Read Khoekhoegowab Esegieli 21 Bible Online

Esegieli 21 - Khoekhoegowab bible

Esegieli 21

¹Tsîs ge mîs ǃKhūb disa hāba te tsî ge mî:

²Khoenôa ǀgôatse, unu sa aisa Jerusalemsǀî, îts ǂnâ ǃanusigu ǃoagu, îts kēbo ǃhūb Israeli dib ǃoagu.

³Îts Israeli ǃhūba mîǀî: Nētib ra ǃKhūb ǃKhūba mî: Mû, tita ge nîra hāǂam tsi, tita ge ti gôaba ǁgarub âba xu nîra ǂgaeǂui, tsî tita ge ǂhanu-aib tsî eloxoresab tsîkha nîra ǃhūǃnoma.

⁴ǂHanu-aib tsî eloxoresab tsîkha ta nî tita satsa ǃhūǃnomaba amaga, ǁnā-amagab ge gôab âtaba ǁgarub âba xu ǁgans hoas ǃoagu nîra ǂoaxa ǃkhawagasa xu ǀapas kōse.

⁵Os ge ǁgans hoasa nîra ǂan, tita ǃKhūta ge ti gôaba ǁgarub âba xu ǂgaeǂui ǃkhaisa; ǁîb ge ǁkhawa oa tide.

⁶Xawe sats khoenôa ǀgôatse, ǀhâimâinǀom; ǀhâimâinǀom ǁîn di mûdi aiǃâ kamanab di khôaǂkhūǂkhūs ǀkha tsî ausib ǀkha.

⁷O i ge nîra ī, sa ǃoan ga: Tarexats ra ǀhâimâinǀom? ti mîo, ots ge satsa nî mî: Gommi ǃaromas ge, ǁîb ra hā xui-ao ti. Ob ge mâ ǂgaob hoaba nîra tsuni, o gu ge ǃomgu hoaga nîra ǃopo, os ge mâ gagas hoasa nîra ǃū; os ge mâ ǁgoas hoasa ǁgammi axase nîra dâuǃari. ǁÎ ǃkhais ra hā, ǁî ǃkhais ge nîra ī, tib ra ǃKhūb ǃKhūba mî.

⁸ǁKhawas ge mîs ǃKhūb disa hāba te tsî ge mî:

⁹Khoenôa ǀgôatse, kēbo îts mî: Nētib ra ǃKhūb ǃKhūba mî: Mî re: Gôab, ā, gôab ge ǀā hâ tsî ǂkhanu hâ.

¹⁰ǁÎb ge ǀāǀāhe hâ, ǂā-eb nî ǂāga, ǁîb ge ǂkhanuǂkhanuhe hâ, ǂkhaib nîga! ǃGâiaǂgao da nî? Haib ti ôab dib, mâ hais hoasa ra ǃharaxūb dib ge a ǁî.

¹¹Tsî ǁîb ge ǁîba ge mā, ǀomǀkhāheb nîga, ǃomǁaeb ǃnâb nî māhese; ǀāǀāhe tsî ǀomǀkhāhe ge hâ i gôaba ǃgamaob di ǃomǁaeb ǃnâb nî māhega.

¹²ǃAu îts ā, sats khoenôa ǀgôatse, ǁîb ge ti ǁaes ǃoagu nîra hā; ǁîb ge Israeli di gaosagu hoagu ǃoagu nîra hâ xuige. ǃHuriǃhuri-aidi ge gôab xa ti ǁaes tawa nîra hâ, ǁnā-amaga ǂnau ǂnamipeb ai.

¹³ǃÂitsâhen ge ǃnubai, tare-e ge ī? ǃHaraxūhesa hai-e hâ i tide? tib ra ǃKhūb ǃKhūba mî.

¹⁴ǁNā-amaga, sats khoenôa ǀgôatse, kēbo îts ǃomsa ǃoms ǀkha ǂnau. Gôab ge ǃnonaǁî ǃnās ai nîra ǃhonarihe, gôab ǁnān ǂnauǃanhe nî kaikhoen dib ge a ǁî, ǃnāb ǃnâ hâ ǃnā-oms kōse ǁîn tawa nîra ǂgâba.

¹⁵Tita ge ǀams gôab disa ǁîn di ǁāgu hoagu ǃoagu ge ǂnûi, ǂgaob nî tsuniga, tsî ǁgonǁgonǂgaodi nî ǂguiga. Okha, ǁîb ge ǂganaihe hâ ǂkhaib nîga, ǁîb ge ǃgamiǂgāhe hâ ǂāb nîga,

¹⁶ǂHomisen, sats gôatse, unusen amǀkhāb ǁôabǀî, ǂhomi îts ǁareǀkhāb ǁôabǀî unusen, ais âts unuhe hâǀîs hoas ǃoa.

¹⁷Tsî tita on ge ti ǃomsa ǃoms âtas ǃoa nîra ǂnau, tsî ti ǁgôasiba nîra sâ kai. Tita ǃKhūta ge ǁî ǃkhaisa ge ǃhoa.

