Read Khoekhoegowab Esegieli 16 Bible Online

Esegieli 16 - Khoekhoegowab bible

Esegieli 16

¹ǃAruǀîs ge ǃKhūb di mîsa ge hāba te mî rase:

²Khoenôa ǀgôatse, ǂanǂan Jerusalemsa ǁîs di ǁgaidīna.

³Îts mî: Nētib ra ǃKhūb ǃKhūba mî Jerusalems ǃoa: Sa ǀkhīs tsî sa ǃnaes tsîra ge Kanaanǁî ǃhūba xu hâ; sa îb ge Amorǁî ge i, tsî sa îs ge Hetiǁî ge i.

⁴Sa ǃnaes xasa; ǁorahes ge tsēs ais ge ǃgaoǀnaehe tama ge hâ i, tsîs ge ǁgam-i ǀkha ǁāǀkhāhe tama ge hâ i, tita ge ǃgapaǀî si ǃnubai, ǁkhātis ge ǂō-i ǀkha sopoǂgāhe tsî ǃkhain ǃnâ ǃgamihe tama ge hâ i.

⁵Mû-i xare-i ge ǀkhom si tama ge hâ i, ǀgui xū-i nēn dī-es nî ǁî-i xa dībahega, ǀkhomhes nîse; tsîs ge ǂgās ǃaub dis ai ge aohe hâ i, ui-uisasib ǀoms âs dib ǃnaes ge tsēs ai.

⁶Tita ge sasa ǃgû-īǀkhā ǃnubai ta ge sa ǀaob dāǃgâhe hâse ge mû, o ta ge tita sa ǀaob ǃnâ: Ûi, ti ge mîǀî si; ā tita ge sa ǃoa ǀaob âs ǃnâ: Ûi, ti ge mî.

⁷Tita ge sasa disiǀoadisin kōse ge ǂgui kai ǃaub di ǁhaon khami; os ge ǀom tsî ge kai, os ge kai ǂkhaisib ǃnâ ge sī, sa samra ge ǀkhama tsî ǀûn âs ge ǀom, xawes ge ǀōǀkhā tsî ǀkhaiǀkhā ge i.

⁸Sasa ta ge tita ǃgû-īǀkhā ǃnubai ta ge tita sasa ge kō, tsî mû ǁaeb ge ǁâs di ǁae ge i; o ta ge tita ti ǁgaboba sa ai ǃāǂui tsî ǀōǀkhāsib âsa ge ǃgū-ai, ā tita ge sasa nūba tsî sas ǀkha ǃgaeǀhaos ǃnâ ge ǂgâ, tib ra ǃKhūb ǃKhūba mî, os ge sasa ge ti kai.

⁹ǁNās khaoǃgâ ta ge tita sasa ǁgam-i ǀkha ge ǁā, tsî tita ge ǀaob âsa sasa xu ge ǁāǁnâ, tsî olib ǀkha sasa ge ǂkhau.

¹⁰Tita ge sasa ǁkhāti ǂgāǃnâguhe hâ sîsenaina ge ana, tsî tita ge sasa ǃâukhōn ǀkha ge ǁharo, tsî ǀui ǀgaisa ǃkhaib ǀkha sasa ge namiǀkhā tsî saiǂkhanu ǃkhaib ǀkha sasa ge ǃgū-ai.

¹¹Tsî ta ge tita ǁkhāti anixūna ǁgā si tsî ǃganura ge ǂnûiǃom si tsî ǁkhamma ǃaob âs ai,

¹²ǁnās ǁkhās xase ta ge tita ǃūs di î-îxū-e ge dī sa ais ai tsî ǃgamra sa ǂgaera tawa tsî krons ǂkhaisib disa sa danas ai.

