Read Khoekhoegowab Esegieli 36 Bible Online

Esegieli 36 - Khoekhoegowab bible

Esegieli 36

¹Tsî sats khoenôa ǀgôatse, kēboba Israeli di ǃhomga îts mî: Sago Israeli ǃhomgo, ǁnâu go re ǃKhūb di mîsa.

²Nētib ra ǃKhūb ǃKhūba mî: Khākhoeb ra sago xa: Haha, ǀamo ǀgapigu ǂûgu kom go sida di ǀumi kaio, ti mî amaga,

³ǁnā-amaga kēbo îts mî: Nētib ra ǃKhūb ǃKhūba mî: Mâ ǃnammi hoaba xu go hîǀhuruhe tsî hapuhe hâ amaga, ǃgauron ǁaedi dina go nî ǀumi kaibase, tsî sago ge ǀhoexa amǁgaub ai ūhe tsî ǁaes di ǃhoaxū kai go ge amaga,

⁴ǁnā-amaga sago, Israeli di ǃhomgo, ǁnâu go re mîs ǃKhūb ǃKhūb disa: Nētib ra ǃKhūb ǃKhūba mî ǃhomgu ǃoa tsî ǃnomdi ǃoa, ǃāgu ǃoa tsî ǃgoaǃnāgu ǃoa, hîǀhuruhe hâ ǃū-aisa ǃādi ǃoa tsî ǁnāxūhe hâ ǃādi, ǁnā ǁaedi ǁîdi ǂnamipe hân di ǁkhâuǁnâxū tsî ǃhōxū kai gedi ǃoa:

⁵ǁNā-amaga nētib ra ǃKhūb ǃKhūba mî: Amase ta ge tita ǃgauron ǁaedi din ǃoagu tsî Edommi hoab din ǃoagu ge ǃhoa ǀaes ti ǁgôasib dis ǃnâ, ǁnān, ti ǃhūba ǀumise ǁî-aitsama ge māsenn, ǃgâiaǂgaob ǂgaob hoab dib ǀkha, turaxa ǃūs ǀkha, ǃhanagu âb nî ǁkhâuǁnâxūse īga.

⁶ǁNā-amaga kēbo Israeli di ǃhūb xa, îts mî ǃhomgu ǃoa tsî ǃnomdi ǃoa, ǃāgu ǃoa tsî ǃgoaǃnāgu ǃoa: Nētib ra ǃKhūb ǃKhūba mî: Mû, tita ge ti ôasasib ǃnâ tsî ti ǁgôasib ǃnâ ge ǃhoa, ǃharaxūb ǁaedi diba du tani hâ amaga;

⁷ǁnā-amaga, nētib ra ǃKhūb ǃKhūba mî: Tita ge ti ǃomma ge ūkhâi, amase di ge ǁnā ǁaedi, sadu ǂnamipe hâde ǁîdi taob ǂûba nîra tani.

⁸Xawe sago, Israeli di ǃhomgo ge ǁkhawa ǀgam ǂgonakha âgo nîra mā, tsî go ge sago di ǂûba ti ǁaes Israelsa ǁkhawa nîra taniba, ǁîn ra hāǀgū xui-ao.

⁹Tsî mû, tita ge sago ǀkha hâ, tsî tita ge sago nîra kōǀî, tsî go ge nîra sîsenhe tsî nîra tsorohe,

¹⁰tsî tita ge sago ai khoena nîra ǂguiǂgui Israeli ommi hoab din, ā, ǁnāb hoab din; tsî ǃādi ge nîra ǁanǃnâhe, tsî ǃū-aisa ǃkhaidi ge nîra ǂnubihe.

¹¹Ā, tita ge sago ai khoen tsî ǀgoan tsîna nîra ǂguiǂgui, tsîn ge nîra ǂgui tsî nîra ǂûtanixa. Tsî tita ge sago nîra ǁanǃnâ kai aibekam ǁaegu âgo khami, ā, sago di tsoatsoade ǃnā hâse ta ge ǃgâise nîra dī, o go ge nîra ǂan tita a ǃKhū ǃkhaisa.