¹⁸ǁKhawas ge mîs ǃKhūb disa hāba te tsî ge mî:

¹⁹Tsî sats, khoenôa ǀgôatse, ǀgam daokha mâi-aiǃâsen, ǁîkha ūb nî gôab Babilons gao-aob diba hākha: ǀGui ǃhūb ǀguiba xu kha ge ǁîkha hoakha nîra ǀkhī. Îts ǀgui ǀkhāba ǁhûiǂuibasen, îts ǁîba ǁhûiǂuibasen ǃās daob di danas tawa.

²⁰Sats ge dao-e nî mâi-aiǃâ, ǁî-e ūb nî gôaba Rabas Amonni ôan dis ǃoagus kas Judab ǃoagus kas hoasa ǁaposa ǃās Jerusalems kōse hā-e.

²¹Babilons di gao-aob ge daogu ra ǀgora ǃkhais tawa ǁnā daokha di danas tawa nîra mâ, aimûǀgarusab nî sîsenūse, ǁîb ge ǂāgu âba nîra ǀāǀā: ǁÎb ge ǁgôatsuiǁgoaga, nîra dî, ǁîb ge âisa nîra kō.

²²Aimûǀgarus ge amǀkhāb ǁôab âb ai nîra hâ Jerusalems tawa, danakhoegab nî mâise, amsab mî ǂnauǃans ǃnâ khowase, dommab nî dâb ǀkha ǃhâkhâise, ǂkhūǂkhūǃnaogab nî ǁāgu ǃoagu mâise, ǁkhuigab nî aokhâise, ǁaposa ǃkhaideb nî ǂnubise.

²³ǁÎ ǃkhais ge ǁîna ǁîn mûǁae ǁau aimûǀgaruse nîra ība, nūden ge ǁîn ǁaegu nū amaga, xaweb ge ǂhanuoǃnâsib xa nîra ǂâi, ǁîn nî ǃkhōhega.

²⁴ǁNā-amagab ra ǃKhūb ǃKhūba nēti mî: Sadu di ǂhanuoǃnâsib xa du ra ǂâi kaihe amagas ge sadu di ǃûǂamdi ra ǂhaiǂhaisa, sadu di ǁoren sadu di dīgu hoagu ǃnâ ra mûhes kōse; sadu xa ra ǂâihe amagas ge ǃommi ǀkha du ra ǃkhōhesa.

²⁵Tsî sats ǃanuoǃnâ eloxoresa gao-aots Israeli dits, tsēs âts nî hātse, ǀkhâuǀams ǂhanuoǃnâsib dis di ǁaeb ai,

²⁶nētib ra ǃKhūb ǃKhūba mî: ǁNā ǀgapasa ūbē, îts ǁnā kronsa ūǁnâ. Nēs ge ǁî tide: Tita ge ǁnā-i ǃgamǃgamsen hâ-e nîra ǀgapiǀgapi tsî ǁnā-i ǀgapi-e nîra ǃgamǃgam.

²⁷Tita ge ǁnā kronsa dawaǃkhupu, dawaǃkhupu, dawaǃkhupusase nîra mâi, ā ǁîs ge nî ǀkhai, ǁnāb, ǁîs ǃoa ǂhanuba ūhâb nîra hās kōse, o ta ge tita ǁîba ǁîsa nîra mâ.

²⁸Tsî sats, khoenôa ǀgôatse, kēbo îts mî: Nētib ra ǃKhūb ǃKhūba mî Amonni ôan tsî ǁîn di ǃharaxūb xa, îts mî: Gôab, gôab ge ǂgaeǂuihe hâ, ǁîb ge ǂāb nîga ǀomǀkhāhe hâ, hîkākāb nîga, ǂkhaib nîga.

²⁹ǁÎn ra ǁausiba mûba tsi hîa, ǁîn ra ǂhumiga aiǃhoaba tsi hîa, ǁnā gu, eloxoresan xa ǂnauǃanhe hâgu, tsēs âgu nî ǀkhâuǀams ǂhanuoǃnâsib dis di ǁaeb ai hāgu di ǃaogu ai ǃgū tsiga.

³⁰ǁÎn ra ī hîa, ab sa gôaba ǁkhawa ǁgarub âb ǃnâ oa. ǁÎs ǃnâts kuruhe hâ ǃkhais, sa ǁanǃhūb ǃnâ ta ge tita satsa nîra ǀgoraǃgâ.

³¹Tsî tita ge sa ǂama ti ǁgôasiba nîra ǁhōǂui. Tita ge ǀaes ti ǁgôasib disa satsa nîra ǃgomǀî; tsî tita ge satsa khauǃkhū ra khoen, ǁgaoǁgaosa ra kurun ǃomǁae nîra māǁnâ.

³²Ots ge ǀaesa ǂûse nîra ība, ob ge ǀaob âtsa ǃhūb ǁaegub ǃnâ nîra hâ, ots ge ǂâihe tide; tita ǃKhūta ge ǁîsa ǃhoa xui-ao.