Read Khoekhoegowab Esegieli 22 Bible Online

Esegieli 22 - Khoekhoegowab bible

Esegieli 22

¹ǃAruǀîs ge mîs ǃKhūb disa hāba te tsî ge mî:

²Sats ǁnâi khoenôa ǀgôatse, satsa ǀaob ǃāsats nî ǃkhō-am? ǁÎsats nî ǃkhō-am? Ā, ǁîsa ǂanǂan ǁîs di ǁgaidīn hoana,

³îts mî: Nētib ra ǃKhūb ǃKhūba mî: Ai, sa ǁaegub ǃnâ ra ǀaoǂnâxū ǃāse, ǁaeb âs nî hāsa, tsî ǁgôa-eloga ra kurubasens, ǀuriǀurisens nîga.

⁴ǀAob hîas ge ǂnâxūb ǂamas ge sasa a ǀhapixa, tsî sa ǁgôa-elogu hîas ge kurubasengu ǀkhas ge ǀuriǀurisen hâ, tsî tsēdi âsa ge ǀgū kai tsî ge kurixa; ǁnā-amaga ta ge tita sasa ǃharaxūxūse ǁaede ge māǁnâ tsî ǃhūgu hoaga ǃhōxūse.

⁵Sa ǀgūse hân tsî sasa xu ǃnūse hân ge sasa nîra ǃhō, sas ǀurisa ǀonsa ūhâs tsî sâoǃnâsib xa ǀoa hâsa.

⁶Mû, gaosagu Israeli digu ge sa ǃnâ ge hâ i, mâb hoab ǀgaib âb ǃoa ǀaoǂnâxūb nîga.

⁷Saob tsî saos tsîran ge sa ǃnâ ge sora; ǃhao khoeban ge sa ǃnâ ǁgâiǀā rase ge sîsenū, ǁîn ge sa ǃnâ ǃoaǀgôa-i tsî ǃoataras tsîna ge ǁgâiǀā.

⁸Ti ǃanusigas ge sasa gere ǃharaxū tsî ti sâtsēgas ge sasa gere ǀuriǀuri.

⁹ǀHoe-aon ge sa ǃnâ ge hâ i, ǀaoǂnâxūn nîga, tsî ǃhomgu ain ge sa ǃnâ ge ǂû, taotaosa ǃkhaiden ge sa ǁaegu ge dī.

¹⁰Taoǃkhais ǁgûb dis ge sa ǃnâ gere ǀhuiǀkhāhe, ǃanuoǃnâs ge ǃkhais âs ǃnâ gere ǀgaiǁgūǀkhāhe.

¹¹ǁNās tawab ge ǀguiba ǀgūkhoeb âb di tarasa gere ǁgaidī-ū, tsî ǀnîb ge ǁîb ôab di tarasa taotaosase gere ǀuriǀuri, tsî naub ge ǁîb di ǃgâsasa gere ǀgaiǁgūǀkhā, ǁgûb di ôasa.

¹²ǁÎn ge sa ǃnâ ǀkhaexūna ge ū, ǀaoǂnâxūn nîga; hōǃnās tsî ǃnā hâ hōbasens tsîras ge ge ū, tsîs ge xūǃgunuxasiba gere sîsen sa ǀgūkhoeb tawa ǁgâiǀāb ǀkha, xawes ge tita ge ǀuru, tib ra ǃKhūb ǃKhūba mî.

¹³Îs ǁnâi mû, tita ge ti ǃomma ge ǁguiǀkhā si xūǃgunuxasib âs, hîas gere dīb ǃaroma tsî ǀaob, hîa sa ǁaegub ǃnâ ge hâ ib ǃaroma.

¹⁴Sa ǂgaoba mâhōb nî? Sa ǃomga ǀgai gu nî tita ga sasa sîsenū tsēdi ǃnâ? Tita ǃKhūta ge ǁnāta, ǁî ǃkhaisa go ǃhoa tsî ǁîsa nîra dī ta.

¹⁵Tsî tita ge sasa ǁaedi ǃnâ nîra ǀgaruǀgaru tsî sasa ǃhūgu ǃnâ nîra tsoromâi, tsî ǃanuoǃnâsib âsa sasa xu nîra hapu.

¹⁶Os ge sa ǃnâ nîra ǀuriǀurihe ǁaedi mûǁae, tsîs ge nîra ǂan tita a ǃKhū ǃkhaisa.

¹⁷ǃAruǀîs ge mîs ǃKhūb disa hāba te tsî ge mî:

¹⁸Khoenôa ǀgôatse, Israeli ommi din ge tita ge goa kaiba; ǁîn hoan ge ǂaib, tin-i, ǂnūǀurib tsî ǂgoaǀurib tsunitsuni-oms di ǁaegub ǃnâ hâb khami ī; ǁîn ge ǀhaiǀurib di goa kai.

