Read Khoekhoegowab Esegieli 20 Bible Online

Esegieli 20 - Khoekhoegowab bible

Esegieli 20

¹Tsî i ge hûǁî kurib ǃnâ ge ī koroǁî ǁkhâb ǃnâ, ǁnā ǁkhâb di disiǁî tsēs ai aogu Israeli kaigu digu ge hā ǃkhaisa ǃKhūba gu nî dîse, tsî gu ge ti ais aiǃâ sī ge ǂnû.

²ǃNubais ge mîs ǃKhūb disa ge hāba te, mî rase:

³Khoenôa ǀgôatse, ǃhoa kaigu Israeli digu ǃoa îts mî: Nētib ra ǃKhūb ǃKhūba mî: Hā go go, tita go nî dîse? Tita a ûitsama ǃkhais ao ta ge tita sago xa dîhe tide, tib ra ǃKhūb ǃKhūba mî.

⁴ǁÎgats kha nî ǀgoraǃgâ? ǁÎgats kha nî ǀgoraǃgâ, sats khoenôa ǀgôatse? ǂAnǂan gu ǁîgu îgu di ǁgaidīna,

⁵îts ǁîga mîǀî: Nētib ra ǃKhūb ǃKhūba mî: Israela ta ge ǁhûiǂuibasen tsēs ai ta ge tita ti ǃomma Jakob ommi di ǃkhommiǀî ge ǀhōǂui tsî ǁî-aitsama ǁîna ge ǂanǂansen Egipteǃhūb ǃnâ, ā, ǃommi âtaba ta ge tita ǁînǀî ǀhōǂui tsî: Tita ge ǃKhūta, sadu di Elota, ti ge mî.

⁶ǁNā tsēs ǁkhās ai ta ge tita ti ǃomma ǁînǀî ge ǀhōǂui, Egipteǃhūba xu ta nî ǁîna ǂgaeǂguiǂuise, ǃhūb tita ǁîna nî ǃkhōǂuibab, daib tsî danib tsîkha ra dâuǃnâb, ǃhūgu hoagu xa a ǂkhaisab ǃnâ.

⁷O ta ge tita ǁîn ǃoa ge mî: Mâ-i hoa-e a-i ǁî-i di mûra di ui-uisana aoxū, î du tā ǁgôa-elogu Egipteb digu ǀkha ǀuriǀurisen; tita ge ǃKhūta, sadu di Elota.

⁸Xawen ge tita mâǃoa tsî ǁnâu ǂgao te tama ge i; khoe-i xare-i ge ǁî-i di mûra di ui-uisana aoxū tama i tsî Egipteb di ǁgôa-eloga ǁnāxū tama ge i, ǁnā-amaga ta ge tita ge mî, ti ǁgôasiba ta nî ǁîn ǂama ǁhōǂui ǃkhaisa, ǁaib âtaba ta nî ǁîn tawa ǀoaǀoase Egipteǃhūb di ǁaegub ǃnâ.

⁹Tsî ta ge ǁî ǃkhaisa ti ǀons ǃaroma ge dī, ǁîs ǁnā ǁaedi, ǁîn ǁaegun hân mûǁae ǀuriǀurihe tidega, ǁîna ta ge mûdi ân aiǃâ ǁî-aitsama ge ǂanǂansen, Egipteǃhūba xu ta nî ǁîna ǂgaeǂguiǂuise.

¹⁰Tsî Egipteǃhūba xu ǂgaeǂguiǂui tsî ta ge ǁîna ǃgaroǃhūb ǃnâ ge ūsī.

¹¹ǃNubai ta ge tita ǁîna ti ǂnûiǂgāde ge mā tsî ǁîna ti ǂhanuga ge ǂanǂan, sats khoets ǁîgats ga dī ǃnubai ǁîga xu nîra ûiga.

¹²ǁNās tawa ta ge tita ǁîna ti sâtsēga ge mā, saose gu nî īga tita tsî ǁîn tsîda ǁaegu, ǂann nîga, tita ǃKhūta a ǁî, ǁîna ra ǃanuǃanu ta ǃkhaisa.

