Read Khoekhoegowab Esegieli 32 Bible Online

Esegieli 32 - Khoekhoegowab bible

Esegieli 32

¹Tsî i ge ǁkhāti ge ī, disiǀgamǁî kurib ǃnâ, disiǀgamǀaǁî ǁkhâb ǃnâ, ǂguro tsēs ǁkhâb dis ai, ǃKhūb di mîs ge hāba te tsî mî ǃkhaisa:

²Khoenôa ǀgôatse, ǃgae-am-e tsoatsoa re Faraob Egipteb di gao-aob ǂama îts ǁîba mîba: Sats ge ǁaedi ǁaegu ǂkham xammi khami ge ī; tsî sats ge huriǃnonab khami ge ī hurigu ǃnâ, tsîts ge ǃāgu âts ǃnâ ge ǃkhopaǂgâ, tsî ǁgamma ge ǂgomaǂgoma ǂaidi âts ǀkha tsî ǁîn di ǃāga ge ǂgoaǂgoa.

³Nētib ra ǃKhūb ǃKhūba mî: O ta ge tita ti ǂhamsa sa ǂama ǂgui ǁaedi di ǀhûs ǃnâ ra ǃā, ǁîn ge satsa ti ǂhanni ǃnâ nîra ǂgaeǃapa.

⁴ǃNubai ta ge tita ǃhūb ai nîra xu tsi, tsî tita ge anin ǀhommi din hoana sa ai nîra ǁan kai, tsî ǀgurun ǃhūbaib din hoana sats xa nîra ǁâ kai.

⁵Tsî tita ge sa ǁgansa ǃhomgu ai nîra māxū tsî ǃgoaǃnāga sa ǀgapisib ǀkha nîra ǀoaǀoa.

⁶Tsî tita ge ǃhūb, ǁîb ǃnâts ra tsâba, sa ǀaoba nîra āsi ǃhomgu kōse, tsî ǃāgu ge sa xa nîra ǀoa.

⁷Tsî tita ga satsa ǀario, o ta ge tita ǀhomma nîra ǃgū-ai tsî ǀgamirodi âba nîra ǃkhaeǃkhae; tita ge soresa ǃâudi ǀkha nîra ǃgū-ai, tsî ǁkhâb ge ǃnâb âba ǃnâ kai tide.

⁸ǃNâ ra ǃnân ǀhommi din hoana ta ge tita sa ǂama nîra ǃkhaeǃkhae; tsî tita ge ǃkhaena-e sa ǃhūb ǂama nîra kuru, tib ra ǃKhūb ǃKhūba mî.

⁹Tsî tita ge ǁnās tawa ǂgaob ǂgui ǁaedi diba nîra ǃoa kai, sa khôasa ta ga tita ǁaedi ǁaegu ūhā ǃnubai, ǁnā ǃhūgu sats a ǀūgu ǃnâ.

¹⁰Tsî Tita ge nîra dī, ǂgui ǁaedi nî sa ǂama ǃhurigâ ǃkhaisa, tsî ǁîn di gao-aogu ge sa ǂama nîra ǃurigu, ti gôaba ta ga ǁîn di aidi aiǃâ ǂkhai kaio, tsîn ge mâ mûsǀapiros hoasa nîra ǀkhū mâ-i hoa-i ǁî-i di ǀoms ǂama sa ǁnās di tsēs ai.

¹¹Nētib ra ǃKhūb ǃKhūba mî xui-ao: Gôab Babilons di gao-aob dib xats ge nîra hāǂamhe.

¹²Tita ge ǂguib âtsa ǁē-aogu di gôab xa nîra ǁnā kai; ǁnāgu, hîa ǁaedi di ǃnā hâ ǁgâiǀā-aogu ge ǃgurib Egipteb diba nîra hîkākā, tsî ǁîb di ǂguib hoab ge nîra hîǀhuruhe.

