Read Khoekhoegowab Esegieli 18 Bible Online

Esegieli 18 - Khoekhoegowab bible

Esegieli 18

¹ǃAruǀîs ge mîs ǃKhūb disa hāba te tsî ge mî:

²Tare-e du ūhâ, o du nē ǂkhoamîsa Israeli di ǃhūb ǃnâ sîsenū tsî ra mî: ǁGûgu ge ora ǂauxûiǂûna ge ǂû, on ge ǀgôana ge ǀkhuruǁgû.

³Tita a ûitsama ǃkhais ao, tib ra ǃKhūb ǃKhūba mî, ǃaruǀî du ge ībahe tide, nē ǂkhoamîsa du nî Israeli ǃnâ sîsenū ǃkhaisa.

⁴Mû, ǀomdi hoadi ge a ti, ǁgûb di ǀoms khami, ǁnās ǁkhās khamis ge ǁkhāti ǀgôab di ǀomsa a ti. ǁNā ǀoms hîa ra ǁores, ǁîs ge nîra ǁō.

⁵Tsî khoe-i ga ǂhanu-ai, tsî ǂhanub tsî ǂhanu-aisib tsîkha dīo,

⁶tsî i ga ǃhomgu ai ǂû tama io, tsî i ga ǁî-i di mûra ǁgôa-elogu Israeli ommi diguǀî ǀhōǃapa tama io, tsî i ga ǀgūkhoeb di tarasa ǀuriǀuri tama io tsî i ga ǃanu tama tarasa ǀgū tama io,

⁷tsî i ga khoe-i xare-e ǁgâiǀā tama io, tsî i ga surude-aoba mâiǁkhaesa ǁkhawa mâo, tsî i ga xū-e ǁgūǀhana tama io, tsî i ga ǃâ hâba ǁî-i di pereba māo, tsî i ga ǀōǀkhā hâba anao,

⁸tsî i ga hōǃnās ai mā tama io, tsî ǃnā hâ hōbasensa ū tama io, tsî i ga ǁî-i di ǃomma ǂkhababa xu ǂgaedawao, tsî i ga ama-aise ǂhanuba nē-i tsî nau-i tsîn ǁaegu sîseno,

⁹tsî i ga ti ǂnûiǂgādi ǃnâ ǃgû tsî ti ǂhanuga ǃkhōǀgaipeo, îǂhôase i nî dīse; nē ǂhanu-ai-i ge amase nîra ûi, tib ra ǃKhūb ǃKhūba mî.

¹⁰Tsî ǀgôabab ga hō-o ǃkhuru ǀaoǂnâxū-aoba, tsîb ga ǃgâsab âba nē xūn di ǀgui-e dī-ū,

¹¹xaweb ga nau xūna dī-ū tama i, tsîb ga ǁkhāti ǃhomgu ai ǂnûo, tsîb ga ǀgūkhoeb âb di tarasa ǀuriǀurio,

¹²tsîb ga ǀkhomǀkhomsabeb tsî ǂhâ hâba ǁgâiǀāo, tsîb ga ǁgūǀhanao, tsîb ga mâiǁkhaesa ǁkhawa mā tama io, tsîb ga ǁgôa-eloga ǃgapaǀîo, tsîb ga ǁgaidīga dīo,

¹³tsîb ga hōǃnās ai mâo, tsîb ga ǃnā hâ hōbasensa ūo: Ûib nî ǁîba? ǁÎb ge ûi tide, ǁnā ǁgaidīn hoanab gere dī xui-ao, ǁîb ge ǂanǂansase nîra ǃgamhe; ǀaob âb ge ǁîb ai nîra hâ.

¹⁴Tsî mû ǀgôabab ga hō-o, ǁgûb di ǁoren, ǁîb ra dīn hoana mû, tsî ga ǂanbasenna ǁnāti īnab dī tidesa,

¹⁵tsîb ga ǃhomgu ai ǂnû tama i, tsîb ga ǁgôa-elogu Israeli ommi diguǀî ǃgapakhâi tama i, tsîb ga ǀgūkhoeb âb di tarasa ǀuriǀuri tama i,

¹⁶tsîb ga khoe-e ǁgâiǀā tama i, tsîb ga mâiǁkhaesa ū tama i, tsîb ga xū-e ǁgūǀhana tama i, tsîb ga pereb âba ǃâ hâ-e mā tsîb ga ǀōǀkhā hâ-e sarana ana,

¹⁷tsîb ga ǃommi âba ǀkhomǀkhomsabeba xu ǂgaedawa tama i, tsîb ga hōǃnās tsî ǃnā hâ hōbasensa ū tama i, tsîb ga ti ǂhanuga dī tsîb ga ti ǂnûiǂgādi ǃnâ ǃgû, ǁnāti īb ge ǂhanuoǃnâsib ǁgûb dib ǃaroma ǁō tide, tsîb ge ǂanǂansase nîra ûi.