¹³Nētis ge sasa ǃhuniǀurib tsî ǀhaiǀurib tsîkha ǀkha ge anihe hâ i, tsî sarab âs ge ǀui ǀgaisa ǃuri ǃkhai tsî sai tsî ǂgāǃnâguhe hâ sîsenai ge i; sas ge ǀui tsampereb tsî danib tsî olib tsîn xa gere ǂû, tsîs ge hoaragase îsa ge i, tsîs ge ge amǁnā gaosi kais ges kōse.

¹⁴ǁNās tawas ge ǀonsa sasa xu ǁaedi ǃnâ ge ǂoa sa îsasib ǂama, ǁîs ge dīǀoaǀoasa ge i, ti ǂkhaisib tita ge sa ai ǁguiba xu, tib ra ǃKhūb ǃKhūba mî.

¹⁵Xawe sas ge îsasib âs ai ǂgomaiǂnûi tsî gere ǀai ǀons âs ǃnâ, ā, sas ge ǀaidi âsa ǃgû-īǀkhā kab hoaba ge ǁhōǂuiba, ǁîb dis ge ǁîsa ge i.

¹⁶Tsîs ge sasa saran âs xa ū tsî îsa ǀgapiga ge dībasen tsî ǁîgu ai ge ǀai; ǁîs ge hā tama ge hâ i, tsî ī tide ǃkhaisa.

¹⁷ǁNās tawas ge soadi sa anixūn dide ti ǃhuniǀurib tsî ǀhaiǀurib, tita ge sasa māb xa ū, tsîs ge aore-īga ge dībasen, tsîs ge ǁîgu ǀkha ge ǀaigu.

¹⁸Tsîs ge ǂgāǃnâguhe hâ saran âsa ū tsî ǁîga ge ǃgū-ai, tsîs ge ti olib tsî ti ǀanǀanxūb tsîkha ais âgu aiǃâ ge ǂnûi.

¹⁹Tsî ti pereb, tita ge sasa māb tsî ti ǀui tsampereb tsî olib tsî danib tsîn, tita ge sasa ǂû kain, ǁînas ge ǁkhāti ǁîgu di aidi aiǃâ ǀnamǀnamsa ǁamase ge ǂnûi, tsî i ge ǁnāti ge i, tib ra ǃKhūb ǃKhūba mî.

²⁰ǃAruǀîs ge sasa sa ôagu tsî sa ôadi tsîn, titas ge ǁorabana, ū tsî ǁîna ge ǁguiba hapuhen nîga; ǂkhari ǃkhairos sa ǀaigu disa nēsa,

²¹ti ôanas ge ǂā tsî ǁîna māǁnâsa, ǁînas ge ǀaesa ǃgûǃnâǃganu kaio?

²²Tsîs ge ǁkhāti sa ǁgaiǁgaisan tsî sa ǀai-ain hoan tawa sa ǂkhamsis di tsēdi xa ǂâi tama ge hâ i ǀōǀkhā tsî ǀkhaiǀkhāses ge hâ i tsî ǀaob âs ǃnâs ge dāǂkhūhe hâse ǁgoe i ǃnubai.

²³Os ge ǁkhāti sa ǂkhabasib hoab ǃoa ge hāǂamhe (tsūba, tsūba si, tib ra ǃKhūb ǃKhūba mî)

²⁴tsî ǃgupuǃkhai-es ge ǂnubibasen tsî ǀgapi ǃkhai-es ge mâ daob hoab ǃnâ dībasen ǃkhaisa.

²⁵Mâ danas daob dis hoas tawas ge sasa ǀgapi ǃkhaidi âsa ge ǂnubibasen, tsîs ge îsasib âsa ge ǁgai kai, tsîs ge ǀnūkha âsa mâ khoeb, ǁnāpa ra ǃgû-īb hoaba ge ǂapeba, tsîs ge ǀaigu âsa ge ǂguiǂgui.

²⁶Tsîs ge ǁkhāti Egipteb ôan, sa ǀgūkhoen hîa sa ǁgans di ge in ǀkha gere ǀai tsîs ge ǀaigu âsa ge ǂguiǂgui, titas nî ǁaiǁaise.

