Read Khoekhoegowab Esegieli 35 Bible Online

Esegieli 35 - Khoekhoegowab bible

Esegieli 35

¹ǃAruǀîs ge mîs ǃKhūb disa hāba te tsî ge mî:

²Khoenôa ǀgôatse, sa aisa ǂnûi ǃhommi Seiri ǃoa-ai îts ǁîb ǃoagu kēbo

³îts ǁîba mîǀî: Nētib ra ǃKhūb ǃKhūba mî: Tita ge nîra hāǂam tsi, sats Seir ǃhomtse, tsî tita ge ǃommi âtaba saǀî nîra ǀhōǂui tsî ǃū-aisa ǃkhaise tsî ǃhurise nîra ǂnûi tsi.

⁴Tita ge ǃādi âtsa ǀguri hâs ase nîra ǂnûi, tsîts ge satsa nîra ǃū-aisa, tsîts ge nîra ǂan tita a ǃKhū ǃkhaisa.

⁵ǀAmo khākhoesi-ets ge satsa ūhâ tsî Israeli ôanats ge gôab di ǀgaib ǀkha dâubē kai amaga, ǁîn tsūǃōb di ǁaeb ai, ǃnā hâ ǂhanuoǃnâsib ân di ǁaeb ai,

⁶ǁnā-amaga, tita a ûitsama ǃkhais ao, tib ra ǃKhūb ǃKhūba mî, tita ge satsa ǀaoba nîra ǁāǁāba, ob ge ǀaoba satsa nîra ǃgôaǃgon; ǀaobats ǁkhan tama amagab ge ǀaoba sats ona nîra ǃgôaǃgon.

⁷Tsî tita ge ǃhommi Seira ǃnā hâ ǃū-aisise nîra ǂnûi, tsî tita ge ǁîba xu nîra ǃhomǂui ǁnāb, ǁîba ra ǃgûǃganub, tsî ǁnāb, oa rab tsîkha.

⁸Tsî tita ge ǃhomgu âba ǁîb di ǂnauǃanhesan ǀkha nîra ǀoaǀoa, sa ǃnomdi tsî sa ǃgoaǃnāgu tsî sa ǃāgu hoaga, ǁîgu ǃnân ge gôab xa ǂnauǃanhe hâna nîra ǁgoe.

⁹ǀAmo hîǀhuruxūse ta ge tita satsa nîra ǂnûi, tsî ǃādi âts ge ǁanǃnâhe tide; nētits ge satsa nîra ǂan tita a ǃKhū ǃkhaisa.

¹⁰Sats ra mî amaga ǁnā ǀgam ǁaera tsî ǁnā ǀgam ǃhūkha tsîn ge nîra ti, tsî sida ge ǁîna ǀumise nîra ūhâ, ǃKhūb ga ǁnāpa hâ xawe,

¹¹ǁnā-amaga, tita a ûitsama ǃkhais ao, tib ra ǃKhūb ǃKhūba mî, tita on ge sa ǁaib ǃoa tsî sa surib, sa ǁkhanni ǃnâts ge ǁîna sîsenūb ǃoa nîra dī; tsî tita ge ǁîn tawa nîra ǂansa, satsa ta ga ǀgoraǃgâ ǃnubai.

¹²Tsî sadu ge nîra ǂan, tita ǃKhūta ge sa ǃkhāǃkhādi, Israeli di ǃhomgats ge ǃhoa-ūdi hoade ǁnâu ǃkhaisa, mî raǃâ: ǁÎn ge hîǀhuruhe hâ, ǁîn ge ǂûse sida māhe hâ.

¹³Nētits ge satsa ams âts ǀkha tita ǃoagu ge kaikaisen tsî sa mîde ti ǃoagu ge ǂguiǂgui, tita ge ǁîsa ge ǁnâu.

¹⁴Nētib ra ǃKhūb ǃKhūba mî: ǃHūb hoab ǃgâiaǂgao hâs ǁkhās xase ta ge tita satsa nîra hîǀhuru.

¹⁵Sats ge ǀumis Israeli ommi din dis ǂama hîǀhuruhes hâ ǃkhais xa ǃgâiaǂgao hâ is ǁkhās xase ta ge tita satsa nîra dī-ū: Seirǃhommi, Edommi hoab ge hoaragase nîra ǃū-aisa kai, tsîn ge nîra ǂan tita a ǃKhū ǃkhaisa.