Read Khoekhoegowab Esegieli 2 Bible Online

Esegieli 2 - Khoekhoegowab bible

Esegieli 2

¹Tsîb ge ǁîba tita ǃoa ge mî: Khoenôa ǀgôatse, mâ ǂaira âts ai, o ta ge tita sa ǀkha nî ǃhoa.

²Ob ge Gagaba, ǁîb ra ǃhoa-ū te hîa, ti ǃnâ ge hā, ti ǂaira ai ge mâi teba, o ta ge ǁnāb, tita ra ǃhoa-ūba ge ǁnâu.

³Ob ge ǁîba tita ǃoa ge mî: Khoenôa ǀgôatse, tita ge satsa Israeli ôan ǃoa ra sî, ǁnā mâǃoaxa ǁaedi tita ge mâǃoadi ǃoa; ǁîn tsî ǁîn di îgu ge tita ǃoagu gere ǃûǂam nētsēs kōse.

⁴Tsî nē ǀgôan ge ǃgari ais tsî karosa ǂgaoba ūhâ, tita ge satsa ǁîn ǃoa ra sî, tsîts ge ǁîna ǃoa nî mî: Nētib ra ǃKhūb ǃKhūba mî.

⁵Tsî ǁîn, ǁnâun kas, ǁnâu taman ga is ka xawe, ǁnān ka xawe, mâǃoaxa ommi din a xui-ao, xawen ge nî ǂan, kēbo-aob ge ǁîn ǁaegub ǃnâ hâ i ǃkhaisa.

⁶Tsî sats khoenôa ǀgôatse, tā ǁîna ǃao îts tā ǁîn di mîde ǃao, ǁîǁhaiben tsî ǁkhūn tsîn ge sa ǀkha hâ tsî ǀhūn tawats satsa ǁan hâ xawe, tā ǃao ǁîn di mîde îts ais ân xa tā ǃhurigâ, mâǃoaxa ommi din a xuige.

⁷Îts ti mîde ǁîna mîba, ǁnâun kas ǁnâu taman ga is ǁnâun kas hoasa, mâǃoaxan a xuige.

⁸Tsî sats khoenôa ǀgôatse, ǁnâu tita satsa ra ǃhoaǀîna, îts satsa tā mâǃoaxa, ǁnā mâǃoaxa ommi din ī khami, ams âtsa khowa îts ǂû, tita satsa ra mā xū-e.

⁹ǃNubai ta ge ge kō tsî mû, ǃommi ge tiǀî ge ǀhōǂuihe hâ i, tsî mû, ǁîb ǃnâ i ge xamihe hâ ǂkhani-e ge hâ i.

¹⁰Ob ge ǁîba ǁî-e ge khowa ti ais aiǃâ, tsî i ge ǁî-e xoa-aihe ge hâ i, aisǀkhāb tsî khaosǀkhāb ai, tsî ǁî-i ai i ge ǃgae-amdi tsî ǀhâimâinǀomdi tsî tsûgu tsîna ge xoahe hâ i.