Read Khoekhoegowab Esegieli 34 Bible Online

Esegieli 34 - Khoekhoegowab bible

Esegieli 34

¹Tsî mîs ǃKhūb dis ge hāba te tsî ge mî:

²Khoenôa ǀgôatse, kēboba ǃûi-aogu Israeli diga; kēbo îts ǁîga mîba ǃûi-aoga: Nētib ra ǃKhūb ǃKhūba mî: Tsūba gu ǁnā ǃûi-aogu Israeli digu, ǁî-aitsama ra ǃûisenga; ǃûi-aoga kha gūna gu ǃûi tide?

³Sago ge kausa-e ra ǂû, tsî go ge ǀûba ra ana, sago ge kausana ra ǂā, xawe gūna go ge ǃûsi tama hâ.

⁴ǂKhabusa-e go ge ǀgaiǀgai tama hâ, tsî ǀaesen hâ-e go ge ǂgauǂgau tama hâ, tsî khôa hâ-e go ge ǀgoe tama hâ, tsî doeǁgabēhe hâ-e go ge ǁkhawa ūhā tama hâ, tsî kā hâ-e go ge ôa tama hâ, tsî go ge ǁîna ǁkhōsib tsî karosasib tsîkha ǀkha ra gaoǂam.

⁵Nētin ge ǀgaruǀgaruhe hâ; ǃûi-ao-i xare-i a ǀkhai xui-ao, tsîn ge ǀgurun ǃaub din hoana ge ǂû kaiba, ǁîn ǀgaru hâ xui-ao.

⁶Ti gūn ge mâ ǃhomgu hoagu ai tsî mâ ǃnoms hoas ai ra ǁhapuma, ā, ti gūn ge ǃhūbaib hoaragab ai ǀgaruǀgaruhe hâ, tsî khoe-i ǁîna ra dîǃgâ-i tsî khoe-i, ǁîna ra ôa-i xare-i ge a ǀkhai.

⁷ǁNā-amaga, sago ǃûi-aogo, ǁnâu go re ǃKhūb di mîsa.

⁸Tita a ûitsama ǃkhais ao, tib ra ǃKhūb ǃKhūba mî, tita ge ǁîsa nîra dī, ti gūn ge ǁkhâuǁnâxū kai amaga, tsî ti gūn ge ǀgurun ǃaub din hoan di ǂû kai amaga, ǃûi-ao-i xare-i a ǀkhai, tsî ti ǃûi-aogu gūna dîǃgâ tama hâ xui-ao, tsî ǃûi-aogu ge ǁî-aitsama ra ǃûisen tsî ti gūna gu ge ǃûsi tama hâ.

⁹ǁNā-amaga sago ǃûi-aogo, ǁnâu go re ǃKhūb di mîsa.

¹⁰Nētib ra ǃKhūb ǃKhūba mî: Mû, tita ge ǃûi-aoga nîra hāǂam tsî ti gūna ǁîgu ǃomǁaeba xu nîra ǂgao, tsî ta ge ǁîga gūna ǃûisa nîra ǀû kai, ǃûi-aogu ǃaruǀî ǁî-aitsama ǃûisen tidega, tsî tita ge ti gūna ǁîgu di ǃomǃnâba xu nîra xuruǂui, ǃaruǀîn ǁîga ǂûse ība tidega.

¹¹Nētib ra ǃKhūb ǃKhūba mî xui-ao: Mû, tita, ā, tita ge ti gūna nîra dîǃgâ tsî ǁîna nîra ôa.

¹²ǃÛi-aob ra gūn âba ôa khami, ǀgaruǀgaruhe hâ gūn âb ǃnâb hâ tsēs ai, ǁnās ǁkhās khami ta ge tita ti gūna nîra ôa; tsî tita ge ǁîna nîra ore, ǁîn ge ǀgaruǀgaruhe hâ i ǃkhaidi hoade xu ǀnanus tsî ǃkhaenab tsîra di tsēs ai.

¹³Tsî tita ge ǁîna ǁaede xu nîra ǂgaeǂguiǂui, tsî ǁîna nîra ǀhaoǀhao ǃhūga xu tsî ǁîna ǁîn di ǃhūb ǃnâ nî ūsī. Tsî tita ge ǁîna ǃhomgu Israeli digu ai tsî ǃāgu amǃgâ tsî ǁanǃnâhe ǁkhā ǃkhaidi ǃhūb didi hoadi tawa nî ǃûi.

¹⁴ǃGâi ǃû-ais ai ta ge tita ǁîna nîra ǃûsi, tsî ǀgapi ǃhomgu Israeli digu ais ge ǁîn di ǃharasa nîra hâ. ǁNāpan ge ǃgâi ǃhara-i ǃnâ nî ǁgoe, tsîn ge kausa ǃû-ai-i ai nîra ǃû ǃhomgu Israeli digu ai.

¹⁵Tita ge aitsama ti gūna nîra ǃûsi, tsî tita ge ǁîna nîra ǁgoe kai, tib ra ǃKhūb ǃKhūba mî.

