Read Khoekhoegowab Esegieli 14 Bible Online

Esegieli 14 - Khoekhoegowab bible

Esegieli 14

¹ǁNās khaoǃgâ gu ge Israeli di kaigu xa aoga ti tawa hā tsî ti ais aiǃâ ge ǂnû.

²ǃNubais ge ǃKhūb di mîsa hāba te tsî ge mî:

³Khoenôa ǀgôatse, nē aogu ge ǁgôa-elogu âga ǂgaob âgu ǃnâ ge ǂnûikhâi, tsî gu ge ǁgonǁgonǂgaos ǁîgu di ǂhanuoǃnâsib disa ǂhanuse aidi âgu aiǃâ ge ǂnûikhâi. Tita kha xare ǁkhōse dîhe ta ra ǁîn xa?

⁴ǁNā-amaga ǁîn ǀkha ǃhoa îts ǁîn ǃoa mî: Nētib ra ǃKhūb ǃKhūba mî: Mâ aob Israeli ommi din dib hoab, ǁgôa-eloga ǂgaob âb ǃnâ ga ǂnûikhâib tsî ǁgonǁgonǂgaos ǂhanuoǃnâsib âb disa ga ǂhanuse ǁîb di ais aiǃâ ǂnûib tsî kēbo-aob tawa ga hāb, ǁîba ta ge tita ǃKhūta, hāb ka ǃnubai, ǂguisib ǁîb di ǁgôa-elogu dib ǃoa nîra ǃeream.

⁵Tita nî Israeli ommi dina ǂgaob ân ǃnâ ǃkhōse, hoatsaman ge ǁîn di ǁgôa-elogu ǀkha tita xu ǁnāǁgôa amaga.

⁶ǁNā-amaga mîba Israeli ommi dina: Nētib ra ǃKhūb ǃKhūba mî: ǃHobasen î du oa sadu di ǁgôa-eloga xu, î du sadu di aide ǁkhaedawa sadu di ǁgaiǁgaisan hoana xu.

⁷Mâ aob Israeli ommi din dib hoab tsî mâ ǃhaokhoeb, Israeli ǃnâ ǃhaokhoese ga hâb hoab, ti khaoǃgâba xu ga khaisen tsî ǁgôa-elogu âba ǁîb di ǂgaob ǃnâ ǂnûikhâib tsî ǂhanuoǃnâsib âb di ǁgonǁgonǂgaosa ǂhanuse ǁîb di ais aiǃâ mâib tsî kēbo-aob tawa hāb, titab nî ǁîba xu dîseba; tita ge ǃKhūta, ǁîb ge tita xu nî ǃereamhe.

⁸Tita ge ti aisa ǁnā khoeb ǃoagu nîra ǂnûi tsî ǁîba saose tsî ǂkhoamîse nîra mâi tsî ǁîba ǁaes âb di ǁaeguba xu nîra ǃhomǂui, o du ge nî ǂan tita a ǃKhū ǃkhaisa.

⁹Tsî kēbo-aob ga ǃhoadāheo, tsî xū-eb ga ǃhoao, o ta ge tita ǃKhūta ǁnā kēbo-aoba ge ǃhoadā, o ta ge tita ti ǃomma ǁîbǀî nîra ǀhōǂui tsî ǁîba nîra hîkākā ti ǁaes Israels di ǁaeguba xu.

¹⁰On ge ǁîn di ǂhanuoǃnâsiba nî tani, ǂhanuoǃnâsib dî-aob dib nî īs ǁkhās xaseb ge ǂhanuoǃnâsib kēbo-aob diba nîra ī.

¹¹Ommi Israeli dib ǃaruǀî ǁkhawa ti khaoǃgâba xu ǁhapubē tidega, tsî ǃaruǀîn ǁîn di ǃûǂamdi hoadi ǀkha ǀuriǀurisen tidega, ǁnāǃnubain ge ǁîna tita ǁaese nîra ība, tsî tita ge ǁîna Elose nîra ība, tib ra ǃKhūb ǃKhūba mî.