¹³Xawe Israeli ommi din ge tita ǃgaroǃhūb ǃnâ ge mâǃoa; ǁîn ge ti ǂnûiǂgādi ǃnâ ǃgû tama ge i tsîn ge ti ǂhanuga ge aoxū, sats khoets ǁîgats ga dī ǃnubai ǁîga xu nîra ûiga, tsîn ge ti sâtsēde kaise ge ǀuriǀuri. Tita ge: Ti ǁgôasiba ta ǃgaroǃhūb ǃnâ ǁîn ǂama nî ǁhōǂui, hîkākāhen nîse, ti ge mî.

¹⁴Tsî ta ge tita ǁî ǃkhaisa ti ǀons ǃaroma ge dī, ǁîs ǁnā ǁaedi, ǁîn di mûdi aiǃâ ta ge ǂgaeǂguiǂuin mûǁae ǀuriǀurihe tidega.

¹⁵Xawe ta ge tita ti ǃomma ǃgaroǃhūb ǃnâ ǁînǀî ge ǀhōǂui, ǁîna ta ǁnā ǃhūb, ǁîna ta ge māb, daib tsî danib tsîkha ra dâuǃnâb, ǃhūgu hoagu xa a ǂkhaisab ǃnâ ūsī tidega;

¹⁶ti ǂhanugan ge aoxū, tsî ti ǂnûiǂgādi ǃnân ge ǃgû tama i, tsî ti sâtsēden ge ǀuriǀuri ǃkhais xa, ǁîn di ǂgaob ge ǁîn di ǁgôa-eloga gere ǃgûǃgon xui-ao.

¹⁷Xawe ti mûs ge ǁîna ge ǃkharesi, ǁîna ta hîkākā tidese tsî ǃgaroǃhūb ǃnâ ta ǁîna dītoaǃari tidese.

¹⁸Tsî ta ge tita ǁîn di ôan ǃoa ge mî ǃgaroǃhūb ǃnâ: Tā ǃgû sadu îgu di ǂnûiǂgādi ǃnâ, î du ǁîgu di ǂhanuga tā ǃkhōǀgaipe, î du ǁîgu di ǁgôa-elogu ǀkha tā ǀuriǀurisen.

¹⁹Tita ge ǃKhūta sadu di Elota, ǃgû ti ǂnûiǂgādi ǃnâ, î du ti ǂhanuga ǃkhōǀgaipe î du ǁîga dī.

²⁰Î du ti sâtsēde khai, o di ge ǁîde saose nîra i tita tsî sadu tsîda ǁaegu, ǂan du nîga tita ǃKhūta a sadu di Elo ǃkhaisa.

²¹Xawe ǁnā ǀgôan ge tita ǁkhāti ge mâǃoa; ǁîn ge ti ǂnûiǂgādi ǃnâ ǃgû tama, tsî ti ǂhanuga sîsenū tama ge i, ǁînan nî dīse, ǁîna xuts nî sats khoetsa ǁînats ga dī ǃnubai ûiga; ǁîn ge ti sâtsēde ge ǀuriǀuri, tita ge: Î ta ti ǁgôasiba ǁîn ǂama ǁhōǂui, î ta ti ǁaiba ǁîn tawa dīǀoaǀoa ǃgaroǃhūb ǃnâ ti mîs kōse.

²²Xawe ta ge tita ti ǃomma ge ǂgaedawa tsî ti ǀons ǃaroma ǁîsa ge dī, ǁîs ǁnā ǁaedi, ǁîn di mûdi aiǃâ ta ge ǁîna ǂgaeǂguiǂuin mûǁae ǀuriǀurihe tidese.

²³Tita ge ǁkhāti ti ǃomma ǁînǀî ge ǀhōǂui ǃgaroǃhūb ǃnâ, tita nî ǁîna ǀgaruǀgaruse ǁaedi ǃnâ tsî ǁîna tsoromâise ǃhūgu ǃnâ,

²⁴ti ǂhanugan ge dī tama i, tsî ti ǂnûiǂgāden ge aoxū, tsî ti sâtsēden ge ǀuriǀuri tsî ǁîn di mûdi ge ǁîn îgu di ǁgôa-eloga ǃgôaǃgon ǃkhais ǃaroma.

