Read Khoekhoegowab Esegieli 23 Bible Online

Esegieli 23 - Khoekhoegowab bible

Esegieli 23

¹ǃAruǀîs ge mîs ǃKhūb disa hāba te tsî ge mî:

²Khoenôa ǀgôatse, ǀgam tarara ge ge hâ i, ǀgui ǁgûs ǀguis di ôara.

³ǁÎra ge Egipteb ǃnâ gere ǀai, ǁîra ge ǂkhamsis âra ǃnâ gere ǀai; ǁnāpa ra ge samra âra ge tsâǀkhāhe, tsî ǁnāpa ra ge samǂaora ǂkhamkhoesis âra dira gere tsananahe.

⁴Tsî ǁîra di ǀonra ge Oholas kais tsî ǁîs ǃgâsas Oholibas ǂkhams tsîra ge i, tsî ra ge ǁîra ge ti kai, tsî ra ge ǀgôagu tsî ǀgôadi tsîna ge ǁora; nēra ge ǁîra di ǀon ge i: Samarias, ǁnās ge Oholas, tsî Jerusalems, ǁnās ge Oholibasa.

⁵Tsîs ge Oholasa ti ǃnâ hâǃâ ge ǀai, os ge ǁîs di ǁâsaga ge ǁâ, Asiriaǁîgu ǀgūse hâga,

⁶ǀhommiǂhoaba ana hâga, gaosagu tsî ǂamkhoega, hoatsama ǃkhōǂuihesa ǂkhamkhoega, ǃgapi-aogu, hāgu ai ra ǃgapiga.

⁷Nētis ge ǁîs di ǀai-aoga ge dī-ū, ǁnāgu Asiriab di ǁhûiǂuisa ge iga, tsî ǁnāgu, ǁîgas ge ǁâgu hoagu ǀkha, ǁîgu di ǁgôa-elogu hoagu ǀkhas ge ǁîsa ge ǀuriǀurisen.

⁸Tsî ǁîs di ǀai-aigu, Egipteba xus ge ūhāgu onas ge ǁnāxū tama ge i; ǁîgu ge ǂkhamsis âs ǃnâ ǁîs ǀkha ge ǁgoe, tsî gu ge ǂkhamkhoesis âs di samǂaora ge tsanana, tsî gu ge ǁîgu di ǀai-aiga ǁîs ǂama ge ǁhōǂui.

⁹ǁNā-amaga ta ge tita ǁîsa ǃomǁaeb ǁîs di ǁâsagu dib ǃnâ gere māǁnâ, Asiriab ôagu, hîas ǁâ hâgu ǃomǁae.

¹⁰ǁÎgu ge taoǃkhais âsa ge ǀhuiǀkhā, ǁîs di ôagu tsî ǁîs di ôadi tsîna gu ge ūbē, tsî ǁîsa gu ge gôab ǀkha ge ǃgam. Os ge ǀonsa ge hō taradi ǃnâ, ǀgoraǃgâdes ge dī-ūhes khaoǃgâ.

¹¹ǁÎs ǃgâsas Oholibas ge mûo, os ge ǁîs ǃgâ-ai ge ǁâ tsî ǀai-aigu âsa ǃgâsas di ǀai-aigu ǃgâ-ai ge ǂguiǂgui.

¹²Os ge ǀgôagu Asiriab diga ge ǁâ, gaosagu tsî ǂamkhoegu ǀgūse hâga, ǀoasase anisen hâga, ǃgapi-aoga, hāgu ai ra ǃgapiga, hoatsama ǃkhōǂuihesa ǂkhamkhoega.

¹³ǃNubai ta ge tita ge mû, ǁîs ǀuriǀurisen hâ ǃkhaisa; ǀgui daob ǀguiba ra ge hoa ra ūhâ i ǃkhaisa.

¹⁴Ā, ǁîs ge ǀai-aigu âsa ǃaruǀîǀgui ge ǀāro; khoegu ǂnubiǂgoab ai xoamâihe hâgas ge mûo, Xaldeaǁîn di īga, menib ǀapa ǀûb ǀkha ananhe hâga,

¹⁵ǃgaesenni ǀkha ǃgaesen hâga, ǀoasase ananhe hâ ǀgapade danadi âgu ai ūhâga hoatsama danakhoese iga, Babilons di ôagu ase iga, Xaldeb ǁîgu ǃnae ǃhūb diga.

¹⁶Os ge ǃgapakhâis ra hîa ǁîga ge ǁâ tsî sîsabega ǁîgu ǃoa ge sî Xaldeb ǃoa.

¹⁷O gu ge ǀgôagu Babilons diga ǁîs tawa ge hâ ǁâb ǁgoeǃkhais ǃnâ, tsî gu ge ǁîsa ǁîgu di ǀai-aigu ǀkha ge ǀuriǀuri, tsî ǁîs on ge ǁîgu ǀkha ge ǀuriǀurisen; ǁnās khaoǃgâs ge ǀoms âsa ǁîga xu ge ǂgaeǁnâ.

