Read Khoekhoegowab Esegieli 13 Bible Online

Esegieli 13 - Khoekhoegowab bible

Esegieli 13

¹Tsî mîs ǃKhūb dis ge hāba te tsî ge mî:

²Khoenôa ǀgôatse, kēbo Israeli di kēbo-aogu, hîa ra kēbogu ǃoagu, îts ǁnāgu, ǁîgu di ǂgaoba xu ra kēboga mîba: ǁNâu ǃKhūb di mîsa!

³Nētib ra ǃKhūb ǃKhūba mî: Tsūba gu ǁnā gâre kēbo-aoga, ǁîgu di gagasa ra ǃgûǃgonga tsî ǁîgu mû tamana!

⁴Sa kēbo-aogu ge ǀgirigu ǃū-aisa ǃkhaidi ǃnâ hâgu khami ī, Israeltse.

⁵Sadu ge ǁhūdi ǃnâ ǃapaǂgâ tsî ǂnubiǂgoaba Israela ǂnubiba tama hâ, ǃkhammi ǃnân nî mâse ǃKhūb di tsēs ai.

⁶ǁÎgu ge ǁausib tsî amab khami ra ǀō ǂhumib tsîkha ra mû, ǁnāgu ǃKhūb ge ǃhoa ti ra mîga, ǃKhūb xa gu sîhe tama xawe, tsî gu ge nauna ra ǃâubasen kai, mîs nî ǁapo ǃkhaisa.

⁷ǁAu ai-e go kha mû tama hâ tsî amab khami ra ǀō ǂhumiba ǃhoa tama go hâ, sago ǃKhūb ra ǃhoa ti ra mîgo, tita ǃhoa tama hîa?

⁸ǁNā-amagab ra ǃKhūb ǃKhūba nēti mî: Sago ǁausiba ra ǃhoa tsî ǂhumiba ra mû amaga, ǁnā-amaga mû, o ta ge tita nîra hāǂam go, tib ra ǃKhūb ǃKhūba mî.

⁹Tsî ti ǃommi ge ǁnā kēbo-aogu, ǁausiba ra mûgu, tsî ǂhumiba ra aimûǀgarugu ǃoagu nîra hâ, ǁîgu ge ǀhûs ti ǁaes dis ǃnâ hâ tide, tsî gu ge xoas Israeli ommi dis ǃnâ xoahe tide tsî Israeli ǃhūb ǃnâ sī tide, tsî du ge nî ǂan tita a ǃKhū ǃKhū ǃkhaisa.

¹⁰ǁNā-amaga, ā ti ǁaesa gu ra ǂgaeǂhapu tsî: ǂKhî a, ti ra mî amaga, ǂkhî-i xare-i a ǀkhai hîa, tsî ǀguib ra ǂgoaǃharaba ǂnubi tsî mû, naugu ge ǁîba ǂkhabusa ǂgoab ǀkha ra ǂapo.

¹¹Mîba ǁnān, ǂkhabusa ǂgoab ǀkha ra ǂapona, ǁîb nîra ǁnā ǃkhaisa; tūǀnanub ge nîra hā, tsî sago kai ǃnareǀuigo nîra ǁnā, tsî ǃgom sareb ge ǁîba nîra ǂari kai.

¹²Mû, ǁnā ǂnubiǂgoab ga ǁnāo, kha mîǀîhe du tide: Mapas ǂapo-ais, ǁîs ǀkha du ge ǂaposa hâ?

¹³ǁNā-amagab ra ǃKhūb ǃKhūba nēti mî: Ā, tita ge kai ǁgaoǂoa-e xu ti ǁgôasib ǃnâ nîra ǀari kai, tsî tūǀnanu-i ge ti ǁaib ǃnâ nîra hâ tsî kai ǃnareǀuidi ti ǁgôasib ǃnâ, hoan nî hîkākāhese.

