Read Khoekhoegowab Esegieli 30 Bible Online

Esegieli 30 - Khoekhoegowab bible

Esegieli 30

¹ǃAruǀîs ge mîs ǃKhūb disa hāba te tsî ge mî:

²Khoenôa ǀgôatse, kēbo îts mî: Nētib ra ǃKhūb ǃKhūba mî: Ā re: Okha ǁnā tsēse! ti.

³Tsēs ge a ǀgū, ā ǃKhūb di tsēs ge a ǀgū xui-ao; ǀnanuxa tsēs ge nîra, ǁaeb ǁaedi dib ge nîra.

⁴Tsî gôab ge Egipteb ǃnâ nîra hā, tsî kai tsûaǂgaob ge Etiopiab ǃnâ nîra hâ, ǂnauǃanhesan ga Egipteb ǃnâ ǁnāǃnubai, ǁîn di ǂguiban nîra ūbē xui-ao, tsî ǁîb di ǃgaoǃgaodi ge nîra khôaǂkhūhe.

⁵Etiopiab, Puti, Ludi, Arabiab tsî Kub tsî ǃgaeǀhaos ôan di ǃhūb tsîn ge ǁîb ǀkha nîra ǀgui ǁnā gôab xa.

⁶Nētib ra ǃKhūb ǃKhūba mî: Ā, ǁîn ge nîra ǁnā, Egipteba ra ǂkhâkhâina, tsî ǃgurib ǁîb di ǀgaib dib ge nîra ǁgôa. Migdolsa xu Sienes kōsen ge ǁîb ǃnâ gôab xa nîra ǁnā, tib ra ǃKhūb ǃKhūba mî.

⁷Tsîn ge nîra hîǀhuruhe, hîǀhuruhe hâ ǃhūgu di ǁaegub ǃnâ, o di ge ǁîb di ǃāde hîǀhuruhe hâ ǃādi di ǁaegub ǃnâ nîra hâ.

⁸Tsîn ge nîra ǂan tita a ǃKhū ǃkhaisa, ǀae-e ta ga tita Egipteb ǃnâ ǁgui ǃnubai, on ge ǁîb di hui-aon hoana nîra khôaǂkhūǂkhūhe.

⁹ǁNātsēs ǁkhās ai gu ge sîsabega ti ais aiǃâba xu doe-omgu ǃnâ nîra ǂoa, ǂhansenoǃnâ Etiopiaǁîǃhūba gu nî ǃhuriǃhurise, tsî i ge kai tsûaǂgao-e ǁîn ǁaegu nîra hâ, Egipteb di tsēs ǃnâs khami; kō, ǁî ǃkhais ge ǃgoaxa.

¹⁰Nētib ra ǃKhūb ǃKhūba mî: Ā, tita ge ǂguib Egipteb diba nîra ǀû kai, Nebukadnesari Babilons di gao-aob di ǃomǁaeba xu.

¹¹ǁÎb tsî ǁaes âb ǁîb ǀkha tsî ǁgâiǀā-aogu ǁaedi digu tsîgu ge nî ūhāhe, ǃhūban nî hîǀhuruse, tsî gu ge ǁîgu di gôaga Egiptebǀî nîra ǂgaeǂui, tsî ǃhūb ge ǂnauǃanhesan ǀkha nîra ǀoaǀoahe.

¹²Tsî tita ge Nylǃāba nîra ǂnâǂnâ, tsî ǃhūba ǂkhaban ǃomǁae nîra ǁamaxū; tsî tita ge ǃhūba ǀoasib âb ǀkha ǃhaokhoen ǃomǁaeba xu nîra hîkākā. Tita ǃKhūta ge ǁî ǃkhaisa ge ǃhoata.

¹³Nētib ra ǃKhūb ǃKhūba mî: Tita ge ǁgôa-eloga nî hîkākā tsî īgu Memfis diga nîra ǀamǀam. Tsî gaosab xareb ge Egipteǃhūb ǃnâ ǃaruǀî hâ tide, tsî tita ge ǃhuri-e Egipteǃhūb ǃnâ nîra ǂnûi.

