Read Khoekhoegowab Esegieli 24 Bible Online

Esegieli 24 - Khoekhoegowab bible

Esegieli 24

¹ǃAruǀîs ge mîs ǃKhūb disa khoeseǁî kurib ǃnâ disiǁî ǁkhâb ǃnâ disiǁî tsēs ǁkhâb dis ai hāba te tsî ge mî:

²Khoenôa ǀgôatse, ǀons tsēs dis, nētsēs ǁkhās disa xoamâibasen, gao-aob Babilons dib ge nētsēs ǁkhās ai Jerusalems aiǃâ sī ǁgoe xuige.

³Îts ǁnā mâǃoaxa ommi dina ǂkhō-e ǂkhōba îts ǁîna mîǀî: Nētib ra ǃKhūb ǃKhūba mî: Sū-e mâiǀaro îts ǁgam-e ǁî-i ǃnâ ǁhō,

⁴îts ǃâdi ǁgans âb dide ǁî-i ǃnâ ǀhûpe ǂgā, mâ ǃgâi ǃâs hoasa tîs tsî ǁgarab tsîra, îts ǁî-e ǀoaǀoa ǃkhōǂuisa ǂkhōgu ǀkha;

⁵îts ǃkhōǂuis gūn disa ū îts ǁkhāti ǂkhōgu ǃnaga ǀae-e khau; îts ǁî-e ǃgâise ǀgû kai, ǁkhāti gu ge ǂkhōgu âba ǁî-i ǃnâ nî sâihe.

⁶ǁNā-amaga, nētib ra ǃKhūb ǃKhūba mî: Tsūba si ǁnā ǀaobǃāsa, ǁnā sūs goab âs, ǁîs ǃnâ hâs tsî goab âs ǁîsa xu ǂoa tamasa! ǃÂ-e ǃâ-i khaoǃgâ ǁî-e xu ǂgaeǂui, îts tā ǂnōgusa ǁîs ǂama ǁnā kai.

⁷ǀAob âs ǁîs ǁaegub ǃnâ hâ xui-ao, ǂkhanu ǃhaob ais ge ǁîsa ge ǁgui; ǁîs ge ǁîba ǃhūb ai ǁhōxū tama hâ, tsarab ǀkhas nî ǃgū-ai bise.

⁸ǁGôasiba ta nî tita khâi kaise, ǀkhao-e ta nî ǀkhaoga ta ge tita ǀaob âsa ǂkhanu ǃhaob ai ge ǁgui, ǃgū-aiheb tidese.

⁹ǁNā-amagab ra ǃKhūb ǃKhūba nēti mî: Tsūba si ǀaobǃāsa! Tita on ge ǀaesa nîra kaikai.

¹⁰ǀAena kaise ǀaere îts ǀaesa khau, î-i ǁgan-e ǁan, îts ǁî-e ǁkhoaǁkhoaxūn ǀkha ǂgāmû; î gu ǂkhōga khauǃkhū.

¹¹Îts ǁnās khaoǃgâ ǀkhaiǃnâse ǁîsa ǂnomdi ai mâi, îs ǀgam, îb ǀgūb âsa khau îb ǀurisasib âsa tsuni ǁaegub âs ǃnâ, îb goab âsa hapuhe.

¹²ǁAusigu ǀkhas ge ǁîsa tita ge ǀhupuǀhupu; xawe ǃnā hâ goab âs ge ǁîsa xu ǂoa tama hâ, ob ge goab âsa ǀaes ǃnâ nî ǂgāhe.

¹³ǀUrisasib âs ǃnâb ge taotaosasiba hâ. Tita ge sasa ge ǃanuǃanu, xawes ge ǃanu tama hâ amagas ge ǃaruǀî ǀurisasib âsa xu ǃanuǃanuhe tide, tita ǁgôasib âtaba sa ai nîra sâ kais kōse.

