Read Khoekhoegowab Esegieli 38 Bible Online

Esegieli 38 - Khoekhoegowab bible

Esegieli 38

¹ǃAruǀîs ge mîs ǃKhūb disa hāba te tsî ge mî:

²Khoenôa ǀgôatse, ais âtsa unu Gogi, ǃhūb Magogi dib ǂamgaosab, Mesexi tsî Tubali tsîkha dib ǃoagu, îts ǁîb ǃoagu kēbo

³îts mî: Nētib ra ǃKhūb ǃKhūba mî: Mû, tita ge nîra hāǂam tsi, sats Gog, Mesexi tsî Tubali tsîkha di ǂamgaosatse.

⁴Tsî tita ge satsa nîra ūdawa tsî ǂhaodana sa ǃnanikha ǃnâ nîra ǂgā, tsî tita ge satsa nîra ǂgaeǂguiǂui sa ǂnubis hoas ǀkha, sa hāgu tsî sa ǃgapi-aogu, hoatsama ǀoa hâse anasen hâgu ǀkha, mâ kai ǀhûhâb, ǃgupu khōsikhōb tsî khōsikhōb tsîkha ūhâb, hoatsama gôaba ra sîsenūb ǀkha;

⁵Persiaǁîgu, Etiopiaǁîgu tsî Putiǁîgu tsîgu, ǁîgu ǀkha hoatsama khōsikhōb tsî toroǀgapas tsîra ūhâga,

⁶Gomeri tsî ǁîb di ǂnubidi hoadi, ommi Togarmab dib digu, ǀapas di ǀkhāgu ai hâgu tsî ǁîb di ǂnubidi hoadi, ǂgui ǁaede sa ǀkha.

⁷ǃKhōdīsen, î du ǂhomisen, sats tsî sa ǀhû hân, sa tawa ra ǀhûn hoan tsîdo, îts satsa ǃûi-aose ība.

⁸ǂGui tsēdi khaoǃgâts ge satsa nîra ôaǀkhāhe, ǀunis kurigu dis aits ge satsa ǁnā ǃhūb, gôaba xu ǁkhawa ge ūhāheb ǃnâ nîra sī, ǁnā gôab, ǂgui ǁaede xu Israeli di ǃhomgu hugaǀgui hîǀhuruxūse ge igu ai ǀhao hâba, ǁnā ǃhūb ga ǁaede xu a ǂgaeǂguiǂuihe tsî hoatsaman ga sâusase ǁano.

⁹ǃNubaits ge satsa nîra doeǃapa, hîǀhuru ra tūǀnanu-i axasets ge satsa nîra hā, ǀnanu-i ǃhūba ǃgū-ai hâ-i axasets ge satsa nîra ī, sats tsî sa ǂnubidi hoadi tsî ǂgui ǁaede sa ǀkha.

¹⁰Nētib ra ǃKhūb ǃKhūba mî: ǁNā tsēs ǁkhās ai i ge ǁkhāti nîra ī, ǀape-aidi ǂgaob âtsa xu nîra ǀkhī ǃkhaisa, tsîts nî ǂkhaba ǂâi-e ǂâi ǃkhaisa,

¹¹tsîts nî mî ǃkhaisa: Tita ge nî doeǃapa ǃhaidi ǃhūb ǃoa, tita ge ǁnān, sâsase hân, ǁnān, ǂkhîse ǁan hâna nî hāǂam; ǁîn ge hoatsama ǂnubiǂgoab ose ǁan hâ, ǂganamūxūdi kas, dao-amdi kas hoasa ūhâ tamana;

¹²ǃnaribasen tsîts nî ǁkhâuǁnâbasense; ǃommi âtsats nî unuse ǁnā ǃū-aisa ǃādi hîa nēsi ǁanǃnâhe hâdi ǃoagu, tsî ǁnā ǁaes, ǁaede xu ǀhaoǀhaohe hâs, ǀgoan tsî xūna ge hōbasens, ǃhūb di ǁaegub ǃnâ ǁan hâsa.

