Read Khoekhoegowab Esegieli 26 Bible Online

Esegieli 26 - Khoekhoegowab bible

Esegieli 26

¹Tsî i ge disiǀguiǀaǁî kurib ǃnâ ǂguro tsēs ǁkhâb dis ai ge ī, ǃKhūb mîs ge hāba te ǃkhaisa, mî raǃâ:

²Khoenôa ǀgôatse, Tires ra Jerusalems xa: Haha, ǁîs ge ǂkhū hâ dao-ams ǁaedi disa, ǁîs ge ti ǀkhāb ai go hā, o ta ge tita nîra ǀoa, ǁîs ge ǃū-aisase hâ, ti mî amaga,

³ǁnā-amagab ra ǃKhūb ǃKhūba nēti mî: Mû, tita ge sas ǂama nîra hā, Tirese, tsî tita ge ǂgui ǁaede sa ǃoagu nîra ūǃapa, hurib ra ǃgabigu âb ǀkha ǃapas ǁkhās xase.

⁴ǁÎn ge ǂnubiǂgoagu Tires diga nîra hîkākā tsî ǂgō-omgu âsa nîra khôaǁnâ, tsî tita ge tsarab âsa ǁîsa xu nîra ǀnapubē tsî nîra ǂkhanu ǃhao kai si.

⁵ǁÎs ge hurib di ǁaegub ǃnâ nîra ǀûidi ǁîs ai ra ǃāǂuihe ǃkhai kai. Tita ge ǁî ǃkhaisa ge ǃhoa xui-ao, tib ra ǃKhūb ǃKhūba mî, tsîs ge nîra ǁaedi di ǁkhâuǁnâxū kai,

⁶tsî ǁîs di ôadi ǃaub ai hâdi ge gôab ǀkha nîra ǃgamhe, o di ge nîra ǂan tita a ǃKhū ǃkhaisa.

⁷Nētib ra ǃKhūb ǃKhūba mî xui-ao: Mû, tita ge Nebukadnesari, Babilons di gao-aoba, gao-aogu di gao-aoba ǀapasa xu Tires ǃoa nîra ūhā, hān ǀkha tsî kunidi ǀkha tsî ǃgapi-aogu ǀkha tsî toroǂnubidi tsî ǂgui ǁaes tsîn ǀkha.

⁸ǁÎb ge sa ôade ǃaub ai gôab ǀkha nîra ǃgam, tsî ǁîb ge ǁaposa ǃkhaide sa ǃoagu nîra dī, tsî ǁkhui-e sa ǃoagu nîra aokhâi tsî ǃgupukhōsikhōga sa ǃoagu nîra ǃkhōkhâi.

⁹Tsîb ge ǂnubiǂgoakhôa-aoga sa ǂnubiǂgoagu ǃoa-ai nîra mâi tsî sa ǂgō-omga ǁîgu di ǂnubiǂgoagu ǀkha nîra khôaǁnâ.

¹⁰ǀOasasib ǁîn di hāgu dib xas ge sasa tsarab âgu xa nîra ǃgū-aihe, sa ǂnubiǂgoagu ge nîra ǀkhū ǀōb ǃgapi-aogu dib xa tsî ǀnūdi dib xa tsî kunidi dib xa, ǁāgu âsa ūb ga ǃgûǂgâ ǃnubai, ǃkhopaǂgâǃnâhe hâ ǃās ra ǃgûǂgâǃnâhe xase.

¹¹ǁÎb ge hāgu âb di ǁkhoradi ǀkha sa ǃās di ǃgangu hoaga nîra dāǂkhū, sa ǁaesab ge gôab ǀkha nîra ǃgam tsî mâb hoab ǀgaib âs di ǂkhâǃnâgu dib ge ǃhūb ai nîra ǁgôa.

¹²Tsîn ge ūs hâ xūna nîra ǃnari tsî ǁamaxūn âsa nîra ǁkhâuǁnâ tsî ǂnubiǂgoagu âsa nîra khôaǁnâ tsî ǃgomǀgausa omgu âsa nîra ǃhanǁgui; tsî sa ǀuidi tsî sa haigu tsî sa tsarab tsînan ge ǁgammi ǁaegub ǃnâ nîra aoǂgā.

¹³Nēti ta ge tita ǀōb sa ǁnaetsanadi diba nîra ǀû kai tsî ǀōb sa harpdi dib ge ǃaruǀî ǁnâuhe tide.

¹⁴Ā, tita ge sasa ǂkhanu ǃhaose nîra dī, sas ge ǀûidi ǁîs ai ra ǃāǂuihe ǃkhaise nîra ī. Sas ge ǃaruǀî ǂnubihe tide, tita ǃKhūta ge ǁî ǃkhaisa ǃhoa xui-ao, tib ra ǃKhūb ǃKhūba mî.

¹⁵Nētib ra ǃKhūb ǃKhūba Tires ǃoa mî: ǃNāǃnuide kha ǀkhū di tide sa ǁnās di ǀōb xa, ǁōǁōsase ǀhapiǂnûihe hâ-i ga ǃgae ǃnubai, sa ǁaegub ǃnân ga ǃhuriǃhurisase ǃgam ǃnubai?

¹⁶Tsî gaosagu hurib digu hoagu ge ǁîgu di tronde xu nîra ǁgôa tsî ǁîgu di anaǂamxūga nîra ǁguiǁnâ tsî ǂgāǃnâguhe hâ saran âga nîra ǂgaeǂui, ǃhuriǃhuri-aidi ǀkha gu ge nî anahe, ǃhūb ai gu ge nîra ǂnû tsî mâ mûsǀapiros hoas ai nîra ǀkhū tsî sas ǂama nîra ǃhurigâ.

¹⁷Tsî gu ge ǃgae-am-e sas ǂama tsoatsoa tsî nîra mî: Matis kha ge kā, sas hurigu din xa ge ǁanǃnâhe hâ is, sa gomxa ǃās hurib ai ge ǀgaisa isa, ǁîs tsî ǁansaben âs tsîn ǁîn di ǃhuriba ǁîs ǃnâ ge ǁan hâ in hoana ge māna.

¹⁸Nēsi di ge ǃnāǃnuide nîra ǀkhū ǁnās âs di tsēs ai; ā, ǃnāǃnuidi, hurib ǃnâ hâdi ge nîra gongonǃnâhe ǀamǂoas âs xa.

¹⁹Nētib ra ǃKhūb ǃKhūba mî xui-ao: Tita ga sasa ǃū-aisa ǃāse ǂnûi ǃnubai, ǁnā ǃādi ǁanǃnâhe tamadi khami, tita ge ǁgamma sas ǂama hāǃapa kai tsî kai ǁgamgu xas ga ǃgū-aihe ǃnubai

²⁰ta ge tita sasa nîra ǁgôa kai ǁnān ǁaes kais ǃoa ra ǁgôan ǀkha, tsî nîra ǁgoe kai si hoadi xa ǃnaga hâ ǃkhaidi ǃhūb didi ǃnâ, ǃū-aisa ǃkhaidi ǃhūb didi ǃnâ hugasa xu ge hâ idi ǃnâ, āb ǃnâ ra ǁgôan ǀkha ǁanǃnâhes tidega, tsî tita ge anixūba nîra kuru-unu ûitsaman di ǃhūb ǃnâ.

²¹Xawe sasa ta ge tita kai ǃhurise nîra mâi, tsîs ge nîra kā; ôahes ka xawes ge hōhe tide, ǀamosib kōse, tib ra ǃKhūb ǃKhūba mî.