Read Khoekhoegowab Esegieli 3 Bible Online

Esegieli 3 - Khoekhoegowab bible

Esegieli 3

¹ǁNās khaoǃgâb ge ǁîba tita ǃoa ge mî: Khoenôa ǀgôatse, hōts ga xū-i hoa-e ǂû, nē xamisa ǂkhanisa ǂû îts ǃgû tsî Israeli ommi dina ǃhoaǀî.

²O ta ge tita ti amsa ge khowa, ob ge ǁîba ǁnā xamisa ǂkhanisa ge ǂû kai te.

³Tsîb ge ǁîba tita ǃoa ge mî: Khoenôa ǀgôatse, sa ǃnāba ǂûmā îts sa ǃnāxūna nē xamisa ǂkhanis, tita ra mā tsis ǀkha ǀoaǀoa. ǃNubai ta ge ge ǂû, tsîs ge ti ams ǃnâ danib khami ge tsâ i ǂkhonsib xa.

⁴Ob ge ǁîba tita ǃoa ge mî: Khoenôa ǀgôatse, ǃgû îts Israeli di ommi din tawa sī îts ti mîdi ǀkha ǁîna ǃhoaǀî.

⁵Sats ge ǁaes ǃhao gowaba ūhâs tsî ǃgom namsa ūhâs ǃoa sîhe tama, tsîts ge Israeli ommi din ǃoa sîhe hâ.

⁶ǂGui ǁaedi ǃhao gowaba ūhâdi tsî ǃgom namsa ūhâdi, ǁîn di mîdets a ǁnâuǃā ǁoa di ǃoa tama; tsî tita ga ǁîna ǃoa sî tsio, xaren kha ǁîna satsa ǁnâu tide?

⁷Xawe Israeli ommi din ge satsa ǁnâu tide, titan ǁnâu ǂgao tama amaga, Israeli ommi hoab din ge a ǀkhamasaǃū, ā, karosa ǂgaoba ūhân ge a ǁî.

⁸Mû, tita ge ais âtsa ǁîn di aidi ǃoagu go ǀkhamaǀkhama tsî ǃūs âtsa go ǀkhamaǀkhama ǁîn di ǃūs ǃoagu.

⁹Tita ge ǃūs âtsa diamantǀuis khami ge dī ǃhaob ǃgâ-ai karosase; tā ǁnâi ǁîna ǃao îts aidi ân aiǃâ tā ǃhurigâ, mâǃoaxa ommi din a xuige.

¹⁰ǃAruǀîb ge ǁîba tita ǁga ge mî: Khoenôa ǀgôatse, ti mîdi tita ge ǃhoa-ū tsi di hoade sa ǂgaob ǃnâ ū îts ǁîde ǂgaera âts ǀkha ǁnâu.

¹¹Îts ǃgû tsî ǃhūsabe ǁaes di ôan tawa sī îts ǁîna ǃhoa-ū îts ǁîna mîǀî: Nētib ra ǃKhūb ǃKhūba mî, ǁnâun kas, ǁnâu taman ga is hoasa.

¹²ǃNubaib ge Gagaba tita ge ūkhâi, o ta ge ti khaoǃgâ dommi kai ǂkhupib diba ge ǁnâu: Ab ǃkhōǀkhāhe ǂkhaisib ǃKhūb diba ǁîb di ǃkhaisa xu ti ra mîba,

¹³tsî ta ge ǀōb ûitsaman di ǁgabogu, nēb nauba ra tsâǀkhāgu diba ge ǁnâu tsî ǀōb ǀnūdi, ǁîn xōǀkhā hâdi diba tsî ǀōb kai ǂkhupib diba.

¹⁴ǃNubaib ge Gagaba tita ūkhâi tsî ge ūbē, o ta ge tita ti gagas di ǀgamsib xa ause ǃoa hâse ge ǃgû, xawe ǃKhūb di ǃommi ge ti ai ǀgaisa ge i.

¹⁵Tsî ta ge ūǃgûbēsan ǁga ge sī, Tel-Abis tawa ǃāb Kebari amǃgâ ǁan hâna, tsî ta ge ǁîn ǁan hâ ǃkhaib tawa ge hâ, ā, burugâ hâse ta ge ǁnāpa ǁîn ǁaegu hû tsēdi kōse ge hâ.