¹³Tsî tita ge ǁîb di ǀgoan hoana ǁnā kai ǁgamgu amǃgâba xu nîra dītoa; tsî khoe-i di ǂai-i xare-i ge ǃaruǀî ǁîba ǂgomaǂgoma tide, tsî ǀgoan di ǁkhoradi ge ǁîba ǀgomaxa kai tide.

¹⁴ǃNubai ta ge tita ǁîn di ǁgamga nîra ǃgamse āǂgâ kai, tsî tita ge ǁîn di ǃāga oli-i axase nîra dâu kai, tib ra ǃKhūb ǃKhūba mî.

¹⁵Egipteǃhūba ta ga tita ǃū-aisa ǃkhai kaio, tsî ǃhūb ǀoasib âb dib ga ǃū-aisao, tsî tita ga ǁnān ǁîb ǃnâ ǁan hân hoana ǂnauo, on ge ǁîna nîra ǂan tita a ǃKhū ǃkhaisa.

¹⁶Nēs ge ǁnā ǃgaetsanas, ǃgae rasen nîra ǁnaesa. Tsî ǀgôadi ǁaedi didi ge ǁîsa ǃgae rase nîra ǁnae, ǁîdi ge ǁîsa Egipteb ǂama tsî ǂguib âb hoab ǂama ǃgae rase nîra ǁnae, tib ra ǃKhūb ǃKhūba mî.

¹⁷ǃAruǀî i ge disiǀgamǀaǁî kurib ǃnâ ge ī, disikoroǀaǁî tsēs ǁkhâb dis ai, ǃKhūb di mîs ge hāba te tsî mî ǃkhaisa:

¹⁸Khoenôa ǀgôatse, tsûsase ǃgae Egipteb di ǂguib ǂama, îts ǁîna ǁgôa kai, ǁîb tsî ǂkhaisa ǁaes di ǀgôadi tsîna hoan xa ǃgam ǃkhaidi ǃhūbaib didi ǃnâ, ǁnān, āb ǃnâ ra ǁgôan tawa:

¹⁹Tari-ets kha ǁnâi ǃnā hâ ǀnamǀnamsasib ǃnâ? ǁGôa îts ǁnâi ǁgoe ǃgaohe taman tawa.

²⁰ǂNauǃanhesan gôab din ǁaegun ge nîra ǁnā, ǁîb ge gôaba māǁnâhe hâ, îts ǁîba ǂgai ǁîb di ǂguib hoab ǀkha.

²¹Hoan xa ǀgaisagu ǁē-aogu digu ge ǁîba hui-aogu âb ǀkha nîra ǃhoaǀî ǀamoǀaeb di ǁaeguba xu: ǁÎgu ge ge ǁgôa, ǃgaohe tama gu ge ǁgoe, gôab xa ǂnauǃanhe hâse.

²²ǁNāpab ge Asiriaba hâ ǁîb di ǂguib hoab ǀkha, ǁîb di ǀhobadi ge ǁîb ǂnamipe hâ; ǁîn ge hoatsama ǂnauǃanhe hâ, ǁîn ge ǁnā hâ gôab xa.

²³ǁÎn di ǀhobadi ge ǂnûihe hâ āb di ǀkhāb tawa, tsî ǁîb di ǂguib ge ǀhobas âb ǂnamipe hâ, ǁîn ge hoatsama ǂnauǃanhe hâ, gôab xan ge ǁnā hâ ǁnān, ûitsaman di ǃhūb ǃnâ ǃhuri-e ge māna.

²⁴ǁNāpab ge Elamma hâ ǁîb di ǂguib hoab ǀkha, ǀhobas âb ǂnamipe; ǁîn ge hoatsama ǂnauǃanhe hâ, gôab xan ge ǁnā hâ, ǁnā ǃgaohe taman, ǁnān, hoan xa ǃgam ǃkhaidi ǃhūb didi ǃnâ ge ǁgôan, ǃhurib âna ûitsaman di ǃhūb ǃnâ ge māna, on ge nēsi taob âna ra tani ǁnān, āb ǃnâ ge ǁgôan ǀkha.

