Read Khoekhoegowab Esegieli 33 Bible Online

Esegieli 33 - Khoekhoegowab bible

Esegieli 33

¹Tsîs ge mîs ǃKhūb disa hāba te tsî ge mî:

²Khoenôa ǀgôatse, ǃhoa ǁaes âts di ôan ǃoa, îts ǁîna mîba: Tita ga gôaba mâ ǃhū-i hoa-i ǂama ūhā, tsî ǁaes ǁnā ǃhūb dis ga khoeb ǁîn di ǀkhâuǀamdi diba ū, tsîn ga ǁîba ǃûiba-aose mâibasen,

³tsîb ga gôab ǃhūb ǂama ǃgoaxa ǃkhaisa mû, tsîb ga ǀgapadasa xâi tsîb ga ǁaesa ǁnamao,

⁴tsî ǁnāb, ǀgapadas di ǀōba ga ǁnâub tsî ǁnâuhōb xawe ga ǁnamakaisen ǂgao tama ib, gôab ga hā tsî ǁîba ūbēo, ob ge ǀaob âba ǁîb di danas ai nîra hâ.

⁵ǁÎb ge ǀōb ǀgapadas diba ge ǁnâu, xaweb ge ǁnamakaisen ǂgao tama ge i, ob ge ǀaob âba ǁîb ai nîra hâ; xawe ǁnāb, hîa ra ǁnamakaisenni, ǁîb ge ǀoms âba ra sâu.

⁶Tsî ǃûi-aob ga gôab ǃgoaxa ǃkhaisa mû tsîb ga ǀgapadasa xâi tama i, ǁaes, ǁnamahe tamas kōse, tsîb ga gôaba hā tsî ǀom-e ǁîna xu ūbēo, ǁîb ge ǂhanuoǃnâsib âb ǃnâ ge ūbēhe, xawe ǀaob âba ta ge tita ǃûi-aob di ǃomǁaeba xu nîra ǂgao.

⁷Tsî sats, khoenôa ǀgôatse, tita ge satsa ǃûi-aose ge mâi Israeli ommi din ǂama, ots ge satsa mîsa ti amsa xu ǁnâu tsî nî ǁîna ti ǃaroma ǁnama.

⁸Tita ga eloxoresab ǃoa: Eloxoresatse, amasets ge satsa nîra ǁō, ti mî, tsî sats ga ǃhoa tama io, eloxoresabats nî daob âba xu ǃhoadanse, ob ge ǁnā eloxoresaba ǂhanuoǃnâsib âb ǃnâ nîra ǁō, xawe ǀaob âba ta ge tita sa ǃomǁaeba xu nîra ǂgao.

⁹Tsî eloxoresabats ga satsa daob âba xu ǁnamao, îb ǁîba xu ǃhobasen ti, tsîb ga daob âba xu ǃhobasen tama io, ob ge ǁîba ǂhanuoǃnâsib âb ǃnâ nîra ǁō, xawe sats ge ǀoms âtsa ge ore.

¹⁰ǁNā-amaga khoenôa ǀgôatse, mîba re Israeli ommi dina: Sadu ge nēti ra ǃhoa tsî: Sida di ǃûǂamdi tsî sida di ǁoren tsîn, sida ai ǁgoe tsî ǁîn ǃnâ da ra ǀhūǁō hîa: Mati da kha ǁnâi nî ûi? ti ra mî.

¹¹ǁÎna mîba re: Tita a ûitsama ǃkhais ao, tib ra ǃKhūb ǃKhūba mî, tita ge tura-i xare-e ūhâ tama hâ ǁōb eloxoresab dib ǃnâ, tsî ta ge tita eloxoresab nî daob âba xu ǃhobasen tsî ûi ǃkhais ǃnâ turaba ūhâ. ǃHobasen du re, ǃhobasen du re sadu di ǂkhaba daoga xu, tare xū-i ǃaroma du kha ǁnâi nî ǁō, sadu Israeli ommi dido?

¹²Tsî sats khoenôa ǀgôatse, mîba re sa ǁaes di ôana: ǂHanu-aisib ǂhanu-aib dib ge ǁîba ore tide ǃûǂams di tsēs ai, tsî eloxoresasib eloxoresab dib xasa, ǁîb ge ǁîb ǃaroma ǁnā tide, eloxoresasib âba xub ga ǃhobasen tsēs ai; tsî ǂhanu-aib ge ǂhanu-aisib âba xu ûi ǁkhā tide, ǁîb ga ǁore tsēs ai.

¹³Tita ga ǂhanu-aib ǃoa, ǁîb nî amase ûi, ti mîo, tsî ǁîb ga ǂhanu-aisib âb ai ǂgomaiǂnûi tsî ǂkhababa dīo, on ge ǁîb di ǂhanu-aisin hoana ǂâihe tide, ob ge ǁnā ǂkhabab, ǁîb ra dīb ǃnâ nîra ǁō.

¹⁴Tsî tita ga eloxoresab ǃoa: Sats ge amase nîra ǁō, ti mîo, tsî ǁîb ga ǁoreb âba xu ǃhobaseno tsî ǂhanub tsî ǂhanu-aisib tsîkha dīo,

¹⁵eloxoresab ga ǁauǁauba mādawao, ǁkhâuǁnâhe hâbab ga matareo, ǂnûiǂgādi ûib didi ǃnâb ga taniseno ǂkhaba-i xare-eb dī tamas kōse, ob ge ǁîba amase nîra ûi, ǁîb ge ǁō tide.

