Read Khoekhoegowab Esegieli 25 Bible Online

Esegieli 25 - Khoekhoegowab bible

Esegieli 25

¹Tsîs ge mîs ǃKhūb disa hāba te tsî ge mî:

²Khoenôa ǀgôatse, ais âtsa Amonni ôan ǃoagu ǂnûi, îts ǁîn ǃoagu kēbo,

³îts Amonni ôan ǃoa mî: ǁNâu du re ǃKhūb ǃKhūb di mîsa: Nētib ra ǃKhūb ǃKhūba mî: Sats ge ti ǃanusib ǂama: Haha, ti mî amaga, ǀuriǀuriheb ge ǃnubai, tsî Israeli di ǃhūb ǂama hîǀhuruheb ge ǃnubai, Judab ommi din ǂama ǃkhōsis ǃnân ge ǃgûǂgâ ǃnubai,

⁴ǁnā-amaga mû, tita ge satsa ǁnān, hîa aiǂoas dina ǁîxūse ra mā, în ǁîn di ǁaposa ǃkhaide sa ǃnâ ǂnûi, în ǁanǃkhaidi âna sa ǃnâ ǂnûikhâi; ǁîn ge sa ǂûna nîra ǂû tsî ǁîn ge sa daiba nîra ā.

⁵Tsî tita ge Rabasa nîra ǃnain di ǃharas ase dī, tsî Amonni ôana nîra gūn di ǃharas ase dī, tsî du ge nîra ǂan tita a ǃKhū ǃkhaisa.

⁶Nētib ra ǃKhūb ǃKhūba mî xui-ao: Sats ge ǃommi ǀkha ge ǁam tsî ǂais ǀkha ǂnāǀgam tsî ǃūs âts hoas ǃnâts ge ǂgaoba xu Israeli ǃhūb ǂama ge ǃgâiaǂgao hâ i amaga,

⁷ǁnā-amaga mû, tita ge ǃommi âtaba saǀî ǀhōǂui tsî nî satsa ǁaede ǃnarixūse mā tsî nî ǃhaode xu ǃhūǃnoma tsi tsî ǃhūga xu dīkākā tsi; tita ge satsa nîra hîǀhuru, ots ge nîra ǂan tita a ǃKhū ǃkhaisa.

⁸Nētib ra ǃKhūb ǃKhūba mî: Moab tsî Seiri tsîkha ge: Mû, ommi Judab dib din ge ǁaedi hoan khami ī ti ra mî amaga,

⁹ǁnā-amaga mû, tita ge ǀkhāb Moab diba nîra ǁkhowa-amba ǁîb di ǃāde xu, ǁnādi, ǀkharib âba xu ǁgoede, ǃhūbaib di î-îxūdi, Bet-Jesimots, Baal-Meons tsî Kirjataims tsîdi kōse.

¹⁰ǁNān, aiǂoas dina ta ge nî ǁîde ǁkhowa-amba, Amonni ôan ǀkha, ǁîxūse ta nî tita ǁîna māǁnâ, Amonni ôan ǁaedi xa ǃaruǀî ǂâihe tidega.

¹¹Tita ge ǁkhāti Moab ǃnâ nîra ǀgoraǃgâ, on ge nîra ǂan tita a ǃKhū ǃkhaisa.

¹²Nētib ra ǃKhūb ǃKhūba mî: Edommi ge Judab ommi dina ǀkhaos ǀguisa ge hî amaga, tsî ǁîn ge kaise ǀhapiǀhapisen amaga, ǁînan ge ǀkhao ǃkhais ǀkha,

¹³ǁnā-amagab ra ǃKhūb ǃKhūba nēti mî: Tita ge ti ǃomma ǁkhāti Edommiǀî nî ǀhōǂui, tsî tita ge khoe-i kas ǀgoa-i kas hoasa ǁîba xu nîra ǃhomǂui, tsî ta ge ǁîba ǃū-aisa ǃkhaise nîra ǂnûi Temansa xu, on ge Dedans kōse gôab xa nîra ǁnā.

¹⁴Tsî tita ge ti ǀkhaoba nîra dī Edommi tawa ǃommi ti ǁaes Israeli dib ǀkha, on ge ǁîna Edomma ti ǁaib ǃoa tsî ti ǁgôasib ǃoa nîra dī-ū; nētimîn ge ti ǀkhaoba nîra hōǃâ, tib ra ǃKhūb ǃKhūba mî.

¹⁵Nētib ra ǃKhūb ǃKhūba mî: Filisteǁîn ge ǀkhao amaga, tsî ǂgaoba xun ge ǀkhao ǃūs ǀkha ǀamo khākhoesis ǀkhan nî hîkākāse,

¹⁶ǁnā-amagab ra ǃKhūb ǃKhūba nēti mî: Mû, tita ge ǃommi âtaba Filisteǁînǀî ra ǀhōǂui, tsî ta ge Keretǁîna nîra ǃhomǂui, tsî ǃgau gen hurib amǃgâ hân dina nîra hîǀhuru.

¹⁷Tsî tita ge kai ǀkhaoba ǁîn ǁaegu nîra ǀkhao ǁgôa ǁkhara-aidi ǀkha, on ge ǁîna nîra ǂan tita a ǃKhū ǃkhaisa, ti ǀkhaoba ta ga ǁîna dī-ū ǃnubai.