¹⁴Tsî tita ge Patrosa nîra hîǀhuru, tsî ǀae-e nîra ǁgui Soans ǃnâ, tsî tita ge nîra ǀgoraǃgâ Nos ǃnâ.

¹⁵Tsî tita ge ti ǁgôasiba nîra ǁhōǂui, Sins Egipteb di ǁaposasis ǂama, tsî tita ge ǂguib Nos diba nîra ǃhomǂui.

¹⁶Tsî tita ge ǀae-e nîra ǁgui Egipteb ǃnâ; os ge Sinsa kai tsûaǂgaoba nîra ūhâ, os ge Nosa nîra ǃkhopaǃganuhe, os ge Memfisa tsēkorobe kaise nîra ǂōǂōhe.

¹⁷ǂKham khoegu Avens tsî Pibesets tsîra digu ge gôab xa nîra ǁnā, tsî ǁansaben âra ge ǃkhōsis ǃnâ nîra ǂgâ.

¹⁸Taxpanhes tawas ge tsēsa nîra ǃkhae, ǃnaob Egipteb diba ta ga tita ǁnāpa khôao tsî ǀgapisib ǁîs di ǀgaib dib ga ǁîs ǃnâ ǀûo, ǀnanu-i xas ge ǁîsa nîra ǃgū-aihe, tsî ǀgôadi âs ge ǃkhōsis ǃnâ nîra ǂgâ.

¹⁹Nēti ta ge tita nîra ǀgoraǃgâ Egipteb ǃnâ, on ge ǁîna nîra ǂan tita a ǃKhū ǃkhaisa.

²⁰Tsî i ge ǁkhāti disiǀguiǀaǁî kurib ǃnâ ge ī, ǂguro ǁkhâb ǃnâ, hûǁî tsēs ǁkhâb dis ai, ǃKhūb di mîs ge hāba te tsî mî ǃkhaisa:

²¹Khoenôa ǀgôatse, tita ge ǁôab Faraob, Egipteb di gao-aob diba ge khôa tsî mû, ǁîb ge ǃgae-aihe tide, soǀôaǃkhairode ra ǁgui-aise, ǂgamǃkhaiba ra ǂgamse, ǁîba nîra ǀgoese, ǀgai tsîb ga gôaba ǃkhō ǁkhā ti.

²²ǁNā-amagab ra ǃKhūb ǃKhūba nēti mî: Mû, tita ge Faraob Egipteb di gao-aoba nîra hāǂam tsî ǁôab âba nîra khôa, hoakha, ǀgaisab tsî khôahe hâb tsîkha, tsî tita ge gôaba ǁôab âba xu nîra ǁnā kai.

²³Tsî tita ge Egipteǁîna ǁaedi ǃnâ nîra ǀgaruǀgaru tsî ǃhūgu ǃnâ ǁîna nîra tsoromâi.

²⁴Tsî tita ge ǁôakha Babilons di gao-aob dikha nîra ǀgaiǀgai tsî ti gôaba ǃomǁaeb âb ǃnâ nîra mā, xawe Faraob di ǁôakha ta ge tita nîra khôa, ob ge ais âb aiǃâ nîra ǃgae, ǁōǁōsase ǀhapi hâ-i ra ǃgae xase.

²⁵Ā, tita ge ǁôakha Babilons gao-aob dikha nîra ǀgaiǀgai, xawe Faraob di ǁôakha ge nîra ǁnā, tsîn ge nîra ǂan tita a ǃKhū ǃkhaisa, ti gôaba ta ga tita Babilons gao-aob ǃomǁae mā tsî ǁîb ga Egipteǃhūb ǂama ǀhōǂui bi ǃnubai.

²⁶Tsî tita ge Egipteǁîna ǁaedi ǃnâ nîra ǀgaruǀgaru tsî ǃhūgu ǃnâ ǁîna nîra tsoromâi. Nētin ge ǁîna nîra ǂan tita a ǃKhū ǃkhaisa.