Read Khoekhoegowab Esegieli 17 Bible Online

Esegieli 17 - Khoekhoegowab bible

Esegieli 17

¹Tsî mîs ǃKhūb dis ge tita hāba tsî ge mî:

²Khoenôa ǀgôatse, ǂganǃgâsa ǀhae-e ūǀkhī, îts ǂkhō-e Israeli omma ǃhoaǀî,

³îts mî: Nētib ra ǃKhūb ǃKhūba mî: ǃAriǃkhās kais, kai ǁgabokha ūhâs, gaxu ǃamga ūhâs, ǃamxas tsî ǃkharaga ǀûga ūhâs, ǁîs ge Libanonni ai hā tsî ǂamǃnâ hâ ǂgonab sederhais diba ge ū.

⁴ǁÎs ge ǀams ǁî-i di ǂkham ǂgonagu disa ǃora tsî ǁîsa ǁamagus di ǃhūb ǃnâ ge ūsī, ǁama-aogu di ǃās ǃnâs ge ǁîsa ge ǂgā.

⁵ǁÎs ge ǁkhāti ǃkhommi ǃhūb dib xa ū, tsî ǃkhomǃhanab ǃnâ ǁîba ge ǂgā, ǁîs ge ǁîba ge ū, ǁîs ge ǁîba ǁgamxa ǃkhais tawa ge ūsī ǂanǃgâsenxasib ǀkha,

⁶ob ge ǁhai tsî ge ama ǂkhaisa ǂauxûiǂûhai kai, ǃgam ǃgaoba ūhâb, ǂgonagu âb ǁîbǀî ǃoa hâb, ǃnomagu âb ǃnagabǀî hâba. Nētib ge ge ǂauxûiǂûhai kai, ǂgonaga ra ūǀkhīb tsî ǂgonaga ra ǀhōǂuib ase.

⁷Tsîs ge ǀnî ǃariǃkhās kaisa ge hâ i, kai ǁgabokha ūhâs tsî ǃamxas; tsî mû, nē ǂauxûiǂûhais ge ǃnomagu âsa ǁîbǀî ge ǂō tsî ǂgonagu âsa ǁîbǀî ge aoǂui, ǁîsis nî ǀâǀâhega ǂgās âs di ǂgaridi ǃoa.

⁸ǃGâi ǃhūǁôab aib ge ǁgamxa ǃkhais amǃgâ ge ǂgāhe, ǂgaena ūǀkhī tsîb nî ǂûtanise, ama ǂkhaisa ǂauxûiǂûhai kaib nîga.

⁹Mî: Nētib ra ǃKhūb ǃKhūba mî: ǃGâiseb nî ǂûtani xare? ǁÎba kha ǃnomagu âba ǃhomǂuib tide, tsî ǂûn âba ǃgaoǁnâb tide, ǂnân nîga? ǁÎb ǃom hâ ǂgaedi hoadi tawab nîra ǂnâ, tsî ǁîs ge kai ǁôaba xus kas kai ǁaesa xus kas hoasa ī tide, ǁîs nî ǃnomagu âsa xu ūbēhesa.

¹⁰Ā, kō ǂgāheb kao kha ǃgâiseb nî ǂûtani xare? Aiǂoas di ǂoab xab ga tsâǀkhāheo, hoaragaseb nî ǂnâ? ǂGā-aidi ǂgās âs didi aib ge hoaragase nîra ǂnâ.

¹¹ǁNās khaoǃgâs ge mîs ǃKhūb disa hāba te tsî ge mî:

¹²ǁNâi ǁnā mâǃoaxa omma mîba; ǀŪ du a xare, taren a nēnasa? Mî: Kō, gao-aob Babilons dib ge Jerusalems tawa hā tsî gao-aob âsa ge ū tsî ǁîs di gaosaga, tsîb ge ǁîga ǁîb ǃoa Babilons ǁga ge ūsī.