¹⁹ǁNā-amagab ra ǃKhūb ǃKhūba nēti mî: Hoatsama du ge goa kai ǃkhais xa, kō, o ta ge tita sado Jerusalems ǁaegub ǃnâ nîra ǀhaoǀhao.

²⁰ǀHaiǀurib, ǂaib, ǂnūǀurib, ǂgoaǀurib tsî tin-i tsîn ra tsunitsuni-oms ǃnâ ǀhaoǀhaohe khami, ǀaes nî ǁîn ǂama ǃnâihese, tsunitsunihen nîse, ǁnās ǁkhās xase ta ge tita sado nîra ǀhaoǀhao ti ǁaib ǃnâ, tsî ti ǁgôasib ǃnâ ǁnāpa nîra ǁnāxū du tsî tsunitsuni du.

²¹Ā, tita ge sado nîra ūǀhao tsî sadu ǂama ǀaes ti ǁgôasib dis ǃnâ nîra ǃnâi, ǁîs di ǁaegub ǃnâ du nî tsunitsunihese.

²²ǀHaiǀurib ra tsunitsuni-oms ǃnâ tsunitsunihe khami, ǁnās ǁkhās khami du ge sado ǁîs di ǁaegub ǃnâ nîra tsunitsunihe, o du ge nîra ǂan tita ǃKhūta ge ǁgôasib âtaba sadu ǂama ǁhōǂui ǃkhaisa.

²³ǃAruǀîs ge mîs ǃKhūb disa hāba te tsî ge mî:

²⁴Khoenôa ǀgôatse, ǁîsa mîba: Sas ge ǃhū-i hîa ǃanuǃanuhe tama-i, tūǀnanuba ūhâ-i ǁgôasib di ǁaeb ai ūǀkhīhe tama-i khami ī.

²⁵ǃGaeǁaesens ǁîs di kēbo-aogu dis ge ǁîs di ǁaegub ǃnâ hâ, ǃgui ra xammi, ǃkhōb go xū-e ra ǀkhauǃāb axase; ǁîgu ge ǀomde ra hapu; ǁhōs tsî ǃgomǀgausan tsîna gu ge ra ūbē; ǁîs di ǃoatarade gu ge ǁîs di ǁaegub ǃnâ ra ǂguiǂgui.

²⁶ǁÎs di pristergu ge ti ǂhanuba ra ǀgaidī-ū, tsî gu ge ti ǃanu xūna ra ǀuriǀuri; ǁîgu ge ǃanu-i tsî ǀurisa-i tsîn ǁaegu ǀgora-e dī tama, tsî ǃkharagasib, ǀurisa-i tsî ǃanu-i ǁaegu hâba gu ge mûǂan tama hâ; ǁnās xōǀkhā gu ge ǁîgu di mûde ti sâtsēde xu ra gaugau, ā, tita ge ǁîgu ǁaegu ra ǀuriǀurihe.

²⁷ǁÎs di gaosagu ge ǁîs di ǁaegub ǃnâ ǂhiradi, xū-e ra ǀkhauǃādi axase ī, ǀaoǂnâxū gu nîse, ǀomde gu nî hîǀhuruse, xūǃgunuxasiba gu nî sîsense.

²⁸Tsî ǁîs di kēbo-aogu ge ǁîna xū tama ǂgoab ǀkha ra ǂabo, ǁausiba ra mûǃâ tsî ǂhumiga ra aimûǀgaruba ǃâ, mî rase: Nētib ra ǃKhūb ǃKhūba mî, ti. ǃKhūb ǁnāti mî tama hâ hîa.

²⁹ǁAes ǃhūb dis ra ǁgâiǀās ǀguisa hî tsî ǃnaribasens ǀguisa sîsen, tsîn ra ǀkhomǀkhomsabeb tsî ǂhâ hâb tsîkha ǁgâiǀā, tsî ǃhaokhoeban ra ǂhanuose ǁgâiǀā.

³⁰Tita ge ǁîn ǁaeguba xu aoba ge ôa, ǂnubiǂgoaba nî ǂnubi tsî ti ais aiǃâ ǃhūba ǁhūs ǃnâ nî mâibaba, ǁîba ta hîǀhuru tidega, xawe ta ge tita khoe-i xare-e hō tama ge i.

³¹ǁNā-amaga ta ge tita ti ǁgôasiba ǁîn ǂama ge ǁhōǂui, ǀaes ti ǁgôasib dis ǃnâ ta ge tita ǁîna ge hapu, ǁîn di daoba ta ge tita danas ân ai ge mâ, tib ra ǃKhūb ǃKhūba mî.