Read Khoekhoegowab Esegieli 31 Bible Online

Esegieli 31 - Khoekhoegowab bible

Esegieli 31

¹Tsî i ge disiǀguiǀaǁî kurib ǃnâ ge ī, ǃnonaǁî ǁkhâb ǃnâ, ǂguro tsēs ǁkhâb dis ai, ǃKhūb di mîs ge hāba te tsî mî ǃkhaisa:

²Khoenôa ǀgôatse, mîba re Faraob, Egipteb di gao-aob, tsî ǂguib âb tsîna: Tarib ǀkhats kha ǀguiti-ī satsa kaisib âts ǃnâ?

³Mû, Asiriab ge sederhai ge i Libanonni ai, îsa ǁnâuga ūhâb, somxa ǂgaede ūhâb; ǀgapi ǃgaoba ūhâb, tsî ǂaob âb ge ǀgom ǁnâugu ǃnâ ge hâ i.

⁴ǁGamgu ge ǁîba ge kaikai, ǁgammi ge ǁîba ge ǀgapiǀgapi; ǁîgu ge ǂgā-ais âba ge dâuǂnamipe tsî dâudâudi âga ǃaub di haidi hoadi ǃoa ge sîǂui.

⁵ǁNā-amagab ge ǃgaob âba ǃaub di haidi hoadi ǃgâ-ai ge ǀgapi; tsî ǁnâugu âb ge ge kai, tsî ǂgonagu âb ge ge gaxu, ǁnā kai ǁgamgu xa, ǀkhīb geo.

⁶Anin ǀhommi din hoan ge ǁnâugu âb ai ge om, tsî ǀgurun ǃaub din hoan ge ǂgonagu âb ǃnâ ge ôa; tsî kai ǁaedi hoadi ge sommi âb ǃnâ ge ǂnôa i.

⁷Nētib ge kaisib âb ǃnâ îsa ge i, tsî gaxusib ǁîb di ǁnâugu dib ǃnâ, ǃnomagu âb ge kai ǁgamgu amǃgâ hâ i xui-ao.

⁸Sederhaidi Elob di ǃhanab didi ge ǁîba ǃkhaeǃkhae tama hâ, tsî siprehaidi ge ǁnâugu âb ǀkha ǀguiti-ī tama hâ, tsî kastanihaidi ge ǂgonagu âb ǀkha ǀguiti-ī tama ge hâ i; mâ hais Elob di ǃhanab ǃnâ hâs hoas ge îsasib ǃnâ ǁîb ǀkha ǀguiti-ī tama ge hâ i.

⁹Tita ge ǁîba ǁnāti ge î-î ǂguisib ǁîb di ǁnâugu dib ǀkha, haidi Edenni didi Elob di ǃhanab ǃnâ hâdi hoadi ge ǁîba suris kōse.

¹⁰ǁNā-amagab ra ǃKhūb ǃKhūba nēti mî: ǃGaob âts ǃnâ hâsets ge ǀgapiǀgapisen amaga, ā, ǁîb ge ǀams âba ǀgom ǁnâugu di ǁaegub kōse ge ǀhōǃapa, tsî ǂgaob âb ge ǁîb di ǀgapib ǃaroma ge ǃguriǃgurisen,

¹¹ǁnā-amaga ta ge tita ǁîba hoan xa ǀgaisab ǁaedi dib ǃomǁae ge mā, ǂhanu-aiseb nî ǁîba dī-ūse; tita ge ǁîba ge doeǁgaǂui ǁîb di eloxoresasib ǃaroma.

¹²Tsî ǃhao khoegu, ǁaedi di ǁgâiǀā-aogu ge ǁîba ge ǃhomǂui tsî ǁîba ge ǁnāxū; ǁîb di ǁnâugu ge ǃhomgu ai ge ǁnā tsî ǃgoaǃnāgu hoagu ǃnâ, tsî ǁîb di ǂgonagu ge ǃāgu ǃhūb digu hoagu tawa ge khôahe; tsî ǁaedi ǃhūbaib didi hoadi ge sommi âba xu ǁgôa tsî ǁîba ge ǁnāxū.

¹³Anin ǀhommi din hoan ge ǁnā hâ ǃgaob âb ai ge ǁan, tsî ǀgurun ǃaub din hoan ge ǂgonagu âb ai ge hâ.

¹⁴ǁGamxa haidi xaredi ǁîdi ǃgaob ǂama ǀgapiǀgapisen tide tsî ǀams âde ǀgom ǁnâugu ǁaeguba xu ǃnā hâse ǀhōǂui tidega, tsî ǁgam-e ra ā haidi xaredi ǁîdi ǂûdi ai mâ tidega ǀgapisib âdi xa; hoatsama di ǁōba māǁnâhe hâ xui-ao, ǃnaga hâ ǃhūb ǃnâ khoenôa ǀgôan ǁaegu, ǁnān, āb ǃoa ra ǁgôan ǃoa.

¹⁵Nētib ra ǃKhūb ǃKhūba mî: ǁÎb ra ǀamoǀaeb ǃoa ǁgôa tsēs ai ta ge tita ge ǃoa, tita ge ǁîb ǃaroma ǁgamma ge ǃgū-ai tsî ǃāgu âba ge ǃkhâi, o gu ge kai ǁgamga ge ǃkhōdawahe, tsî tita ge Libanonna ǁîb ǃaroma ge ǂnūǂnū, tsî ǃaub di haidi hoadi ge ǁîb ǃaroma ge ǁgâǁō.

¹⁶ǀŌb ǁîb di ǁnās dib xa ta ge tita ǁaede ge ǀkhū kai, ǀamoǀaeb ǃoa ta ge tita ǁîba ǁgôa kai ǃnubai, ǁnān, āb ǃnâ ra ǁgôan ǀkha; tsî haidi Edenni didi hoadi, Libanonni di ǃkhōǂuihesadi, tsî ǃgâidi ǁgam-e ra ādi hoadi ge ǃnaga hâ ǃhūb ǃnâ ge ǁkhaeǂgaosen.

¹⁷ǁÎdi on ge ǁîb ǀkha ǀamoǀaeb ǃoa ge ǁgôa, gôab xa ǂnauǃanhe hân ǃoa, tsî ǁnān ǁîb di ǁôase ge in, tsî ǁnān sommi âb ǃnâ ǁaedi ǁaegu ge ǂnôa in.

¹⁸Tarib ǀkhats kha ǁnâi ǀguiti-ī ǂkhaisib tsî kaisib ǃnâ Edenni di hain ǁaegu? Ā, sats ge Edenni di hain ǀkha nîra ǁgôa-ūhe hoan xa ǃnaga hâ ǃhūb ǃoa; ǃgaohe taman ǁaeguts ge satsa nîra ǁgoe gôab xa ǂnauǃanhe hân ǀkha. Nēb ge Faraoba, ǂguib âb hoab ǀkha, tib ra ǃKhūb ǃKhūba mî.