¹⁴Nēti ta ge tita ǁnā ǂgoaǃharab sadu ge ǂkhabusa ǂgoab ǀkha ǂapoba nîra khôaǁnâ tsî ǁîba ǃhūb ai nîra aoǁgui, ǃgaoǃgaob âb nî ǀkhaiǀkhās kōse; nētis ge ǃāsa nîra ǁnā, tsî sadu ge ǁîs ǁaegu nîra kāǁō; o du ge nîra ǂan tita a ǃKhū ǃkhaisa.

¹⁵Nēti ta ge tita ti ǁgôasiba ǂnubiǂgoab ǃoagu nîra ūǀkhī tsî ǁnān, ǂkhabusa ǂapoǂgoab ǀkha ǁîba ra ǂapon ǃoagu, tsî tita ge sadu ǃoagu nîra mî: ǁNā ǂnubiǂgoab ge ǃaruǀî hâ, tsî ǁîba ge ǂapogu ge a ǀkhai ti;

¹⁶ǁnā kēbo-aogu Israeli digu, Jerusalems xa ra kēbogu tsî ai-i ǂkhîb di-e ǁîsa ra mûba gu, ǂkhî-i xare-i a ǀkhai hîa, tib ra ǃKhūb ǃKhūba mî.

¹⁷Tsî sats khoenôa ǀgôatse, sa aisa ǂnûi ǁnā ǀgôadi sa ǁaes didi, ǂgaob âde xu ra kēbodi ǃoagu, îts ǁîde kēboba.

¹⁸Îts mî: Nētib ra ǃKhūb ǃKhūba mî: Tsūba di ǁnā tarade, ǁôagu di gamǃnâgu hoaga ǂkhapide ra ǂombade tsî mâ gaxusib hoaba ǃgū-aiǃkhaigu danas diga ra dībade, ǀomden nî ǃause. ǀOmdi ti ǁaes dide xare ǃau du nî, tsî sadu ǀkha hâ ǀomde kha xare ǁîde ûitsamase ūhâ di du nî?

¹⁹Tsî tita kha ti ǁaes tawa nî ǀuriǀuri ǃomsǀoarogu gerstǃhorob digu ama tsî pereǃâdi ama, ǁō tama ga i hâ ǀomde du nî ǃgamga, tsî ǀomde du nî ûib ǃnâ sâuga, ûi tama ga i hâde, sadu di ǂhumib, ti ǁaes ǂhumiba ra ǁnâusa du ra ǂhumibab ǀkha.

²⁰ǁNā-amaga nētib ra ǃKhūb ǃKhūba mî: Mû, tita ge sadu di ǂkhapide nîra hāǂam, ǁîdi ǀkha du ǁnāpa ǀomde doe ra xūse ra ǃaude, tsî tita ge ǁîde sadu di ǁôaga xu nîra tsububē; tsî tita ge ǁnā ǀomde nîra ore, ǁnā ǀomdi sadu doe ra xūse ra ǃaude.

²¹ǁNās tawa ta ge tita sadu di danaǃgū-aiǃkhaiga nîra ǀkhau tsî ti ǁaesa sadu ǃomǁaeba xu nîra ore, ǃaruǀîn sadu ǃomǁae ǃauxūse hâ tidega; o du ge nî ǂan tita a ǃKhū ǃkhaisa.

²²Sadu ge ǂgaob ǂhanu-aib diba ǂkhabasib ǀkha ǃoa kai ǃkhais xa, tita ǁîba tsûaǂgao kai tama hîa, tsî ǃomkha eloxoresab dikha du ge ǀgaiǀgai ǃkhais xa, ǂkhaba daob âba xub ǃhobasen tidega, ûib nîse;

²³ǁnā-amaga du ge ǃaruǀî ǁausiba mû tide, tsî aimûǀgarusa sîsenū tide. Tsî tita ge ti ǁaesa sa ǃomǁaeba xu ore, o du ge nîra ǂan tita a ǃKhū ǃkhaisa.