¹²ǃAruǀîs ge ǃKhūb di mîsa hāba te tsî ge mî:

¹³Khoenôa ǀgôatse, ǃhūb ga tita ǃoagu ǁoreo, ǃgomse ra ǃûǂamǃâ, o ta ge tita ǃommi âtaba ǁîbǀî nîra ǀhōǂui tsî hais pereb disa nîra khôa tsî ǃâtsūǀkhā-e ǁîb ǃnâ nîra sî, khoen tsî ǀgoan tsîna ta ǁîba xu nî ǃhomǂui ga,

¹⁴nē ǃnona aogu, Noaxi, Danieli tsî Job tsîgu ga ǁîb ǁaegu hâ i xawe, tsî ǁîgu di ǂhanu-aisib ǀguib ǀkha ǁîn di ǀomsa ǃnoraǃnorao, tib ra ǃKhūb ǃKhūba mî.

¹⁵Xawe ta ge tita nîra dī, tsū ǀgurun nî ǃhūba ǃgûǃnâ ǃkhaisa, ǁîbab nî ǀgôao kaise, ǁîbab nî ǃū-aisa kaiga, khoe-i xare-i xab ǃgûǃnâǃganuhe tides kōse ǁnā ǀgurun xa,

¹⁶ǁnā ǃnona aogu ga ǁîb ǁaegu hâ xawe, tita a ûitsama ǃkhais ao, tib ra ǃKhūb ǃKhūba mî, xawe gu ge ǀgôagu kas ǀgôadi kas hoasa ǃnoraǃnora tide, ǁîgu ǀguigu ge ga ǃnora, xawe ǃhūb ga ǃū-aisa.

¹⁷Tsî gôaba ta ga ǁnā ǃhūba ūhāǂam tsî mîo: Gôatse, ǃhūba ǃgûǃnâǃganu, î ta tita ǁîba xu khoen kas ǀgoan kas hoasa ǃhomǂui.

¹⁸ǁNā ǃnona aogu ga ǁîb ǁaegu hâ xawe, tita a ûitsama ǃkhais ao, tib ra ǃKhūb ǃKhūba mî, xawe gu ge ǀgôagu kas ǀgôadi kas hoasa ǃnoraǃnora tide, tsî gu ge ǁîgu ǀguiga nîra ǃnora.

¹⁹Tsî ǂhīǁōba ta ga tita ǁnā ǃhūb ǃnâ sîo, tsî ti ǁgôasiba ta ga ǀaob ǀkha ǁîb ǂama ǁhōǂuio, khoen kas ǀgoan kas hoas ǁîba xu nî ǃhūǃnomahese:

²⁰Tsî Noaxi, Danieli tsî Job tsîgu ga ǁîb ǁaegu hâ i xawe, tita a ûitsama ǃkhais ao, tib ra ǃKhūb ǃKhūba mî, ǀgôab kas ǀgôas kas hoasa gu ge ǃnoraǃnora tide, ǁîgu di ǀoms ǀguisa gu ge ǁîgu di ǂhanu-aisib ǀkha ga ǃnoraǃnora.

²¹Nētib ra ǃKhūb ǃKhūba mî xui-ao: Matikōse ǁnās ǃgâ-ais kha ǁî ǃkhaisa nîra ī, tita ti haka tsū ǀgoraǃgân, gôab, ǃâtsūǀkhāb, ǁaixa ǀgurun tsî ǂhīǁōb tsîna Jerusalems ǃoagu ga sî ǃnubai, khoen kas ǀgoan kas hoas nî ǁîba xu ǃhūǃnomahese.

²²Xawe kō, ûi gen ge ǁîs ǃnâ nîra ǃgau, ǁîn ge nîra ǂgaeǂguiǂuihe, ǀgôagu kas ǀgôadi kas hoasa, mû, ǁîn ge sadu ǃoa nîra ǂoaxa, tsî du ge ǁîn di daoba nîra mû tsî ǁîn di dīga, o du ge nîra ǁkhaeǂgaohe ǁnā ǂkhaban, Jerusalems ǂama ta ge ūhān hoan xa, ā, ǁîs ǂama ta tita nî ūhān hoan xa.

²³Nētin ge ǁîna sado nîra ǁkhaeǂgao, ǁîn di daob tsî ǁîn di dīgats ga mû ǃnubai, o du ge sado nî ǂan, tita ǀhapi-i ose ǁnān ǁîs ǃnâ ta ge dīn hoana dī tama hâ ǃkhaisa, tib ra ǃKhūb ǃKhūba mî.