¹⁶O i ge hû tsēdi di ǀunis ai ge ī ǃKhūb di mîs ge tita ǃoa hā ǃkhaisa, mî rase:

¹⁷Khoenôa ǀgôatse, tita ge satsa Israeli ommi din ǂama ǃûi-aose ge mâi; ots ge satsa mîsa ti amsa xu ǁnâu tsî nî ti amǃnâs ai ǁnama.

¹⁸Tita ga eloxoresab ǃoa: Sats ge nî ǁō ti mîo, tsî sats ga ǁîba ǁnama tsî ǃhoaǀî tama io, eloxoresabats nî eloxoresa daogu âba xu ǁnamase, ûib ǃnâts nî ǁîba sâuga, ob ge ǁnā eloxoresaba ǂhanuoǃnâsib âb ǃnâ nîra ǁō, xawe ǀaob âba ta ge tita sa ǃomma xu nîra ǂgao.

¹⁹Xawe eloxoresabats ga satsa ǁnama, tsîb ga eloxoresasib âba xu tsî eloxoresa daob âba xu ǃhobasen tama io, ob ge ǁîba ǂhanuoǃnâsib âb ǃnâ nîra ǁō; xawe sats ge sa ǀomsa ge sâu.

²⁰Tsî ǂhanu-aib ga ǂhanu-aisib âba xu oa tsî ǂkhababa dīo, tsî tita ga ais âb aiǃâ ǃnôa-e ǁguio, ob ge ǁîba nîra ǁō; ǁîbats ǁnama tama amagab ge ǁîba ǁoreb âb ǃnâ nîra ǁō, tsî ǂhanu-aisin âb hîab ge dīn xa i ge ǂâihe tide, xawe ǀaob âba ta ge tita sa ǃomma xu nîra ǂgaoǀkhā.

²¹Tsî ǂhanu-aibats kara ǁnamao, ǂhanu-aib aseb ǁore tidese, tsîb ga ǁore tama io, ǁîb ge amase nîra ûi, ǁnamaheb ge amaga, tsî sats ge ǀoms âtsa ge sâu.

²²Tsî ǃKhūb di ǃommi ge ǁnāpa ti ai ge hâ i, tsîb ge tita ǃoa ge mî: Khâi îts ǃgoaǃnāb ǃoa ǂoa, o ta ge tita ǁnāpa nî ǃhoa-ū tsi.

²³O ta ge tita khâi tsî ǃgoaǃnāb ǃoa ge ǂoa, tsî mû, ǂkhaisib ǃKhūb dib ge ǁnāpa ge mâ i, ǁnā ǂkhaisib, ǃāb Kebari tawa ta ge mûb khami ība, o ta ge tita ti ais ai ge ǁnā.

²⁴ǃNubaib ge Gagaba ti ǃnâ hā tsî ti ǂaira ai ge mâi te, tsî ǁîb ge tita ǀkha ge ǃhoa tsî nēti ge mî: ǃGû îts sa ommi ǃnâ sī ǂganamǂgāsen.

²⁵Sats khoenôa ǀgôats xasa, mû, ǁîn ge tsuriga sa ai nî ǁgui tsîn ge ǁîgu ǀkha nî ǃgae tsi; ǁnā-amagats ge ǁîn ǁaeguba xu ǂoa tide.

²⁶Tsî tita ge nams âtsa sa namǃhanab tawa nî ǂae kai, ots ge nîra ǃgome, ots ge ǁîna ǂgōǀau-aose ība tide, ǁîn a mâǃoaxa ommi di xui-ao.

²⁷Xawe tita ga ǃhoa-ū tsio, o ta ge tita sa amsa nîra khowa, ots ge ǁîn ǃoa nîra mî: Nētib ra ǃKhūb ǃKhūba mî: ǁNâu ka-i a-i ǁnâu, tsî ǁnâu tama ga i-i a-i tā ǁnâu; ǁîn a mâǃoaxa ommi di xuige.