Read Khoekhoegowab Esegieli 37 Bible Online

Esegieli 37 - Khoekhoegowab bible

Esegieli 37

¹ǃOmmi ǃKhūb dib, ti ai ge hâ ib, ge ǃKhūb Gagab ǃnâ ǂgaeǂguiǂui tsî ǃgoaǃnāb di ǁaegub ǃnâ ge ǂnûi te; tsî ǁîb ge ǂkhōgu xa ge ǀoa hâ i.

²Tsî ǁîb ge tita ǁîgu ǂnamipe ge ǃgû-īǀkhā kai, tsî mû ǁîgu ge kaise ǀoasa ge i ǃgoaǃnāb di ǂgās ai, tsî mû, ǁîgu ge kaise ǂnâsa ge i.

³Ob ge ǁîba tita ǃoa ge mî: Khoenôa ǀgôatse, nē ǂkhōga ûi gu nî xare? O ta ge tita: ǃKhūtse, ǃKhūtse, sats ge a ǂan, ti ge mî.

⁴ǃNubaib ge ǁîba tita ǃoa ge mî: Nē ǂkhōga kēboǂam îts ǁîgu ǃoa mî: Sa ǂnâsa ǂkhō go, ǁnâu go re ǃKhūb di mîsa!

⁵Nētib ra ǃKhūb ǃKhūba nē ǂkhōgu ǃoa mî: Mû, tita ge gagasa sago ǃnâ nîra ūhā, o go ge nîra ûi.

⁶Tsî tita ge ǁapaga sago ai nîra ǁgui tsî ǁgansa sago ai nîra hā kai, tsî khōba sago nîra ana; tsî gagasa sago nîra mā, o go ge nîra ûi, o go ge nîra ǂan tita a ǃKhū ǃkhaisa.

⁷ǃNubai ta ge tita ge kēbo, mîmāhe ta ge khami, o i ge ǀō-e ge hā, tita ra kēbo hîa, tsî mû, gon-i; o gu ge ǂkhōga ge ǀgūgu, mâ ǂkhōb hoaba ǁîb di ǂkhōb ǃoa.

⁸O ta ge ge kō tsî mû, ǁapagu ge ǁîgu ai ge hā, tsî ǁgan-i ge ge ǀkhī, tsî ǁîb ge ǁîga khōba ǀgapiseba xu ge ǂgaeǂgā, xawe gaga-i xare-i ge ǁîgu ǃnâ ge ǀkhai i.

⁹Ob ge ǁîba tita ǃoa ge mî: Gagas ǃoa kēbo îts gagasa mîǀî: Nētib ra ǃKhūb ǃKhūba mî: Sas gagase, hā haka ǂoade xu îs nē ǃgamhe hân ǃnâ ǃgomǂgā, ûin nîga.

¹⁰O ta ge tita ge kēbo, mîmāhe ta ge khami; ǃnubais ge gagasa ǁîgu ǃnâ ge hā, o gu ge ûi tsî ǁîgu di ǂaidi ai ge mâ, kaise kai ǂnubisa.

¹¹Ob ge ǁîba tita ǃoa ge mî: Khoenôa ǀgôatse, nē ǂkhōgu ge a Israeli ommi hoab di. Mû, ǁîn ra mî: Sida ǂkhōgu ge ǂnâ hâ, tsî sida ǃâubasens ge kā hâ; sida ge ǃgaoǁnâhe hâ.

¹²ǁNā-amaga kēbo îts ǁîna mîba: Nētib ra ǃKhūb ǃKhūba mî: Mû, tita ge sadu ǀhobade nîra ǁkhowa-am tsî ta ge sado ǀhobadi âdo xu nîra ǀkhī kai, sas ti ǁaese, tsî tita ge sado Israeli di ǃhūb ǃnâ nîra ūsī.

¹³O du ge nîra ǂan tita a ǃKhū ǃkhaisa, ǀhobadi âdo ǁkhowa-am tsî ta ga tita sado ǀhobadi âdo xu ǀkhī kai ǃnubai, sas ti ǁaese.

¹⁴Tsî tita ge ti Gagaba sadu ǃnâ nîra mā, o du ge nîra ûi, tsî tita ge sado ǃhūb âdu ǃnâ nîra ǂnûi. O du ge nîra ǂan, tita ǃKhūta a ǁnā, nēna ǃhoa tsî ge a dīta ǃkhaisa, tib ra ǃKhūba mî.