¹³Skebab tsî Dedanni tsî ǁama-aogu Tarsis digu tsî ǁîn di ǂkham xamgu tsîgu ge sa ǃoa nîra mî: Hāts ra satsa, xū-ets nî ǃnaribasense? ǀHaoǀhaots go ǂguib âtsa, ǁkhâuǁnâ-ets nî ǁkhâuǁnâbasense, ǀhaiǀurib tsî ǃhuniǀurib tsîkhats nî ūbēse, ǀgoan tsî xūn tsînats nî ūbēga, kai ǁkhâuǁnâ-ets nî ǁkhâuǁnâbasenga?

¹⁴ǁNā-amaga kēbo, sats khoenôa ǀgôatse, îts Goga mîba: Nētib ra ǃKhūb ǃKhūba mî: Satsa hōǃâts tide ǁî ǃkhaisa, ti ǁaes Israels ga sâusase ǁan tsēs ai?

¹⁵ǁNāǃnubaits ge satsa sa ǃkhaisa xu nîra hā, ǀapas di ǀkhāga xu, sats tsî ǂgui ǁaede sa ǀkha; ǁîn hoan ge hāgu ai nîra ǃgapi, ama kai ǂguib tsî khoexa ǂnubisa.

¹⁶Tsîs ge ti ǁaes Israels ǃoagu nîra doeǃapa ǀnanu-i axase, ǃhūbats nî ǃgū-aise. ǀUnis tsēdi dis ais ge ǁî ǀkhaisa nîra ī; ǃnubai ta ge tita satsa ti ǃhūb ǃoagu nîra ūhā, ǁaedi nî tita ǂanse, sats Gogts tawa ta ga tita ǁîn di mûdi aiǃâ khaihe ǃnubai.

¹⁷Nētib ra ǃKhūb ǃKhūba mî: Satsa ǁnāts, ǁîts xa ta ge tita ti ǃgāgu di ǃoabasa xu ǃgû-ī ge tsēdi ǃnâ ǃhoatsa, kēbo-aogu Israeli digu ǁnā tsēdi ai gere kēbogu kurigu kōse, tita nî satsa ǁîn ǃoagu ūhāga?

¹⁸Tsî i ge ǁnātsēs ǁkhās ai nîra ī, Gogi ga Israeli di ǃhūb ǃoagu hā tsēs ai, tib ra ǃKhūb ǃKhūba mî, ob ge ti ǁgôasiba ǂguis âtas ǃnâ nîra ǃapa.

¹⁹Tita ge ti ôasasib ǃnâ ǀaes ti ǁgôasib dis ǃnâ gere ǃhoa xui-ao: ǁNātsēs ai i ge kai ǀkhū-e nîra hâ Israeli ǃhūb ǃnâ,

²⁰ti ais xan nî ǁaun hurib dina ǀkhūs kōse, tsî ǁgaboxan ǀhommi din tsî ǀgurun ǃaub din tsî ǂhanaben ǃhūbaib ai ra ǂhanan tsî khoen ǃhūb ai hân hoan tsîna, tsî ǃhomgu ge nîra aoǁguihe tsî ǃhoroǃkhaidi ge nîra ǁnā tsî ǂnubiǂgoagu hoagu ge ǃhūb ai nîra ǁnā.

²¹Tita ge gôaba ǁîn ǂama ti ǃhomgu hoagu ai nîra ǂgai xui-ao, tib ra ǃKhūb ǃKhūba mî; gôab mâb hoab dib ge ǃgâsab âb ǃoagu nîra hâ.

²²Tsî tita ge ǁîba nîra ǀgoraǃgâ ǂhīǁōb ǀkha tsî ǀaob ǀkha, tsî tita ge dâu-īǂam ra ǀapib tsî kai ǃnareǀuidi tsî ǀaes tsî swabeli tsîna ǁîb ǂama nîra ǀapi kai tsî ǁîb di ǂnubidi ai tsî ǁnā ǀoasa ǁaedi ǁîb ǀkha nî hâdi ai.

²³Nēti ta ge tita nîra kaikaisen tsî tita nîra khaisen tsî nîra ǂanǂansen ǂgui ǁaedi di mûdi aiǃâ, tsîn ge nîra ǂan, tita a ǃKhū ǃkhaisa.