²⁷Mû, ǁnā-amaga ta ge tita ti ǃomma sas ǂama ge ǀhōǂui tsî ǂnûibahes hâ amǃnâsa ge ǀoroǀoro, tsî tita ge sasa turab sasa ǁkhan hâdi dib ǃnâ ge mā, ǀgôadi Filisteǁîn didi, sa taotaosa daob ǂama tao hâdi dib ǃnâ.

²⁸ǃAruǀîs ge sasa Asiriab di ôan ǀkha ge ǀai, ǂâu ǁoas ge i xui-ao, ā, ǁîn ǀkhas ge ǀai, xawes ge ǁkhāti gorose ǂâu tama ge i.

²⁹Tsîs ge ǀaib âsa ge ǂguiǂgui Kanaanǃhūb ǃnâ Xaldeb kōse, xawes ge ǁî ǃkhais on ǀkha gorose ǂâu tama ge i.

³⁰Matikōseb a ǂkhabusa sa ǂgaoba, nēn hoanas ra dīo, sîsenain kao ra ǀai-aos dise īna,

³¹ǃgupuǃkhais âsas ra mâ danas daob dis hoas tawa ǂnubi hîa, tsî ǀgapi ǃkhais âsas ra mâ daob hoab ǃnâ dībasen hîa, ǁnā ǀai-aos, ǀaib amǃnâsa ra ǃharaxūs khami ī tama ǃâ.

³²Okha ǁnā ǀai-aos, ǁîs ra aob âs di amǃnâs ai ǃhaokhoega ǃkhōǃoa!

³³ǁÎgu ge mâ ǀai-aodi hoade amǃnâsa ra mā, xawe sas ge sa amǃnâsa sa ǁâsagu hoaga ra mā, tsî sas ra ǁîga ǀkhae, sa ǂnamipe hâ ǃkhais hoasa xu gu nî sa tawa ǂgâxase sa ǀai-aigu ǃaroma.

³⁴O i ge sas ǀkha sa ǀaib ǃnâ ǁnās ǃoagu hâ xū-e taradi di-e ra ī, sa ǀaigu ǃnâs sasa ǃgôaǃgonhe tama ǃkhaisa, ǀais nîse; sas ga ǀaib amǃnâsa māo tsîs ga ǀaib amǃnâsa māhe tama io, os ge sasa ǃoagu hâ xū.

³⁵ǁNā-amaga sas ǀai-aose, ǁnâu ǃKhūb di mîsa!

³⁶ǁNā-amagab ra ǃKhūb ǃKhūba mî: ǃGāb âs ǁhōǂuihe hâ amaga tsî taotaosa ǃkhais âs ǀaigu âs ǃnâ sa ǁâsaguǀî ge ǀkhaiǀkhā amaga tsî ǁgaiǁgaisan âs di ǁgôa-elogu hoaguǀî tsî ǀaob sa ôan, ǁîgas ge mān dibǀî,

³⁷ǁnā-amaga, mû, tita ge sa ǁâsagu ǁîgas ge ǀai-ūgu hoaga nî ǀhaoǀhao, tsî ǁnāgu, sasa ge ǁâgu-ūgu hoaga, tsî ǁnāgu, sas ǁkhan hâgu hoaga, tsî ta ge ǁîga sa ǃoagu sa ǂnamipe hâ ǃkhais hoasa xu nî ǀhaoǀhao, tsî tita ge ǁîgu aiǃâ sa ǀōǀkhāsiba nî ǂhaiǂhai, sa ǀōǀkhāsib hoab nî ǁîgu xa mûhese.

³⁸ǁNās tawa ta ge tita sasa ǀai-aodi tsî ǀaoǂnâxū-aodi tsîdi di ǂhanub ǃoa nîra ǀgoraǃgâ; tsî tita ge sasa ǀaob ǁgôasib tsî ôasasib tsîkha diba nîra māǁnâ.

