîn di mûdi aiǃâ doebē, îts sa ǃāsa xu nau ǃās ǃoa doe ǁîn di mûdi aiǃâ, ǀnîsin ge nî hōǃâ, mâǃoaxa ommi din a xawe.

⁴Ots ge satsa sa sîsenūdana tsēa ǁîn di mûdi aiǃâ nî ūǀkhī, ǁnān hîa ra doebēn di sîsenūdan xase; ǁnās khaoǃgâts ge satsa ǃuia ǁîn di mûdi aiǃâ nî ǂoa, ǁnān hîa ra doebēn ra ǂoa xase.

⁵ǂNubiǂgoaba khaoǃkhopa ǁîn di mûdi aiǃâ îts ǁnāǃnubai sa sîsenūdana ūǀkhī.

⁶ǁÎn di mûdi aiǃâts ge ǁîna sa ǃhōkha ai nî tani, ǃkhaenab ǃnâts ge ǁîna nî ūǀkhī, sa aisats ge nî ǃgū-ai, ǃhūbats mû tidega, tita ge satsa Israeli di omma saose mā xui-ao.

⁷O ta ge tita mîmāhe ta ge khami ge dī; tita ge ti sîsenūdana tsēa ge ūǀkhī, ǁnān hîa ra doebēn di sîsenūdan xase. ǁNās khaoǃgâ ta ge ǃuia ǂnubiǂgoaba ǃommi ǀkha ge khaoǃkhopa; tita ge ǁîna ǃkhaenab ǃnâ ge ūǀkhī, tsî tita ge ǁîna ǃhōb ai ge tani mûdi ân aiǃâ.

⁸Tsî ǃnauǁgoagas ge mîs ǃKhūb disa hāba te tsî ge mî:

⁹Khoenôa ǀgôatse, Israeli di ommi, ǁnā mâǃoaxa omma kha: Tare-ets ra dī? ti mîǀî tsi tamab hâ?

¹⁰ǁÎna mîǀî: Nētib ra ǃKhūb ǃKhūba mî: Nē ǂhôas ge gaosab Jerusalems dib ǃoagu hâ tsî Israeli ommi ǁîn ǁaegu hâb hoab ǃoagu.

¹¹Mî: Tita ge sadu di buruxa saota, tita ge dī khamin ge ǁîna nîra dī-ūhe. ǁÎn ge ǂgaeǂguibēhe rase ǃkhōsis ǃnâ nîra ǂgâ.

¹²Tsî ǁnā gaosab, ǁîn ǁaegu hâb ge sîsenūxūba ǃhōb ai nîra tani ǃkhaenab ǃnâ, tsîb ge nîra ǂoa; ǂnubiǂgoaban ge nîra khaoǃkhopa, ǁîban nî ǁnāpa xu ūǂuise, ais âbab nî ǃgū-ai, mûs ǀkhab ǃhūba mû tidese.

¹³Tita ge ǁkhāti ti ǂhamsa ǁîba nîra ǃāǂuiba, ti ǂhaotsurib ǃnâb nî ǃkhōhese, tsî tita ge ǁîba Babilons, Xaldeaǁîn di ǃhūb ǃnâ nîra ūsī, xaweb ge mû tide, ǁnāpab nîra ǁō xawe.

¹⁴Tsî ǁnān, hui bin nîse ǁîb ǂnamipe hân hoan tsî ǁîb di ǂnubidi hoadi tsîna ta ge tita ǂoadi hoadi ǃnâ nîra tsoromâi, tsî tita ge gôaba ǁîn khaoǃgâ nîra ǂgaeǂui.

¹⁵Nētin ge ǁîna nî ǂan tita a ǃKhū ǃkhaisa, tita ga ǁîna ǁaedi ǃnâ ǀgaruǀgaru tsî ǁîna ǃhūgu ǃnâ tsoromâi ǃnubai.

¹⁶Tsî tita ge ǁîn xa ǀoro khoerona nîra ǃgau kai gôaba xu tsî ǃâtsūǀkhāba xu tsî ǂhīǁōba xu, ǁîn di ǁgaidīn hoanan nî ǁnā ǁaedi, ǁîn tawan nî sīde ǃhoabase, tsîn ge nî ǂan tita a ǃKhū ǃkhaisa.

¹⁷ǁNās khaoǃgâs ge mîs ǃKhūb disa hāba te tsî ge mî:

¹⁸Khoenôa ǀgôatse, sats ge pereb âtsa ǀkhūb ǀkha nîra ǂû, tsî ǁgam-i âtsats ge ǃhurib tsî ǂhansens tsîkha ǀkha nîra ā.

¹⁹Îts mî ǃhūb di ǁaes ǁga: Nētib ra ǃKhūb ǃKhūba mî Jerusalems di ǁansaben xa, Israeli di ǃhūb xa: ǁÎn ge pereb âna ǂhansens ǀkha nîra ǂû, tsî ǁîn di ǁgam-e ǃhurib ǀkha nîra ā, ǃhūb ân nî ǀoasib âba xu ǀkhaiǀkhā amaga, ǀgaidīs ǁîb ǃnâ ǁan hân hoan dis ǃaroma.

²⁰Tsî ǁanǃnâhe hâ ǃādi ge nîra ǃū-ai, tsî ǃhūb ge nîra ǃgaroǃhū kai, tsî sadu ge nî ǂan, tita a ǃKhū ǃkhaisa.

²¹ǁKhawas ge mîs ǃKhūb disa hāba te tsî ge mî:

²²Khoenôa ǀgôatse, mâ ǂkhoamî-e kha ǁnā-i, Israeli ǃnâ du ūhâ-e: Tsēdi ge nîra ǃnūǃnūhe, tsî mâ, ai-i hoa-i ge nîra kā?

²³ǁNā-amaga mî ǁîn ǃoa: Nētib ra ǃKhūb ǃKhūba mî: Tita ge nē ǂkhoamîsa nîra ǀû kai, on ge ǁîsa ǃaruǀî ǂkhoamîse sîsenū tide Israeli ǃnâ. Îts ǁîn ǃoa mî: Tsēdi ge ǀgūse go hā tsî mîs mâ ai-i hoa-i disa.

²⁴ǁAu ai-i xare-i ge ǃaruǀî hâ tide tsî ǁgoasen ra aiǀgarusa Israeli ommi di ǁaegub ǃnâ.

²⁵Tita a ǃKhū xui-ao, tita ge nîra ǃhoa; ǁNā mîs, tita nî ǃhoas ge nîra dīhe; ǁîs di ǁaeb ge ǁkhawa mâiǂuihe tide. Sadu mâǃoaxa ommi di du di tsēdi ǃnâ ta ge tita mî-e ǃhoa tsî nîra dī, tib ra ǃKhūb ǃKhūba mî.

²⁶ǃAruǀîs ge mîs ǃKhūb disa hāba te tsî ge mî:

²⁷Khoenôa ǀgôatse, mû, ǁnān Israeli ommi din ra mî: ǁNā ais ǁîb ra mûs ge ǂgui tsēdi disa, tsîb ra ǁaegu ǃnūgu xa kēbo.

²⁸ǁNā-amaga ǁîn ǃoa mî: Nētib ra ǃKhūb ǃKhūba mî: Ti mîdi di ǀguis xares ge mâiǂuihe tide; ǁnā mîs ǃhoa ta ges ǁîs ge nîra dīhe, tib ra ǃKhūb ǃKhūba mî.