¹⁸Nētis ge ǁîs di ǀai-aiga ge ǂhaiǂhai tsî taoǃkhais âsa ge ǀhuiǀkhā; ǃnubais ge ti ǀomsa ǁîsa xu ge xoresen. Ti ǀoms ge ǁîs di ǃgâsasa xu xoresen khami.

¹⁹Tsîs ge ǁîs di ǀai-aiga ge ǂguiǂgui, ǂkhamsis âs di tsēdi xa ra ǂâiǃâ, Egipteǃhūb ǃnâs ge ǀai ǃnubai.

²⁰Tsîs ge ǁîgu di ǀgamitaradi ǃgâ-ai ge ǁâ, ǁgans âdi eseln di ǁgandi khami īde tsî ǂnâs âdi hān di ǂnâs khami īde.

²¹Nētis ge sasa ǂkhamsis âs di taotaosa dīsa ǁkhawa ge ôa-am, Egipteǁîgu ge samǂaora âsa tsanana ǃnubai, ǂkhamsis âs di samra xa.

²²ǁNā-amaga sas Oholibase, nētib ra ǃKhūb ǃKhūba mî: Mû, tita ge sa ǁâsagu, sa ǀoms ge ǁîga xu ǂgaeǁnâhega, sa ǃoagu nîra ǂkhaiǂkhaikhâi, tsî tita ge ǁîga mâ ǃnammi hoaba xu sa ǃoagu nîra ūhā.

²³Babilons di ôaga tsî Xaldeaǁîgu hoaga tsî Pekoǁîga tsî Soaǁîga tsî Koaǁîga tsî Asiriab di ôagu hoaga, ǁîgu ǀkha ǃkhōǂuihesa ǂkhamkhoegu hoatsama gaosa tsî ǂamkhoe tsî danakhoe tsî ǂgaihesa khoe ge iga, hoatsama hāgu ai ra ǃgapiga.

²⁴ǁÎgu ge sa ǃoagu nîra hā kunidi tsî ǀnūdi tsîn ǀkha, tsî ǁaedi ǀhû hâ di tsî ǃgubu khōsikhōgu tsî toroǀgapadi tsîn ǀkha; ǁîgu ge sasa nî xāǂgā, tsî tita ge ǁîgu di ais aiǃâ ǀgoraǃgâsa nîra mâi, tsî gu ge sasa ǁîgu di ǂhanugu ǃoa nîra ǀgoraǃgâ.

²⁵Tsî tita ge ti ôasasiba sa ǃoagu nîra mâi, o gu ge ǁgôasib ǃnâ nîra sîsenū si, o gu ge sa ǂguis tsî sa ǂgaera tsîde nîra ūǁnâ, o i ge ǀuni xū-i sa-e gôab xa nîra ǁnā; ǁîgu ge sa ôagu tsî sa ôadi tsîna nîra ūbē, tsî i ge ǀuni xū-i sa-e ǀaes xa nîra hapuhe.

²⁶ǁÎgu ge sa saran ona nîra ǂgaeǂuiǀkhā si tsî anixūn âsa nîra ūbē.

²⁷Nēti ta ge tita sa taotaosasiba nîra ǀû kai xu si tsî ǁnā ǀai-aib âs, Egipteǃhūba xus ge ūhāba, tsîs ge sasa mûra âs ǀkha ǁînǀî ǃgapakhâi tide tsî ǃaruǀî Egipteb xa ǂâi tide.

²⁸Nētib ra ǃKhūb ǃKhūba mî xui-ao: Mû, tita ge sasa nîra māǁnâ ǁnāgu, sas ǁkhan hâgu ǃomǁae, ǁnāgu, sa ǀoms ǁîga xu xoresen hâgu ǃomǁae.

²⁹ǁÎgu ge sasa ǁkhanni ǀkha nîra sîsenū tsî sa xūreb hoaba nîra ūbē tsî ǀōǀkhā tsî ǀkhaiǀkhāse nîra xū si, ǀaib taoǃkhais âs nî ǀhuiǀkhāhese, tsî sa taotaosasib tsî sa ǀai-aigu tsîna.

³⁰Nēnas ge nîra dī-ūhe, ǁaedes gere ǀaiǃgon amaga, tsî ǁîgu di ǁgôa-elogu ǀkhas gere ǀuriǀurisen amaga.

³¹Sa ǃgâsas di daob ǃnâs ge sasa gere ǃgû, ǁnā-amaga ta ge tita ǁîs di ǀgabisa sa ǃomǁae nîra mā.

³²Nētib ra ǃKhūb ǃKhūba mî: Sas ge ǃgâsas âs di ǀgabisa nîra ā; ǁnās ǃgam tsî a harasa; sas ge nîra âiǂuixū tsî ǃhōxū kai; ǁnā ǀgabis ge ǂguina ǃkhōǂgā hâ.

³³ǀHorosib tsî ǂhansens tsîra xas ge sasa nîra ǀoa, ǀgabis hîǀhurus tsî ǃū-aisib tsîra dis ge a sa ǃgâsa Samarias di ǀgabi.

