Read Khoekhoegowab Esegieli 39 Bible Online

Esegieli 39 - Khoekhoegowab bible

Esegieli 39

¹ǃAruǀî sats khoenôa ǀgôatse, kēbo Gogi ǃoagu îts mî: Nētib ra ǃKhūb ǃKhūba mî: Mû, tita ge satsa nîra hāǂam, sats Gogts, ǂamgaosats Mesexi tsî Tubali tsîkha ditse.

²Tsî tita ge nîra ūdawa tsi tsî nîra ǂgaeǂgui tsi tsî ǀapas di ǀkhāga xu nîra doeǃapa kai tsi, tsî tita ge Israeli di ǃhomgu ai nîra ūhā tsi.

³Tsî tita ge khās âtsa sa ǁareǀkhāb ǃomma xu nîra ǂnauǂui, tsî tita ge ǂāgu âtsa sa amǀkhāb ǁôaba xu nîra ǁnā kai.

⁴Israeli di ǃhomgu aits ge nîra ǁnā, sats tsî sa ǂnubidi hoade tsî ǁnā ǁaedi sa ǀkha hâdi tsîna. Tita ge satsa ǃkhā-anin, mâ aniǁôan hoan din, tsî ǀgurun ǃaub dina ǂûse ge mā.

⁵ǂGās aits ge satsa nîra ǁnā, tita ge ǁîsa ge ǃhoa xui-ao, tib ra ǃKhūb ǃKhūba mî.

⁶Tsî tita ge ǀae-e nîra sî Magogi ǃnâ tsî ǁnān, ǃnāǃnuidi ai ǂkhîse ǁan hân ǃnâ, on ge nîra ǂan tita a ǃKhū ǃkhaisa.

⁷Tsî tita ge ti ǃanu ǀonsa ti ǁaes Israels di ǁaegub ǃnâ nîra ǂanǂan, tsî ta ge ti ǃanu ǀonsa ǃaruǀî ǀuriǀuri kai tide o di ge ǁaede nîra ǂan, tita ǃKhūta a Israeli di ǃAnu ǃkhaisa.

⁸Mû, ǁî ǃkhais ge hā nîrasa, tsîs ge nîra ǃnae, tib ra ǃKhūb ǃKhūba mî, nēs ge ǁnā tsēs, ǁîs xa ta ge ǃhoasa.

⁹Tsî ǁansaben Israeli ǃādi din ge nîra ǂoa tsî ǀae-e nîra khau tsî ǀāxūna khauǃkhū, khōsikhōgu tsî ǃgupu khōsikhōgu, khādi tsî ǂāgu tsî ǃhôadi tsî ǁhâigôagu tsîn hoana, tsîn ge ǁîn xa ǀae-e nîra khau hû kurigu kōse.

¹⁰ǀAenan ge ǃauba xu tani tide tsî ǁoedi ǃnâ ǁhā tide, xawen nî ǁâtanin ǀkha ǀaesa khau, tsîn ge ǁnān, ǁîna ge ǁkhâuǁnâna nîra ǁkhâuǁnâ, tsî ǁnān, ǁîna ge ǁgūǀhanana nîra ǁgūǀhana, tib ra ǃKhūb ǃKhūba mî.

¹¹Tsî i ge ǁnātsē nîra ī, Goga ta nî tita ǁnāpa ǁkhōǃkhaisa Israeli ǃnâ mā ǃkhaisa, ǃgoaǃnāb ǁnān, hîa ra doeǃganun diba huriba xu aiǂoasǀî; ǁîb ge ǁnān, doeǃganu ran daoba nî ǂganamba; tsîn ge ǁnāpa Goga nîra ǁkhō, tsî ǂguib âb hoaba tsîn ge ǁîba Gogi ǂguib di ǃgoaǃnāb ti nîra ǂgai.

¹²Tsî Israeli ommi din ge ǁîna nîra ǁkhō, ǃhūban nî ǀkhaiǀkhaise, hû ǁkhâgu kōse.

¹³Ā, ǁaes ǃhūb dis hoas ge ǁîna nîra ǁkhō, tsî ǁî ǃkhais ge ǁîna ǀonse nîra ība, tita nî ǂkhaiǂkhaihe tsēs ai, tib ra ǃKhūb ǃKhūba mî.

¹⁴ǁKhātin ge khoega nî ǁhûiǂuibasen ǁaeb ǀkha, ǃhūba ra ǃgûǃganuga, doeǃganu rana gu nî ǁkhōse, tsî ǁnān, ǃhūbaib ai ǃgau hâna, ǁîba gu nî ǀkhaiǀkhaise; ǀunis hû ǁkhâgu dis ai gu ge nîra ôaǃnâ.