¹⁵ǃAruǀîs ge mîs ǃKhūb disa hāba te tsî ge mî:

¹⁶Sats khoenôa ǀgôatse, hai-e ū îts ǁî-i ai Judab di tsî Israeli ôan ǁîb di horesab di ti xoa, îts ǀkhara hai-e ū tsî ǁî-i ai Joseb di ti xoa, hais Efraimmi dis, tsî Israeli ommi hoab ǁîb di horesan disa.

¹⁷Îts ǁnâi ǁîna ǀgūgu kai nē-e nau-i tawa, ǀgui hais ǀguise, on ge sa ǃomǁae nîra ǀgui.

¹⁸Tsî ǀgôan sa ǁaes din ga satsa ǃhoa-ū tsî: ǂAnǂan dats kha tide nē xūn ǀkhats tare-e ra ǂâibasen ǃkhaisa? ti mîo,

¹⁹îts ǁnâi satsa ǁîna mîǀî: Nētib ra ǃKhūb ǃKhūba mî: Mû, tita ge hais Joseb dis, Efraimmi ǃomǁae ge hâ is, tsî Israeli ǃhaodi ǁîn di horesan disa nîra ū, tsî tita ge ǁîna Judab di haisa nîra dīǀāro, tsî ta ge ǁîde ǀgui hais ǀguise nîra dī, tsî di ge ti ǃomǁae nîra ǀgui.

²⁰Tsî ǁnā haidi, ǁîdets nî xoa-aidi ge sa ǃomǁae nîra hâ ǁîn di mûdi aiǃâ.

²¹Îts ǁnâi ǁîna mîǀî: Nētib ra ǃKhūb ǃKhūba mî: Mû, tita ge Israeli ôana nîra ūhā ǁnā ǁaedi, ǁîn ǁgan ge doen di ǁaeguba xu tsî mâ ǃnammi hoaba xu ǁîna nîra ǀhaoǀhao, tsî ǁîn di ǃhūb ǃnâ ǁîna nîra ūhā.

²²Tsî tita ge ǁîna ǀgui ǁaes ǀguise nîra dī ǃhūb ǃnâ Israeli di ǃhomgu ai, tsîn ge hoatsama ǀgui gao-aob ǀguiba gao-aose nîra ūhâ, tsîn ge ǃaruǀî ǀgam ǁaese hâ tide tsî ǃaruǀî ǀgam gaosise ǀgoraǃāsen tide.

²³Tsîn ge ǃaruǀî ǀuriǀurisen tide ǁîn di ǁgôa-elogu ǀkha tsî ǁîn di ǁgaiǁgaisan ǀkha tsî ǁîn di ǃûǂamdi hoadi ǀkha, tsî tita ge ǁîna ǁnā ǁanǃkhaidi ân, ǁîdi ǃnân ge ǁorede xu ore tsî ǁîna nîra ǃanuǃanu. Nētin ge ǁîna tita ǁaese nîra ība, tsî tita ge ǁîna Elose nîra ība.

²⁴Tsî ti ǃgāb Davib ge ǁîn ǂama gao-aose nîra ī, tsîn ge hoatsama ǀgui ǃûi-aob ǀguiba nîra ūhâ, tsîn ge ti ǂhanugu ǃnâ nîra ǃgû tsî ti ǂnûiǂgāde sâu tsî ǁîde nîra dī.

²⁵Tsîn ge ti ǃhūb, ti ǃgāb Jakoba ta ge māb, ǁîn îgu ge ǁanǃnâb ǃnâ nîra ǁan; ā, ǁîb ǃnân ge nîra ǁan, ǁîn tsî ǁîn ôan tsî ǁîn ôan di ôan tsîna ǀamosib kōse, tsî ti ǃgāb Davib ge ǁîn di gao-aose nîra ī ǀamosib kōse.

²⁶Tsî tita ge ǁîn ǀkha ǃgaeǀhaos ǂkhîb disa nîra dī, ǀamo ǃgaeǀhaoses ge ǁîsa ǁîn ǀkha nîra ī, tsî tita ge ǁîna nîra ǂnûiǂgā tsî ǁîna nî ǂguiǂgui, tsî tita ge ti ǃanusiba ǁîn ǁaegu nîra mâi ǀamosib kōse.

²⁷Tsî ti tabernakeli ge ǁîn ǀkha nîra hâ; tsî tita ge ǁîna Elose nîra ība, tsî ǁîn ge tita ǁaese nîra ība.

²⁸O di ge ǁaede nîra ǂan, tita a ǁnā ǃKhū Israela ra ǃanuǃanu ta ǃkhaisa, ti ǃanusiba ta ga ǁîn ǁaegu mâi ǃnubai ǀamosib kōse.