¹⁶Kā hâ-e ta ge tita nîra ôa, tsî doeǁgabēhe hâ-e ta ge tita ǁkhawa nîra ūhā, tsî khôa hâ-e ta ge tita nîra ǀgoe, tsî ǀaesen hâ-e ta ge tita nîra ǀgaiǀgai, xawe kausa tsî ǀgaisa-e ta ge tita nîra hîkākā. Tita ge ǁîna ǀgoraǃgâs ǀkha nîra ǃûsi.

¹⁷Tsî sadu, ti gūdo, ǃKhūb ǃKhūb ra nēti mî: Mû, tita ge nîra ǀgora ǀgoa-i tsî ǀgoa-i ǁaegu, bairagu tsî pirigu ǁaegu.

¹⁸ǂKhari ǃkhairose du kha ǁnâi nēsa ūhâ, ǃgâi ǃû-aisa du ra ǃûǁnâsa? ǃGau hâ-i sadu ǃû-ais di-i tsîna du kha sadu di ǂaidi ǀkha nî dāǂkhū? Tsî ǃanu ǁgamma du kha nî ā; tsî ǃgau hâba sadu di ǂaidi ǀkha ǂgomaǂgoma?

¹⁹Ti gūna kha nî ǃû, sadu xa ǂaidi âdu ǀkha dāǂkhūǂkhūhe hâna, tsî ān nî, ǂaidi âdu ǀkha du ǂgomaǂgoma hâna?

²⁰ǁNā-amagab ra ǃKhūb ǃKhūba nēti ǁîna ǃoa mî: Mû, tita, ā, tita ge nî ǀgora kausa ǀgoan tsî ǃgarasa ǀgoan ǁaegu.

²¹Sadu ǂkhabusan hoana ǃnammi tsî ǃhōb tsîkha ǀkha ra ǁgâiǁkhae tsî sadu di ǁnâgu ǀkha ra ǃkhā amaga, ǃaugab kōse du ǁîna nî ǀgaruǀgarus kōse,

²²ǁnā-amaga ta ge tita ti gūna nîra ore, ǃaruǀîn ǁkhâuǁnâxū kai tidega, tsî tita ge nîra ǀgora ǀgoan tsî ǀgoan ǁaegu.

²³Tsî tita ge ǀgui ǃûi-aob ǀguiba ǁîna nîra ǂkhaiǂkhaiba, tsî ǁîb ge ǁîna nîra ǃûi, ti ǃgāb Daviba, ǁnāb ge ǁîna nîra ǃûsi tsî ǁnāb ge ǁîna ǃûi-aose nî ība.

²⁴Tsî tita ǃKhūta ge ǁîna Elose nîra ība tsî ti ǃgāb Davib ge ǁîn ǁaegu gaosase nîra ī; tita ǃKhūta ge ǁî ǃkhaisa ge ǃhoa.

²⁵Tsî tita ge ǃgaeǀhaos ǂkhîb disa ǁîn ǀkha nîra dī tsî ǁaixa ǀguruna ǃhūb âna xu nîra toa kai, tsîn ge sâusase nîra ǁan ǃgaroǃhūb ǃnâ tsî nîra ǁom ǁoedi ǃnâ.

²⁶Tita ge ǁîn tsî ti ǃnoms ǂnamipe hâ ǃkhaidi tsîna ǀkhaese nîra ǂnûi, tsî tita ge tūǀnanuba ǁaeb âb ai nîra ǀapi kai, tūǀnanub ǀkhaeb dib ge nîra hâ.

²⁷Tsî hain ǃaub din ge ǂûn âna nîra mā, tsî ǃhūb ge ūǀkhīn âba nîra mā, tsîn ge ǁîn di ǃhūb ǃnâ sâusase nîra hâ tsî nîra ǂan, tita a ǃKhū ǃkhaisa, haigu ǁîn di ǃnaob diga ta ga tita khôao, tsî ǁnān, ǁîna ge ǃoaba kain di ǃomǁaeba xu ǁîna xuruǂui ǃnubai.

²⁸Tsîn ge ǃaruǀî ǁaede ǁkhâuǁnâse ība tide, tsî ǀgurun ǃhūbaib din ge ǁîna ǃaruǀî hapu tide, xawen ge sâusase nîra ǁan, tsî khoe-i, ǁîna nî ǃhuriǃhuri-i xare-i ge nîra ǀkhai.

²⁹Tsî tita ge ǁîna ǂûǂûxa ǃû-aiba nîra ǂkhaiǂkhaiba, tsîn ge ǃaruǀî tsuwubēhe tide ǃâtsūǀkhāb xa ǃhūb ǃnâ, tsî ǃharaxūb ǁaedi diba ǃaruǀî tani tide.

³⁰Tsîn ge nîra ǂan, tita ǃKhūta, ǁîn di Elota, ǁîn ǀkha hâ tsî ǁîn a ti ǁae Israeli di om ǃkhaisa, tib ra ǃKhūb ǃKhūba mî.

³¹Sadu ti gūdo, ti ǃû-ais di gūdo, sadu ge a khoe, xawe tita ge a sadu di Elo, tib ra ǃKhūb ǃKhūba mî.