¹²Tsî tita ge khoena sago ai nîra ǃgû kai, ti ǁaes Israelse. ǁÎn ge sago ǀumise nîra ūhâ, tsî sago ge ǁîn di ǀumise nîra i, tsî sago ge ǁîna ǃaruǀî ǁkhâuǁnâ tide.

¹³Nētib ra ǃKhūb ǃKhūba mî: ǁÎn ra sa ǃoa: Sats ge ǃhūts, khoena ra haputsa, tsî sats ge ǃhūts, sa khoena ra ǁkhâuǁnâtsa, ti mî amaga,

¹⁴ǁnā-amagats ge ǃaruǀî khoena hapu tsî sa khoena ǃaruǀî ǃnôa kai tide, tib ra ǃKhūb ǃKhūba mî.

¹⁵Tsî tita ge ǃaruǀî ǃharaxūb ǁaedi diba sa ǂama ǁkhawa ǁnâu tide, tsîts ge ǃhōb ǃhaodi diba ǃaruǀî tani tide, tsîts ge ǁaedi âtsa ǃaruǀî ǃnôa kai tide, tib ra ǃKhūb ǃKhūba mî.

¹⁶ǃAruǀîs ge mîs ǃKhūb disa hāba te tsî ge mî:

¹⁷Khoenôa ǀgôatse, Israeli ommi din ge ǁîn di ǃhūb ǃnân ǁan hâ hîa, ǁîba gere ǀuriǀuri ǁîn di daob ǀkha tsî ǁîn di dīgu ǀkha; ǁîn di daob ge ti ais aiǃâ ǁkhaebēhe hâ taras di ǀurisasib khami ge ī i.

¹⁸ǁNā-amaga ta ge ǁgôasib âtaba ǁîn ǂama ge ǁhōǂui ǁnā ǀaob, ǁîn di ǃhūb ǃnân gere ǂnâxūb ǃaroma tsî ǁîn di ǁgôa-elogu, ǁîgu ǀkhan ge ǁîba gere ǀuriǀurigu ǃaroma.

¹⁹Tsî tita ge ǁîna ǁaedi ǃnâ ge ǀgaruǀgaru, tsîn ge ǃhūgu ǃnâ ge sariǃāhe: Tita ge ǁîna ǁîn di daob ǃoa tsî ǁîn di dīgu ǃoa ge ǀgoraǃgâ.

²⁰Tsî ǁaedi ǃnân ge sīo, ǁîn ǃoan ge ǃgûo, on ge ti ǃanu ǀonsa ge ǀuriǀuri, khoen ge ǁîn xa: Nēn ge ǁaes ǃKhūb disa, tsîn ge ǁîn di ǃhūba xu ge ǃgûǂoa, ti mî amaga.

²¹Xawe tita ge ǁîna ti ǃanu ǀons ǃaroma ge sâu, Israeli ommi din ge ǁnā ǁaedi, ǁîn tawan ge sī di ǁaegu ǀuriǀurisa.

²²ǁNā-amaga mî Israeli ommi din ǃoa: Nētib ra ǃKhūb ǃKhūba mî: Tita ge ǁî ǃkhaisa sadu Israeli ommi di du ǃaroma dī tama i, tsî ti ǃanu ǀons, sadu ge ǁaedi, ǁîn tawa du ge sī di ǁaegu gere ǀuriǀuris ǃaroma ra dī.

²³Tita ti kai ǀonsa nîra khai xui-ao, ǁaedi ǃnâ ǀuriǀurihe hâsa, sadu ge ǁîn ǁaegu gere ǀuriǀurisa; o di ge ǁaede nîra ǂan tita a ǃKhū ǃkhaisa, tib ra ǃKhūb ǃKhūba mî, tita ga sadu tawa mûdi ân aiǃâ ǃanuǃanuhe ǃnubai.

²⁴Tita sado ǁaede xu nîra ūhā tsî ǃhūgu hoaga xu sado nîra ǀhaoǀhao xui-ao; tsî tita ge sado ǃhūb âdu ǃnâ nîra ūhā.