²⁵ǂNauǃanhesan ǁaegun ge ǁîba ǁgoeǃkhai-e ge dība, ǂguib âb hoab ǃnâ, ǁîb ǂnamipe di ge ǀhobadi âba hâ, ǁîn hoan ge ǃgaohe tama hâ tsî gôab xa ǂnauǃanhe hâ, ǁîn di ǃhurib ge ûitsaman di ǃhūb ǃnâ māhe hâ i xui-ao, on ge nēsi taob ana ra tani ǁnān, āb ǃnâ ge ǁgôan ǀkha, ǁîb ge ǂnauǃanhesan di ǁaegub ǃnâ ge ǂgaeǂguiǂgâhe.

²⁶ǁNāpa kha ge Mesexi tsî Tubali tsîkha hâ ǁîkha di ǂguib hoab ǀkha; ǁîkha ǂnamipe di ge ǀhobadi âkha hâ; ǁîn hoan ge ǃgaohe tama hâ tsî gôab xa ǂnauǃanhe hâ, ǁîn di ǃhuriban ge ûitsaman di ǃhūb ǃnâ mā amaga.

²⁷Xawen ge ǁnā ǁē-aogu, ǃgaohe tamagu ǃnâ ge ǁnāgu ǀkha ǁgoe tama hâ, ǀamoǀaeb ǃoa ge ǁgôagu toroǀāxūn âgu ǀkha tsî gôagu âga danadi âgu ǃnaga ge ǁguihegu, tsî ǂhanuoǃnâsib âgu ǂkhōgu âgu ai hâgu, ǁē-aogu di ǃhurib ge ûitsaman di ǃhūb ǃnâ hâ i amaga.

²⁸Sakho on ge nîra khôaǂkhūǂkhūhe ǃgaohe tama hân ǁaegu, tsî kho ge ǂnauǃanhesan gôabi ǂnauǃanhe hân ǀkha nîra ǁgoe.

²⁹ǁNāpa gu ge Edommi di gao-aogu tsî ǁîb di gaosagu hoaga hâ ǁîgu di ǀgaib ǀkha, ǂnauǃanhesan gôab xa ǂnauǃanhe hân tawa ge ǂgaeǂguihegu; ǁîgu ge ǃgaohe taman ǀkha ǁgoe tsî ǁnān, āb ǃnâ ge ǁgôan ǀkha.

³⁰ǁNāpa gu ge ǃgari-aogu ǀapas diga hâ; ǁîgu hoagu tsî Sidonǁîgu hoagu ǂnauǃanhesan ǀkha ge ǁgôagu, tao hâǃâ, ǁîgu di ǃhurib xa, ǁîgu di ǀgaiba xu ge ǀkhība, tsî gu ge ǃgaohe tama hâse gôab xa ǂnauǃanhe hân tawa ǁgoe tsî taob âga ra tani ǁnān, āb ǃnâ ge ǁgôan ǀkha.

³¹ǁÎgab ge Faraoba nîra mû, tsî nîra ǁkhaeǂgaosen ǁîb di ǂguib hoab ǀkha, gôab xa ǂnauǃanhe hân ge Farao tsî ǁîb di ǂnubis hoas tsîna, tib ra ǃKhūb ǃKhūba mî.

³²Tita on ge ti ǃhuriba ge mā xui-ao ûitsaman di ǃhūb ǃnâ, ǁnāxab ge ǁîba nîra ǂgaeǂguisīhe ǃgaohe taman di ǁaegub ǃnâ, gôab xa ǂnauǃanhe hân tawa, Faraob tsî ǁîb di ǂnubis hoasa, tib ra ǃKhūb ǃKhūba mî.