Read Khoekhoegowab Esegieli 27 Bible Online

Esegieli 27 - Khoekhoegowab bible

Esegieli 27

¹ǃAruǀîs ge mîs ǃKhūb disa hāba te tsî ge mî:

²Sats khoenôa ǀgôatse, ǃgae-am-e tsoatsoa Tires ǂama.

³Îts mî Tires, hurib di ǂgâdaodi tawa ǁan hâs, ǂgui ǃnāǃnuidi ai ǁaedi ǀkha ǁamagusa ra hîsa: Nētib ra ǃKhūb ǃKhūba mî: Sas Tires ra mî: Tita ge hoaragase a îsa.

⁴Sa ǀkharigu ge hurigu di ǃarab ǃnâ hâ; sa kuru-aogu ge îsasib âsa ge dīǀoaǀoa.

⁵ǁÎgu ge sa haixūǃnôan hoana siprehaidi Senirs didi xa ge kuru; ǁîgu ge sederhaide Libanonna xu gere ūhā, ǂgurihaiga gu nî sasa dībase.

⁶Aik-haidi Basanni didi xa gu ge ǂgauǁgubihaigu âsa gere kuru; ǂgaeǂgui-unu-ūxūde gu ge ǂkhoaǁgûgu Siprus di ǃnāǃnuide xu ra ūhāhen xa gere dī.

⁷ǀUi ǃuri ǃkhaib, anxase ǂgāǃnâguhe hâb, Egipteba xu ra hāb ge ǃāǂuisab âsa ge i, sails aseb nî ība siga; ǀhommiǂhoab tsî purpuri tsîkha, Elisab di ǃnāǃnuira xu ra hākha, ge sa ǃgū-aixū ge i.

⁸Sidons tsî Arfads tsîra di ǁansaben ge sa ǁgubi-ao ge i; gā-aigu âs sas Tires ǃnâ hâgu ge sa ǂgaeǂgui-unu-ao ge i.

⁹Kaigu Gebals digu tsî ǁîs di gā-aigu tsîgu ge sa ǃnâ ge hâ i, khôaǃkhaidi âsa ra dī-unuǃâ. Doe-omgu hurib digu hoagu tsî ǁîb di huribaib sîsenaogu hoagu ge sa ǃnâ ge hâ i, ǁamagusa ge nî dī-ū sise.

¹⁰Persiaǁîgu tsî Ludiǁîgu tsî Putiǁîgu ge sa ǂnubis ǃnâ sa toro-aose ge hâ i. Khōsikhōb tsî toroǀgapas tsîra gu ge sa ǃnâ ge ǂgāmâi, ǁîra ge sa anixū ge i.

¹¹ǀGôagu Arfads digu tsî sa ǂnubis digu tsîgu ge ǂnubiǂgoagu âs ai ge hâǂnamipe si; tsî Gamadǁîgu ge sa ǂgō-omgu ai ge hâ i. ǁÎgu di khōsikhōga gu ge sa ǂnubiǂgoagu ǂnamipe ge ǂgāmâi; ǁîgu ge îsasib âsa ge dīǀoaǀoa.

¹²Tarsis ge sa ǀkha ǁamagusa ge dī ǂguisib mâ xūn hoan dib xa; ǀhaiǀurib tsî ǂnūǀurib tsî tin-i tsî ǂgoaǀurib tsîn ǀkhan ge ǁamagusa gere dī sa ǁamaxūǃkhaidi ai.

¹³Javanni din tsî Tubali din tsî Mesexi din ge sa ǁama-ao ge i; khoen tsî ǂaixapan tsîn ǀkhan ge ǁamagusa gere dī-ū si.

¹⁴Ommi Togarmab diba xun ge hān tsî ǃgapi-aogu tsî hā-eseln tsîna gere ūhā sadu di ǁamaxūǃkhaidi ai.

¹⁵ǀGôagu Dedans digu ge sa ǁama-ao ge i; ǀoasa ǃnāǃnuidi ge sa ǃommi di ǁamaxū ge i; ǁnâgu tsî ǂkhoaǁgûgu tsî tsabihain tsînan ge sasa ǃnarexūse gere mā.

¹⁶Siriab ge ǁamagusa sa ǀkha gere dī, ǀoasasib sa sîsengu dib ǃaroma; smarag-ǀuidi tsî purpuri tsî ǂgāǃnâguhe hâ sîsenain tsî saib tsî koraldi tsî ǃgomǀgausa ǀuidi tsînan ge ǁamaxūǃkhaidi âs ai gere ūhā.

¹⁷Judab tsî Israeli di ǃhūb tsîkha ge sa ǁama-ao ge i; ǃhorob minits dib tsî ǂkhon amperedan tsî danib tsî olib tsî balsemmi tsîn ǀkha kha ge ǁamagusa gere dī-ū si.

¹⁸Damaskus ge sa ǀkha ǁamagusa gere dī, ǂguisib sa sîsengu dib ǃaroma, mâ xūn hoan di ǀoasib ǃaroma; ǂauxûiǂûhaib Helbons dib tsî ǃuri ǀûb tsîkha ǀkhan ge ǁamagusa gere dī.