¹⁸ǁÎb di îb, ǁgâiǀā raseb ge ǁgâiǀā, ǃgâsab di xūna ǀâ tsîb ge ti mûǁae ǃgâi tama xūna ǁîb di ǁaeda ǁaegu dī amaga, kō, ob ge ǂhanuoǃnâsib âb ǃnâ nîra ǁō.

¹⁹O du ge sado: Tarexasa kha ǀgôab ǂhanuoǃnâsib ǁgûb diba tani tamasa? ti ra mî. ǁNā ǀgôab, ǂhanub tsî ǂhanu-aisib tsîkha ga dī tsî ga ti ǂnûiǂgādi hoade ǃkhōǀgaipe tsî ga ǁîde dīb, ǁîb kom amase nîra ûio.

²⁰ǁNā ǀoms ǁore ras, ǁîs ge nîra ǁō; ǀgôab ge ǂhanuoǃnâsib ǁgûb diba tani tide, tsî ǁgûb ge ǂhanuoǃnâsib ǀgôab diba tani tide; ǂhanu-aisib ǂhanu-aib dib ge ǁîb ǂûb ai nîra hâ, tsî eloxoresasib eloxoresab dib ge ǁîb ǂûb ai nîra hâ.

²¹Xawe eloxoresab ga ǁoren âb, dīb gena xu ǃhobaseno, tsî ti ǂnûiǂgādi hoade ǃkhōǀgaipeo tsî ǂhanub tsî ǂhanu-aisib tsîkha dīo, amaseb ge ǁîba nîra ûi, ǁîb ge ǁō tide.

²²ǁÎb di ǃûǂamdi, dīb gedi hoadi ge ǂâihe tide, ǁîb di ǂhanu-aisib, hîab ge dīb ǃnâb ge ǁîba nîra ûi.

²³Tita tura-e xare ūhâ ta nî eloxoresab di ǁōb ǃnâ? tib ra ǃKhūb ǃKhūba mî. Xare ti i ī tama hâ, ǁîb ga ǁîb di daoga xu ǃhobasen ǃnubaib nîra ûi ǃkhaisa?

²⁴Xawe ǂhanu-aib ga ǂhanu-aisib âba xu oa tsî ǂkhababa dīo, ǁnā ǁgaidīn eloxoresab ra dīn hoan ǃoa, ûib ga ǁîba? ǁÎb di ǂhanu-aisin, dīb gen hoan ge ǂâihe tide; ǁîb di ǃûǂams, ǃûǂammi ges ǃnâ, ǁîb di ǁoreb, ǁoreb geb ǃnâb ge nîra ǁō.

²⁵Xawe du ge sado ǃKhūb di daob ge ǂhanu tama hâ ti ra mî. ǁNâu re, Israeli ommi dido, ti daoba ǂhanu tama hâ? ǂKhaba tama gu kha hâ sadu di daoga?

²⁶ǂHanu-aib ga ǂhanu-aisib âba xu oa tsî ǁîb ǃnâ ǁō-o, ob ge ǁîba ǁîb di ǂkhabab, dīb geb ǃnâ nîra ǁō.

²⁷Xawe eloxoresab ga eloxoresasib âb, hîab ge dība xu ǃhobasen tsî ǂhanub tsî ǂhanu-aisib tsîkha dīo, ob ge ǁîba ǀoms âba ûib ǃnâ nîra sâu.

²⁸Kōkō tsîb ra ǁîb di ǃûǂamdi dīb gedi hoade xu ǃhobasen amagab ge ǁîba amase nîra ûi, ǁîb ge ǁō tide.

²⁹Xawen ra Israeli ommi dina: Daob ǃKhūb dib ge ǃgâi tama hâ, ti mî. Ti daoga kha ǂhanu tama nî ī, sadu Israeli ommi dido? Sadu di daoga kha ǂkhaba tama hâ?

³⁰ǁNā-amaga ta ge tita sadu Israeli ommi dido nîra ǀgoraǃgâ, mâ-i hoa-e ǁî-i di daogu ǃoa, tib ra ǃKhūb ǃKhūba mî; oa î du ǃhobasen sadu di ǃûǂamdi hoade xu, o du ge ǂhanuoǃnâsiba ǁgonǁgonǂgaose ī kaibahe tide.

³¹Sado xu aobē sadu di ǃûǂamde, ǃûǂamdi dī du ge di hoade, î du ǀasa ǂgaoba tsî ǀasa gagasa kurubasen; tare xū-i ǃaroma du kha ǁnâi nî ǁō, sadu Israeli ommi di do?

³²Tita ge tura-i xare-e ūhâ tama hâ ǁō ra-i di ǁōb ǃnâ, tib ra ǃKhūb ǃKhūba mî, ǁnā-amaga ǃhobasen î du ûi.