¹³ǁNās xōǀkhāb ge gao-aosi ǃkhommi xa ū tsî ǃgaeǀhao-e ǁîb ǀkha ge dī, tsîb ge ǁîba ge nū kai, tsî ǀgaisagu ǃhūb dīgab ge ǁîba ge ūbē,

¹⁴ǃgamǃgamsenxa gaosi kais nîga ǀgapiǀgapisen tamasa tsî ǃgaeǀhaos âba ra ǃkhōǀgaipeses nî mâhōse.

¹⁵Xaweb ge ǁîba ge mâǃoa, ǁîb di sîsabega Egipteb ǃnâ ra sîǃâ, hān tsî kai ǁaesab nî māhese. ǃGâiǃgâb nî xare? Ûib nî xare, nēti ī xūna ra dība? ǃGaeǀhaosa khôa tsî xare ûib nî?

¹⁶Tita a ûitsama ǃkhais ao, tib ra ǃKhūb ǃKhūba mî: ǁNā gao-aob ǁîba ge gao kaib, nūs âbab ge ǃharaxūb tsî ǃgaeǀhaos âbab ge khôab di ǃās ǃnâb ge nîra ǁō, ǁîb tawa Babilons ǁaegub ge ǁîba nîra ǁō.

¹⁷ǁKhātib ge Faraoba kai ǀgaib tsî ǂgui toroǁaes ǀkha torob ǃnâ ǁîba xū-e dī-ū ǁoase nîra i, ǁkhui-e gu ga aokhâi xawe, tsî ǁkhui-omsa gu ga ǂnubi xawe, ǂgui ǀomdi nî hîkākāhese.

¹⁸ǁÎb ge nūsa ǃharaxū xui-ao, ǃgaeǀhaosa ra khôase, tsî mû, ǁîb ge ǃommi âba ge mā, xaweb ge nēn hoana gere dī, ûib nî xare?

¹⁹ǁNā-amaga nētib ra ǃKhūb ǃKhūba mî: Tita a ûitsama ǃkhais ao ta ge tita ti nūs ǁîb ge ǃharaxūsa, tsî ti ǃgaeǀhaos, ǁîb ge khôasa, ǁîb di danas ai nîra mā.

²⁰Tsî tita ge ti ǀûide ǁîba nîra ǃāba, ǃkhōheb nîse, tsî ti ǂhaotsurib ǃnâ; tsî tita ge ǁîba Babilons ǃoa nîra ūsī kai, tsî ta ge ǁnāpa ǁîba nîra ǀgoraǃgâ ǃûǂams âb ti ǃoagub ge ǃûǂams ǃaroma.

²¹Tsî ǁîb di ǃhūsaben hoan ge ǁîb di ǂnubidi ǀkha gôab ǃnâ nîra ǁnā, tsî ǃgau gen hoan ge ǂoadi hoadi ǃnâ nîra ǀgaruǀgaruhe, tsî sadu hoadu ge nî ǂan tita ǃKhūta go ǃhoa ǃkhaisa.

²²Nētib ra ǃKhūb ǃKhūba mî: Tita ge ǁkhāti ǂamǃnâ hâ ǂgonab ǀgapi sederhaib dib xa ū tsî nîra ǂgā bi; ǂamǃnâ hâ ǂkham ǂgonarogu di ǀgui tsauraba khôaǁnâ tsî ǁîba ǀgapi tsî ǃguri ǃhommi ai nîra ǂgā.

²³ǀGapi ǃhommi Israeli dib ai ta ge tita ǁîba nîra ǂgā; ob ge ǂgonaga nîra ūǀkhī tsî nîra ǂûtani, tsîb ge nîra ǂkhaisa sederhai kai, ǁîb ǃnagan nî anin hoan tsî ǁgaboxan hoana ǁans kōse; sommi ǂgonagu âb dib ǃnân ge ǁîna nîra ǁan.

²⁴Nēti di ge haidi ǃaub didi hoade nî ǂan, tita ǃKhūta ge ǀgapi haiba ǃgamǃgam tsî ǂam haisa ǀgapiǀgapi tsî ǃam haisa ǂnâǂnâ tsî ǂnâsa haisa ǃkhā kai ǃkhaisa. Tita ǃKhūta ge ǁîsa ge ǃhoa, tsî ta ge ǁîsa nîra dī.