¹⁴Tita ǃKhūta ge ǁî ǃkhaisa ge ǃhoa, os ge nîra hâ, o ta ge tita ǁîsa nîra dī; tita ge ǁîsa xu ǂgō tide tsî tita ge sâu tsî ǃhausen tide. Sa daogu ǃoa tsî sa dīgu ǃoan ge sasa nîra ǀgoraǃgâ, tib ra ǃKhūb ǃKhūba mî.

¹⁵ǃAruǀîs ge mîs ǃKhūb disa hāba te tsî ge mî:

¹⁶Khoenôa ǀgôatse, mû tita ge turab sa mûra diba satsa xu ǁō-ai-i ǀkha nîra dībē, xawe sats ge ǃgae tide tsî ā tide, tsî ǁgamrogu âts ge ǀkhī tide.

¹⁷ǁNâi, ǃgaeǀû; sats ge ǁō hân ǂama ǃgae tide, ǀgapas sa danas disa ǃgae, îts ǁharora âtsa sa ǂaira ǃnâ ǂgaeǂgā; tsî ǀgapise hâ amǁgaubats ge ǃgae-am tide tsî khoen di pereba ǂû tide.

¹⁸Nēna ta ge ǁaes ǃoa ǁgoaga ge ǃhoa, tsî ti taras ge ǃuia ge ǁō, tsî ta ge ǁgoaga mîmāhe ta ge khami ge dī.

¹⁹Os ge ǁaesa tita ǃoa ge mî: ǂAnǂan dats kha tide, tare kaiba dan nî nēn, sats ra dīna ǃkhaisa?

²⁰O ta ge tita ǁîn ǃoa ge mî: Mîs ǃKhūb dis ge hāba te tsî ge mî:

²¹Mîba re Israeli ommi dina: Nētib ra ǃKhūb ǃKhūba mî: Mû tita ge ti ǃanusiba nîra ǀuriǀuri, ǂkhaisib sadu ǁaposasigu dib, turab sadu mûdi diba tsî sâub sadu di ǀoms diba. Tsî sadu di ôagu tsî sadu di ôadi tsîn, ǁnān hîats ge ǁnāxūn ge gôab xa nîra ǁnā.

²²ǃNubai du ge sado nîra dī, tita ge dī khami. ǀGapise hâ amǁgauga du ge ǃgae-ai tide tsî khoen di pereba du ge ǂû tide.

²³Tsî sadu di ǀgapadi ge sadu di danadi ai nîra hâ, tsî sadu di ǁharode sadu di ǂaidi tawa, sadu ge ǃgae tide tsî ā tide, tsî du ge sadu di ǂhanuoǃnâsigu ǃnâ nîra tsanaǁkhui; tsî mâb hoab ge ǃgâsab âb ǂama nîra ǀhâimâinǀom.

²⁴Nētib ge Esegiela buruxa saose nîra ība du; ǁînab ge dīn hoan ǃoa du ge sado nîra dī. Nēs ge īo, o du ge nîra ǂan tita ǃKhūta a ǃKhū ǃkhaisa.

²⁵Tsî sats khoenôa ǀgôatse, ī i ǁnātsē tide, tita ga ǁaposasib âna ǁîna xu ūbē ǃnubai, ǃgâiaǂgaob ǁîn di anixūb dib, turab ǁîn di mûdi dib, tsî ǁkhoreb ǁîn di ǀomdi diba, ǁîn di ôagu tsî ǁîn di ôadi tsîn:

²⁶ǁNātsē i nî ûi ga khoe-e sa tawa hā ǃkhaisa, sa ǂgaera i nî ǁî xūna ǁnâu kaise?

²⁷ǁNātsēs ǁkhās ais ge ams âtsa ǁnā-i, ûi ge-i tawa nîra khowahe, tsîts ge nîra ǃhoa tsî ǃaruǀî ǃgome tide; nētits ge ǁîna buruxa saose nîra ība, tsî ǁîn ge nîra ǂan tita a ǃKhū ǃkhaisa.