Read Khoekhoegowab Esegieli 29 Bible Online

Esegieli 29 - Khoekhoegowab bible

Esegieli 29

¹Disiǁî kurib ǃnâ, disiǁî ǁkhâb ǃnâ, disiǀgamǀaǁî tsēs ǁkhâb dis ais ge mîs ǃKhūb disa hāba te tsî ge mî:

²Khoenôa ǀgôatse, ǂnûi ais âtsa, Faraob, Egipteb di gao-aob ǃoagu, îts ǁîb ǃoagu kēbo tsî Egipteb hoab ǃoagu;

³ǃhoa îts mî: Nētib ra ǃKhūb ǃKhūba mî: Mû, tita ge nîra hāǂam tsi, sats Faraots, Egipteb, ǁnā kai huriǃnonab, ǃāgu âb di ǁaegub ǃnâ ǁgoeb di gao-aotse, sats: Ti Nylǃāb ge a ti tsî tita ge ǁîba ge dībasen, ti ra mîtsa.

⁴Xawe tita ge ǂhao-ūdaga amǃnâb âts ǃnâ nîra ǂgā, tsî ta ge sa ǃāgu di ǁauba ǂhapirogu âts tawa nîra ǂae kai, tsî tita ge satsa ǃāgu âts di ǁaeguba xu nîra ǂgaeǃapa, ob ge ǁaub sa ǃāgu dib hoaba sa ǂhapirogu ai nîra ǂae.

⁵Tsî tita ge satsa nîra ǁnāxū ǃgaroǃhūb ǃnâ, sats tsî sa ǃāgu di ǁaub hoaba. Sats ge ǂgās ǃaub dis ai nîra ǁnā; sats ge sākhâihe tsî ǀhaoǀhaohe tide. ǀGurun ǃhūbaib din tsî anin ǀhommi dina ta ge tita satsan nî ǂûse ge mā.

⁶Tsî ǁansaben Egipteb din hoan ge nîra ǂan tita a ǃKhū ǃkhaisa. Israeli ommi din ge ǁîna ǂāse ge ība xui-ao.

⁷ǁÎn ge satsa ǃommi âts tawa ǃkhō ǃnubaits ge ge khôa, tsî ǁîn di ǃnammi hoaba ge ǃkhaiǃā, tsî ǁîn ge sa ai ǃgâseno, ots ge ge khôa tsî mâ kamanab hoab âna ǁî-aitsama ge ǁnope kai.

⁸ǁNā-amaga nētib ra ǃKhūb ǃKhūba mî: Mû, tita ge gôaba sa ǂama nîra ūhā, tsî tita ge satsa xu khoe-i kas ǀgoa-i kas hoasa nîra ǃhomǂui.

⁹Tsî Egipteǃhūb ge nîra ǃū-aisa ǃkhai tsî ǃgaroǃhū kai, tsîn ge nîra ǂan tita a ǃKhū ǃkhaisa. Nylǃāb ge a ti, tita ge ǁîba ge dī, ti ra mî xui-ao,

¹⁰ǁnā-amaga, mû, tita ge sats tsî sa ǃāga nîra hāǂam, tsî tita ge Egipteǃhūba ǃū-aisa tsî ǀkhaiǃnâ ǃkhaise nîra ǂnûi Migdolsa xu Sienes ǁgā, tsî Etiopiab di ǀkharib kōse.

¹¹Khoe-i di ǂai-i xare-i ge ǁîba ǃgûǃnâǃganu tide, tsî ǀgoa-i di ǂai-i xare-i ge ǁîba ǃgûǃnâǃganu tide, tsîb ge hakadisi kurigu kōse ǁanǃnâhe tide.

¹²Tita ge Egipteǃhūba ǃū-aisa ǃkhaise nîra ǂnûi xui-ao, hîǀhuruhe hâ ǃhūgu di ǁaegub ǃnâ, tsî ǁîb di ǃādi ge ǃū-aisa ǃkhaise nîra i, hîǀhuruhe hâ ǃādi di ǁaegub ǃnâ hakadisi kurigu kōse, tsî tita ge Egipteǁîna ǁaedi ǃnâ nîra ǀgaruǀgaru tsî ǃhūgu ǃnâ nîra tsoromâi.

¹³Nētib ra ǃKhūb ǃKhūba mî xui-ao: Hakadisi kurigu di ǀunis ai ta ge tita Egipteǁîna ǁnā ǁaedi, ǁîdi ǃoan ge ǀgaruǀgaruhe hâ ide xu nîra ǀhaoǀhao.

¹⁴Tsî tita ge ǃkhōsis Egipteǁîn disa nîra unu tsî ǁîna ǁkhawa Patrosǃhūb, ǃnaeǃhūb ân ǃnâ nîra ūhā, tsî ǁnāpan ge ǃnaga hâ gaosise nîra ī.

¹⁵Tsîs ge nau gaosidi xa ǃgamǃgamsase nîra ī, tsî ǃaruǀî nau ǁaedi ǂamǃnâ ǀgapiǀgapisen tide. Tita ge ǁîna nîra ǀoro kai xui-ao, ǁaedi ǂaman gao tidega.

¹⁶Tsîs ge ǃaruǀî Israeli ommi dina ǂgomaiǂnûise ība tide ǂhanuoǃnâsib xa ra ǂâi kai xūse, ǁînǀîn ra kōnǃgâ ǃnubai, tsîn ge nîra ǂan tita ǃKhūta a ǃKhū ǃkhaisa.

¹⁷ǃAruǀî i ge ge ī, ǀgamdisihûǀaǁî kurib ǃnâ, ǂguro ǁkhâb ǃnâ, ǂguro tsēs ǁkhâb dis ai, mîs ǃKhūb dis ge hāba te tsî mî ǃkhaisa:

¹⁸Khoenôa ǀgôatse, Nebukadnesari, Babilons di gao-aob, ge toroǂnubis âba ǃgom sîsenna ge sîsen kai Tires ǃoa-ai; mâ danas hoas ge ge ǃgora tsî mâ ǃnammi hoab ge ge tsuruǂuihe, tsî ǁîb kas ǁîb di ǂnubis kas hoas ge Tires xa amǃnâ-e ūhâ tama ge i, ǁnā ǃoabas, ǁîsab ge ǃoaba-ūs ǂama.

¹⁹ǁNā-amaga nētib ra ǃKhūb ǃKhūba mî: Mû, tita ge Nebukadnesari, Babilons di gao-aoba, Egipteǃhūba nîra mā, tsîb ge ǁîba ǂguib âba nîra ǂgaeǂguibē tsî ǁkhâuǁnâs âba nîra ǀâ, tsî ǁîn ge ǂnubis âb di amǃnâse nîra ī.

²⁰Sîsenamǃnâs, ǁîs ǃoagub ge sîsens ase ta ge ǁîba Egipteǃhūba ge mā, titan ge ǁî ǃkhaisa ǃoaba amaga, tib ra ǃKhūb ǃKhūba mî.

²¹ǁNā tsēs ǁkhās ai ta ge ǁnâb Israeli ommi diba nîra ǀkhī kai, tsî satsa ta ge khowas ams disa ǁîn ǁaegu nîra mā, tsîn ge nîra ǂan tita a ǃKhū ǃkhaisa.