¹⁶ǁÎb di ǁoren, hîab ge ǁoren hoanab ge ǂâibahe tide; ǁîb ge ǂhanub tsî ǂhanu-aisib tsîkha ge dī, ob ge ǁîba amase nîra ûi.

¹⁷Xawen ge sa ǁaes di ôana: Daob ǃKhūb dib ge ǂhanu tama hâ ti ra mî, ǁîn di daob ǂûb ǂhanu tama hîa.

¹⁸ǂHanu-aib ga ǂhanu-aisib âba xu oa tsî ǂkhababa dīo, ob ge ǁîb ǃnâ nîra ǁō.

¹⁹Tsî eloxoresab ga eloxoresasib âba xu ǃhobasen tsî ǂhanub tsî ǂhanu-aisiba dīo, ob ge ǁîkha ǃnâ nîra ûi.

²⁰Xawe du ge: Daob ǃKhūb dib ge ǂhanu tama hâ, ti ra mî; o ta ge tita sado, mâb hoab âdo, daob âb ī xase nîra ǀgoraǃgâ, sadu Israeli ommi dido.

²¹Tsî i ge disiǀgamǀaǁî kurib, ǃkhōsase ūǃgûhes âda dib ǃnâ, disiǁî ǁkhâb ǃnâ, koroǁî tsēs ǁkhâb dis ai ge ī, ǀguib Jerusalemsa xu ge ûib ge ti tawa hā tsî: ǃĀs go ǂnauhe, ti mî ǃkhaisa.

²²Tsî ǃommi ǃKhūb dib ge ǃuia ti ai go hâ i, ǁnā ûi geb di hās aiǃâ, tsîb ge ti amsa ge khowaba te, ǁîb ge ǃnauǁgoaga ti tawa hās kōse. Nētis ge ti amsa ge khowahe, tsî ta ge ǃaruǀî ǃgome tama ge i.

²³ǃNubais ge mîs ǃKhūb disa hāba te tsî ge mî:

²⁴Khoenôa ǀgôatse, ǁansaben ǁnā ǃū-aisa ǃkhaidi Israeli ǃhūb didi din ge ǃhoa tsî ra mî: Abrahammi ge ǀguri ao ge i tsîb ge ǃhūba ǀumise ge ūhâ i, xawe sida ge a ǂgui, o da ge sida ǀumixūse māhe hâ.

²⁵ǁNā-amaga mî ǁîn ǃoa: Nētib ra ǃKhūb ǃKhūba mî: Sadu ge ǁgan-e ǀaob ǀkha ra ǂû, tsî du ge sadu di ǁgôa-eloguǀî ra kōkhâi tsî ra ǀaoǂnâxū; ǃhūba kha ǀumise du nî ūhâ bi xare?

²⁶Sadu ge gôab âdu ai ra ǃgâsen, sadu ge ǁgaiǁgaisana ra dī, tsî du ge nēba naub di tarasa ra ǀuriǀuri; ǃhūba kha ǀumise du nî ūhâ xare?

²⁷Nētits ge satsa ǁîna nî mîba: ǃKhūb ǃKhūb ra nēti mî: Tita a ûitsama ǃkhais aon ge ǁnān, ǃū-aisa ǃkhaidi ǃnâ hâna gôab xa nîra ǁnā, tsî ǁnā-i, ǃaub di ǂgās ai hâ-e ta ge tita ǀguruna nîra māǁnâ, ǁîn nî ǁî-e ōga, tsî ǁnān, ǁaposa ǃkhaidi ǃnâ tsî ǁhāgu ǃnâ hân ge ǂhīǁōb xa nîra ǁō.

²⁸Tita ge ǃhūba ǃū-aisa ǃkhaise tsî ǃhurise nîra ǂnûi, tsî ǃgurib ǀgaib âb dib ge nîra toa, tsî ǃhomgu Israeli digu ge nîra ǃū-aisa, khoe-i xare-i ǁîga ī-ai tides kōse.

²⁹On ge ǁîna nîra ǂan tita a ǃKhū ǃkhaisa, tita ga ǃhūba ǃū-aisa ǃkhaise tsî ǃhurise ǂnûi ǃnubai, ǁnā ǁgaidīn, ǁîn ge dīn hoan ǃaroma.

³⁰Tsî sats khoenôa ǀgôatse, ǀgôan sa ǁaes din ge hugaǀgui ǂnubiǂgoagu tawa tsî omgu di dao-amdi ǃnâ ra ǃhoa; nēb ge naub ǀkha ra ǃhoa, mâb hoab ǁîb di ǃgâsab ǀkha mî ra ǃâ: Hā î da ǁnâu, mâs a mî ǃKhūba xu ra ǀkhīsa ǃkhaisa.

³¹Tsîn ra hā sa tawa, ǁaes ra hā xase, tsîn ge sa ais aiǃâ ra ǂnû ti ǁaes khami, tsîn ra sa mîde ǁnâu, xawen ge ǁîde dī tama hâ, ams ân ǀkhan ra ǁâ, xawe ǂgaob ân ra ǁîn di xūǃgunuxasiba ǃgûǃgon xui-ao.

³²Tsî mû, sats ge ǁîna ǁâsab di ǁnaetsanas axase ība, ǀguib ǃgâidommi tsî ǃgâise ra ǀkhōb axase; ǁnā-amagan mîdi âtsan ra ǁnâu xawe ǁîde dī tama.

³³Xawe ǁnā ǃkhais ga hāo, tsî mû, ǁîs ge nîra hā, on ge ǁîna nîra ǂan, kēbo-aob ge ǁîn ǁaegu hâ i ǃkhaisa.