³⁹Tsî tita ge sasa ǁîgu ǃomǁae nîra māǁnâ, o gu ge ǁîga ǃgupuǃkhais âsa nîra khôaǁnâ, tsî ǀgapiǃkhaidi âsa nîra ǃhanǁgui, tsî saran âsa nîra ǂgaeǂuiǀkhā si tsî sa ǀgapiǃgôasa anixūna nîra ū tsî ǀōǀkhā tsî ǀkhaiǀkhāse nî ǁnāxū si.

⁴⁰ǁNās khaoǃgâ gu ge ǀhû-e sa ǃoagu nîra ǂoaxa kai, tsî gu ge ǀkha nîra ǀuiǁhom si tsî ǁîgu di gôagu ǀkha nîra ǃkhāǃganu si.

⁴¹Tsî gu ge ǁkhāti sa omde ǀaes ǀkha nîra khauǃkhū tsî ǀgoraǃgâde nîra sîsenū si ǂgui taradi di mûdi aiǃâ. Tsî tita ge sasa ǀai-aose hâsa nîra ǀû kai, tsîs ge ǃaruǀî ǁkhāti ǀai-ao-amǃnâsa mā tide.

⁴²Nēti ta ge tita ti ǁgôasiba sa ai nîra sâ kai, tsî ti ôasasib ge sasa xu nîra ǁgôa, tsî tita ge nîra ǃnō tsî ǃaruǀî ǁaixa tide.

⁴³Tsēdi sa ǂkhamsis didi xas ge ǂâi tama i, tsî titas ge nēn hoan ǀkha ǁgonaǂgaose ība amaga, mû, o ta ge tita daob âsa sa danas ai nîra mā, tib ra ǃKhūb ǃKhūba mî. Tsîs ge ǁnā taotaosa dīsa sa ǁgaiǁgaisan hoana ǃnā hâse dī tide.

⁴⁴Mû, ǂkhoamîde ra sîsenū-i hoa-i ǁî-i ge sas xa ǂkhoamî-e sîsenū tsî nîra mî: ǁGûs ī khamis ge ǀgôasa ī.

⁴⁵Sas ge a sa îs di ôa, aob âs tsî ǀgôan âsa ge uixa hâ isa; tsî sas ge ǃgâsas, sa ǃgâsadi aogu âdi tsî ǀgôan âde ge uixa hâ idi disa. Saos ge Hetiǁî tsî saob ge Amorǁî ge i.

⁴⁶Tsî sa ǃgâsas kais ge Samariasa, ǁîs tsî ǁîs di ôadi tsîn sa ǁareǀkhāb ai ǁan hâsa, xawe sa ǃgâsas, sas xa ǂkhams, amǀkhāb ai ǁan hâs ge Sodomsa tsî ǀgôadi âsa.

⁴⁷Xawe sas ge daogu âs ǃnâ ǃgû tama hâ tsî ǁgaidīn ân ǃoa dī tama ge hâ i, ǂkhari ǃkhaises ge ǁî ǃkhaisa ge ū, xawes ge a ǃoaxa, tsî sas ge ǁîs ǃgâ-ai ge ǁgaoǁgao sa daogu hoagu ǃnâ.

⁴⁸Tita a ûitsama ǃkhais ao, tib ra ǃKhūb ǃKhūba mî, Sodoms sa ǃgâsas, ǁîs tsî ǀgôadi âs ge tātsē dī tama, sas ge dī khami, sas tsî sa ôadi tsîso.

⁴⁹Mû, nēb ge ǂhanuoǃnâsib sa ǃgâsas Sodoms diba ge i: ǃGurisib tsî ǃnāsa pereb tsî ǂhansenoǃnâ sâb tsîgas ge ǁîs tsî ǁîs di ôadi tsîde ge ūhâ i, xawes ge ǀgâsan tsî ǂhâ hân di ǃomma ǀgaiǀgai tama ge hâ i.

⁵⁰Tsî di ge ǃguriǃgurisen tsî ǁgaiǁgaisana gere dī ti ais aiǃâ; ǁnā-amaga ta ge tita ǁîde ge dībē, ǁî ǃkhaisa ta ge mûo.

