Read Khoekhoegowab Esegieli 19 Bible Online

Esegieli 19 - Khoekhoegowab bible

Esegieli 19

¹ǃAruǀî satsa ǃgae-ai-e ǃgae Israeli di gaosagu ǂama,

²îts mî: Taresa ge i sa îsa? Xams ge ǁî ge i, xamdi ǁaegu ǁgoesa, ǁîs ge ǂkhamn âsa xamgu ǁaegu ge kaikai.

³Tsîs ge ǂkhamgu âs di ǀguiba ge kaikai, ǁîb ge ge ǂkham xam kai. ǁÎb ge ǃkhōb gena ǀkhauǃā, ǁîb ge khoena ge ō.

⁴ǁÎ ǃkhaisa di ge ǁaede ǁîb xa ge ǁnâu, ǁîb ge ǁîn di tsaus ǃnâ ge ǃkhōhe, tsîn ge ǁîba ǂhaoǀurin ǀkha Egipteǃhūb ǃoa ge ūsī.

⁵Tsî ǁîs ge mû ǃâubasens ra hîas ra ǃâuǁkhui ǃkhaisa, os ge ǀnîb ǂkhamgu âs diba ū tsî ǁîba ǂkham xamse ge ǂnûi.

⁶ǁÎb ge hugaǀgui xamgu ǃnâ gere ǃgû, ǁîb ge ǂkham xam kai tsî ǃkhōb gena ge ǀkhauǃā ǁîb ge khoena ge ō.

⁷ǁÎb ge ǃoataradi âna ge ǂan tsîb ge ǃādi âna ge hîkākā, ǃhūb tsî ǁîb di ǀoasib ge dommi âb di ǃorob xa ǃhurigâs kōse.

⁸ǃNubai di ge ǁaede ǃhūǃâde xu ǁîb ǃoagu ge hāǂnamipe, tsîn ge ǂhanni âna ǁîba ge khoraba, ǁîn di tsaus ǃnâb ge ǁîba ge ǃkhōhe.

⁹Tsîn ge ǁîba ǂhaoǀurin ǀkha ǂganamhe hâ ǃkhō-oms ǃnâ ge mâi Babilons di gao-aob ǃoan nî ǁîba ūsīga. ǁÎn ge ǁîba ǁaposa ǃkhaidi ǃnâ ge ūsī, dommi âb ǃaruǀî Israeli di ǃhomgu ai ǁnâuhe tidese.

¹⁰Sa îs ge ǂauxûiǂûhais khami ge ī, ǃnōsasib ǃnâ ǁgamgu tawa ǂgāhe hâsa; ǁîs ge ǂûtanixa tsî ǂgonagu xa ge ǀoa hâ i, ǁgamxasib xa.

¹¹Tsîs ge ǀgaisa ǂgonaga ge ūhâ i, gaosab di gaohaise anu hâga, tsî ǃgaos mâ ǂgonab dis ge ǀgapi ge i ǀgom ǂgonan ǁaegu, tsîs ge ǀgapib âs ǃaroma ge mûhe ǂgonagu âs di ǂguib ǀkha.

¹²Xawes ge ǁgôasib ǃnâ ge ǃhomǂuihe, tsî ǃhūb ai ge aoǁguihe. Tsî ǂoab aiǂoas dib ge ǂûn âsa ge ǂnâǂnâ; ǁîs di ǀgaisa ǂgonagu ge khôaǁnâhe tsî ge ǂnâ, ǀaes ge ǁîga ge hapu.

¹³Tsî nēsis ge ǁîsa ǃgaroǃhūb ǃnâ ǂgāhe hâ, ǂnâsa tsî ǁgâsa ǃhūb ǃnâ.

¹⁴Tsî ǀaes ge ǀgui ǂgonab ǁîs di ǂgonagu diba xu ge ǂoa, ǂûn âsa ge hapusa, ǃaruǀî i ge ǀgaisa ǂgona-i gaohaise anu hâ-i xare-e ǀkhai is kōse, gaosîsenūhe nî-e. Nēs ge ǃgaesa, tsîs ge ge ǃgae-ai kai.