³⁴Sas ge ǁîsa nîra ā tsî ǂhororu, tsî ǃârodi âsas ge nîra ǂkhūǂkhū; tsîs ge sa samra ǂhanira nîra ǀkhauǁnâ. Tita ge ǁîsa ge ǃhoa, tib ra ǃKhūb ǃKhūba mî xui-ao.

³⁵ǁNā-amagab ra ǃKhūb ǃKhūba nēti mî: Titas ge sasa ǀuru tsî titas ge sa ǃgâb ai ao, xuige ǁkhāti tani sa taotaosasib tsî sa ǀai-aigu tsîna.

³⁶Tsîb ge ǃKhūba ge mîǀî te: Khoenôa ǀgôatse, satsa Oholas tsî Oholibas tsîrats kha nî ǃkhō-am? ǁÎra ǁgaidīn âra ǁgau.

³⁷ǁÎra ge gere ǃgamekhôa, tsî ǀaob ge ǁîra di ǃomkha tawa hâ, tsî ra ge ǁgôa-elogu âra ǀkha ge ǃgamekhôa xui-ao; ǁnās tawa ra ge ǁkhāti ǁîra ôan, tita ra ge ǁorabana, ǁîra aiǃâ ǀaesa ge ǃgûǃganu kai, hapuhen nîse.

³⁸Tsî ra ge ganupe nēsa tita ge dība: ǁÎra ge ti ǃanusiba ǁnā tsēs ǁkhās ai ge ǀuriǀuri tsî ti sâtsēde ge ǀuriǀuri.

³⁹ǁÎra di ôana ra ge ǁgôa-elogu âra ǂābao, o ra ge ǁnā tsēs ǁkhās ai ti ǃanusib ǃnâ ge hā, ǁîba ra nî ǀuriǀurise. Tsî mû, nēti ra ge ti ommi ǁaegub ǃnâ ge dī.

⁴⁰Nēs on ge hâ; aogu ǃnūseba xu nî hāgu, sîsabeb ge ǁîgu ǃoa sîhe hâ igu ǃoa ra ge sî ǃkhaisa, tsî mû, ǁîgu ge ge hā, ǁnāgu, ǁîgu ǃaromas ge khōsen tsî mûra âsas ge boro tsî ani-anixūn ǀkhas ge î-îsenbaga.

⁴¹Tsîs ge sasa ǂkhaisa kharob ai ge ǂnôa i, ǁîb aiǃâb ge tāba ǁāǁāhe hâ ib, tsî ǁîb ais ge ti ǀanǀanxūn tsî ti olin tsîna ǂnûi hâ iba.

⁴²Tsî ǀōb ǂnubis dib ge ǁîb ai ǃnoao; o ra ge aogu khoen di ǂguib digu ǃoa ge sî, o gu ge ǂauxûi-ā-aoga ǃgaroǃhūba xu ge ūhāhe, ǁîgu ge ǃganude ge ǂnûiǃom ra tsî ǂkhaisa kronsa ge ǀgapa ra.

⁴³ǃNubai ta ge tita ǁnās, ǃgamekhôas xa ge kairas xa ge mî: Nēsi gu ge ǀai-aogu nē ǀai-aos diga nîra ǀai tsî ǁîs on ge ǁnāsa nî dī.

⁴⁴Tsî gu ge ǁîs tawa ge ǂgâ, taras, ǀai-aos tawats ra khoetsa ǂgâ khami, ǁnāti gu ge ge ǂgâ Oholas tsî Oholibas tsîra, ǁnā taotaosa tarara tawa.

⁴⁵O gu ge ǂhanu-ai aoga ǁîsa nîra ǀgoraǃgâ ǂhanub ǃgamekhôa-aodi dib tsî ǂhanub ǀaoǂnâxū-aodi dib ǃoa, ǃgamekhôa-aora ge a ǁî, tsî ǀaob ǁîra ǃomǁae hâ xui-ao.

⁴⁶Nētib ra ǃKhūb ǃKhūba mî xui-ao: ǁÎn ge ǀhû-e ǁîra ǃoagu nîra ǂoaxa kai tsî ǁîra nîra gongonǃnâ tsî ǁîra nîra hîǀhuru.

⁴⁷Tsî ǀhaos ge ǁîra ǀuidi ǀkha nîra ǁhom tsî gôagu ǀkha ǁîra nîra ǁhâiǁgui; ǁîra di ôagu tsî ǁîra di ôadi tsînan ge nîra ǃgam tsî omra âra ǀaes ǀkha nîra khauǃkhū.

⁴⁸Nēti ta ge tita taotaosasib ǃhūb diba nîra ǀû kai, taradi hoadi nî ǁgauhese, î di saro di taotaosasib ǃoa tā dī.

⁴⁹Nētin ge taotaosasib âro saro aiǃâ nîra ǁgui, tsî ro ge ǁoren saro ǁgôa-elogu dina nîra tani. O ro ge nîra ǂan tita ǃKhūta a ǃKhū ǃkhaisa.