⁵¹Samarias on ge ǃkhareb sa ǁoren dib kōse ǁore tama hâ, tsî sas ge sa ǁgaidīna ǁîs ǃgâ-ai ge ǂguiǂgui, tsîs ge ǃgâsadi âsa ge ǂhanu-ai kai sa ǁgaidīn dīs gen hoan ǀkha.

⁵²Îs ǁnâi sasa ǁkhāti tani sa taosiba, sas ǃgâsadi âsa sa ǁoren, ǁîdi ǃgâ-ais ge ǁgaisise gere dīn ǀkha ra ǀgoraǃgâse, ǁîdi ge sas xa a ǂhanu-ai, ǁnâi sas ona tao, îs sa taosiba tani, ǃgâsadi âsas ge ǂhanu-ai kai amaga.

⁵³Tita ga ǃkhōsan, ǁnās ge Sodoms tsî ǁîs di ôadi di ǃkhōsana ǁkhawa ūhāo tsî ǃkhōsan Samarias tsî ǁîs di ôadi dina ǃnubai ta ge tita ǃkhōsan sa ǃkhōsis dina nîra ūhā ǁî ǁaegu;

⁵⁴taosib âsas nî tanise, îs taotaohe sas ge dīn hoan ǃaroma, ǁîdes ra sasa ǁkhaeǂgao hîa.

⁵⁵Sa ǃgâsadi Sodoms tsî ǁîs di ôadi tsîdi ga aibekam īsib âdi ǃoa oao, tsî Samarias tsî ǁîs di ôadi tsîdi ga aibekam īsib âdi ǃoa oa, ǃnubai so ge sas tsî sa ôadi tsîso sa aibekam īsiba ǃoa nîra oa.

⁵⁶Ā, sa ǃgâsas Sodoms ge sa ams ǃnâ ǁnâuhe tama ge hâ i sa kai ǃgurib di tsēs ai,

⁵⁷sa ǂkhabasib hoab ge ǂhaiǂhaiǃgâhes aiǃâ Siriab ôadi di ǃharaxūs tsî ǁnān, ǁîb ǂnamipe hân hoan dis Filisteǁîn ôadi, sasa ra ǃharaxūǂnamipedi disa.

⁵⁸ǃNubais ge sasa sa taotaosa dīgu tsî sa ǁgaidīgu tsîga ge tani, tib ra ǃKhūb ǃKhūba mî.

⁵⁹Nētib ra ǃKhūb ǃKhūba mî xui-ao: Tita ge sas ona nî dī-ū, sas ge dīs ǁkhās xase, sas nūsa ge ǃharaxūsa, ǃgaeǀhaosa ra khôaǃâ.

⁶⁰Xawe ta ge tita ti ǃgaeǀhaos sa ǀkha ta ge ǂkhamsis âs di tsēdi ǃnâ dīs xa nîra ǂâi, o ta ge tita sas ǀkha ǀamo ǃgaeǀhao-e nîra ǂnûikhâi.

⁶¹ǃNubais ge sasa sa daogu xa nîra ǂâi tsî nîra tao, sa ǃgâsadi sas xa a kaidi nî ǁnāti sas xa a ǂkharidi ǀkha sas xa ǃkhōǃoahe ǁaeb ai; tita ge ǁîde sasa ǃgôase nîra mā, xawe sa ǃgaeǀhaosa xu tama.

⁶²Tita ge ti ǃgaeǀhaosa sas ǀkha nîra ǂnûikhâi xui-ao, os ge sasa nî ǂan tita a ǃKhū ǃkhaisa,

⁶³sas nî ǂâi tsî taoga, tsî ams âsas ǃaruǀî khowa tidega sa taob ǃaroma, tita ga sasa ǀûbagusa dī-ū ǃnubai, dīs gen hoan ǂama, tib ra ǃKhūb ǃKhūba mî.