²⁵ǁNā-amaga ta ge tita ǁkhāti ǂâibasendi ǃgâi tamade ge mā tsî ǂhanugu, ǁîgu tawan ge ûi ǁoa iga;

²⁶tsî tita ge ǁîna ǁîn di ǁguibadi ǃnâ ge ǀuriǀuri, ǁgûsa ra ǁkhowa-amn hoanan ge ǀaesa ǃgûǃganu kai ǃkhais xa, tita ǁîna nî hîǀhuruse, ǁîn nî ǂanse tita a ǃKhū ǃkhaisa.

²⁷ǁNā-amaga, khoenôa ǀgôatse, ǃhoa Israeli-ommi din ǃoa îts mîba ǁîna: Nētib ra ǃKhūb ǃKhūba mî: Nēs on ǀkha gu ge sadu di îga tita ge ǃkhāǃkhā, ǃûǂam rase gu ge tita ǃoagu ǃûǂam ǃkhaisa.

²⁸Tita ge ǁîna ǁnā ǃhūb, ǁîb ǂama ta ge ti ǃomma ǀhōǂuib ǃnâ ūsīo, ǁîba ta nî ǁîna māse, on ge mâ ǀgapi ǃnoms hoas tsî mâ ǁoes hoasa kō tsî ǁîn di ǁguibade ǁnāpa gere ǁguiba tsî ǁîn di ǂoeǂoe ra ǁguibade ǁnāpa gere mā, tsî ǁnāpan ge ǁîn di ǀnamǀnamsa ǁamaba gere ǂnûi, tsî ǁnāpan ge ǁîn di ǂnâǁguibade gere ǁguiba.

²⁹O ta ge tita ǁîna ǃoa ge mî: Mâba ǁnā ǀgapib, ǁîb ǃoa du ra ǃgûba, xawes ge ǀons âba ǀgapi ti ra ǂgaihe nētsēs kōse.

³⁰ǁNā-amaga mî Israeli ommi ǃoa: Nētib ra ǃKhūb ǃKhūba mî: ǀUriǀurisen du ge daob sadu îgu dib ǃnâ tsî ǀaiǃgon du ge ǁîn di ui-uisana?

³¹Ā, ǁguibas sadu di hōdi dis ǀkha tsî sadu di ôana ǀaesa ǃgûǃganu kais ǀkha du ge ǀuriǀurisen hâ, sadu di ǁgôa-elogu hoagu tawa nētsēs kōse, tsî tita kha dîkaisen ta nî sadu Israeli ommi didu xa? Tita a ûitsama ǃkhais ao ta ge tita sadu xa dîkaisen tide.

³²ǁNā-amaga i ge sadu di gagas ǃnâ ge khâi-e tātse ǃnae tide, sadu ra mî-e: Sida ge ǁaedi tsî ǃhūgu di ǃhaodi khami nîra ī, hain tsî ǀuin tsîna ra ǃoabase.

³³Tita a ûitsama ǃkhais ao, tib ra ǃKhūb ǃKhūba mî, tita ge ǀgaisa ǃommi ǀkha tsî ǀhōǂuihesa ǁôab ǀkha tsî ǁhōǂuihesa ǁgôasib ǀkha sado nîra gaoǂam.

³⁴Tita ge sado ǁaede xu nîra ǂgaeǂguiǂui tsî sado nîra ǀhaoǀhao xui-ao, ǁnā ǃhūgu, ǁîgu ǃnâ du ge ǀgaisa ǃommi ǀkha tsî ǀhōǂuihesa ǁôab ǀkha tsî ǁhōǂuihesa ǁgôasib ǀkha ǀgaruǀgaruhega xu.

³⁵ǁNās tawa ta ge tita sado ǃgaroǃhūb ǁaedi dib ǃnâ nîra ūsī, tsî ta ge ǁnāpa sado nîra ǀgoraǃgâ aisa xu ais ǃoa.

³⁶Tita ge sadu di îga ǃgaroǃhūb Egipteǃhūb dib ǃnâ ǀgoraǃgâ khami, ǁnās ǁkhās khami ta ge tita sadu ona nîra ǀgoraǃgâ, tib ra ǃKhūb ǃKhūba mî.

³⁷Tsî tita ge sado ǃûi-aob ǃhôas ǃnaga nîra ǃgûǃganu kai, tsî tita ge sado tsôab ǃgaeǀhaos dib ǃnâ nîra ūǂgā.

