Read Khoekhoegowab Esegieli 28 Bible Online

Esegieli 28 - Khoekhoegowab bible

Esegieli 28

¹ǃAruǀîs ge mîs ǃKhūb disa hāba te tsî ge mî:

²Khoenôa ǀgôatse, gaosab Tires diba mîba: Nētib ra ǃKhūb ǃKhūba mî: ǂGaob âts ra ǃguriǃgurisen tsî, tita ge a elo, tita ge ǂnû-aiǃnaos elogu dis ai ǂnôa hurigu ǁaegub ǃnâ, ti ra mî amaga; khoets a tsîts elo tama hîa, tsîts ra ǂgaob âtsa elob di ǂgaob axase dī.

³Mû, ots ge Danieli ǃgâ-ai a gā-ai; ǂganǃgâsan hoan ge satsa ǂganǃgâsaba tama hâ;

⁴sa gā-aisib tsî sa ǁnâuǃāba xuts ge satsa ge xūxa, ā, ǃhuniǀurib tsî ǀhaiǀurib tsîkhats ge satsa ǁuigu âts ǃnâ ge hōbasen;

⁵kaisib sa gā-aisib diba xuts ge sa ǁamagus ǃnâ xūn âtsa kaise ge ǂguiǂgui, tsî ǂgaob âts ra ūts hân xa ǀgapiǀgapisen.

⁶ǁNā-amagab ra ǃKhūb ǃKhūba nēti mî: Sa ǂgaobats ge Elob di ǂgaob axase dī amaga,

⁷ǁnā-amaga kō, tita ge ǃhao khoega nîra hā ǂam kai tsi, ǁgaridī-aogu ǁaedi diga; ǁîgu ge gôagu âga îsasib sa gā-aisib dib ǂama nîra ǀhōǂui, tsî ǂkhaib âtsa nîra ǀuriǀuri.

⁸Āb ǃnâ gu ge ǁîga satsa nîra ǁgôa kai, tsîts ge satsa hurigu di ǃarab ǃnâ ǂnauǃanhe hâ i di ǁōba nîra ǁō.

⁹Satsa kha ǃgamaob âts di ais aiǃâ: Tita ge a elo ti nî mî, ǁnāb satsa ra ǂnauǃanni di ǃomǁaeb ǃnâts a khoe, tsî elo tama hîa?

¹⁰Sats ge ǁōb ǃgaohe taman diba nîra ǁō ǃhaokhoen ǃomǁae: Tita ge ǃhoa xui-ao, tib ra ǃKhūb ǃKhūba mî.

¹¹ǃAruǀîs ge mîs ǃKhūb disa hāba te tsî ge mî:

¹²Khoenôa ǀgôatse, ǃgae-am-e tsoatsoa Tires di gao-aob ǂama, îts ǁîba mîba: Nētib ra ǃKhūb ǃKhūba mî: Sats ǀgausa ra ǂganamǀgaiǀgaits, gā-aisib xa ǀoa tsî îsasib xa dīǀoaǀoasatse.

¹³Sats ge Edenni Elob di ǃhanab ǃnâ ge hâ i; mâ ǃgomǀgausa ǀuis hoas ge sa ǃgū-aixū ge i: Sardisǀuidi tsî topas tsî diamants tsî turkoes tsî sardoniksǀuidi tsî jaspisǀuidi, safir tsî robain tsî smarag-ǀuidi tsî ǃhuniǀurib tsîna. Sîsenni sa ǃkhurusedi dib tsî ǂnami-aon dib ge sa ǀkha ge hâ; sats ra kuruhe tsēs ain ge ǁîna ǂhomi ge hâ i.

¹⁴Sats ge ǂkhauǀkhāhe hâ ǃgū-ai ra xeru ge i, tsî tita ge ǁnā ta, satsa ge ǂnûi ta. Sats ge ǃanu ǃhommi Elob dib ai ge hâ i; sats ge ǀaexa ǀuidi ǁaegu ge ǃgûma.

¹⁵Sats ge daogu âts ǃnâ dīǀoaǀoasa ge i, ǁîs aits ge kuruhe tsēsa xu, ǂhanuoǃnâsib ge sa ǃnâ hōhes kōse.