¹⁵Tsî doeǃganu ran ge ǃhūba nîra doeǃganu, tsî ǀguib ân ga khoeǂkhō-e mûo, ob ge ǁî-i xōǀkhā ǂâiǂâisensao-e nîra ǂnûikhâi, ǁkhō-aogu nîra ǁî-e Gogi ǂguib di ǃgoaǃnāb ǃnâ ǁkhōse.

¹⁶Tsî ǀons ǁnā ǃkhais dis ge Hamona ti ra ǂgaihe. Nētin ge ǃhūba nîra ǃanuǃanu.

¹⁷Tsî sats, khoenôa ǀgôatse, nētib ra ǃKhūb ǃKhūba mî: Mîba anin, mâ aniǁôan hoan dina tsî ǀgurun ǃaub din hoana: ǀHû î du hāǀhao mâ ǃnammi hoaba xu ti ǂāǁguibas, sado ta ge ǂābas ǁga, ama kai ǂāǁguibas ǁga Israeli di ǃhomgu ai, î du ǁgan-e ǂû, î du ǀaoba ā.

¹⁸ǁGans ǁē-aogu disa du ge nî ǂû tsî ǀaob ǃhūbaib gaosagu diba du ge nî ā, bairagu tsî ǁkhaogu tsî pirigu tsî ǁgōgu hoatsama Basanni di kausagu diba.

¹⁹Tsî du ge kausa-e nî ǂû ǁâs kōse, tsî ǀaoba nîra ā ākhanus kōse, ti ǂāǁguibas, sado ta ge ǂābas xa.

²⁰Tsî du ge ti tāb tawa nîra ǁâ, hāgu xa tsî ǃgapi-aogu xa, ǁē-aogu tsî toro-aogu hoagu xa, tib ra ǃKhūb ǃKhūba mî.

²¹Tsî tita ge ti ǃgôasiba nîra ǂnûi ǁaedi ǃnâ, tsî ǁaedi hoadi ge ti ǀgoraǃgâs, dī ta ges, tsî ti ǃommi, ǁîn tawa ta ge ǁguiba nîra mû.

²²Tsî ǁnān, Israeli ommi din ge nîra ǂan tita ǃKhūta a ǁîn di Elo ǃkhaisa ǁnā tsēsa xu tsî aiǃâb ǃoa.

²³Tsî ǁaedi ge nîra ǂan, ǁnān Israeli ommi din ge ǂhanuoǃnâsib ân ǃaroma ǃkhōsase ūǃgûbēhe ǃkhaisa, ti ǃoagun ge ǃûǂam amaga, tsî ti aisa ta ge ǁîna xu gaugau tsî ǁîna ta ge mâǃoasaben ân ǃomǁae māǁnâ amaga, hoatsaman ge gôab xa ǁnās kōse.

²⁴ǁÎn di ǀurisasib ǃoa tsî ǁîn di ǃûǂamdi ǃoa ta ge tita ǁîna ge dī-ū, tsî tita ge ti aisa ǁîna xu ge gaugau.

²⁵ǁNā-amagab ra ǃKhūb ǃKhūba nēti mî: Nēsi ta ge tita ǃkhōsan Jakob dina ǁkhawa nîra ūhā, tsî tita ge Israeli ommi hoab dina nîra ǀkhom, tsî tita ge ti ǃanu ǀons ǂama nîra tau.

²⁶Tsî taob ânan ga tanio, tsî ǁnā ǃûǂams, ti ǃoagun gere ǃûǂams hoasa, ǃhūb ǃnân ǁan hâ tsî khoe-i xare-i xan ǃhuriǃhurihe tama hîa,

²⁷tita ga ǁîna ǁaede xu ǁkhawa ūhāo, tsî ǁîna khākhoen ân di ǃhūga xu ǀhaoǀhao-o, tsî tita ga ǂgui ǁaedi di mûdi aiǃâ ǁî-aitsama khaiseno,

²⁸ǃnubain ge nîra ǂan tita ǃKhūta a ǁîn di Elo ǃkhaisa, tita ge ǁîna ǃkhōsase ǁaedi ǃnâ ge ūǃgûbē kai ǃkhais xa, tsî ǁîna ta ge ǁkhawa ǃhūb ân ǃnâ ǀhaoǀhao, tsî khoe-i xare-i ǁîn di-e ta ǁnāpa ǃaruǀî ǃgau kai tama ǃkhais xa.

²⁹Tsî tita ge ti aisa ǁîna xu gaugau tide, ti Gagaba ta ga tita Israeli ommi din ǂama ǁhōǂui ǃnubai, tib ra ǃKhūb ǃKhūba mî.