²⁵ǃNubai ta ge tita ǃanu ǁgam-e sadu ai nîra ǀgapi, o du ge nîra ǃanu; sadu di ǀurisasin hoana xu tsî sadu di ǁgôa-elogu hoaga xu ta ge tita sado nîra ǃanuǃanu.

²⁶Tsî tita ge sado ǀasa ǂgaoba nîra mā tsî ǀasa gagasa sadu di ǃnāb ǃnâ nîra mā; tsî tita ge ǀuiǂgaoba sadu di ǁgansa xu nîra ūbē tsî ǁganǂgaoba sado nîra mā.

²⁷Tsî tita ge ti Gagaba sadu ǃnāb ǃnâ nîra mā, tsî tita ge nî dī, ti ǂnûiǂgādi ǃnâ du nî tanisen tsî ti ǂhanuga du nî sâu tsî dī ǃkhaisa.

²⁸Tsî du ge nîra ǁan ǁnā ǃhūb, sadu di îga ta ge tita māb ǃnâ; tsî sadu ge tita ǁaese nîra ība, tsî tita ge sado Elose nîra ība.

²⁹Tsî tita ge sado sadu di ǀurisasin hoana xu nîra ore, tsî tita ge nîra ǂgai ǃhorob ǃoa tsî ǁîba nîra ǂguiǂgui, tsî tita ge ǃâtsūǀkhā-i xare-e sadu ai ǁgui tide.

³⁰Tsî tita ge ǂûn haidi din tsî ūǀkhīn ǃaub din tsîna nîra ǂguiǂgui, ǃharaxūb ǃâtsūǀkhāb diba du ǃaruǀî ǁaedi ǃnâ ǃkhōǃoa tidega.

³¹ǃNubai du ge sadu di ǂkhaba daogu tsî sadu di dīgu, ǃgâi tama ge igu xa nîra ǂâi, tsî du ge aitsama sadu xa nîra uixa sadu ǂhanuoǃnâsigu ǂama tsî sadu ǁgaidīn ǂama.

³²Tita ge ǁî ǃkhaisa sadu ǂama dī tama hâ, tib ra ǃKhūb ǃKhūba mî, ǁîsa ǂan, î du tao î du taob xa dāhe sadu di daogu ǂama, sadu Israeli ommi dido!

³³Nētib ra ǃKhūb ǃKhūba mî: Tita ga sado sadu ǂhanuoǃnâsiga xu ǃanuǃanu tsēs ai ta ge tita ǃāde nîra ǁanǃnâ kai, tsî di ge ǃū-aisa ǃkhaide nîra ǂnubihe.

³⁴Tsî hîǀhuruhe hâ ǃhūb ge nîra ǂnubihe, ǃū-aisa ǃkhaiseb ge ī is di amǃnâs ai, ǁîba ge ǃgûǃnâǃganu-i hoa-i di mûra aiǃâ.

³⁵Tsîn ge nîra mî: Nē ǃhūb hîǀhuruhe ge hâ ib ge ǃhanab Edenni dib khami ge ī, tsî ǃū-aisa tsî hîǀhuruhe hâ tsî hîkākāhe hâse ǁgoe ǃādi ge ǁapo tsî ǁanǃnâhe hâ.

³⁶ǃNubai di ge ǁnā ǁaede, sa ǂnamipe ǁgoe ǃādi ǃnâ ǃgau hâna nîra ǂan, tita ǃKhūta hîkākāhe hâ ǃāde ǂnubikhâi tsî ra ǂgā ǃkhaisa. Tita ǃKhū ta ge ǁî ǃkhaisa go ǃhoa tsî nîra dī.

³⁷Nētib ra ǃKhūb ǃKhūba mî: Nēs on ǃaroma ta ge tita Israeli ommi din xa nîra ǂgaoǀkhāhe, î ta ǁîna ǁî ǃkhaisa dība: Tita ge ǁîna khoena nîra ǂgui kaiba gūn axase.

³⁸Khaihesa gūn axase, Jerusalems di gūn axase, ǂnûihesa ǀgapi ǁaegu ân ai i xase, ǁnās ǁkhās xase di ge ǃū-aisa ǃāde khoen gūdi xa nîra ǀoa, tsîn ge nîra ǂan tita a ǃKhū ǃkhaisa.