¹⁶ǂGuisib sa ǁamagus dib ǀkhan ge ǁaegub âtsa ǁgaridīs ǀkha ge dīǀoaǀoa, tsî sats ge ge ǁore. ǁNā-amaga ta ge tita satsa Elob ǃhomma xu nîra ǀuriǀuri, tsî sats ǃgū-ai ra xerutsa nîra hîkākā ǀaexa ǀuidi ǁaeguba xu.

¹⁷Sa ǂgaob ra îsasib âts xa ǃguriǃgurisen, sats ge gā-aisib âtsa ge ǁgaoǁgao ǂkhaib âts xa; tita ge satsa ǃhūb ai ge aoǁgui, tita ge satsa ais gao-aogu dis aiǃâ ge mâi, ǁîgu nî sats ǂama kōse.

¹⁸ǂGuisib sa ǂhanuoǃnâsigu dib ǀkha, ǂkhabab sa ǁamagus dib ǀkhats ge sa ǃanusiga ge ǀuriǀuri. ǁNā-amaga ta ge tita ǀae-e sa ǁaeguba xu ge ǀkhī kai, ǁî-i ge satsa ge hapu, tsî tita ge satsa ge tsao kai ǁnān satsa ra mûn hoan aiǃâ.

¹⁹Satsa ǁaedi ǃnâ ǂann hoan ge sa ǂama ǃhurigâ hâ; sats ge ge kai ǃhuri kai, tsîts ge ǃaruǀî nîra ǀkhai ǀamos kōse.

²⁰ǃAruǀîs ge mîs ǃKhūb disa hāba te tsî ge mî:

²¹Khoenôa ǀgôatse, sa aisa ǂnûi, Sidons ǃoagu îts ǁîsa kēboǂam.

²²Îts mî: Nētib ra ǃKhūb ǃKhūba mî: Mû, tita ge nîra hāǂam si, sas Sidonse, tsî ta ge sa ǁaegu nîra ǂkhaiǂkhaihe; on ge nîra ǂan tita a ǃKhū ǃkhaisa, ǀgoraǃgâde ta ga tita ǁîs ǃnâ ǀgoraǃgâ tsî ǁîs ǃnâ khaihe ǃnubai.

²³Tita ge ǂhīǁōba ǁîs ǃnâ nîra sî xui-ao, tsî ǀaoba daogu âs ai, tsî ǂnauǃanhesan ge ǁîs ǁaegub ǃnâ nîra ǁnā, gôab mâ ǃnammi hoaba xu ǁîs ǃoagu nîra hāb xa, on ge nîra ǂan tita a ǃKhū ǃkhaisa.

²⁴Tsî Israeli ommi din ge ǃaruǀî tsûtsû ra ǁkhū-i kas, ǃkhā ra ǀgami-i kas hoasa ūhâ tide. ǁNān, ǁîsa hâǂnamipe hân, tsî ǁîsa ra ǁkhâuǁnân hoan xa hâ kaibahe tide. On ge nîra ǂan tita ǃKhū ta a ǃKhū ǃkhaisa.

²⁵Nētib ra ǃKhūb ǃKhūba mî: Israeli ommi dina ta ga tita ǁaedi, ǁîn ǁaegu ta ge ǁîna ǀgaruǀgarude xu ǀhaoǀhao, tsî tita ga ǁîn ǃnâ ǁaedi di mûdi aiǃâ khaiheo, on ge ǁîn di ǃhūb, ti ǃgāb Jakoba ta ge māb ǃnâ nîra ǁan.

²⁶Tsîn ge sâusase ǁîb ǃnâ nîra ǁan tsî omde nîra ǂnubi tsî ǂauxûiǂûǃhanaga nîra ǂgā, ā ǁîn ge sâusase nîra ǁan, ǀgoraǃgâde ta ga tita ǁnān, ǁîna ge ǁkhâuǁnân hoan tsî ǁnān, ǁîn ǂnamipe hâna ǀgoraǃgâ ǃnubai. On ge nîra ǂan tita ǃKhūta a ǁîn di Elo ǃkhaisa.