¹⁹Danni tsî Javanni tsîkha ge ǃgûma tsî ǁamaxūǃkhaidi âs ai ǂkhanu ǂnūǀurib tsî kassis tsî kalmus tsîna ǁamaguxūse gere ūhāba si.

²⁰Dedanni ge ǃgomǀgausa ǂnamdi ǃgapi-aogu didi ǀkha gere ǁamagusa dī-ū si.

²¹Arabiab tsî gaosagu Kedari digu hoagu ge sa ǃommi di ǁama-ao ge i; ǁkhaon ǀkha tsî bairagu ǀkha tsî pirin tsîn ǀkha gu ge sasa ǁamagusa gere dī-ū.

²²ǁAma-aogu Skebas tsî Ramas tsîra digu ge sa ǁama-ao ge i; hoan xa ǃgâi ǃgâihamxūn tsî ǃgomǀgausa ǀuidi hoadi tsî ǃhuniǀurib tsîn ǀkhan ge ǁamaxūǃkhaidi âs ai ǁamagusa gere dī.

²³Haranni tsî Kanneb tsî Edenni digu ge Skebab tsî Assuri tsî Kilmadi tsîgu di ǁama-aogu ǀkha ǁamagusa sasa gere dī-ū.

²⁴ǁÎgu ge sa ǁama-ao ge i ǀoa hâ î-îxūn ǀkha, ǀhommiǂhoab tsî ǂgāǃnâguhe hâ sîsenain di ǃgamigu ǀkha tsî ǁuiǂgaedi ǀkha tsî îsa saran ǀkha, tsurin ǀkha ǃgaehe tsî sederǂgaedi ǃnâ ǂgāhe hâ xūn ǀkha ǁamagus âs ǃnâ.

²⁵Doe-omgu Tarsis digu ge sas xa ge ǃkhōǀkhā, sa ǀkha gu ge ūhâ i ǁamagus ǂama. Tsî sas ge ǀoa tsî îbe ǂkhaisa ge i hurigu di ǂgaob ǃnâ.

²⁶Sa ǁgubi-aogu ge sasa kai ǁgamgu ǃoa ge ūsī. Aiǂoas di ǂoab ge sasa hurigu di ǃarab ǃnâ ge khôaǂkhū.

²⁷Sa xūn tsî sa ǁamaxūǃkhais di xūn tsî sa ǁamagus, tsî sa hurikhoegu tsî sa ǂgaeǂgui-unu-aogu, tsî khôaǃkhaide ra dī-unugu tsî ǁamagusa sasa ra dī-ūgu, tsî toro-aogu sa ǃnâ hâgu hoagu, sa ǀhaohâb sa ǃnâ hâb hoab on ǀkha, ǁîn ge hurigu di ǃarab ǃnâ nîra ǁnā tsēs sa ǁnās dis ai.

²⁸ǀŌb sa ǂgaeǂgui-unu-aogu ǃaub dib xa di ge aiǃāde nîra ǀkhū.

²⁹Tsî ǂgauǁgubihaiba ra sîsenūgu hoagu, hurikhoegu tsî hurib di ǂgaeǂgui-unu-aogu hoagu ge doe-omgu âga xu nîra ǁgôa, tsî gu ge ǃhūb ai nîra mâhâhâ.

³⁰Tsî gu ge ǁîgu di domma sas ǂama nîra ǁnâu kai tsî ause nîra ǃau; tsî gu ge tsaraba ǁîgu di danadi ai nîra tsoro tsî gu ge tsaob ǃnâ nîra ǃupupesen.

³¹Tsî gu ge sas ǂama nîra ǃgorakaisen tsî ǁhōga nîra ana. Tsî gu ge sas ǂama nîra ā ausib ǀoms dib ǀkha tsî au ǃgae-ai-i ǀkha.

³²Tsî gu ge ās âgu ǃnâ ǃgae-am-e nîra tsoatsoa, tsî sas ǂama nîra ǃgae: Tarisa Tires khami ge ī isa, ǁîs hurib di ǁaegub ǃnâ ǃhomǂuihe hâs khami īsa?

³³Sa ǁamaxūǃkhaidi di xūn ge huriga xu ǀkhīo, os ge ǂgui ǁaede ǀoasasib sa xūn dib ǀkha ge ǁâǁâ; tsî sa ǁamagus ǀkhas ge gao-aogu ǃhūbaib diga ge ǃkhū kai.

³⁴Huriga xus ge sasa ǃgammi ǁgamgu dib ǃnâ khôahe; ǁaeb ai ra ge sa ǁamagus tsî sa ǀhaohâb hoaba sa ǁaegub ǃnâ ge ǁnā.

³⁵ǁAnsaben ǃnāǃnuidi din hoan ge sas ǂama ǃao hâ; tsî gao-aogu âdi ge ǃurigu hâ tsî aidi ge burugâ hâ.

³⁶ǁAma-aogu ǁaedi ǁaegu hâgu ge sasa ra ǂnamǀî; sas ge ge kai ǃhuri kai tsîs ge ǃaruǀî hâ tide ǀamosib kōse.