³⁸ǁNās xōǀkhā ta ge tita ǁnān, mâǃoa tsî ga tita ǃoagu ǃûǂamna sado xu nîra khai. Tita ge ǁîna ǃhūb ǃhaokhoesis ân diba xu nîra ǂgaeǂguiǂui, tsîn ge ǃhūǃâb Israeli dib ǃnâ ǁkhawa hā tide, tsî du ge nîra ǂan tita a ǃKhū ǃkhaisa.

³⁹Tsî sadu Israeli ommi dido, nētib ra ǃKhūb ǃKhūba mî: ǃGû î du mâ-i hoa-e ǁî-i di ǁgôa-eloga ǃoaba, tsî ǁnās khaoǃgâ sadu tita ai ǃgâ tide amaga du ge ǃaruǀî ti ǃanu ǀonsa ǀuriǀuri tide sadu di hōdi ǀkha tsî sadu di ǁgôa-elogu ǀkha.

⁴⁰Ti ǃanu ǃhommi ai, ǁnā ǀgapi ǃhommi Israeli dib ai, tib ra ǃKhūb ǃKhūba mî, ǁnāpan nî Israeli ommi hoaragab dina tita ǃoaba xui-ao, ǁîn hoan, ǁnāpa ta ge ǁîn ǃnâ nîra ǃgâibahe, tsî ǁnāpa ta ge sadu di ǃkhōkhâiǁguibade nîra ǂgao tsî ǂgurosan sadu di ǃkhōkhâixūn din sadu di khaihesan hoan ǀkha.

⁴¹Tita ge sadu ǃnâ nîra ǃgâibahe ǀnamǀnamsa ǁamab ǃaroma, tita ge sado ǁaede xu nîra ǂgaeǂguiǂui tsî ǁnā ǃhūgu, ǁîgu ǃnâ du nî ǀgaruǀgaruhega xu ǀhaoǀhao ǃnubai, tsî tita ge sadu ǃnâ nîra khaihe ǁaedi di mûdi aiǃâ.

⁴²Tsî sadu ge nîra ǂan tita a ǃKhū ǃkhaisa, tita nî sado ǃhūǃâb Israeli dib ǃnâ ūsī ǃnubai, ǁnā ǃhūb, ǁîb ǂama ta ge ti ǃomma, sadu di îga ta nî mā bise, ūkhâib ǃnâ.

⁴³O du ge ǁnāpa sadu di daogu xa nîra ǂâi tsî sadu di dīgu, ǁîgu ǀkha du ge ǀuriǀurisengu xa, o du ge ǁî-aitsama sadu xa nîra uixa sadu di ǂkhaban, hîa du gere dīn hoan xa.

⁴⁴O du ge nîra ǂan tita a ǃKhū ǃkhaisa, tita ga sadu ti ǀons ǃaroma sîsenū ǃnubai, sadu di ǂkhaba daogu ǃoa tama i tsî ǁkhāti sadu ǁgao hâ dīgu ǃoa tama, sadu Israeli ommi dido, tib ra ǃKhūb ǃKhūba mî.

⁴⁵ǃAruǀîs ge mîs ǃKhūb disa hāba te tsî ge mî:

⁴⁶Khoenôa ǀgôatse, ais âtsa unu ǃkhawagasǀî ǁgoe daob ǁga, îts ǃkhawagasǀî ǂnâ îts kēbo ǁoes ǃkhawagasǀî ǁgoe ǃaub dis ǁga.

⁴⁷Îts ǃkhawagas di ǁoesa mî-ū: ǁNâu ǃKhūb di mîsa: Nētib ra ǃKhūb ǃKhūba mî: Mû, tita ge sadu ǃnâ ǀae-e nîra ǂhubi sa ǃnâ nî ǃam hai-i hoa-i tsî ǂnâsa hai-i hoa-e hapu-e. ǁHabu ra ǁhabub ge ǀarihe tide, tsî ǁîb xa di ge aidi ǃkhawagas didi hoade nîra khauǃkhūhe ǃkhawagasa xu ǀapas kōse.

⁴⁸Os ge ǁgans hoasa nîra mû, tita ǃKhūta ǁî-e ge ǂhubi ǃkhaisa, ǁî-i ge ǀari tide.

⁴⁹O ta ge tita ge mî: Okha, ǃKhūtse, ǃKhūtse, ǁîn ge tita xa: ǂKhōdi di kuru-ao tamaba kha ǁîba? ti ra mî.